Dokument ta' sessjoni
19.10.2011 B7‑0537/2011
MOZZJONI GĦAL RIŻOLUZZJONI
skont l-Artikolu 90(2) tar-Regoli ta' Proċedura
dwar it-tiftix ta' opinjoni tal-Qorti tal-Ġustizzja dwar il-kompatibilità mat-Trattati tal-Ftehim bejn l-Unjoni Ewropea u l-Awstralja dwar l-ipproċessar u t-trasferiment ta’ data mir-record tar-Reġistru tal-ismijiet tal-passiġġieri (PNR) derivata mill-Unjoni Ewropea minn trasportaturi bl-ajru lis-Servizz Doganali Awstraljan
Cornelia Ernst, Kyriacos Triantaphyllides
f'isem il-Grupp GUE/NGL
Riżoluzzjoni tal-Parlament Ewropew dwar it-tiftix ta' opinjoni tal-Qorti tal-Ġustizzja dwar il-kompatibilità mat-Trattati tal-Ftehim bejn l-Unjoni Ewropea u l-Awstralja dwar l-ipproċessar u t-trasferiment ta’ data tar-Reġistru tal-ismijiet tal-passiġġieri (PNR) derivata mill-Unjoni Ewropea minn trasportaturi bl-ajru lis-Servizz Doganali Awstraljan
Il-Parlament Ewropew,
– wara li kkunsidra l-Artikolu 218 tat-Trattat dwar il-Funzjonament tal-Unjoni Ewropea (TFUE), u b'mod partikolari l-paragrafi 6 u 11 tiegħu,
– wara li kkunsidra l-abbozz ta' deċiżjoni tal-Kunsill (09825/2011),
– wara li kkunsidra l-Ftehim bejn l-Unjoni Ewropea u l-Awstralja dwar l-ipproċessar u t-trasferiment ta’ data mir-Reġistru tal-ismijiet tal-passiġġieri (PNR) derivata mill-Unjoni Ewropea minn trasportaturi bl-ajru lis-Servizz Doganali Awstraljan,
– wara li kkunsidra l-Komunikazzjoni mill-Kummissjoni dwar l-approċċ globali għat-trasferimenti ta' dejta tar-Reġistru tal-Ismijiet tal-Pasiġġieri (PNR) lil pajjiżi terzi ( COM(2010)0492 ),
– wara li kkunsidra r-riżoluzzjonijiet tiegħu tal-14 ta' Frar 2007 dwar SWIFT, il-Ftehim tal-PNR u d-djalogu transatlantiku dwar dawn il-kwistjonijiet[1], tat-22 ta' Ottubru 2008 dwar l-evalwazzjoni tal-Ftehim tal-PNR bejn l-Awstralja u l-UE[2], tal-5 ta' Mejju 2010 dwar l-illanċjar ta’ negozjati għal ftehimiet dwar ir-Reġistru tal-ismijiet tal-passiġġieri (PNR) mal-Istati Uniti, l-Awstralja u l-Kanada[3], u tal-11 ta' Novembru 2010 dwar l-approċċ globali għat-trasferimenti ta' data tar-Reġistru tal-Ismijiet tal-Passiġġieri (PNR) lil pajjiżi terzi[4],
– wara li kkunsidra l-opinjonijiet tal-Kontrollur Ewropew għall-Protezzjoni tad-Data tad-19 ta' Ottubru 2010 dwar il-Komunikazzjoni mill-Kummissjoni dwar l-approċċ globali għat-trasferimenti ta' dejta tar-Reġistru tal-Ismijiet tal-Pasiġġieri (PNR) lil pajjiżi terzi[5] u tal-15 ta' Lulju 2011 dwar il-proposta għal Deċiżjoni tal-Kunsill dwar il-konklużjoni ta' Ftehim bejn l-Unjoni Ewropea u l-Awstralja dwar l-ipproċessar u t-trasferiment ta’ data mir-Reġistru tal-ismijiet tal-passiġġieri (PNR) derivata mill-Unjoni Ewropea minn trasportaturi bl-ajru lis-Servizz Doganali Awstraljan[6],
– wara li kkunsidra l-Opinjoni 7/2010 tal-Grupp ta' Ħidma dwar il-Protezzjoni tad-Data tal-Artikolu 29, adottata fit-12 ta' Novembru 2010, dwar il-Komunikazzjoni tal-Kummissjoni dwar l-approċċ globali għat-trasferimenti tad-data mir-recordtar-Reġistru tal-ismijiet tal-passiġġieri (PNR) lil pajjiżi terzi,
– wara li kkunsidra l-Artikolu 16 TFUE u l-Artikoli 7 u 8 tal-Karta tad-Drittijiet Fundamentali tal-Unjoni Ewropea,
– wara li kkunsidra r-rakkomandazzjoni tal-Kumitat għal-Libertajiet Ċivili, il-Ġustizzja u l-Intern u l-opinjoni tal-Kumitat għall-Affarijiet Barranin ( A7-0000/2011 ),
– wara li kkunsidra l-Artikolu 90(6) tar-Regoli ta' Proċedura tiegħu,
A. billi l-qafas legali Ewropew li jippermetti lill-kumpaniji tal-ajru Ewropej jittrasferixxu data tal-PNR tal-passiġġieri ġie stabbilit permezz tad-Deċiżjoni tal-Kunsill Ewropew 2008/651/PESK/ĠAI tat-30 ta' Ġunju 2008 dwar l-iffirmar ta’ Ftehim bejn l-Unjoni Ewropea u l-Awstralja dwar l-ipproċessar u t-trasferiment ta’ data tar-Reġistru tal-ismijiet tal-passiġġieri (PNR) derivata mill-UE minn trasportaturi bl-ajru lis-Servizz Doganali Awstraljan (minn hawn 'il quddiem imsejjaħ "il-Ftehim");
B. billi l-Ftehim applika b'mod proviżorju mit-30 ta' Ġunju 2008, u dan fi 17-il Stat Membru biss tal-UE, peress li l-unanimità meħtieġa ma setgħetx tinkiseb fil-Kunsill rigward il-konklużjoni tal-Ftehim;
C. billi, wara d-dħul fis-seħħ tat-Trattat ta' Lisbona fl-1 ta' Diċembru 2009, il-konklużjoni ta' ftehimiet tal-PNR ġodda tirrikjedi l-kunsens tal-Parlament Ewropew qabel ma jiġu finalment adottati mill-Kunsill;
D. billi l-Kunsill talab lill-Parlament Ewropew għall-kunsens tiegħu dwar ftehim PNR ġdid mal-Awstralja fil-15 ta' Frar 2010;
E. billi fil-5 ta' Mejju 2010 l-Parlament Ewropew adotta riżoluzzjoni biex tiġi posposta l-votazzjoni dwar din it-talba għal kunsens, u dan ittardja l-konklużjoni tal-Ftehim u wassal biex il-Kummissjoni u l-Awstralja jiftħu negozjati ġodda f'Jannar 2011;
F. billi l-Kummissjoni bdiet ftehim ġdid u, fid-19 ta' Mejju 2011, bagħtet rakkomandazzjoni lill-Kunsill biex jikkonkludi l-Ftehim, li l-Kunsill imbagħad iffirma fid-29 ta' Settembru 2011; billi fl-istess jum, il-Parlament Ewropew irċieva t-talba tal-Kunsill għall-approvazzjoni;
G. billi l-iskop ċar tal-Ftehim, kif iddikjarat fl-ewwel Artikolu tiegħu, huwa li jistabbilixxi l-kundizzjonijiet li bi qbil magħhom data tal-PNR tkun tista' tiġi trasferita u użata, u kif id-data se tiġi protetta;
1. Huwa tal-fehma li hemm inċertezza legali dwar jekk l-abbozz tal-Ftehim huwiex konformi mal-leġiżlazzjoni tal-UE dwar il-protezzjoni tad-data, u għalhekk jekk huwiex kumpatibbli mat-Trattati f'dan ir-rigward; barra minn hekk, għandu dubji dwar l-għażla tal-bażi legali, jiġifieri l-Artikoli 82(1)(d) u 87(2)(a) TFUE (koperazzjoni tal-pulizija u koperazzjoni ġudizzjarja), u mhux l-Artikolu 16 TFUE (protezzjoni ta' data);
2. Jiddeċiedi li jfittex opinjoni tal-Qorti tal-Ġustizzja dwar il-kompatibilità tal-Ftehim mat-Trattati;
3. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni għal skopijiet ta' informazzjoni u biex jieħu l-miżuri neċessarji biex jikseb din l-opinjoni mill-Qorti tal-Ġustizzja.