Dokument ta' sessjoni
24.10.2017
MOZZJONI GĦAL RIŻOLUZZJONI
imressqa wara d-dikjarazzjoni tal-Kummissjoni
skont l-Artikolu 123(2) tar-Regoli ta' Proċedura
dwar il-ġlieda kontra l-fastidju u l-abbuż sesswali fl-UE
( 2017/2897(RSP) )
Mylène Troszczynski
f'isem il-Grupp ENF
Riżoluzzjoni tal-Parlament Ewropew dwar il-ġlieda kontra l-fastidju u l-abbuż sesswali fl-UE
( 2017/2897(RSP) )
Il-Parlament Ewropew,
– wara li kkunsidra d-Dikjarazzjoni Universali tad-Drittijiet tal-Bniedem tal-1948,
– wara li kkunsidra d-Dikjarazzjoni dwar id-Drittijiet tat-Tfal tal-1924,
– wara li kkunsidra d-Deċiżjoni Nru 1351/2008/KE tal-Parlament Ewropew u tal-Kunsill tas-16 ta' Diċembru 2008 li tistabbilixxi programm Komunitarju pluriennali dwar il-ħarsien tat-tfal li jużaw l-Internet u t-teknoloġiji l-oħrajn tal-komunikazzjoni[1],
– wara li kkunsidra d-Direttiva 2012/29/UE tal-Parlament Ewropew u tal-Kunsill tal-25 ta' Ottubru 2012 li tistabbilixxi standards minimi fir-rigward tad-drittijiet, l-appoġġ u l-protezzjoni tal-vittmi tal-kriminalità, u li tissostitwixxi d-Deċiżjoni Qafas tal-Kunsill 2001/220/ĠAI[2],
– wara li kkunsidra d-dikjarazzjoni mill-Kummissjoni tal-25 ta' Ottubru 2017 dwar il-ġlieda kontra l-fastidju u l-abbużi sesswali fl-UE,
– wara li kkunsidra l-Artikolu 123(2) tar-Regoli ta' Proċedura tiegħu,
A. billi l-fastidju sesswali jikkonsisti fl-impożizzjoni fuq persuna, b'mod repetut, ta' kliem jew imġiba b'konnotazzjonijiet sesswali li jiksru d-dritt għad-dinjità tiegħu jew tagħha minħabba n-natura degradanti jew umiljanti tagħhom jew li joħolqu ambjent intimidanti, ostili, jew offensiv fil-konfront tiegħu jew tagħha;
B. billi l-fastidju sesswali jista', pereżempju, jieħu l-forma ta' riferenzi sesswali jew messaġġi suġġestivi;
C. billi l-fastidju sesswali m'għandux jiġi konfuż mal-attakk sesswali, li jinvolvi il-kuntatt fiżiku mingħajr kunsens (eż. fondling), kif ukoll il-vjolenza, l-sfurzar jew it-theddid;
D. billi l-fastidju sesswali m'għandux jiġi konfuż mal-fastidju morali (reat) jew stupru (delitt);
E. billi f'diversi leġiżlazzjonijiet nazzjonali, l-awtur ta' fastidju sesswali jew stupru jikkommetti reat u jeħel piena ta' ħabs u multa; billi dawn il-pieni jiżdiedu f'ċerti każijiet, b'mod partikolari meta l-awturi jkunu abbużaw mill-awtorità mogħtija lilhom minħabba l-funzjoni tagħhom jew meta l-vittmi jkunu kkunsidrati partikolarment vulnerabbli;
F. billi l-użu purament kummerċjali tal-ġisem femminili għarwien jew kważi għarwien jista' jikkontribwixxi għat-tnaqqis ta' rispett tal-irġiel fil-konfront tan-nisa;
G. billi fl-31 ta' Diċembru 2015 f'Cologne, ġew irreġistrati 470 rapport ta' vjolenza sesswali; billi l-awturi tal-attakki kienu deskritti mill-pulizija u l-prosekuturi bħala "li jappartjenu għall-kategorija ġenerali ta' rifuġjati" u "immigranti illegali";
1. Jikkundanna l-każijiet allegati ta' fastidju sesswali rrappurtati fi ħdan l-istituzzjonijiet tal-UE;
2. Iqis li l-pieni applikabbli għal fastidju sesswali għandhom jiżdiedu u li l-pieni applikabbli għal stupru għandhom jiżdiedu sal-livell massimu tal-iskala tal-pieni;
3. Jistieden lill-Istati Membri, li huma sovrani f'tali kwistjonijiet legali, biex iżidu il-pieni applikabbli għal fastidju sesswali, fastidju morali, attakki sesswali u stupri, u jipproponi li l-kundanni għal stupru jwasslu għal sentenzi b'piena massima ta' ħabs;
4. Jitlob li kull immigrant jew rifuġjat li nstab ħati ta' abbuż sesswali, attakk sesswali jew stupru jitkeċċa immedjatament mit-territorju tal-UE u jiġi kkundannat fil-pajjiż ta' oriġini tiegħu jew tagħha;
5. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.