Dokument ta' sessjoni
24.10.2017
MOZZJONI GĦAL RIŻOLUZZJONI
imressqa wara d-dikjarazzjoni tal-Kummissjoni
skont l-Artikolu 123(2) tar-Regoli ta' Proċedura
dwar il-ġlieda kontra l-fastidju u l-abbuż sesswali fl-UE
( 2017/2897(RSP) )
Malin Björk, Marina Albiol Guzmán, Patrick Le Hyaric, Josu Juaristi Abaunz, Marie-Christine Vergiat, Marie-Pierre Vieu, Ángela Vallina, Kateřina Konečná, Jiří Maštálka, Stelios Kouloglou, Paloma López Bermejo, Lola Sánchez Caldentey, Tania González Peñas, Estefanía Torres Martínez, Xabier Benito Ziluaga, Miguel Urbán Crespo, Eleonora Forenza, Sabine Lösing, Stefan Eck, Martina Anderson, Lynn Boylan, Matt Carthy, Liadh Ní Riada, Neoklis Sylikiotis
f'isem il-Grupp GUE/NGL
Riżoluzzjoni tal-Parlament Ewropew dwar il-ġlieda kontra l-fastidju u l-abbuż sesswali fl-UE
( 2017/2897(RSP) )
Il-Parlament Ewropew,
– wara li kkunsidra l-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika, li nfetħet għall-iffirmar f'Istanbul fil-11 ta' Mejju 2011 (minn hawn 'il quddiem "Il-Konvenzjoni ta' Istanbul"),
– wara li kkunsidra l-Artikoli 2 u 3 tat-Trattat dwar l-Unjoni Ewropea (TUE),
– wara li kkunsidra t-Trattat dwar il-Funzjonament tal-Unjoni Ewropea (TFUE) u, b'mod partikolari l-Artikoli 8, 19, 157, 216 u 218(6), it-tieni subparagrafu, il-punt (a) tiegħu,
– wara li kkunsidra l-Artikoli 21, 23, 24, 25 u 26 tal-Karta tad-Drittijiet Fundamentali tal-Unjoni Ewropea,
– wara li kkunsidra d-Dikjarazzjoni ta' Beijing u l-Pjattaforma ta' Azzjoni adottata mir-Raba' Konferenza Dinjija dwar in-Nisa fil-15 ta' Settembru 1995, u d-dokumenti ta' eżitu sussegwenti adottati fis-sessjonijiet speċjali tan-NU Beijing +5 (2000), Beijing +10 (2005), Beijing +15 (2010) u Beijing +20 (2015), u l-Konvenzjoni dwar l-Eliminazzjoni ta' Kull Forma ta' Diskriminazzjoni Kontra n-Nisa (CEDAW) u l-Protokoll Fakultattiv tagħha,
– wara li kkunsidra r-riżoluzzjoni tiegħu tal-20 ta' Settembru 2001 dwar il-fastidju fuq il-post tax-xogħol[1], tas-26 ta' Novembru 2009 dwar l-eliminazzjoni tal-vjolenza kontra n-nisa[2], tal-5 ta' April 2011 dwar prijoritajiet u punti prinċipali ta' qafas politiku ġdid tal-UE rigward il-ġlieda kontra l-vjolenza fuq in-nisa[3], tal-15 ta' Diċembru 2011 dwar ir-rieżami ta' nofs il-perjodu tal-istrateġija Ewropea 2007–2012 dwar is-saħħa u s-sigurtà fuq il-post tax-xogħol[4], tal-25 ta' Frar 2014 b’rakkomandazzjonijiet lill-Kummissjoni dwar il-ġlieda kontra l-vjolenza fuq in-nisa[5] u l-Valutazzjoni tal-Valur Miżjud Ewropew li takkumpanjah ta' Novembru 2013, tal-24 ta' Novembru 2016 dwar l-adeżjoni tal-UE għall-Konvenzjoni ta' Istanbul dwar il-prevenzjoni u l-ġlieda kontra l-vjolenza fuq in-nisa[6], u tat-12 ta' Settembru 2017 dwar il-proposta għal deċiżjoni tal-Kunsill dwar il-konklużjoni, mill-Unjoni Ewropea, tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika[7],
– wara li kkunsidra d-dokument ta' ħidma tal-persunal tal-Kummissjoni tat-3 ta' Diċembru 2015 bit-titolu "Strategic engagement for gender equality 2016-2019" ("Impenn strateġiku għall-ugwaljanza bejn in-nisa u l-irġiel 2016-2019") ( SWD(2015)0278 ),
– wara li kkunsidra d-dikjarazzjoni tat-Triju ta' Presidenzi tal-UE tad-19 ta' Lulju 2017 mill-Estonja, il-Bulgarija u l-Awstrija dwar l-ugwaljanza bejn in-nisa u l-irġiel,
– wara li kkunsidra d-Direttiva 2012/29/UE tal-25 ta' Ottubru 2012 li tistabbilixxi standards minimi fir-rigward tad-drittijiet, l-appoġġ u l-protezzjoni tal-vittmi tal-kriminalità, u li tissostitwixxi d-Deċiżjoni Qafas tal-Kunsill 2001/220/ĠAI[8],
– wara li kkunsidra d-Direttiva 2011/99/UE tat-13 ta' Diċembru 2011 dwar l-ordni Ewropea ta' protezzjoni[9] u r-Regolament (UE) Nru 606/2013 tat-12 ta' Ġunju 2013 dwar ir-rikonoxximent reċiproku ta' miżuri ta' protezzjoni f'materji ċivili[10](10),
– wara li kkunsidra d-Direttiva 2006/54/KE dwar l-implimentazzjoni tal-prinċipju ta' opportunitajiet indaqs u ta' trattament ugwali tal-irġiel u n-nisa fi kwistjonijiet ta' impjiegi u xogħol (tfassil mill-ġdid)[11] u d-Direttiva 2004/113/KE li timplimenta l-prinċipju ta' trattament ugwali bejn l-irġiel u n-nisa fl-aċċess għal u l-provvista ta' merkanzija u servizzi[12], li jiddefinixxu u jikkundannaw il-fastidju u l-fastidju sesswali,
– wara li kkunsidra r-riżoluzzjonijiet tiegħu tal-14 ta' Marzu 2017 dwar l-ugwaljanza bejn in-nisa u l-irġiel fl-Unjoni Ewropea fl-2014-2015[13], u tal-10 ta' Marzu 2015 dwar il-progress fuq l-ugwaljanza bejn in-nisa u l-irġiel fl-Unjoni Ewropea fl-2013[14],
– wara li kkunsidrat l-Artikolu 12a tar-Regolamenti tal-Persunal,
– wara li kkunsidra d-Deċiżjoni tal-Kummissjoni tas-26 ta' April 2006 dwar il-politika tal-Kummissjoni Ewropea fil-qasam tal-protezzjoni tad-dinjità tal-persuna u tal-ġlieda kontra l-fastidju psikoloġiku u l-fastidju sesswali,
– wara li kkunsidra l-gwida għall-Membri tal-Parlament Ewropew bit-titolu "Il-prevenzjoni tal-intimidazzjoni fuq il-post tax-xogħol", u l-pjan ta' azzjoni tal-amministrazzjoni tal-Parlament dwar din il-kwistjoni kruċjali,
– wara li kkunsidra l-Artikolu 123(2) tar-Regoli ta' Proċedura tiegħu,
A. billi l-ugwaljanza bejn is-sessi hija valur fundamentali tal-UE; billi d-dritt għat-trattament ugwali u n-nondiskriminazzjoni huwa dritt fundamentali stabbilit fit-Trattati u fil-Karta tad-Drittijiet Fundamentali u jenħtieġ li jiġi rrispettat, promoss u applikat fil-leġiżlazzjoni, fil-prattika, fis-sentenzi ġuridiċi u fil-ħajja ta' kuljum;
B. billi, skont l-Indiċi tal-Ugwaljanza bejn is-Sessi tal-2017, l-Istati Membri kollha għadhom lura milli jiksbu l-ugwaljanza bejn in-nisa u l-irġiel, u l-progress miexi bil-mod; billi l-vjolenza sessista hija kemm kawża kif ukoll konsegwenza ta' inugwaljanzi bejn in-nisa u l-irġiel;
C. billi "fastidju sesswali" ifisser kondotta relatata mas-sess li mhijiex mixtieqa mill-persuna li lejha hija indirizzata u li għandha l-għan jew l-effett li toffendi dik il-persuna jew li toħloq ambjent intimidanti, ostili, jew offensiv jew disturbanti; billi l-fastidju sesswali għandu jiġi ttrattat bħala diskriminazzjoni abbażi tas-sess. billi l-fastidju sesswali jista' jiġi espress permezz ta' att wieħed jew minn imġiba persistenti;
D. billi n-nisa fl-Unjoni Ewropea mhumiex protetti b'mod indaqs kontra l-vjolenza mill-irġiel, il-fastidju u l-abbuż sesswali minħabba l-politiki u l-leġiżlazzjoni differenti fl-Istati Membri; billi s-sistemi ġudizzjarji ma jipprovdux biżżejjed appoġġ lin-nisa;
E. billi l-vjolenza sesswali u l-fastidju fuq il-post tax-xogħol huma kwistjonijiet ta' saħħa u sikurezza u għandhom jiġu indirizzati u impediti bħala tali;
F. billi m'hemm l-ebda intervent wieħed li jelimina waħdu l-vjolenza u l-fastidju sesswali, iżda taħlita ta' azzjonijiet infrastrutturali, legali, ġudizzjarji, ta’ infurzar, edukattivi, tas-saħħa u azzjonijiet oħra relatati mas-servizzi jistgħu jnaqqsu l-għadd ta' każijiet u l-konsegwenzi tagħhom;
G. billi r-rapport tal-Aġenzija tal-Unjoni Ewropea għad-Drittijiet Fundamentali ta' Marzu 2014 bit-titolu "Violence against women: an EU-wide survey" (Il-vjolenza kontra n-nisa: stħarriġ fl-UE kollha) juri li mara minn kull 10 ġiet soġġetta għal fastidju sesswali jew stalking bl-użu ta' teknoloġija ġdida, filwaqt li 75 % tan-nisa fi rwoli ta' teħid ta' deċiżjonijiet b'responsabilità ogħla kellhom iġarrbu fastidju sesswali; billi dan juri li l-ebda mara jew tifla, irrispettivament mill-età u l-pożizzjoni fil-ħajja, mhi sikura minn vjolenza sessista;
H. billi l-fastidju u l-abbuż sesswali, b’mod predominanti mill-irġiel fuq in-nisa, hija problema strutturali u mifruxa mal-Ewropa kollha u mad-dinja, u hija fenomenu li jinvolvi l-vittmi u lil dawk li jwettqu d-delitt irrispettivament mill-età, l-isfond tal-edukazzjoni, id-dħul finanzjarju u l-pożizzjoni soċjali, u huwa marbut mad-distribuzzjoni inugwali tal-poter bejn in-nisa u l-irġiel fis-soċjetà tagħna;
I. billi l-vjolenza fuq in-nisa, inkluż il-fastidju sesswali u l-abbuż sesswali, hija tollerata wisq faċilment; billi fil-fatt hija tikkostitwixxi ksur sistemiku tad-drittijiet fundamentali u delitt serju li jrid jiġi kkastigat bħal tali; billi l-impunità trid tintemm sabiex jiġi żgurat li l-awturi jiġu soġġetti għal proċedura kriminali u n-nisa u l-bniet li ħelsuha minn vjolenza jingħataw l-appoġġ u r-rikonoxximent xieraq mis-sistema ġudizzjarja sabiex jinkiser iċ-ċiklu vizzjuż tas-silenzju u s-solitudni għal dawk li kienu vittmi ta' vjolenza;
J. billi t-trasgressuri ta' vjolenza sessista spiss ikunu persuni li l-vittma diġà tafhom u f'ħafna każijiet il-vittma tkun f'pożizzjoni ta' dipendenza, fattur li jżid il-biża' tal-vittma li tirrapporta l-vjolenza;
K. billi, l-istereotipi tas-sessi u s-sessiżmu, inkluż diskors ta' mibegħda sessist, li jseħħu madwar id-dinja, offline, online u fil-ħajja pubblika u privata, jikkostitwixxu kawża ewlenija tal-forom kollha ta' vjolenza fuq in-nisa;
L. billi l-Istati Membri kollha ffirmaw il-Konvenzjoni ta' Istanbul, iżda sa issa 15 biss minnhom irratifikawha; billi l-adeżjoni tal-UE mal-Konvenzjoni ma teżonerax lill-Istati Membri mir-ratifika fil-livell nazzjonali;
M. billi l-Artikolu 40 tal-Konvenzjoni ta' Istanbul jistipula li "Il-Partijiet għandhom jieħdu l-miżuri leġiżlattivi meħtieġa jew miżuri oħra biex ikun żgurat li kull forma ta' mġiba verbali, mhux verbali jew fiżika mhux mixtieqa ta' natura sesswali, bl-għan jew bl-effett li tmur kontra d-dinjità ta' persuna, b'mod partikolari meta jinħoloq ambjent intimidanti, ostili, degradanti, umiljanti jew offensiv, tkun suġġetta għal sanzjonijiet kriminali jew oħrajn legali";
N. billi l-vjolenza u l-fastidju sesswali fi spazji pubbliċi huma mifruxa fl-Unjoni Ewropea;
O. billi l-vjolenza u l-fastidju fil-ħajja politika jolqtu lin-nisa b'mod sproporzjonat minħabba l-ġeneru tagħhom;
P. billi dan it-tip ta' vjolenza jikkostitwixxi ksur tad-drittijiet tal-bniedem u l-libertajiet fundamentali, inkluż l-obbligu li jiġi żgurat li n-nisa jkunu jistgħu jipparteċipaw liberament fir-rappreżentanza politika; billi dawn il-libertajiet huma minquxa fil-ftehimiet internazzjonali, bħalma huma l-Patt Internazzjonali dwar id-Drittijiet Ċivili u Politiċi, il-Konvenzjoni dwar l-Eliminazzjoni ta' Kull Forma ta' Diskriminazzjoni kontra n-Nisa (CEDAW), il-Pjattaforma għal Azzjoni ta' Beijing u l-Għanijiet ta' Żvilupp Sostenibbli (SDGs);
Q. billi stħarriġ mill-Unjoni Interparlamentari (IPU) ikkonkluda li, fost in-nisa li jipparteċipaw fil-ħajja politika fid-dinja kollha, inklużi dawk fi 15-il pajjiż Ewropew, 81.8 % ta' dawk li wieġbu fil-pajjiżi u r-reġjuni kollha esperjenzaw vjolenza psikoloġika, u 65.5 % kienu soġġetti bosta drabi, jew ta' spiss, għal rimarki sessisti umiljanti tul il-mandat parlamentari tagħhom;
R. billi l-fastidju sesswali huwa definit fl-Artikolu 12a tar-Regolamenti tal-Persunal;
S. billi l-biċċa l-kbira tal-parlamenti nazzjonali fl-UE m'għandhomx miżuri attivi biex jiġġieldu l-fastidju sesswali u l-abbuż sesswali fuq il-post tax-xogħol; billi l-Parlament waqqaf Kumitat Konsultattiv speċifiku biex jittratta l-ilmenti dwar fastidju bejn l-assistenti parlamentari akkreditati (APAs) u l-Membri, filwaqt li Kumitat Konsultattiv dwar il-fastidju u l-prevenzjoni tiegħu fuq ul-post tax-xogħol qed jittratta proċeduri formali oħra relatati ma' membri tal-persunal tal-amministrazzjoni u l-gruppi politiċi tal-Parlament;
Tolleranza żero għall-fastidju sesswali u l-abbuż sesswali fl-UE
1. Jikkundanna l-forom kollha ta' vjolenza kontra n-nisa, u jiddeplora l-fatt li n-nisa u l-bniet spiss jiġu esposti għal fastidju sesswali u abbuż sesswali, li jikkostitwixxu ksur serju tad-drittijiet tal-bniedem u d-dinjità tagħhom;
2. jappoġġa bil-qawwa lin-nisa u l-bniet li ħadu sehem fil-kampanja #JienUkoll, inklużi dawk li ddenunzjaw lit-trasgressuri tagħhom;
3. Itenni l-istedina tiegħu lill-Kummissjoni biex tippreżenta strateġija komprensiva tal-UE kontra l-forom kollha ta' vjolenza sessista, inkluż il-fastidju sesswali u l-abbuż sesswali fuq in-nisa u l-bniet;
4. Jitlob l-istabbiliment ta' strument tal-liġi kriminali fil-forma ta' direttiva kontra l-vjolenza sessista, inkluż il-fastidju sesswali u l-abbuż sesswali, u miżuri biex jiġi indirizzat il-qafas tas-"sitt-Pijiet bl-Ingliż" dwar il-fastidju sesswali u l-abbuż sesswali kontra n-nisa (politika, prevenzjoni, protezzjoni, prosekuzzjoni, proviżjoni u sħubija); jinsisti li l-Istati Membri jeħtieġ li jiżguraw li dawk li jwettqu d-delitt jiġu ppenalizzati kif inhu xieraq skont is-serjetà tad-delitt, huma meħtieġa juru d-diliġenza dovuta u jirreġistraw u jinvestigaw is-suriet kollha ta' vjolenza sessista, inkluż il-fastidju sesswali, bl-għan li jingħata bidu għal prosekuzzjoni pubblika, u jagħmlu pjanijiet biex jiġu żviluppati rutini investigattivi għall-pulizija u għall-professjonisti tas-settur tas-saħħa bl-għan li tiġi assikurata evidenza ta' fastidju sesswali u abbuż sesswali;
5. Ifakkar li l-fastidju sesswali jista' jieħu forom differenti (fiżiku, verbali, bil-kitba jew mod ieħor) u jinvolvi persuni tas-sess oppost jew tal-istess sess; billi firxa ta' tipi differenti ta' mġiba tista' titqies li bħala fastidju sesswali, bħal: wegħdiet ta' xi tip ta' kumpens (avvanz fil-karriera, eċċ.) minflok favuri sesswali, jew theddid ta' ritaljazzjoni jekk tali talbiet jiġu respinti; tennija ta' kummenti vulgari jew suġġestivi, jew innuendo sesswali; l-użu ta' lingwaġġ jew ġesti espliċiti u oxxeni; kumplimenti ripetuti u esaġerati dwar id-dehra ta' kollega; kuntatt fiżiku, tħakkik ma' xi ħadd, qris, jew bews deliberat mhux mixtieq; atti ta' voyeurism jew esibizzjoniżmu; l-użu ta' materjal pornografiku;
6. Jistieden lill-Istati Membri jikkriminalizzaw il-fastidju sesswali u l-abbuż sesswali fil-forom kollha tagħhom, u jimpenjaw ruħhom bis-sħiħ biex jiżguraw li dan jiġi eliminat b'mod effikaċi; huwa tal-fehma li biex jinkiseb dan jeħtieġ, fost l-oħrajn: li ssir kriminalizzazzjoni tal-fastidju sesswali fil-postijiet pubbliċi, il-ħajja politika u fuq il-post tax-xogħol; li jsiru kampanji ta' sensibilizzazzjoni dwar id-drittijiet tal-vittmi tal-fastidju sesswali u l-bullying; li jingħata taħriġ lill-pulizija u l-membri tas-sistema tal-ġustizzja kriminali dwar id-drittijiet tal-vittmi u li jiġi infurzat protokoll strett għall-appoġġ tal-vittmi u ssir investigazzjoni ta' każijiet ta' fastidju sesswali u l-bullying; li jiġi pprovdut parir legali u appoġġ mingħajr ħlas lill-vittmi biex jitressqu l-każijiet quddiem il-qorti;
7. Jistieden lill-Kummissjoni tippromwovu b'mod attiv bidla fl-attitudnijiet u fl-imġiba u li jiġġieldu s-sessiżmu u r-rwoli sterjotipati tal-ġeneru, inkluż billi jippromwovi lingwa newtrali għall-ġeneru, jagħmlu sforzi konġunti biex jiġi indirizzat ir-rwol ewlieni tal-mezzi tax-xandir u r-reklamar f'dan il-qasam, u li jinkoraġġixxu lil kulħadd, inklużi l-irġiel u s-subien, jassumu rwol attiv fil-prevenzjoni ta' kull forma ta' vjolenza;
8. Jistieden lill-Istati Membri biex jiżguraw li fis-sistemi edukattivi tagħhom ikun hemm, b'mod obbligatorju, sensibilizzazzjoni dwar il-kunsens sesswali u l-fastidju sesswali;
9. Jistieden lill-Kummissjoni tagħti bidu u tinvesti fi djalogu mal-mezzi tax-xandir dwar ir-responsabilità tagħhom li jipprovdu informazzjoni oġġettiva dwar il-vjolenza sesswali u l-intimidazzjoni fi spazji pubbliċi, fuq il-post tax-xogħol u bnadi oħra u biex jiġu mħeġġa jagħtu prominenza lill-kampanji ta' sensibilizzazzjoni u lill-ħidma tas-soċjetà ċivili fil-ġlieda kontra l-vjolenza kontra n-nisa;
10. Jistieden lill-Istati Membri jinfurzaw id-direttivi eżistenti tal-UE dwar din il-kwistjoni, b'mod partikolari d-Direttiva 2006/54/KE dwar l-implimentazzjoni tal-prinċipju ta' opportunitajiet indaqs u ta' trattament ugwali tal-irġiel u n-nisa fi kwistjonijiet ta' impjiegi u xogħol u d-Direttiva 2004/113/KE li timplimenta l-prinċipju ta' trattament ugwali bejn l-irġiel u n-nisa fl-aċċess għal u l-provvista ta' merkanzija u servizzi, li jiddefinixxu u jikkundannaw il-fastidju u l-fastidju sesswali, u jistedinhom ukoll jallokaw riżorsi finanzjarji u umani adegwati bil-għan li jipprevjenu u jiġġieldu kontra l-vjolenza, il-fastidju sesswali u l-abbuż sesswali, jagħtu s-setgħa lin-nisa u lill-bniet, jipproteġu lill-vittmi u jħarsu d-dritt tal-vittmi għal kumpens;
11. Jistieden lill-Istati Membri jimplimentaw bis-sħiħ id-Direttiva 2011/99/UE dwar l-ordni Ewropea ta' protezzjoni u r-Regolament (UE) Nru 606/2013 dwar ir-rikonoxximent reċiproku ta' miżuri ta' protezzjoni f'materji ċivili; jistieden lill-Kummissjoni tippubblika r-rapport ta' implimentazzjoni tagħha, mistenni mill-1 ta' Jannar 2016 'il quddiem;
12. Jistieden lill-Kummissjoni tirrevedi d-deċiżjoni Qafas tal-UE attwalment fis-seħħ dwar il-ġlieda kontra ċerti forom u espressjonijiet ta' razziżmu u ksenofobija permezz tal-liġi kriminali, bil-għan li jiġu inklużi s-sessiżmu, l-atti kriminali ta' preġudizzju u l-inċitament għall-mibegħda abbażi tal-orjentazzjoni sesswali, l-identità tal-ġeneru u l-karatteristiċi sesswali;
13. Jitlob lill-Kummissjoni ttejjeb il-ġbir ta' data diseggregata komparabbli dwar il-vjolenza sessista fil-livell tal-UE;
Fastidju sesswali fil-parlamenti, inkluż il-Parlament Ewropew
14. Jistieden lill-Istati Membri jeżaminaw is-sitwazzjoni tal-fastidju u l-abbuż sesswali, biex jieħdu miżuri attivi ħalli jiġġielduhom fil-parlamenti nazzjonali tagħhom, u jimplimentaw u jinfurzaw b'mod adegwat politika ta' rispett u dinjità fuq il-post tax-xogħol għall-membri eletti u l-persunal; jitlob li l-implimentazzjoni ta' tali politika tiġi mmonitorjata;
15. Jistieden lill-Istati Membri jipprovdu appoġġ u protezzjoni għall-membri parlamentari li jkollhom kuntatt mal-pubbliku, b'mod partikolari dawk li qed jesperjenzaw abbuż sesswali u theddid ta' vjolenza sessista, anki online;
16. Jitlob li jitlaqqa' kumitat ta' esperti indipendenti b'mandat li jeżamina s-sitwazzjoni tal-fastidju u l-abbuż sesswali fil-Parlament Ewropew;
17. Iħeġġeġ lill-Parlament jagħraf li l-fastidju sesswali u l-abbuż sesswali fl-istituzzjoni huma reat f'każijiet fejn il-vittma ma kinitx tat il-kunsens tagħha, sabiex jiżgura li reati bħal dawn jirriżultaw fi prosekuzzjoni awtomatika;
18. Jistieden lill-Parlament jirrevedi u jsaħħaħ il-funzjonament tal-Kumitat Konsultattiv li jittratta l-ilmenti ta' fastidju bejn l-assistenti parlamentari akkreditati u l-Membri tal-Parlament; jitlob lill-Kumitat Konsultattiv dwar il-fastidju u l-prevenzjoni tiegħu biex jissaħħaħ bil-ħsieb li jiġu kkonsolidati l-miżuri pożittivi tiegħu u jiġu evitati l-kunflitti ta' interess rigward il-membri ta' dawk il-kumitati importanti, u li jiġi stabbilit kumitat iddedikat speċjali dwar il-fastidju sesswali, li jinkludi konsulent legali u rappreżentanti tal-persunal mediku bil-għan li jinvestiga każijiet formali, jinżamm reġistru kunfidenzjali tal-każijiet matul iż-żmien u jiġi adottat l-aħjar mod biex tiġi żgurata tolleranza żero fil-livelli kollha tal-istituzzjoni;
19. Jistieden lill-Parlament jappoġġa bis-sħiħ lill-vittmi li jressqu l-każijiet fi ħdan l-istituzzjoni u/jew mal-pulizija lokali, bil-għan li jiġu attivati miżuri għall-protezzjoni ta' emerġenza u salvagwardja fejn meħtieġ u jiġi implimentat bis-sħiħ l-Artikolu 12a tar-Regolamenti tal-Persunal, filwaqt li jiġi żgurat li l-każijiet jiġu investigati bis-sħiħ u li jittieħdu miżuri dixxiplinari;
20. Jistieden lill-Parlament jiżgura l-implimentazzjoni ta' pjan ta' azzjoni b'saħħtu u effikaċi fl-interess tal-prevenzjoni u l-appoġġ u t-taħriġ obbligatorju għall-persunal u l-Membri kollha dwar ir-rispett u d-dinjità fuq il-post tax-xogħol bil-għan li jiġi żgurat li approċċ ta' tolleranza żero isir in-norma; jirriżolvi li jimpenja ruħu bis-sħiħ f'kampanji ta' sensibilizzazzjoni mal-Membri u s-servizzi kollha tal-amministrazzjoni, b'fokus speċjali fuq gruppi li jinsabu f'qagħda vulnerabbli, bħall-apprentisti, l-assistenti parlamentari akkreditati (APAs) u l-aġenti kuntrattwali, u li jitwaqqaf netwerk istituzzjonali ta' counsellors kunfidenzjali biex jappoġġaw u jagħtu parir lill-vittmi, kif inhi l-prattika fil-Kummissjoni;
o
o o
21. Jagħti istruzzjonijiet lill-President tiegħu biex jgħaddi din ir-riżoluzzjoni lill-Parlament Ewropew, lill-parlamenti u lill-gvernijiet tal-Istati Membri, lill-Kunsill, lill-Kummissjoni u lill-Assemblea Parlamentari tal-Kunsill tal-Ewropa.