Il-Parlament Ewropew,

–   wara li kkunsidra l-Artikolu 167(3) tat-Trattat dwar il-Funzjonament tal-Unjoni Ewropea,

–   wara li kkunsidra d-Deċiżjoni Nru 1622/2006/KE tal-Parlament Ewropew u tal-Kunsill tal-24 ta’ Ottubru 2006 li tistabbilixxi azzjoni Komunitarja għall-avveniment tal-Kapitali Ewropea tal-Kultura mill-2007 sal-2019

ĠU L 304, 3.11.2006, p. 1.

–   wara li kkunsidra l-Memorandum ta' Fehim li jistabbilixxi t-termini u l-kundizzjonijiet għal parteċipazzjoni sħiħa tal-Bosnja-Ħerzegovina fil-Programm Kultura 2007-2013 ffirmat fil-21 ta' Diċembru 2010,

–   wara li kkunsidra l-Artikoli 115(5) u 110(2) tar-Regoli ta' Proċedura tiegħu,

A. billi ġiet stabbilita azzjoni Komunitarja intitolata 'Kapitali Ewropea tal-Kultura' sabiex tkun enfasizzata r-rikkezza u d-diversità tal-kulturi Ewropej u l-karatteristiċi komuni tagħhom, kif ukoll sabiex tippromwovi ftehim reċiproku akbar bejn iċ-ċittadini Ewropej,

B.  billi attwalment id-deċiżjoni msemmija hawn fuq dwar it-twaqqif ta' azzjoni Komunitarja għall-avveniment tal-Kapitali Ewropea tal-Kultura mill-2007 sal-2019 tapplika biss għall-Istati Membri tal-UE,

C. billi f'diversi okkażjonijiet ingħatat l-oppportunità biex jintrebaħ it-titlu ta' 'Kapitali Ewropea tal-Kultura' lil pajjiżi Ewropej terzi;

D. billi Sarajevo għandu post speċjali fl-istorja u l-kultura Ewropea u fl-2014 se jikkommemora diversi anniversarji importanti,

E.  billi l-Kunsill tal-Belt ta' Sarajevo u operaturi kulturali lokali ħejjew ħafna xogħol fil-kandidatura tagħhom għal dan it-titlu,

1.  Jistieden lill-Kunsill biex jippremja, b'mod eċċezzjonali, it-titlu ta' 'Kapitali Ewropea tal-Kultura' lil Sarajevo fl-2014;

2.  Jemmen li din l-inizjattiva se tkun qed tirrappreżenta pass importanti lejn is-sorpassar ta' qasmiet Ewropej li seħħew fl-imgħoddi u se tkun qed tpoġġi fid-dawl l-Ewropa Ġdida bin-nomina ta' 'Kaptali Ewropea tal-Kultura' lil belt li matul is-seklu 20 kienet lok ta' ġrajjiet traġiċi tassew;

3.  Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni u lill-Kumitat tar-Reġjuni.