Il-Parlament Ewropew,

–   wara li kkunsidra l-Artikolu 225 tat-Trattat dwar il-Funzjonament tal-Unjoni Ewropea,

–   wara li kkunsidra l-konklużjonijiet tal-Kunsill tal-14 ta’ Ġunju, li talbu lill-Kummissjoni tfassal strateġija Ewropea għar-reġjun tal-Atlantiku sa Ġunju 2011,

–   wara li kkunsidra l-konsultazzjoni pubblika mnedija mill-Kummissjoni, bil-ħsieb li tippubblika komunikazzjoni dwar strateġija Ewropea għar-reġjun tal-Atlantiku,

–   wara li kkunsidra l-istrateġija tal-UE għar-reġjun tal-Baħar Baltiku u l-istrateġija tal-UE għar-reġjun tad-Danubju,

–   wara li kkunsidra l-konklużjonijiet tal-5 Rapport ta’ Koeżjoni,

–   wara li kkunsidra l-Artikolu 115(5) u 110(2) tar-Regoli ta’ proċedura tiegħu,

A. billi l-Artikolu 3 tat-Trattat dwar l-Unjoni Ewropa u t-Titolu XVIII tat-Trattat dwar il-Funzjonament tal-Unjoni Ewropea jistabbilixxu l-koeżjoni territorjali bħala objettiv tal-Unjoni Ewropea,

B.  billi ħames Stati membri tal-UE għandhom kosta Atlantika: Franza, l-Irlanda, il-Portugall, Spanja u r-Renju Unit,

C. billi r-reġjun tal-Atlantiku għandu l-karatteristiċi speċifiċi tiegħu, li huma:

     -    żona marittima dinamika (grazzi għat-trasport marittimu, is-sajd, l-enerġija tal-baħar, eċċ.),

-   żona li l-ambjent fraġli tagħha għandu jkun ippreservat u li hija suġġetta għall-konsegwenzi tat-tibdil fil-klima (erożjoni kostali, fenomeni klimatiċi estremi),

-   żona remota fi ħdan l-Unjoni Ewropea, bi problemi ta’ aċċessibilità u konnettività u b’numru baxx ta’ ċentri urbani maġġuri;

D.  billi dawn il-karatteristiċi speċifiċi huma ħerġin minn linji gwida li jmorru lil hinn mill-konfini u li għalihom iridu jinstabu tweġibiet fil-livell Ewropew,

E.  billi f’Ġunju 2010 l-Kunsill talab lill-Kummissjoni tiżviluppa strateġija għar-reġjun tal-Atlantiku sa Ġunju 2011, u billi l-publikazzjoni ta’ Komunikazzjoni mill-Kummissjoni hija ppjanata għall-2011,

1.  Jitlob lill-Kummissjoni tfassal malajr kemm jista’ jkun l-istrateġija tal-UE għar-reġjun tal-Atlantiku bħala strateġija integrata li tittratta kwistjonijiet marittimi u territorjali;

2.  Huwa tal-fehma li din l-istrateġija għandha tiġi stabbilita fil-qafas tal-objettiv tal-politika ta’ koeżjoni tal-kooperazzjoni territorjali (Objettiv 3), u tkun ibbażata fuq approċċ integrat, trażversali u territorjali, bil-mira li l-politiki jkunu kkoordinati aħjar bejn il-livelli varji ta’ governanza f’territorju partikolari, b’attenzjoni speċjali fuq aspetti relevanti; huwa konvint li l-kooperazzjoni territorjali Ewropea tista’ tikkontribwixxi sewwa għall-intensifikazzjoni tal-proċess ta’ integrazzjoni fi ħdan ir-reġjun tal-Atlantiku permezz ta’ parteċipazzjoni akbar mis-soċjetà ċivili fil-proċess ta’ teħid ta’ deċiżjonijiet u l-implimentazzjoni ta’ azzjonijiet konkreti;

3.  Jenfasizza li l-valur miżjud maġġuri tal-istrateġiji makroreġjonali tal-UE jidher fil-kooperazzjoni f’livell diversi, il-koordinament u l-investiment strateġiku aħjar tal-fondi disponibbli, u mhux fl-allokazzjoni addizzjonali tar-riżorsi; jenfasizza l-konklużjonijiet tal-Presidenza Svediża li jitkellmu kontra istituzzjonijiet ġodda, leġiżlazzjoni ġdida u baġits ġodda;

4.  Jitlob li l-istrateġija tinfetaħ għar-reġjuni kollha tal-UE tul il-kosta tal-Atlantiku, inklużi r-reġjuni l-aktar ’l barra tal-Makaroneżja;

5.  Jemmen li d-dimensjoni esterna ta’ din l-istrateġija tista’ tissaħħaħ minħabba l-pożizzjoni ġeografika tar-reġjuni tal-Atlantiku, b’mod partikolari fl-oqsma tas-sigurtà u s-sorveljanza marittima u fl-isfera tar-relazzjonijiet kummerċjali internazzjonali; huwa tal-opinjoni li l-kooperazzjoni internazzjonali u l-inizjattivi ta’ kooperazzjoni trijangolari wkoll iridu jiġu indirizzati;

6.  Jemmen li din l-istrateġija għandha timplimenta koordinazzjoni aħjar tal-għanijiet u l-mezzi, b’rabtiet qawwija mal-istrateġija UE 2020 u l-politiki tal-UE għal wara l-2013; ifakkar f’dan ir-rigward li din l-istrateġija timmira lejn nfiq aħjar tal-fondi tal-UE, mhux lejn żieda fl-infiq;

7.  Jitlob li din l-istrateġija tkun konnessa tajjeb mal-politika reġjonali tal-UE u l-politika marittima integrata u huwa tal-fehma li għandha tiffaċilita sinerġija ma’ politiki oħra tal-UE bħan-netwerks tat-trasport tranżewropej, il-politika komuni dwar is-sajd, azzjonijiet dwar il-klima u l-ambjent, il-programm ta’ qafas dwar ir-riċerka u l-iżvilupp, il-politika tal-enerġija, eċċ.;

8.  Jemmen li d-dimensjoni territorjali ta’ din l-istrateġija hija essenzjali u se tikkontribwixxi għall-koeżjoni territorjali tal-UE; huwa tal-fehma li din id-dimensjoni territorjali se jkollha tindirizza speċjalment il-ftuħ, l-interkonnessjoni tan-netwerks tat-trasport u l-enerġija u l-iżvilupp tal-enerġja tal-baħar, l-iżvilupp taż-żoni urbani u rurali u l-intensifikazzjoni tar-rabtiet bejn l-art u l-baħar u bejn il-baħar u l-ilmijiet interni;

9.  Itenni l-importanza tat-titjib tal-aċċessibilità fir-reġjuni marittimi tal-Atlantiku, u taż-żieda fil-moviment tal-persuni, il-merkanzija u s-servizzi f’dawn ir-reġjuni sabiex jinkisbu l-għanijiet tas-suq intern u l-objettiv tal-politika ta’ koeżjoni, speċjalment bl-iżvilupp ta’ tbaħħir fuq distanzi qosra u r-rotot prinċipali tal-baħar;

10. Ifakkar li d-dimensjoni marittima hija prijorità ta’ din l-istrateġija, partikolarment permezz ta’ approċċ li jirrigwarda l-baċini marittimi;

11. Ifaħħar bil-qawwa kollha l-promozzjoni u l-appoġġ mill-Kummissjoni Ewropea tal-ippjanar u l-kostruzzjoni ta' toroq marittimi fir-reġjun tal-Atlantiku, bħat-triq marittima Gijon-Nantes, bħala mod biex jittejbu u jiġu diversifikati n-netwerks tat-trasport transewropej, biex jiġu influwenzati r-relazzjonijiet kummerċjali internazzjonali, tiġi stimulata l-attività ekonomika tal-portijiet u jingħata kontribut għat-tnaqqis fl-emissjonijiet CO2;

12. Huwa tal-fehma li din l-istrateġija tindirizza l-aspetti ta’ interess komuni li ġejjin: l-enerġija marittima, l-ambjent u t-tibdil fil-klima, inkluż il-prevenzjoni u l-ġlieda kontra t-tniġġis tal-baħar mill-vapuri, it-trasport u l-aċċessibilità, is-sikurezza, is-sigurtà u s-sorveljanza, ir-riċerka, l-innovazzjoni, l-industriji kreattivi, il-kultura, il-mistrieħ u t-turiżmu, is-servizzi u t-taħriġ marbuta mal-baħar, is-sajd u s-settur tal-frott tal-baħar;

13. Jemmen li din l-istrateġija għandha tiżviluppa sinerġiji bejn il-politiki nazzjonali, reġjonali u locali tal-UE u għalhekk huwa tal-opinjoni li hija meħtieġa governanza mġedda fil-livelli differenti, bbażata fuq involviment aktar mill-qrib tal-awtoritajiet tal-UE, nazzjonali, reġjonali u lokali;

14. Jixtieq li din l-istrateġija taħdem b’approċċ minn isfel għal fuq, li jibda mir-reġjuni u jinvolvi lil dawk kollha interessati; jinsisti dwar in-neċessità li fit-tfassil u l-implimentazzjoni ta’ din l-istrateġija jiġu assoċjati l-awtoritajiet pubbliċi reġjonali u lokali u l-organizzazzjonijiet tas-soċjetà ċivili (inkluż in-netwerks interreġjonali u l-organizzazzjonijiet ikkonċernati);

15. Jinsisti li l-kooperazzjoni fi ħdan il-qafas ta’ din l-istrateġija għandha qabel kollox tkun ibbażata fuq il-ħtiġijiet ta’ dawk kollha interessati u għalehkk huwa tal-fehma li l-prijoritajiet politiċi indirizzati għandhom jiġi deċiżi permezz ta’ kunsens;

16. Huwa tal-opinjoni li r-Raggruppament Ewropew ta' Kooperazzjoni Territorjali (REKT) jista’ jkun għodda interessanti biex tiffaċilita kooperazzjoni fi ħdan il-qafas ta’ strateġija tal-UE għar-reġjun tal-Atlantiku;

17. Huwa tal-fehma li din l-istrateġija għandha tkun implimentata mill-2014 ’il quddiem u tiġi kkoordinata mal-qafas finanzjarju multiannwali, u li għandha timxi flimkien ma’ pjan ta’ azzjoni definit fil-livell Ewropew u li jinkludi lista ta’ proġetti għall-istrutturar;

18. Huwa tal-opinjoni li d-dimensjonijiet interni u esterni ta’ din l-istrateġija se jkollhom jimplimentaw allokazzjoni Atlantika tal-fondi eżistenti tal-Komunità, ibbażata fuq prijoritajiet maqsuma;

19. Jistieden lill-Kummissjoni u lill-Istati Membri jistabbilixxu regoli simplifikati biex jiffaċilitaw l-implimentazzjoni ta’ din l-istrateġija u jnaqqsu l-piż amministrattiv;

20. Jistieden lill-Kummissjoni taħdem mill-qrib mal-Parlament Ewropew fid-definizzjoni tal-prijoritajiet għall-iżvilupp tal-istrateġija tal-UE għar-reġjuni tal-Atlantiku, u jistieden lill-Kummissjoni tinforma regolarment lill-Parlament u tikkonsulta miegħu dwar l-istatus tal-implimentazzjoni ta’ din l-istrateġija;

21. Se jesprimi l-opinjonijiet tiegħu dwar il-komunikazzjoni futura tal-Kummissjoni permezz ta’ rapport ta’ inizjattiva;

22. Jagħti istruzzjonijiet lill-President tiegħu biex jgħaddi din ir-riżoluzzjoni lil Kunsill, lill-Kummissjoni, lill-Kumitat tar-Reġjuni u lill-istituzzjonijiet l-oħra relevanti.