Dokument ta' sessjoni
22.11.2017
MOZZJONI GĦAL RIŻOLUZZJONI
imressqa wara d-dikjarazzjoni tal-Viċi President tal-Kummissjoni/tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà
skont l-Artikolu 123(2) tar-Regoli ta' Proċedura
dwar is-sitwazzjoni fil-Jemen
( 2017/2849(RSP) )
Harald Vilimsky
f'isem il-Grupp ENF
Riżoluzzjoni tal-Parlament Ewropew dwar is-sitwazzjoni fil-Jemen
( 2017/2849(RSP) )
Il-Parlament Ewropew,
– wara li kkunsidra d-dikjarazzjoni tal-14 ta' Novembru 2017 mill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà dwar is-sitwazzjoni fil-Jemen,
– wara li kkunsidra l-Artikolu 123(2) tar-Regoli ta' Proċedura tiegħu,
A. billi l-kunflitt bejn l-Arabja Sawdija u l-Gvern Houthi fil-Jemen laħaq livell ġdid ta' aggressjoni; billi dan il-kunflitt jaġixxi bħala gwerra bi prokura, li l-konsegwenzi tiegħu huma devastanti għall-pajjiż u l-popolazzjoni tiegħu; billi, minkejja l-appelli internazzjonali għal soluzzjoni politika għall-kriżi, il-partijiet fil-kunflitt ma rnexxilhomx jilħqu qbil u l-ġlied għadu għaddej; billi l-Mibgħut Speċjali tan-NU għall-Jemen, Ismail Ould Cheikh Ahmed, irrimarka dwar il-livell sorprendentement baxx ta' interess internazzjonali fil-kunflitt fil-Jemen;
B. billi l-Koalizzjoni Għarbija mmexxija mill-Arabja Sawdija, ma għamlet l-ebda tentattiv biex issolvi l-kunflitt b'mod diplomatiku, iżda minflok intensifikat il-kunflitt permezz ta' attakki mill-ajru u atti oħra ta' aggressjoni fil-Jemen; billi l-kunflitti politiċi domestiċi fl-Arabja Sawdija jistgħu jwasslu għal aktar aggressjoni militari kontra l-Jemen; billi hemm suspett qawwi li l-Koalizjoni Għarbija kkooperat ma' organizzazzjonijiet terroristiċi, bħal Al-Qaida u d-Da'esh fil-Jemen;
C. billi, skont ir-rapporti ta' osservaturi internazzjonali, is-sitwazzjoni umanitarja hija meqjusa bħala serja ħafna, u li hija partikolarment aggravata mill-imblokk Sawdi tal-portijiet tal-Jemen; billi kważi 90 % tal-ikel bażiku fil-pajjiż jiġi importat; billi, skont il-Kumitat Internazzjonali tas-Salib l-Aħmar u n-Nazzjonijiet Uniti, dawn l-imblokki jirrappreżentaw fattur primarju li jistgħu jwasslu għal katastrofi umanitarja, li tinvolvi li madwar 27 miljun ruħ ibagħtu l-ġuħ;
D. billi, skont rapporti tan-Nazzjonijiet Uniti, hemm aktar minn żewġ miljun persuna spostata internament/refuġjata fil-Jemen; billi l-eskalazzjoni imminenti tal-kunflitt u d-deterjorament tas-sitwazzjoni umanitarja tista' twassal għal mewġa oħra ta' migrazzjoni tal-massa, li tista' wkoll ikollha effett fuq l-Ewropa;
E. billi l-Koalizzjoni Għarbija bbumbardjat deliberatament faċilitajiet ċivili 38 darba, inklużi skejjel u sptarijiet; billi s-sitwazzjoni ta' ċivili fil-Jemen, speċjalment dik tat-tfal, kompliet taggrava sa minn meta bdiet il-kriżi; billi n-Nazzjonijiet Uniti kkritikat il-Koalizzjoni Għarbija bħala responsabbli għall-mewt ta' 638 tifel u tifla;
F. billi għadhom qed jiġu esportati armi minn pajjiżi Ewropej lejn l-Arabja Sawdija, u billi huwa ssuspettat li qegħdin jintużaw fil-kunflitt fil-Jemen; billi, fir-riżoluzzjoni tagħha tat-13 ta' Settembru 2017 dwar l-esportazzjoni tal-armi: l-implimentazzjoni tal-Pożizzjoni Komuni 2008/944/CFSP[1], il-Parlament talab għall-waqfien tal-esportazzjoni kollha ta' armi jew ta' teknoloġiji militari lejn żoni ta' kunflitt; billi l-Kunsill tas-Sigurtà tan-Nazzjonijiet Uniti impona embargo fuq l-armi fuq il-milizji Houthi;
1. Iqis li l-kunflitt fil-Jemen jeħtieġ li jiġi solvut b'mod diplomatiku malajr kemm jista' jkun, speċjalment fl-interessi tal-popolazzjoni ċivili fil-Jemen; jistieden lill-partijiet kollha, b'mod partikolari l-Arabja Sawdija, sabiex tintemm kull aggressjoni militari fil-Jemen u biex tipproponi waqfien mill-ġlied immedjat segwit minn negozjati ta' paċi; jikkundanna kwalunkwe tentattiv sabiex il-kunflitt jiġi estiż għal reġjuni jew pajjiżi oħra;
2. Jikkundanna bil-qawwa l-aħħar attakki mill-ajru mmexxija mill-Arabja Sawdija fuq il-Jemen; jikkundanna kull kooperazzjoni ma' organizzazzjonijiet terroristiċi bħal Al-Qaida jew id-Da' esh matul il-kunflitt; jissuġġerixxi li n-Nazzjonijiet Uniti tfassal rapport preċiż dwar ir-relazzjonijiet militari bejn it-tmexxija militari tal-Arabja Sawdija u l-organizzazzjonijiet terroristiċi fil-Jemen;
3. Huwa mħasseb dwar is-sitwazzjoni umanitarja fil-Jemen, li hija kkawżata l-aktar mill-politika ta' imblokk tal-Arabja Sawdija u l-alleati tagħha kif ukoll mill-attakki mill-ajru fuq l-infrastruttura tal-pajjiż; jistieden lill-Arabja Sawdija biex minnufih itemm l-imblokki fuq il-portijiet tal-Jemen sabiex tiġi evitata katastrofi umanitarja; huwa mħasseb dwar l-eskalazzjoni tal-kunflitt li tista' twassal għal mewġa oħra ta' migrazzjoni tal-massa, li jkollha effett ukoll fuq il-pajjiżi Ewropej;
4. Jenfasizza li l-Koalizzjoni Għarbija mmexxija mill-Arabja Sawdija, deliberament attakkat faċilitajiet ċivili, fejn kien hemm tfal; jikkritika bil-qawwa kollha l-aggressjoni militari kontra ċivili, b'mod partikolari t-tfal; jikkundanna l-attakki kollha fuq faċilitajiet ċivili, bħall-isptarijiet u l-iskejjel, u jħeġġeġ lill-partijiet kollha fil-kunflitt biex dawn it-tipi ta' attakki jieqfu; jistieden lin-Nazzjonijiet Uniti biex jeskludu lill-Arabja Sawdija mill-Kunsill tad-Drittijiet tal-Bniedem;
5. Jenfasizza li l-Arabja Sawdija għadha timporta armi u teknoloġiji militari minn pajjiżi tal-UE, li huma suspettati li qed jintużaw fil-kunflitt fil-Jemen; tissuġġerixxi li n-Nazzjonijiet Uniti għandha timponi embargo fuq l-armi fuq l-Arabja Sawdija;
6. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni/lir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, lill-gvernijiet u lill-parlamenti tal-Istati Membri, lis-Segretarju Ġenerali tan-Nazzjonijiet Uniti, lis-Segretarju Ġenerali tal-Kunsill ta' Kooperazzjoni tal-Golf, lis-Segretarju Ġenerali tal-Lega tal-Istati Għarab u lill-Gvern tal-Jemen.