30.9.2008 B6‑0521/2008 MOZZJONI GĦAL RIŻOLUZZJONI imressqa biex jingħalaq id-dibattitu dwar id-dikjarazzjoni mill-Kummissjoni skont l-Artikolu 103(2) tar-Regoli ta' Proċedura minn Cristiana Muscardini, Eugenijus Maldeikis, Ģirts Valdis Kristovskis, Jan Tadeusz Masiel, Seán Ó Neachtain u Ryszard Czarnecki f'isem il-Grupp UEN dwar il-ġejjieni tal-Aġenda tal-Iżvilupp ta' Doha tad-WTO PE413.310 B6‑0521/2008 Riżoluzzjoni tal-Parlament Ewropew dwar il-ġejjieni tal-Aġenda tal-Iżvilupp ta' Doha tad-WTO Il-Parlament Ewropew, – wara li kkunsidra d-Dikjarazzjoni Ministerjali ta’ Doha tal-Organizzazzjoni Dinjija tal-Kummerċ (WTO) tal-14 ta' Novembru 2001, – wara li kkunsidra r-riżoluzzjonijiet preċedenti tiegħu dwar l-Aġenda ta' Doha għall-Iżvilupp (DDA), – wara li kkunsidra l-Artikolu 103(2) tar-Regoli ta' Proċedura tiegħu, A. billi t-taħditiet ministerjali tad-WTO maħsuba biex jikkonkludu r-rawnd ta’ Doha daħħlu f’fażi li ma setgħux jitkomplew fl-aħħar ta’ Lulju 2008, B. billi nkiseb xi progress sabiex il-membri tad-WTO jersqu qrib li jiffinalizzaw il-Ftehima, C. billi l-interessi tal-pajjiżi li qed jiżviluppaw, u b’mod partikulari l-pajjiżi l-inqas żviluppati, kif ukoll l-impenn tal-membri kollha tad-WTO għar-‘rawnd ta' żvilupp’, għandhom jinżammu fil-qalba tan-negozjati, D. billi l-falliment li jintlaħaq ftehim jista’ jdgħajjef serjament il-kredibilità tas-sistema multilaterali tal-kummerċ u b’konsegwenza dik tad-WTO nnifisha, E. billi l-konklużjoni tad-DDA qed issir aktar kritika maż-żmien hekk kif il-prospetti ekonomiċi u finanzjarji jkomplu jmorru għall-agħar, 1. Huwa serjament iddiżappuntat u mħasseb bil-fatt li t-taħdidiet ministerjali tad-WTO f'Lulju li għadda waslu f’punt li ma setgħux jitkomplew; 2. Itenni l-impenn sħiħ tiegħu għall-istrateġija multilaterali għall-politika kummerċjali u sabiex id-WTO tkun tista’ tiggarantixxi riżultat ibbilanċjat għall-kummerċ internazzjonali fuq il-bażi tar-rispett sħiħ għall-Għanijiet tal-Millenju għall-Iżvilupp; 3. Huwa konvint li, fil-kuntest preżenti kkaratterizzat bi kriżi ekonomika u finanzjarja, il-konklużjoni b'suċċess tar-rawnd ta' Doha tista' tkun fattur li jwassal għal stabilità; jibqa’ jżomm sod l-impenn lejn id-DDA, minħabba li l-isfidi globali marbuta mas-sigurtà tal-ikel, l-enerġija u l-bidla fil-klima għandhom bżonn jiġu ndirizzati mid-WTO ladarba dan ir-rawnd jiġi konkluż ; 4. Huwa konxju bis-sħiħ dwar id-diffikultajiet ta’ Impriża Waħda; jilqa’ b’sodisfazzjon il-progress li sar sa issa matul in-negozjati, liema progress għandu jipprovdi bażi importanti u kkonsolidata għal-laqgħa li jmiss sabiex jitkompla r-Rawnd ta’ Doha u sabiex jiġi miksub riżultat ta’ suċċess; 5. Jistieden lill-UE u lill-Istati Uniti, kif ukoll lill-G20 bħala parteċipanti ekonomiċi ġodda importanti, biex jassumu r-responsabbiltajiet tagħhom fin-negozjati attwali, biex jirrispettaw bis-sħiħ l-ispirtu tar-‘rawnd ta’ żvilupp’, u biex jagħmlu l-isforzi kollha tagħhom biex jaslu għal ftehim sal-aħħar ta’ din is-sena, sabiex id-DDA xorta tkun tista’ tiġi konkluża fl-2009; jenfasizza għal darb’oħra l-importanza tad-divrenzjar bejn pajjiżi li qed jiżviluppaw u pajjiżi emerġenti; 6. Jistieden lill-Indja u lill-Istati Uniti biex isibu soluzzjoni politika mingħajr dewmien dwar il-Mekkaniżmu ta' Salvagwardja Speċjali (SSM), sabiex jassiguraw bilanċ ġust bejn l-interessi kummerċjali u tal-iżvilupp li jippermettu kwistjonijiet agrikoli oħra li jiġu diskussi u solvuti, bħall-espansjoni fit-tariffi tal-kwoti, is-simplifikazzjoni tat-tariffi u s-sussidji tal-qoton, kif ukoll il-kwistjonijiet li għandhom x'jaqsmu man-NAMAs u s-servizzi; 7. Jemmen li d-diffikultajiet tad-DDA jenfasizzaw il-bżonn, ladarba r-rawnd jintemm, biex tkun indirizzata b'urġenza l-kwistjoni tar-riforma tad-WTO sabiex tkun aktar effettiva u trasparenti u biex titjieb il-leġittimità demokratika u l-integrità tagħha fl-istruttura usa’wiesgħa tal-governanza globali; itenni l-bżonn ta' għajnuna teknika mmirata u l-bini tal-kapaċità biex il-pajjiżi li qed jiżviluppaw ikunu megħjuna jinvolvu rwieħhom b’mod effettiv fid-DDA; 8. Jistieden lill-Kummissjoni u lill-Kunsill biex jistabbilixxu ftehima sabiex jiżguraw il-parteċipazzjoni sħiħa tal-Parlament fin-negozjati internazzjonali tal-kummerċ tal-UE; 9. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni, lill-Kunsill, lill-Gvernijiet u lill-Parlamenti tal-Istati Membri, u lid-Direttur Ġenerali tad-WTO.