Dokument ta' sessjoni
24.4.2017
MOZZJONI GĦAL RIŻOLUZZJONI
imressqa wara d-dikjarazzjoni tal-Kummissjoni
skont l-Artikolu 123(2) tar-Regoli ta' Proċedura
dwar is-sitwazzjoni fil-Venezwela
( 2017/2651(RSP) )
Ignazio Corrao, Fabio Massimo Castaldo, Rolandas Paksas
f'isem il-Grupp EFDD
Riżoluzzjoni tal-Parlament Ewropew dwar is-sitwazzjoni fil-Venezwela
( 2017/2651(RSP) )
Il-Parlament Ewropew,
– wara li kkunsidra d-diversi riżoluzzjonijiet preċedenti tiegħu dwar is-sitwazzjoni fil-Venezwela, b'mod partikolari dawk tas-27 ta' Frar 2014 dwar is-sitwazzjoni fil-Venezwela[1], tat-18 ta' Diċembru 2014 dwar il-persekuzzjoni tal-oppożizzjoni demokratika fil-Venezwela[2], tat-12 ta' Marzu 2015 dwar is-sitwazzjoni fil-Venezwela[3] u tat-8 ta' Ġunju 2016 dwar is-sitwazzjoni fil-Venezwela[4],
– wara li kkunsidra d-Dikjarazzjoni Universali tad-Drittijiet tal-Bniedem tal-1948,
– wara li kkunsidra l-Patt Internazzjonali dwar id-Drittijiet Ċivili u Politiċi, li l-Venezwela hija parti għalih,
– wara li kkunsidra l-Karta Demokratika Inter-Amerikana, adottata fil-11 ta' Settembru 2001,
– wara li kkunsidra l-Kostituzzjoni tal-Venezwela,
– wara li kkunsidra t-twissijiet espressi fir-rapporti tal-OAS tat-30 ta' Mejju 2016 u tal-14 ta' Marzu 2017 dwar il-Venezwela u l-appell tas-Segretarju Ġenerali tagħha biex il-Kunsill Permanenti jitlaqqa' b'urġenza, skont l-Artikolu 20 tal-Karta Demokratika, bil-għan li tiġi diskussa l-kriżi politika tal-Venezwela,
– wara li kkunsidra l-ittra tas-27 ta' Marzu 2017 tal-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/RGħ), Federica Mogherini, dwar is-sitwazzjoni dejjem aktar serja u l-kriżi gravi li qed tolqot lill-Venezwala fil-livell politiku, ekonomiku u umanitarju,
– wara li kkunsidra l-Artikolu 123(2) tar-Regoli ta' Proċedura tiegħu,
A. billi fil-25 ta’ Jannar 2017 is-Segretarju Ġenerali tal-Organizzazzjoni tal-Istati Amerikani (OAS), Luis Almagro Lemes, iddikjara fil-Parlament Ewropew li d-djalogu mibdi fit-30 ta’ Ottubru 2016, li ġie appoġġjat mill-Kunsill tal-Unjoni Ewropea permezz tal-medjazzjoni ta’ żewġ eks-Presidenti tar-Repubblika Dominikana u tal-Panama, Leonel Fernández u Martín Torrijos, l-eks Prim Ministru Spanjol, José Luis Rodríguez Zapatero, u l-Knisja Kattolika, kien naqas milli jikseb l-għanijiet mixtieqa;
B. billi seħħew protesti kbar fil-Venezwela fl-aħħar tliet ġimgħat, wara d-deċiżjoni tal-Qorti Suprema Venezwelana tas-27 ta’ Marzu 2017;
C. billi tal-anqas tmien persuni mietu u madwar 100 ruħ oħra sfaw midruba matul dawk il-protesti; billi żewġ dimostranti u aġent wieħed tal-Gwardja Nazzjonali Venezwelana mietu waqt protesta li saret fid-19 ta’ April 2017;
D. billi d-dritt għal-libertà ta’ għaqda paċifika għal kulħadd huwa pilastru fundamentali tad-demokrazija; billi din il-libertà u d-drittijiet mogħtija minnha għandhom jitgawdew u jiġu eżerċitati b’mod paċifiku u b’rispett tar-regoli demokratiċi;
E. billi l-prinċipju ta’ noninterferenza fl-affarijiet interni ta’ stat għandu jiġi rrispettat; billi l-iggravar estern u l-inċitament ta’ protesti għandhom jiġu evitati taħt iċ-ċirkostanzi kollha;
F. billi r-rieda tal-poplu Venezwelan espressa permezz ta’ elezzjonijiet għandha tiġi rispettata, u għandhom ikunu kkundannati kwalunkwe sforzi li saru minn atturi barranin sabiex itemmu l-mandati politiċi qabel l-iskadenza naturali tagħhom;
G. billi l-Venezwela hi għanja fir-riżorsi naturali, fatt li faċilment jista’ jiġbed l-interess ta’ pajjiżi oħra u kumpaniji barranin; billi dawn ir-riżorsi għandhom jintużaw bl-għan li tiġi żgurata ħajja deċenti għaċ-ċittadini kollha tal-Venezwela;
H. billi d-determinazzjoni tal-politika ekonomika hija esklussivament parti mill-affarijiet interni ta’ kull stat, u kwalunkwe tentattiv ta’ influwenza politika bħal din għandu jitqies bħala interferenza mhux xierqa fil-qasam esklussiv tagħha; billi l-interessi tal-popolazzjoni proprja tiegħu għandhom ikunu l-uniċi mexxejja wara kwalunkwe iffissar min-naħa tal-gvern tal-politika ekonomika tiegħu;
I. billi s-separazzjoni tas-setgħat, kif definit mill-Kostituzzjoni tal-Venezwela, hija garanzija meħtieġa biex tipproteġi d-drittijiet taċ-ċittadini u tiddefendi d-demokrazija u l-istat tad-dritt, u tikkostitwixxi prerekwiżit bażiku għal demokrazija rappreżentattiva;
J. billi l-President Nicolas Maduro talab lill-Qorti Suprema tirrevedi s-sentenza li tannulla Assemblea Nazzjonali; billi l-Qorti Suprema Venezwelana fl-1 ta’ April 2017 ħarġet sentenzi ġodda li jerġgħu jistabbilixxu l-awtorità tal-Assemblea;
1. Jesprimi tħassib serju dwar is-sitwazzjoni li qed tiddeterjora serjament fil-Venezwela, ikkaratterizzata minn klima dejjem tiżdied ta' vjolenza politika u instabilità soċjali;
2. Jesprimi, b’mod partikolari, tħassib serju dwar il-vjolenza kontinwa fil-Venezwela, u għal dawk li ġew maqtula jew midruba waqt il-protesti li saru f’dawn l-aħħar ġimgħat;
3. Jistieden lill-partijiet kollha involuti biex jirrispettaw il-Kostituzzjoni Venezwelana u s-setgħat li l-Kostituzzjoni tikkonferixxi lill-korpi politiċi differenti kollha;
4. Jilqa’ b’sodisfazzjon ir-reviżjoni reċenti ta’ xi elementi tad-deċiżjoni tal-Qorti Suprema Venezwelana;
5. Jistieden lill-Gvern tal-Venezwela sabiex jissalvagwardja s-separazzjoni u l-indipendenza tas-setgħat; ifakkar li s-separazzjoni u n-nuqqas ta' interferenza bejn setgħat li huma leġittimi ndaqs jiffurmaw prinċipju essenzjali ta' stati demokratiċi u hija mmexxija mill-istat tad-dritt;
6. Jenfasizza li huwa essenzjali li l-Gvern tal-Venezwela jiżgura protezzjoni sħiħa tad-drittijiet tal-bniedem;
7. Itenni li d-dritt ta’ għażla ta’ min għandu jkollu s-setgħa politika leġittima fil-Venezwela jirrisjedi unikament mal-poplu tal-Venezwela, li l-unika possibilità tiegħu li jeżerċita dan id-dritt huwa permezz ta’ elezzjonijiet regolari;
8. Jistieden lill-partijiet kollha involuti biex jirrispettaw ir-rieda tal-poplu u l-liġi elettorali; jistieden lill-Gvern tal-Venezwela biex jikkonforma mal-kostituzzjoni u jippreżenta kalendarju elettorali li jippermetti l-iżvolġiment ta' proċessi elettorali ħielsa u trasparenti;
9. Jenfasizza l-importanza li tiġi żgurata l-akbar trasparenza u li jiġi stabbilit kalendarju ċar għall-proċess elettorali li ġej, sabiex jipprevjenu kull possibilità li jiqajmu pretensjonijiet jew dubji dwar il-ġustizzja tal-proċess elettorali fil-ġejjieni;
10. Jistieden lill-partijiet kollha involuti jirrispettaw u jiggarantixxu d-dritt kostituzzjonali għal-libertà ta' għaqda paċifika; jistieden lill-awtoritajiet Venezwelani jiggarantixxu s-sigurtà u l-eżerċizzju liberu tad-drittijiet għaċ-ċittadini kollha, b'mod partikolari d-difensuri tad-drittijiet tal-bniedem, il-ġurnalisti, l-attivisti politiċi u l-membri tal-organizzazzjonijiet mhux governattivi indipendenti, li kollha jinsabu f'riskju akbar ta' attakki;
11. Iħeġġeġ lill-gvern u lill-oppożizzjoni jżommu l-ġlieda politika fil-konfini fi ħdan il-konfini tal-arranġamenti u garanziji kostituzzjonali; jikkundanna bil-qawwa kwalunkwe forma ta’ vjolenza, irrispettivament minn min tkun twettqet;
12. Iħeġġeġ lill-partijiet kollha involuti biex joqogħdu lura milli jieħdu xi pożizzjoni radikali, minn kull forma ta’ vjolenza u minn kwalunkwe oġġezzjoni bil-quddiem jew ideoloġika għal djalogu; iħeġġeġ lill-partijiet kollha involuti biex iressqu soluzzjonijiet konkreti u realistiċi għall-problemi soċjali u politiċi li jaffettwaw il-popolazzjoni tal-Venezwela;
13. Jappoġġja l-inizjattiva ta’ paċi tal-Knisja Kattolika u kull inizjattiva maħsuba biex jerġa’ jkun hemm il-paċi u d-djalogu;
14. Jistieden lill-awtoritajiet Venezwelani jippermettu li l-għajnuna umanitarja tidħol fil-pajjiż bħala kwistjoni ta' urġenza u jagħtu aċċess lill-organizzazzjonijiet internazzjonali li jixtiequ jgħinu lis-setturi tas-soċjetà li ntlaqtu l-aktar;
15. Jistieden lill-Unjoni Ewropea u lill-Istati Membri tagħha biex joħolqu djalogu kostruttiv mal-Gvern tal-Venezwela, filwaqt li jirrispettaw il-prinċipju ta’ noninterferenza fl-affarijiet interni ta’ stat, bl-għan li jissalvagwardaw is-sikurezza u l-benessri taċ-ċittadini tal-Venezwela u taċ-ċittadini Ewropej li jgħixu fil-Venezwela;
16. Itenni t-talba urġenti tiegħu li tintbagħat delegazzjoni tal-Parlament Ewropew fil-Venezwela u biex id-delegazzjoni torganizza djalogu mas-setturi kollha involuti fil-kunflitt mill-aktar fis possibbli;
17. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà, lill-Gvern u lill-Assemblea Nazzjonali tar-Repubblika Bolivarjana tal-Venezwela, lill-Assemblea Parlamentari Ewro-Latino-Amerikana u lis-Segretarju Ġenerali tal-Organizzazzjoni tal-Istati Amerikani.