Dokument ta' sessjoni
4.7.2016
MOZZJONI GĦAL RIŻOLUZZJONI
imressqa wara d-dikjarazzjoni mill-Kummissjoni
skont l-Artikolu 37(3) tar-Regoli ta' Proċedura u l-ftehim qafas dwar ir-relazzjonijiet bejn il-Parlament Ewropew u l-Kummissjoni Ewropea
dwar il-prijoritajiet tal-Parlament Ewropew għall-Programm ta' Ħidma tal-Kummissjoni għall-2017
( 2016/2773(RSP) )
David Borrelli
f'isem il-Grupp EFDD
Riżoluzzjoni tal-Parlament Ewropew dwar il-prijoritajiet tal-Parlament Ewropew għall-Programm ta' Ħidma tal-Kummissjoni għall-2017
( 2016/2773(RSP) )
Il-Parlament Ewropew,
– wara li kkunsidra l-komunikazzjoni tal-Kummissjoni intitolata ''Programm ta' Ħidma tal-Kummissjoni tal-2016 – Mhux il-waqt li kollox jibqa' l-istess'' ( COM(2015)0610 ) u l-Annessi 1 sa 6 tagħha,
– wara li kkunsidra l-Artikolu 37(3) tar-Regoli ta' Proċedura tiegħu,
A. billi l-kriżi ekonomika, soċjali u politika wasslet biex Stati Membri jiżżerżqu f'riċessjoni u deflazzjoni, b'numru preokkupanti ta' madwar 17-il miljun persuna qiegħda;
B. billi l-inizjattivi proposti mill-istituzzjonijiet tal-UE dwar ir-riforma tal-qafas ta' governanza ekonomika tal-lum ikomplu jgħarrqu l-kriżi ekonomika, demokratika u soċjali fl-UE;
C. billi r-rati ta' żball u ta' frodi li jaffettwaw il-baġit tal-UE għadhom f'livell għoli bla ebda tnaqqis sinifikanti, u billi, għal 21 sena konsekuttiva, il-pagamenti ntlaqtu materjalment minn żbalji minħabba l-effikaċja parzjali tas-sistemi superviżorji u ta' kontroll;
D. billi, fi żmien ta' awsterità għaċ-ċittadini kollha, huwa imperattiv li jitnaqqsu l-ispejjeż amministrattivi tal-UE, b'attenzjoni speċifika fuq l-identifikazzjoni ta' ekonomiji strutturali sinifikanti permezz ta' rieżami tat-tqassim ġeografiku tal-postijiet tax-xogħol tal-Parlament Ewropew;
E. billi l-politiki tal-UE għandhom nuqqas gravi ta' trasparenza, speċjalment fil-każ ta' negozjati dwar ftehimiet ta' kummerċ internazzjonali;
F. billi huwa assolutament neċessarju li jiġi evitat li ċ-Ċina ingħata l-istatus ta' ekonomija tas-suq;
G. billi l-qgħad fit-tul irdoppja mill-2007 u jirrappreżenta nofs il-qgħad totali; 4.5 miljun żagħżugħ u żagħżugħa fl-età ta' bejn 15-il sena u 24 sena jinsabu qiegħda fl-UE, u billi aktar minn 7 miljuni fost iż-żgħażagħ Ewropej fl-età ta' bejn 15-il sena u 24 sena la huma impjegati u lanqas qed jieħdu edukazzjoni jew taħriġ;
H. billi l-għajnuna lill-intrapriżi żgħar u ta' daqs medju (SMEs) għandha tkun prijorità, b'attenzjoni speċifika għat-tnaqqis ta' spejjeż amministrattivi eċċessivi u bla ħtieġa;
I. billi l-Iskema għan-Negozjar ta' Emissjonijiet (ETS) falliet b'mod sostanzjali;
J. billi l-qbil bejn l-Istati Membri dwar l-arranġamenti dwar il-Faċilità għar-Rifuġjati fit-Turkija mhuwiex l-aħjar soluzzjoni għall-UE rigward il-problema tal-emerġenza tar-rifuġjati li qed tiżviluppa (u m'għandux jiġi rreplikat ma' pajjiżi terzi oħra);
K. billi forma ta' demokrazija diretta li fiha ċ-ċittadini jieħdu deċiżjonijiet diretti tagħti aktar leġittimità lill-proċess ta' teħid tad-deċiżjonijiet, u tista' tgħin biex tagħti spinta lill-parteċipazzjoni taċ-ċittadini; billi huwa importanti li nirrispettaw il-vot tal-poplu permezz ta' referenda nazzjonali ħielsa u ġusti fl-Istati Membri;
Prijoritajiet ewlenin
1. Jenfasizza l-ħtieġa urġenti li l-Istati Membri jitħallew jagħmlu użu sħiħ tal-għodod ta' politika monetarja u fiskali bil-għan li jappoġġjaw l-irkupru ekonomiku b'mod effikaċi u jiżguraw il-leġittimità demokratika u politika ta' deċiżjonijiet ekonomiċi fundamentali;
2. Iqis li, fid-dawl tar-rieżami tal-QFP, għandha tingħata prijorità għar-riżoluzzjoni tal-problema tal-pagamenti qabel ma jiġu implimentati impenji ġodda; ifakkar li l-ewwel għażla għandha dejjem tkun dik tar-riallokazzjoni ta' approprjazzjonijiet minn linji baġitarji eżistenti li mhumiex prijoritarji, biex b'hekk nevitaw il-ħala u l-ġestjoni ħażina; jirrimarka li, f'xi każijiet, il-programmi jistgħu jiġu ffinanzjati u implimentati aħjar fil-livell nazzjonali bi qbil mal-prinċipju tas-sussidjarjetà;
3. Jitlob li l-baġit tal-UE jsirulu wisq aktar kontrolli u awditjar; jinsisti, bħala rekwiżit mandatorju, li dikjarazzjoni ta' assigurazzjoni pożittiva (DAS) tinkiseb mill-Qorti tal-Awdituri fi żmien sentejn; jiddispjaċih li r-rati ta' żball u ta' frodi li jaffettwaw il-baġit tal-UE, b'referenza partikolari għall-akkwist pubbliku, u jinsisti fuq il-ħtieġa qawwija li l-korruzzjoni u l-kriminalità organizzata fil-livell transnazzjonali jiġu miġġielda; jenfasizza l-importanza ta' aktar trasparenza fl-infiq tal-UE u jitlob li tiġi ppubblikata l-informazzjoni kollha dwar l-infiq mill-fondi Ewropej;
4. Jirrifjuta l-idea ta' baġit speċifiku għaż-żona tal-euro, peress li dan ikun jikkostitwixxi firda sinifikanti bejn pajjiżi li jużaw l-euro u dawk li jżommu l-munita proprja tagħhom; jieħu nota li baġit għaż-żona tal-euro jkollu l-effett ukoll li jwassal għal sottomissjoni ulterjuri tas-sovranità demokratika nazzjonali għall-benefiċċju ta' formazzjonijiet teknokratiċi;
5. Jenfasizza li l-munita unika għandha impatt asimettriku u distruttiv fuq l-ekonomiji aktar dgħajfa, li jiġu sfurzati jagħmlu aġġustament diffiċli ta' żvalutazzjoni interna minħabba munita li hija sopravalutata fil-konfront tal-ekonomiji tagħhom, filwaqt li tħalli lil dawk l-Istati Membri taż-żona tal-euro li huma aktar b'saħħithom jisfruttaw vantaġġ kompetittiv inġust minħabba munita sottovalutata fil-konfront ta' Stati Membri oħra taż-żona tal-euro, b'tali mod li jiġġeneraw disparitajiet u żbilanċi makroekonomiċi intollerabbli fl-UE; jenfasizza l-ħtieġa urġenti li tiġi ppjanata likwidazzjoni ordnata tal-unjoni monetarja u li jiġu pprovduti minnufih mekkaniżmi demokratiċi għall-ħruġ volontarju ta’ pajjiż miż-żona tal-euro;
6. Itenni l-ħtieġa li jsir użu aħjar mill-flus tal-kontribwenti; jenfasizza l-importanza li jitnaqqsu l-ispejjeż amministrattivi tal-UE, speċjalment f'perjodu ta' kriżi persistenti; jiddeplora l-fatt li l-Parlament Ewropew għandu tliet postijiet tax-xogħol — Brussell, Strasburgu u l-Lussemburgu; jisħaq fuq il-fatt li l-Parlament ikun aktar effikaċi, kosteffiċjenti u favur l-ambjent jekk ikollu sede f'post wieħed biss;
7. Itenni li l-kofinanzjament nazzjonali tal-Fondi Strutturali u ta’ Investiment Ewropej għandu jiġi eskluż kompletament mid-definizzjoni ta’ defiċits strutturali tal-Patt ta’ Stabbiltà u Tkabbir u jiddeplora l-fatt li l-miżuri ta’ awsterità fl-UE jimminaw serjament l-objettivi ta’ koeżjoni soċjali, territorjali u ekonomika;
8. Jopponi bil-qawwa l-Programm ta’ Appoġġ għal Riformi Strutturali;
9. Jissottolinja li l-ħolqien tal-Fond Ewropew għall-Investimenti Strateġiċi (FEIS) kellu impatt f’dak li jirrigwarda tnaqqis fi programmi tal-Orizzont 2020 u tal-Faċilità Nikkollegaw l-Ewropa (CEF);
10. Jinsisti li n-negozjati dwaris-Sħubija Trans-Atlantika ta’ Kummerċ u ta’ Investiment(TTIP) jiġu abbandunati peress li jbaxxu l-istandards taż-żewġ naħat itenni t-tħassib profond tiegħu dwar il-fatt li l-Kummissjoni biss għandha d-dritt tinnegozja ftehimiet ta’ kummerċ, u mhux il-gvernijiet nazzjonali, eletti u responsabbli; jiddispjaċih għar-rifjut tal-Kummissjoni li tirreġistra l-Inizjattiva taċ-Ċittadini Ewropej (ECI) "Stop TTIP"; jopponi l-inklużjoni ta’ Sistema ta’ Qorti tal-Investiment (ICS) fi ftehimiet kummerċjali futuri; jopponi kwalunkwe inklużjoni tas-servizzi pubbliċi fit-TTIP u fi ftehimiet ta’ kummerċ oħra; jitlob lill-parlamenti nazzjonali jgħidu tagħhom dwar negozjati kummerċjali, bħall-Ftehim Ekonomiku u Kummerċjali Komprensiv (CETA) bħala sinjal ta’ kontroll demokratiku
11. Iħeġġeġ lill-Kummissjoni tqawwi l-isforzi tagħha biex iġġib 'il quddiem riforma komprensiva tal-Istrumenti għad-Difiża tan-Negozju, u b’hekk ittejjeb l-effikaċja, it-trasparenza u l-infurzar tagħhom, sabiex il-produtturi, l-importaturi u ċ-ċittadini jiġu mħarsa minn kull sieħeb kummerċjali li ma jikkompetix b’mod ġust;
12. Jirrikonoxxi l-prinċipji tas-sussidjarjetà u tal-proporzjonalità f’dak li jirrigwarda l-implimentazzjoni tal-Pjan ta’ Azzjoni tal-Ekonomija Ċirkolari, b'mod li l-Istati Membri titħallielhom il-possibbiltà li jmorru lil hinn mid-deċiżjonijiet Komunitarji;
13. Jinsisti li l-UE ma tirrikonoxxix u ma tagħtix l-istatus ta’ ekonomija tas-suq liċ-Ċina;
14. Jiddispjaċih bil-qawwa li l-Garanzija għaż-Żgħażagħ ma ħalliet l-ebda żieda sostanzjali fl-impjiegi taż-żgħażagħ u jinsab profondament imħasseb dwar ir-rata allarmanti tal-qgħad fit-tul;
15. Jikkundanna kull leġiżlazzjoni tal-UE li timponi piżijiet amministrattivi fuq l-SMEs — li huma sors ewlieni ta’ impjiegi u ta’ tkabbir — u li timponilhom aktar ostakoli burokratiċi; jenfasizza li jeħtieġ li l-SMEs jingħataw aktar appoġġ, b'mod li l-enfasi prinċipali tkun fuq li titnaqqas il-burokrazija tal-UE filwaqt li tkun żgurata protezzjoni soċjali xierqa;
16. Jissottolinja l-ħtieġa li jiġu rikonoxxuti l-problemi sinifikanti li l-Iskema għan-Negozjar ta’ Emissjonijiet ġarrbet fil-passat, u jistieden lill-Kummissjoni tikkunsidra li r-riżorsi ta’ implimentazzjoni korrispondenti jiġu riallokati għal inizjattivi oħra li jrendu aktar prosperità lis-soċjetà Ewropea;
17. Jenfasizza l-ħtieġa li jiġu stabbiliti rapporti ta' monitoraġġ u implimentazzjoni dwar il-ħlasijiet u l-infiq nazzjonali tal-Fond għall-Asil, il-Migrazzjoni u l-Integrazzjoni u tal-Fond għas-Sigurtà Interna, u li l-użu tal-fondi mogħtija lit-Turkija mill-UE fi ħdan il-qafas tal-ftehim bejn l-UE u t-Turkija jkun issorveljat bis-sħiħ u jiġi evalwat regolarment;
18. Ifakkar li l-Istati Membri għandhom jittrasponu u jimplimentaw l-istrumenti disponibbli fil-livell internazzjonali fil-ġlieda kontra l-kriminalità organizzata, il-korruzzjoni u l-ħasil tal-flus;
19. Ifakkar li, skont l-Artikolu 46(1) tal-Konvenzjoni Ewropea dwar id-Drittijiet tal-Bniedem, il-Partijiet Għolja Kontraenti assumew mingħajr kwalifika obbligu solenni u vinkolanti taħt l-istat tad-dritt li "jirrispettaw is-sentenza finali tal-Qorti fi kwalunkwe każ li jkunu parti fih". Jiddeplora d-dewmien fl-implimentazzjoni u n-nuqqas ta’ rieda politika f’ċerti ċirkostanzi li ċerti sentenzi tal-Qorti jiġu implimentati;
20. Iqis li l-involviment attiv taċ-ċittadini tal-UE fil-proċess tat-teħid ta’ deċiżjonijiet ġuridiċi huwa ta’ importanza liema bħalha sabiex jingħeleb id-distakk demokratiku; jemmen li forma ta’ demokrazija diretta tkattar il-parteċipazzjoni u r-responsabbiltà; itenni l-fehma tiegħu li tali miżuri huma assolutament neċessarji f'soċjetà demokratika, u li jippermettu ż-żamma tal-ġustizzja, tal-libertà u tal-parteċipazzjoni;
21. Jenfasizza l-importanza tar-rispett tal-vot tal-poplu, permezz ta' referenda nazzjonali ħielsa u ġusti fl-Istati Membri, dwar trattati ġodda jew dwar kwalunkwe tibdil fit-trattati eżistenti;
22. Jesiġi li l-Kummissjoni u l-istituzzjonijiet kollha tal-UE jirrispettaw ir-riżultat tar-referendum fir-Renju Unit li sar fit-23 ta’ Ġunju 2016; jitlob li l-Kummissjoni u l-Kunsill iwettqu negozjati tal-Artikolu 50 b’mod miftuħ u amikevoli, fir-rispett tar-rieda tal-poplu Brittaniku;
23. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni u lill-gvernijiet tal-Istati Membri.