Dokument ta' sessjoni

 

12.1.2015                                                                                                        B8‑0001/2015 /REV

MOZZJONI GĦAL RIŻOLUZZJONI

imressqa wara d-dikjarazzjoni mill-Kummissjoni

skont l-Artikolu 37(3) tar-Regoli ta' Proċedura u l-ftehim qafas dwar ir-relazzjonijiet bejn il-Parlament Ewropew u l-Kummissjoni Ewropea

dwar il-Programm ta' Ħidma tal-Kummissjoni għall-2015

2014/2829(RSP) )

József Szájer, Lara Comi

f'isem il-Grupp PPE

 

B8‑0001/2015 /REV

Riżoluzzjoni tal-Parlament Ewropew dwar il-Programm ta' Ħidma tal-Kummissjoni għall-2015

( 2014/2829(RSP) )

Il-Parlament Ewropew,

–       wara li kkunsidra l-komunikazzjoni tal-Kummissjoni bit-titolu ‘Programm ta' Ħidma tal-Kummissjoni 2015 – Bidu Ġdid’ ( COM(2014)0910 ) u l-Annessi 1 sa 4 tagħha,

–       wara li kkunsidra l-konklużjonijiet tal-Kunsill Ewropew tas-26-27 ta' Ġunju 2014 u tat-18 ta’ Diċembru 2014,

–       wara li kkunsidra d-dikjarazzjoni tas-16 ta' Diċembru 2014 tal-President u l-Ewwel Viċi President tal-Kummissjoni dwar il-Programm ta' Ħidma tal-Kummissjoni għall-2015,

–       wara li kkunsidra l-Artikolu 37(3) tar-Regoli ta' Proċedura tiegħu,

A.     billi l-prijoritajiet politiċi għandhom jitqabblu mar-riżorsi finanzjarji disponibbli;

B.     billi l-politika u l-azzjoni tal-UE, imwettqa id f'id mal-Istati Membri skont il-prinċipju tas-sussidjarjetà, jistgħu u jridu jkollhom influwenza reali biex jgħinu liċ-ċittadini jantiċipaw u jirreaġixxu għal soċjetà li qed tinbidel malajr;

C.     billi l-Ewropa trid issegwi l-mudell tal-ekonomija soċjali tas-suq, u tiggarantixxi tkabbir sostenibbli bil-għan li lill-ġenerazzjoni li jmiss toffrilha impjiegi minflok dejn;

1.      Jilqa' l-Programm ta' Ħidma tal-Kummissjoni (CWP) u jenfasizza l-fatt li tnaqqis sinifikanti fil-piż amministrattiv fuq iċ-ċittadini u l-kumpaniji jista' jinkiseb biss billi nnaqqsu l-għadd ta' proposti leġiżlattivi u billi, minflok, niffukaw fuq il-prijoritajiet ewlenin;

2.      Jilqa' d-deċiżjoni tal-Kummissjoni li tippreżenta l-Programm ta' Ħidma tagħha għall-2015 mill-iktar fis possibbli, biex b'hekk uriet li hija lesta taġixxi fil-pront, u jilqa' l-fatt li s-CWP huwa indirizzat lejn l-impjiegi, it-tkabbir u l-investiment, b'tali mod li jsarraf il-Linji Gwida Politiċi ppreżentati mill-Kummissjoni f'Novembru 2014 fi 23 proposta konkreta;

3.      Jemmen bis-sħiħ li l-isforzi jridu jiġu kkonċentrati lejn ftit prijoritajiet ewlenin u jitlob lill-Kummissjoni biex ma tiħux inizjattivi li mhumiex essenzjali;

4.      Jappoġġa l-bidla fil-metodu li għandha l-għan li ssir tindifa biex tiġi evitata l-ħela tar-riżorsi fuq proposti leġiżlattivi li m'għadhomx jintużaw li mhumiex adegwati u li m'għadhomx jissodisfaw il-prijoritajiet u t-tħassib taċ-ċittadini tal-UE;

5.      Jitlob, għalhekk, li l-ispejjeż tal-piżijiet burokratiċi jitnaqqsu b'25 % u li l-valutazzjonijiet indipendenti jiġu stabbiliti sabiex ikejlu l-piż amministrattiv u l-ispejjeż relatati tal-proposti l-ġodda, inkluż it-test mandatorju tal-SMEs. Dawn iż-żewġ miżuri jgħinu jneħħu l-burokrazija fil-livelli kollha, dak Ewropew, nazzjonali u reġjonali, u jgħinu lill-atturi ekonomiċi u ċ-ċittadini kollha fil-ħajja ta' kuljum tagħhom;

6.      Jinsisti fuq il-ħtieġa li l-leġiżlazzjoni eżistenti tiġi implimentata b'mod sħiħ, imħaffef u effikaċi, fl-oqsma bħas-suq uniku, id-dritt ambjentali, is-settur finanzjarju u dak bankarju u l-PAK, il-PKS u l-Politika ta' Koeżjoni li ġew riveduti reċentement;

7.      Jappoġġa bis-saħħa l-miżuri għall-ġlieda kontra l-frodi fiskali u l-evażjoni tat-taxxa u jenfasizza l-bżonn li flus il-kontribwenti jintużaw b'mod iktar effiċjenti, u li jittieħdu iktar passi favur il-ħarsien tal-interessi finanzjarji tal-Unjoni;

8.      Jemmen li l-progress rapidu f'TTIP ambizzjuża, ibbilanċjata u komprensiva li tirrispetta l-istandards soċjali, ambjentali u tal-konsumatur tal-UE huwa essenzjali għall-ħolqien ta' opportunitajiet ta' tkabbir ġodda; jitlob li jsir iktar progress f'negozjati kummerċjali oħrajn u li l-pakkett ta' Bali tad-WTO jiġi rratifikat u implimentat; jenfasizza l-importanza tad-dimensjoni industrijali tal-Politika ta' Sigurtà u ta' Difiża Komuni (PSDK);

9.      Jappoġġa r-reviżjoni tal-Ftehim Interistituzzjonali dwar it-Tfassil Aħjar tal-Liġijiet, kif intalab bosta drabi, u l-proposta għall-ipprogrammar konġunt mal-Kummissjoni u l-Kunsill biex titjieb l-effiċjenza tal-proċess leġiżlattiv;

10.    Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni.