Dokument ta' sessjoni

 

   B8-0753/2016 }

   B8-0756/2016 }

   B8-0759/2016 }

   B8-0764/2016 }

   B8-0768/2016 }

   B8-0771/2016 }

   B8-0772/2016 } RC1

 

8.6.2016

MOZZJONI GĦAL RIŻOLUZZJONI KONĠUNTA

imressqa skont l-Artikoli 135(5) u 123(4) tar-Regoli ta' Proċedura

li tissostitwixxi l-mozzjonijiet għal riżoluzzjoni mressqa mill-gruppi:

Verts/ALE ( B8-0753/2016 )

EFDD ( B8-0756/2016 )

ECR ( B8-0759/2016 )

S&D ( B8-0764/2016 )

PPE ( B8-0768/2016 )

GUE/NGL ( B8-0771/2016 )

ALDE ( B8-0772/2016 )

dwar il-Kambodja

( 2016/2753(RSP) )

Cristian Dan Preda, Elmar Brok, Tomáš Zdechovský, Andrej Plenković, Davor Ivo Stier, József Nagy, Elisabetta Gardini, Romana Tomc, Jarosław Wałęsa, Bogdan Brunon Wenta, Tunne Kelam, Lefteris Christoforou, Marijana Petir, Ivana Maletić, Dubravka Šuica, Stanislav Polčák, Pavel Svoboda, Patricija Šulin, Therese Comodini Cachia, Csaba Sógor, Sven Schulze, Andrey Novakov, Ramona Nicole Mănescu, Jeroen Lenaers, Roberta Metsola, Ivan Štefanec, Adam Szejnfeld, Milan Zver, Michaela Šojdrová, Luděk Niedermayer, Claude Rolin, Jaromír Štětina, Eduard Kukan, Jiří Pospíšil, Thomas Mann, Brian Hayes, Andrey Kovatchev, Eva Paunova, Krzysztof Hetman, László Tőkés, David McAllister, Inese Vaidere

f'isem il-Grupp PPE

Pier Antonio Panzeri, Josef Weidenholzer, Victor Boştinaru, Zigmantas Balčytis, Hugues Bayet, Brando Benifei, José Blanco López, Vilija Blinkevičiūtė, Simona Bonafè, Nicola Caputo, Andrea Cozzolino, Andi Cristea, Miriam Dalli, Isabella De Monte, Elena Gentile, Lidia Joanna Geringer de Oedenberg, Michela Giuffrida, Sylvie Guillaume, Cătălin Sorin Ivan, Jeppe Kofod, Krystyna Łybacka, Vladimír Maňka, David Martin, Costas Mavrides, Marlene Mizzi, Sorin Moisă, Alessia Maria Mosca, Victor Negrescu, Momchil Nekov, Demetris Papadakis, Tonino Picula, Pina Picierno, Kati Piri, Inmaculada Rodríguez-Piñero Fernández, Monika Smolková, Tibor Szanyi, Claudia Țapardel, Marc Tarabella, Julie Ward, Damiano Zoffoli

f'isem il-Grupp S&D

Ruža Tomašić, Arne Gericke, Anna Elżbieta Fotyga, Karol Karski, Ryszard Antoni Legutko, Ryszard Czarnecki, Tomasz Piotr Poręba, Angel Dzhambazki, Mark Demesmaeker, Monica Macovei, Charles Tannock, Notis Marias, Raffaele Fitto

f'isem il-Grupp ECR

Petras Auštrevičius, Ramon Tremosa i Balcells, Izaskun Bilbao Barandica, Filiz Hyusmenova, Ilhan Kyuchyuk, Marielle de Sarnez, Valentinas Mazuronis, Pavel Telička, Beatriz Becerra Basterrechea, Nedzhmi Ali, Dita Charanzová, Martina Dlabajová, José Inácio Faria, Fredrick Federley, Nathalie Griesbeck, Marian Harkin, Ivan Jakovčić, Louis Michel, Javier Nart, Maite Pagazaurtundúa Ruiz, Carolina Punset, Frédérique Ries, Robert Rochefort, Marietje Schaake, Jasenko Selimovic, Hannu Takkula, Ivo Vajgl, Hilde Vautmans, Cecilia Wikström, Paavo Väyrynen, María Teresa Giménez Barbat, Urmas Paet

f'isem il-Grupp ALDE

Marie-Christine Vergiat, Kateřina Konečná, Lola Sánchez Caldentey, Tania González Peñas, Miguel Urbán Crespo, Estefanía Torres Martínez, Xabier Benito Ziluaga, Merja Kyllönen

f'isem il-Grupp GUE/NGL

Barbara Lochbihler, Heidi Hautala, Bodil Valero, Maria Heubuch, Ernest Urtasun, Bronis Ropė, Igor Šoltes, Davor Škrlec

f'isem il-Grupp Verts/ALE

Ignazio Corrao, Fabio Massimo Castaldo, Rolandas Paksas, Isabella Adinolfi

f'isem il-Grupp EFDD

European Parliament resolution on Cambodia

( 2016/2753(RSP) )

Il-Parlament Ewropew,

–  wara li kkunsidra r-riżoluzzjonijiet preċedenti tiegħu dwar il-Kambodja, b'mod partikolari dawk tas-26 ta' Novembru 2015 dwar is-sitwazzjoni politika fil-Kambodja[1], tad-9 ta' Lulju 2015 dwar l-abbozzi ta' liġijiet dwar l-NGOs u t-trade unions tal-Kambodja[2] u tas-16 ta' Jannar 2014 dwar is-sitwazzjoni tad-difensuri tad-drittijiet u l-attivisti tal-oppożizzjoni fil-Kambodja u fil-Laos[3],

–  wara li kkunsidra d-dikjarazzjoni lokali tal-UE tat-30 ta' Mejju 2016 dwar is-sitwazzjoni politika fil-Kambodja,

–  wara li kkunsidra r-rapport tal-20 ta' Awwissu 2015 tar-Rapporteur Speċjali tan-NU dwar is-sitwazzjoni tad-drittijiet tal-bniedem fil-Kambodja,

–  wara li kkunsidra r-riżoluzzjoni tat-2 ta' Ottubru 2015 tal-Kunsill tad-Drittijiet tal-Bniedem tan-NU dwar il-Kambodja,

–  wara li kkunsidra l-osservazzjonijiet ta' konklużjoni tas-27 ta' April 2015 mill-Kumitat tad-Drittijiet tal-Bniedem tan-NU dwar it-tieni rapport perjodiku tal-Kambodja,

–  wara li kkunsidra d-Dikjarazzjoni Universali tad-Drittijiet tal-Bniedem tal-10 ta' Diċembru 1948,

–  wara li kkunsidra l-Patt Internazzjonali dwar id-Drittijiet Ċivili u Politiċi tal-1966,

–  wara li kkunsidra l-Linji gwida tal-UE tal-2008 dwar id-Difensuri tad-Drittijiet tal-Bniedem,

–  wara li kkunsidra l-Ftehim ta' Kooperazzjoni tal-1997 bejn il-Komunità Ewropea u r-Renju tal-Kambodja,

–  wara li kkunsidra r-Riżoluzzjoni adottata mill-Assemblea Ġenerali tan-NU fit-8 ta' Marzu 1999 dwar id-Dritt u r-Responsabilità ta' Individwi, Gruppi u Organi tas-Soċjetà li Jippromwovu u Jħarsu d-Drittijiet tal-Bniedem u l-Libertajiet Fundamentali,

–  wara li kkunsidra d-dikjarazzjoni tal-1 ta' April 2016 mir-Rapporteur Speċjali tan-NU li tħeġġeġ lill-Kambodja biex issaħħaħ il-ħarsien tan-nisa u d-drittijiet tal-popli indiġeni,

–  wara li kkunsidra d-dikjarazzjoni konġunta tat-2 ta' Mejju 2016 mill-organizzazzjonijiet tas-soċjetà ċivili li tikkundanna l-akkużi kontra d-difensuri tad-drittijiet tal-bniedem,

–  wara li kkunsidra l-Konvenzjoni tal-Organizzazzjoni Internazzjonali tax-Xogħol dwar il-Libertà ta' Assoċjazzjoni u l-Protezzjoni tad-Drittijiet għall-Organizzazzjoni,

–  wara li kkunsidra l-Kostituzzjoni Kambodjana, b'mod partikolari l-Artikolu 41 tagħha, li fih huma minquxa d-drittijiet u l-libertajiet ta' espressjoni u tal-assemblea, l-Artikolu 35 dwar id-dritt ta' parteċipazzjoni politika u l-Artikolu 80 dwar l-immunità parlamentari,

–  wara li kkunsidra l-Artikoli 135(5) u 123(4) tar-Regoli ta' Proċedura tiegħu,

A.  billi fl-aħħar xhur kien hemm żieda kostanti fl-arresti ta' membri tal-oppożizzjoni politika, tal-attivisti tad-drittijiet tal-bniedem u tar-rappreżentanti tas-soċjetà ċivili;

B.  billi l-Prim Ministru Hun Sen ilu fil-poter għal aktar minn 30 sena; billi Sam Rainsy, il-President tal-partit tal-oppożizzjoni ewlieni, is-CNRP, għadu f'eżilju awtoimpost xprunat minn prosekuzzjonijiet preċedenti abbażi ta' akkużi foloz motivati politikament, u billi l-aġent president tas-CNRP, Kem Sokha, qiegħed jiġi sottopost għal investigazzjoni; billi fit-22 ta' April 2016, prosekutur tal-Qorti ta' Phnom Penh ħabbar li l-President tas-CNRP, Sam Rainsy, se jiffaċċja proċess in absentia abbażi ta' akkużi motivati politikament li se jingħata bidu fit-28 ta' Lulju 2016;

C.  billi fl-20 ta' Novembru 2015 Sam Rainsy ġie mħarrek minn qorti biex ikun interrogat fir-rigward ta' post ippubblikat fuq il-paġna ta' Facebook pubblika tiegħu minn senatur tal-oppożizzjoni, Hong Sok Hour, li ilu taħt arrest sa minn Awwissu 2015 fuq akkużi ta' falsifikazzjoni u tixwix wara li ppubblika fuq il-paġna ta' Facebook ta' Sam Rainsy filmat li fih jidher dokument allegatament falz relatat mat-trattat dwar il-fruntiera mal-Vjetnam tal-1979;

D.  billi fit-3 ta' Mejju 2016, il-Qorti Muniċipali ta' Phnom Penh ħarrket lil Kem Sokha fir-rigward tal-akkuża ta' inġurja kriminali, kif ukoll il-Membri Parlamentari Pin Ratana u Tok Vanchan, minkejja l-fatt li huma jgawdu l-immunità;

E.  billi fit-12 ta' Mejju 2016, l-analist politiku magħruf Ou Virak, ġie mħarrek ukoll fir-rigward ta' akkużi ta' inġurja wara li esprima l-opinjoni tiegħu dwar il-każ ta' Kem Sokha;

F.  billi fit-2 ta' Mejju 2016 tressqu akkużi motivati politikament kontra Ny Sokha, Nay Vanda u Yi Soksan (tliet avukati anzjani tad-drittijiet tal-bniedem mill-Assoċjazzjoni Kambodjana għad-Drittijiet tal-Bniedem u l-Iżvilupp (ADHOC)), ex membru tal-ADHOC Ny Chakrya, li hu l-viċi segretarju ġenerali tal-Kumitat Elettorali Nazzjonali (NEC), u l-membru tal-Uffiċċju tal-Kummissarju Għoli tan-NU għad-Drittijiet tal-Bniedem (UN OHCHR) Soen Sally, u billi dawn jistgħu jingħataw sentenzi ta' mhux aktar minn 10 snin priġunerija;

G.  billi membru tal-oppożizzjoni tal-Assemblea Nazzjonali Um Sam An ġie mċaħħad mill-immunità parlamentari u ġie arrestat fil-11 ta' April 2016 fuq akkużi foloz ta' "tixwix biex joħloq konfużjoni fis-soċjetà" b'rabta mal-opinjonijiet mhux vjolenti tiegħu dwar ir-relazzjonijiet bejn il-Kambodja u l-Vjetnam; billi huwa sussegwentement inżamm mill-pulizija Kontra t-Terroriżmu, ġie mressaq kontrih att ta' akkuża għal proċess u nżamm f'detenzjoni abbażi ta' dawn l-akkużi;

H.  billi fis-26 ta' April 2016, il-Qorti ta' Phnom Penh ressqet att ta' akkuża kontra Rong Chhun, ex mexxej tat-trade unions li hu attwalment membru tan-NEC, għal proċess abbażi ta' akkużi foloz motivati politikament ta' tixwix tal-vjolenza provokata mis-soppressjoni ta' strajkijiet tal-ħaddiema mill-forzi tas-sigurtà tal-gvern bejn l-aħħar ta' Diċembru 2013 u l-bidu ta' Jannar 2014; billi huwa ppjanat li jsiru żewġ elezzjonijiet importanti (l-elezzjonijiet komunali fl-2017 u l-elezzjonijiet parlamentari fl-2018), u billi l-eżerċizzju ta' pressjoni fuq in-NEC huwa metodu użat mill-gvern biex jinfluwenza dawn l-elezzjonijiet;

I.  billi fid-9 ta' Mejju 2016, tmien persuni li kienu qegħdin jipprotestaw paċifikament kontra l-arresti ta' membri tal-persunal tal-ADHOC, fosthom, Ee Sarom, Direttur tal-NGO Sahmakun Teang Tnaut, Thav Khimsan, il-Viċi Direttur tal-NGO LICADHO, kif ukoll konsulent Svediż u konsulent Ġermaniż tal-LICADHO, ġew arrestati u meħlusa ftit wara; billi fis-16 ta' Mejju 2016, ġara l-istess lil ħames dimostranti paċifiċi;

J.  billi l-UE hija l-akbar sieħeb tal-Kambodja f'termini ta' assistenza għall-iżvilupp, b'allokazzjoni ġdida għall-perjodu 2014-2020 li tammonta għal EUR 410 miljun; billi l-UE tappoġġja firxa wiesgħa ta' inizjattivi tad-drittijiet tal-bniedem imwettqa mill-NGOs Kambodjani u minn organizzazzjonijiet oħra tas-soċjetà ċivili; billi l-Kambodja hija ferm dipendenti fuq l-għajnuna għall-iżvilupp;

K.  billi, fis-26 ta' Ottubru 2015, grupp ta' dimostranti favur il-gvern fi Phnom Penh attakkaw brutalment żewġ Membri Parlamentari tal-oppożizzjoni CNRP, Nhay Chamrouen u Kong Sakphea, u heddew is-sigurtà tar-residenza privata tal-ewwel Viċi President tal-Assemblea Nazzjonali; billi rapporti ssuġġerew li l-pulizija u forzi tas-sigurtà oħra baqgħu josservaw b'mod passiv waqt li kienu qed iseħħu l-attakki; billi seħħew arresti fir-rigward ta' dawn l-attakki, iżda billi l-NGOs għad-drittijiet tal-bniedem fil-Kambodja esprimew it-tħassib tagħhom li dawk li kienu verament wettqu l-attakki għadhom liberi;

L.  billi, minkejja kritika mifruxa mis-soċjetà ċivili u mill-komunità internazzjonali, il-promulgazzjoni tal-Liġi dwar l-Assoċjazzjonijiet u l-NGOs (LANGO) tat setgħat arbitrarji lill-awtoritajiet tal-istat biex jagħlqu u jibblokkaw il-ħolqien ta' organizzazzjonijiet li jħarsu d-drittijiet tal-bniedem, u diġà bdiet tiskoraġġixxi l-ħidma tal-ħarsien tad-drittijiet tal-bniedem fil-Kambodja u tostakola l-azzjoni tas-soċjetà ċivili;

M.  billi sa mill-Approvazzjoni tal-Liġi dwar l-Assoċjazzjonijiet u l-NGOs (LANGO) fl-2015, l-awtoritajiet ċaħdu l-permessi għal avvenimenti ta' promozzjoni pubblika fuq skala kbira mmexxija minn NGOs u billi matul l-aħħar xhur, avvenimenti li seħħew b'rabta mal-Jum Dinji tal-Ħabitat, il-Jum Internazzjonali tad-Drittijiet tal-Bniedem, il-Jum Internazzjonali tan-Nisa u l-Jum Internazzjonali tal-Ħaddiema kollha ġew sfrattati f'livelli differenti mill-forzi tal-pulizija, kif ġew sfrattati wkoll dimostrazzjonijiet oħra;

N.  billi s-Senat Kambodjan adotta l-Liġi dwar it-Trade Unions fit-12 ta' April 2016 u din imponiet restrizzjonijiet ġodda fuq id-dritt tal-ħaddiema għall-assoċjazzjoni u tat setgħat arbitrarji ġodda lill-gvern biex jirreprimi l-eżerċizzju ta' dak id-dritt mit-trade unions,

1.  Jesprimi tħassib profond dwar ambjent li dejjem sejjer għall-agħar għall-politiċi tal-oppożizzjoni u għall-attivisti tad-drittijiet tal-bniedem fil-Kambodja u jikkundanna l-atti kollha ta' vjolenza, l-akkużi motivati politikament, id-detenzjoni arbitrarja, l-interrogatorji, is-sentenzi u d-dikjarazzjonijiet ta' ħtija fir-rgward ta' dawn il-persuni;

2.  Jiddeplora l-eskalazzjoni ta' akkużi motivati politikament u l-persekuzzjoni ġudizzjarja kontra d-difensuri u l-attivisti tad-drittijiet tal-bniedem, u b'mod partikolari, is-sentenzi, l-akkużi u d-dikjarazzjonijiet ta' kundanna motivati politikament, b'rabta mal-ħidma leġittima ta' attivisti, kritiċi politiċi u difensuri tad-drittijiet tal-bniedem fil-Kambodja;

3.  Iħeġġeġ lill-awtoritajiet Kambodjani jirrevokaw il-mandat ta' arrest u jwaqqgħu l-akkużi kollha miġjuba kontra l-mexxej tal-oppożizzjoni Sam Rainsy u l-membri tas-CNRP tal-Assemblea Nazzjonali u s-Senat, inkluż is-Senatur Hong Sok Hour; jitlob il-ħelsien immedjat tal-ħames difensuri tad-drittijiet tal-bniedem li għadhom taħt arrest preventiv, jiġifieri Ny Sokha, Nay Vanda, Yi Soksan, Lim Mony u Ny Chakra, biex dawn il-politiċi, attivisti u difensuri tad-drittijiet tal-bniedem jitħallew jaħdmu liberament u mingħajr biża' ta' arrest jew persekuzzjoni, u li jintemm l-użu politiku tal-qrati biex jiġu persegwitati persuni abbażi ta' akkużi motivati politikament u foloz; jistieden lill-Assemblea Nazzjonali tirristabbilixxi lil Sam Rainsy, Um Sam An u Hong Sok Hour immedjatament u treġġa' l-immunità parlamentari tagħhom;

4.  Iħeġġeġ lill-Awtoritajiet Kambodjani jwaqqgħu l-akkużi kollha motivati politikament u proċedimenti kriminali oħra kontra l-ADHOC u difensuri tad-drittijiet tal-bniedem Kambodjani oħra, itemmu t-theddid kollu li jinfurzaw id-dispożizzjonijiet ripressivi tal-LANGO, flimkien ma' tentattivi oħra ta' intimidazzjoni u persekuzzjoni ta' difensuri u organizzazzjonijiet nazzjonali u internazzjonali tad-drittijiet tal-bniedem, u jeħilsu immedjatament u mingħajr kundizzjonijiet dawk kollha inkarċerati abbażi ta' akkużi motivati politikament u foloz;

5.  Iħeġġeġ lill-Gvern tal-Kambodja jirrikonoxxi r-rwol leġittimu u utli li għandhom is-soċjetà ċivili, it-trade unions u l-oppożizzjoni politika biex jikkontribwixxu għall-iżvilupp ekonomiku u politiku globali tal-Kambodja;

6.  Iħeġġeġ lill-Gvern jaħdem biex isaħħaħ id-demokrazija u l-istat tad-dritt u jirrispetta d-drittijiet tal-bniedem u l-libertajiet fundamentali, inkluż li jikkonforma bis-sħiħ mad-dispożizzjonijiet kostituzzjonali dwar il-pluraliżmu u l-libertà ta' assoċjazzjoni u ta' espressjoni;

7.  Ifakkar li ambjent ta' djalogu demokratiku ħieles mit-theddid huwa essenzjali għall-istabilità politika, għad-demokrazija u għal soċjetà paċifika fil-pajjiż, u jħeġġeġ lill-gvern jieħu l-miżuri kollha meħtieġa biex jiżgura s-sigurtà tar-rappreżentanti kollha eletti demokratikament fil-Kambodja, irrispettivament mill-affiljazzjoni politika tagħhom;

8.  Jilqa' r-riforma tan-NEC permezz ta' emenda tal-Kostituzzjoni b'segwitu għall-ftehim ta' Lulju 2014 bejn il-Partit Popolari Kambodjan (is-CPP) u s-CNRP dwar ir-riformi elettorali; jenfasizza l-fatt li n-NEC issa jikkonsisti minn erba' rappreżentanti tas-CPP, erba' rappreżentanti tas-CNRP u rappreżentant tas-soċjetà ċivili;

9.  Jistieden lill-gvern jiżgura investigazzjonijiet kompluti u imparzjali, bil-parteċipazzjoni tan-NU, li jwasslu għall-prosekuzzjoni ta' dawk kollha responsabbli għall-attakk brutali reċenti fuq iż-żewġ membri tas-CNRP tal-Assemblea Nazzjonali minn membri tal-forzi armati u għall-użu ta' forza eċċessiva militari u tal-pulizija biex irażżnu dimostrazzjonijiet, strajkijiet, u ferment soċjali;

10.  Jistieden lill-awtoritajiet Kambodjani jwaqqgħu l-akkużi kollha kontra l-ex mexxej ta' trade union u membru tan-NEC Rong Chhun;

11.  Jistieden lill-Istati Membri, lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta' Sigurtà, lis-Servizz Ewropew għall-Azzjoni Esterna (SEAE) u lill-Kummissjoni biex jistabbilixxu parametri referenzjarji ċari għall-elezzjonijiet li ġejjin fil-Kambodja, konsistenti mad-dritt internazzjonali dwar il-libertà tal-espressjoni, ta' assoċjazzjoni u ta' assemblea, u biex jikkomunikaw pubblikament dawn il-parametri referenzjarji lill-awtoritajiet u lill-oppożizzjoni tal-Kambodja; jistieden lis-SEAE jagħmel l-ammont tal-assistenza finanzjarja tal-UE dipendenti fuq titjib fis-sitwazzjoni tad-drittijiet tal-bniedem fil-pajjiż;

12.  Jesprimi t-tħassib tiegħu dwar il-Liġi l-ġdida dwar it-Trade Unions; iħeġġeġ lill-gvern biex jirrevoka l-Liġi dwar it-Trade Unions, il-LANGO u liġijiet simili li qed jillimitaw l-eżerċizzju tal-libertajiet fundamentali u jheddu l-eżerċizzju tad-drittijiet tal-bniedem; iħeġġeġ lill-gvern jiżgura li l-leġiżlazzjoni kollha relevanti għad-drittijiet tal-bniedem tkun f'konformità mal-Kostituzzjoni tal-Kambodja u mal-istandards internazzjonali;

13.  Iħeġġeġ lill-Gvern tal-Kambodja jtemm l-iżgumbramenti furzati kollha u l-ħtif tal-art u jiżgura li kwalunkwe żgumbrament jitwettaq f'konformità sħiħa mal-istandards internazzjonali;

14.  Jenfasizza l-importanza tal-Missjoni ta' Osservazzjoni Elettorali u l-kontribut tagħha għal elezzjonijiet ħielsa u ġusti; jistieden lin-NEC u l-awtoritajiet governattivi relevanti biex jiżguraw li l-votanti eliġibbli kollha, inklużi l-ħaddiema migranti u d-detenuti, ikollhom aċċess għal, u ħin li fih ikunu jistgħu jieħdu vantaġġ minn, opportunitajiet ta' reġistrazzjoni;

15.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta' Sigurtà, lis-Servizz Ewropew għall-Azzjoni Esterna, lill-gvernijiet u lill-parlamenti tal-Istati Membri u lill-Gvern u lill-Assemblea Nazzjonali tal-Kambodja.

[1] Testi adottati, P8_TA(2015)0413
[2] Testi adottati, P8_TA(2015)0277
[3] Testi adottati, P7_TA(2014)0044