Dokument ta' sessjoni

 

A7-0138/2011

6.4.2011

RAPPORT

dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2009, Taqsima V – Il-Qorti tal-Awdituri

(C7‑0215/2010 – 2010/2146(DEC) )

Kumitat għall-Kontroll tal-Baġit

Rapporteur: Crescenzio Rivellini

PR_DEC_Other

WERREJ

Paġna

1. PROPOSTA GĦAL DEĊIŻJONI TAL-PARLAMENT EWROPEW.....................................3

2. MOZZJONI GĦAL RIŻOLUZZJONI TAL-PARLAMENT EWROPEW...............................5

RIŻULTAT TAL-VOTAZZJONI FINALI FIL-KUMITAT........................................................9

1. PROPOSTA GĦAL DEĊIŻJONI TAL-PARLAMENT EWROPEW

dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2009, Taqsima V – Il-Qorti tal-Awdituri

(C7‑0215/2010 – 2010/2146(DEC) )

Il-Parlament Ewropew,

–   wara li kkunsidra l-baġit ġenerali tal-Unjoni Ewropea għas-sena finanzjarja 2009[1],

–   wara li kkunsidra l-kontijiet annwali finali tal-Unjoni Ewropea għas-sena finanzjarja 2009 ( SEC(2010)0963 – C7‑0215/2010)[2],

–   wara li kkunsidra r-rapport annwali tal-Qorti tal-Awdituri għall-awtorità ta' kwittanza dwar il-verifiki interni mwettqa fis-sena 2009,

–   wara li kkunsidra r-Rapport Annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2009, flimkien mar-risposti tal-istituzzjonijiet[3],

–   wara li kkunsidra d-dikjarazzjoni ta' assigurazzjoni dwar l-affidabilità tal-kontijiet, kif ukoll il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri skont l-Artikolu 287 tat-Trattat dwar il-Funzjonament tal-Unjoni Ewropea[4],

–   wara li kkunsidra l-Artikolu 272(10) u l-Artikoli 274, 275 u 276 tat-Trattat KE u l-Artikolu 314(10) u l-Artikoli 317, 318 u 319 tat-Trattat dwar il-Funzjonament tal-Unjoni Ewropea,

–   wara li kkunsidra r-Regolament tal-Kunsill (KE, Euratom) Nru 1605/2002 tal-25 ta' Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej[5], u b'mod partikulari l-Artikoli 50, 86, 145, 146 u 147 tiegħu,

–   wara li kkunsidra l-Artikolu 77 u l-Anness VI tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Kontroll tal-Baġit ( A7-0138/2011 ),

1.  Jagħti l-kwittanza lis-Segretarju Ġenerali tal-Qorti tal-Awdituri fir-rigward tal-implimentazzjoni tal-baġit tal-Qorti tal-Awdituri għas-sena finanzjarja 2009;

2.  Jippreżenta l-kummenti tiegħu fir-riżoluzzjoni t'hawn taħt;

3.  Jagħti istruzzjonijiet lill-President tiegħu biex jgħaddi din id-Deċiżjoni u r-riżoluzzjoni li hi parti integrali minnha lill-Kunsill, lill-Kummissjoni, lill-Qorti tal-Ġustizzja tal-Unjoni Ewropea, lill-Qorti tal-Awdituri, lill-Ombudsman Ewropew u lill-Kontrollur Ewropew għall-Protezzjoni tad-Data, u biex jiżgura li jiġu ppubblikati f'Il-Ġurnal Uffiċjali tal-Unjoni Ewropea (serje L).

 

2. MOZZJONI GĦAL RIŻOLUZZJONI TAL-PARLAMENT EWROPEW

li tinkludi kummenti li jagħmlu parti integrali mid-Deċiżjoni dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2009, Taqsima V – Il-Qorti tal-Awdituri

(C7‑0215/2010 – 2010/2146(DEC) )

Il-Parlament Ewropew,

–   wara li kkunsidra l-baġit ġenerali tal-Unjoni Ewropea għas-sena finanzjarja 2009[6],

–   wara li kkunsidra l-kontijiet annwali finali tal-Unjoni Ewropea għas-sena finanzjarja 2009 ( SEC(2010)0963 – C7‑0215/2010)[7],

–   wara li kkunsidra r-rapport annwali tal-Qorti tal-Awdituri għall-awtorità ta' kwittanza dwar il-verifiki interni mwettqa fis-sena 2009,

–   wara li kkunsidra r-Rapport Annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2009, flimkien mar-risposti tal-istituzzjonijiet[8],

–   wara li kkunsidra d-dikjarazzjoni ta' assigurazzjoni dwar l-affidabilità tal-kontijiet, kif ukoll il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri skont l-Artikolu 287 tat-Trattat dwar il-Funzjonament tal-Unjoni Ewropea[9],

–   wara li kkunsidra l-Artikolu 272(10) u l-Artikoli 274, 275 u 276 tat-Trattat KE u l-Artikolu 314(10) u l-Artikoli 317, 318 u 319 tat-Trattat dwar il-Funzjonament tal-Unjoni Ewropea,

–   wara li kkunsidra r-Regolament tal-Kunsill (KE, Euratom) Nru 1605/2002 tal-25 ta' Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej[10], u b'mod partikulari l-Artikoli 50, 86, 145, 146 u 147 tiegħu,

–   wara li kkunsidra l-Artikolu 77 u l-Anness VI tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Kontroll tal-Baġit ( A7-0138/2011 ),

1. Jinnota li fl-2009 l-Qorti tal-Awdituri kellha disponibbli approprjazzjonijiet għall-impenji li kienu jammontaw għal total ta' EUR 188 000 000 (EUR 133 000 000 fl-2008; EUR 122 000 000 fl-2007), b'rata ta' utilizzazzjoni ta' 92.19 %, li hija taħt il-medja tal-istituzzjonijiet l-oħrajn (97.69 %);

2. Ifakkar li, għas-sena finanzjarja 2009, il-kontijiet tal-Qorti tal-Awdituri kienet/u verifikata/i minn kumpanija esterna, PricewaterhouseCoopers (bħal fl-2008 u l-2007), li waslet għall-konklużjonijiet li ġejjin:

(a)       fir-rigward tal-preċiżjoni tal-kontijiet għas-sena finanzjarja 2009, li "fil-fehma tagħna, dawn id-dikjarazzjonijiet finanzjarji jagħtu stampa vera u korretta tal-qagħda finanzjarja tal-Qorti Ewropea tal-Awdituri mill-31 ta' Diċembru 2009, u għalhekk ir-riżultat finanzjarju u l-flussi tal-likwidità tagħha għas-sena ntemmu f'konformità mar-Regolament tal-Kunsill (KE, EURATOM) Nru 1605/2002 tal-25 ta' Ġunju, mar-Regolament tal-Kummissjoni (KE, EURATOM) Nru 2342/2002 tat-23 ta' Diċembru 2002 li jippreskrivi regoli ddettaljati għall-implimentazzjoni tar-Regolament tal-Kunsill imsemmi, u mar-Regoli tal-Kontabilità tal-Qorti Ewropea tal-Awdituri"; kif ukoll

(b)      fir-rigward tal-użu tar-riżorsi finanzjarji assenjati lill-Qorti tal-Awdituri u ma' kemm huma xierqa l-proċeduri ta' kontroll fis-seħħ matul is-sena finanzjarja 2009, li "xejn ma ġibed l-attenzjoni tagħna biex iġegħelna nemmnu li fl-aspetti materjali kollha u abbażi tal-kriterji msemmija hawn fuq: (a) ir-riżorsi assenjati lill-Qorti ma ntużawx għall-għanijiet li għalihom kienu intiżi; (b) il-proċeduri ta’ kontroll fis-seħħ ma jagħtux il-garanziji meħtieġa biex jiżguraw il-konformità tal-operazzjonijiet finanzjarji mar-regoli u r-regolamenti applikabbli";

3. Jilqa’ l-istrateġija ta’ awditjar tal-Qorti tal-Awdituri għall-perjodu 2009 - 2012 u jappoġġa l-għanijiet prijoritarji tagħha (jintuża l-potenzjal kollu tal-impatt globali mill-awditjar tagħha u tiżdied l-effiċjenza billi jsir l-aħjar użu tar-riżorsi); jistenna li l-Qorti tal-Awdituri tirrapporta dwar il-passi meħuda biex tiġi implimentata din l-istrateġija ta' awditjar, kif ukoll li turi l-progress f'din id-direzzjoni bl-użu ta’ Indikaturi Ewlenin tar-Rendiment (KPI), b'mod partikolari bl-introduzzjoni tal-KPI 1 sa 4 fl-2010; jilqa' b'mod partikolari l-pjan li tippubblika segwiti fir-rigward tar-rapporti speċjali biex jiżdied l-impatt tagħhom;

4. Jilqa' t-titjib fil-KPI 5, 6 u 7 mill-2008 sal-2009, u jinnota b'sodisfazzjon li l-Qorti tal-Awdituri laħqet il-miri tagħha fir-rigward tal-KPI 8 u 9; jinnota li l-Qorti tal-Awdituri ma laħqitx il-mira tagħha fir-rigward tal-Indikaturi Ewlenin tar-Rendiment 10, li fl-2009 meta mqabbel mal-2008 l-għadd ta' ġranet ta' taħriġ naqas minn 10 għal 9, u l-għadd ta' ġranet iddedikati mill-awdituri għat-taħriġ professjonali minbarra korsijiet tal-lingwa kien waqa’ minn 7 għal 4, liema ċifri ma jirrispettawx il-linji gwida tal-Federazzjoni Internazzjonali tal-Kontabilisti (40 siegħa/5 ijiem);

5. Jinnota ż-żieda konsiderevoli fl-għadd ta' rapporti prodotti mill-Qorti tal-Awdituri, b'mod partikolari, iż-żieda ta' għadd ta' rapporti speċjali (minn 12 għal 18) u rapporti annwali speċifiċi (minn 29 għal 37), minkejja li l-għadd ta' opinjonijiet naqas; jistenna li l-eżerċizzji ta’ awditjar tar-rendiment li fuqhom huma bbażati r-rapporti speċjali tal-Qorti tal-Awdituri se jikkontribwixxu għall-missjoni primarja tagħha li twettaq awditjar tal-finanzi tal-Unjoni;

6. Imħasseb bin-nuqqas ta' informazzjoni dettaljata fir-rapporti speċifiċi annwali tal-Qorti tal-Awdituri dwar l-aġenziji; iħeġġeġ lill-Qorti tal-Awdituri biex fil-ġejjieni tinkludi aktar tagħrif sħiħ fir-rapporti tagħha dwar l-aġenziji, b'mod partikolari fir-rigward tal-konklużjonijiet tar-rapporti tal-awdituri interni;

7. Jilqa' l-fatt li matul it-tħejjija tar-Rapport Annwali għas-sena finanzjarja 2009, il-Qorti tal-Awdituri wettqet valutazzjoni fil-fond tas-sistemi ta' sorveljanza u kontroll fil-Qorti tal-Ġustizzja, fl-Ombudsman Ewropew u fil-Kontrollur Ewropew għall-Protezzjoni tad-Data, li inkludiet l-eżami ta' kampjun addizzjonali ta' transazzjonijiet ta' ħlasijiet relatati mar-riżorsi umani u ma’ nefqa amministrattiva oħra;

8. Iħeġġeġ lill-Qorti tal-Awdituri biex tkompli u twessa’ din il-prattika, u li b'mod partikolari tikkunsidra li twettaq valutazzjoni fid-dettall tas-sistemi ta' sorveljanza u kontroll fil-Kunsill; iħeġġeġ ukoll lill-Qorti tal-Awdituri biex tikkunsidra l-possibilità li jsir użu ta' modi ġodda u innovattivi biex jitwettaq l-awditjar, inklużi l-prodotti ġodda msemmija fl-istrateġija ta' awditjar 2009 - -2012, u, b’hekk, tiġi analizzata l-possibilità ta' titjib addizzjonali fir-rigward tal-produzzjoni u l-effikaċja tal-awditjar;

9. Iqis li l-kooperazzjoni bejn il-Qorti tal-Awdituri u l-Parlament tista’ tissaħħaħ bis-simplikar tal-metodi ta’ ħidma u tal-istrateġiji u ssaħħaħ aktar is-sinerġiji bejn iż-żewġ istituzzjonijiet; jilqa' f'dan ir-rigward il-miżuri li qed tieħu l-Qorti tal-Awdituri biex tirriforma u ttejjeb b'mod kontinwu r-rwol tagħha b'konformità mat-talba tal-Parlament biex il-valutazzjonijiet u l-awditjar tagħha jkollhom impatt iktar wiesa' u profond, biex id-data tagħha tkun iktar effikaċi u utli u biex is-sistemi u l-proċeduri tagħha jkunu iktar affidabbli; jistenna b'interess ir-'rieżami ta' segwitu bejn l-pari’ li l-Qorti tal-Awdituri biħsiebha tniedi matul l-2011 (tliet snin wara r-rieżami bejn il-pari pożittiv tal-2008); iħabbar f'dan ir-rigward li l-Parlament biħsiebu joħroġ rapport fuq inizjattiva proprja dwar titjib possibbli li jista' jiġi propost lill-Qorti tal-Awdituri b'assigurazzjoni sħiħa li jista' jistrieħ fuq il-kooperazzjoni ta' din tal-aħħar;

10. Jinnota li l-Qorti tal-Awdituri rreklutat 112-il impjegat fl-2009 (69 uffiċjali, 14-il persunal temporanju, 39 persunal b'kuntratt), u n-numru totali ta' postijiet vakanti fl-aħħar tal-2009 (49) tnaqqas b'mod konsiderevoli meta mqabbel ma' tmiem l-2008 (68); jilqa' t-tnaqqis fid-dewmien tal-proċess ta’ reklutaġġ tal-Qorti tal-Awdituri;

11. Jilqa’ t-titjib kostanti fir-rigward tal-proporzjon ta’ rġiel u nisa fil-persunal tal-Qorti tal-Awdituri, b'mod partikolari t-tnaqqis tal-isproporzjon fil-livell ta’ assistenti, kapijiet tal-unità u diretturi;

12. Jinnota li r-rapport tal-2009 tal-awditur intern tal-Qorti tal-Awdituri kien ġeneralment pożittiv, jilqa' f'dan il-kuntest il-fatt li l-maġġoranza tar-rakkomandazzjonijiet imressqa mill-awditur intern ġew aċċettati u integrati fi pjanijiet ta' azzjoni korrettivi;

13. Jilqa' s-suċċess li għaddejja minnu l-kooperazzjoni interistituzzjonali bejn l-Iskola Ewropea tal-Amministrazzjoni u l-Qorti tal-Ġustizzja fil-qasam tat-taħriġ;

14. Jinnota r-reviżjoni tar-Regoli ta' Proċedura tal-Qorti tal-Awdituri, li saret fl-2010, u jistieden lill-Qorti tal-Awdituri biex tagħti valutazzjoni tal-effett ta’ dawk il-bidliet fir-Rapport tal-Attività Annwali tagħha;

15. Ifakkar, fir-rigward tad-dikjarazzjonijiet tal-interessi finanzjarji tal-membri, li f'konformità mal-Kodiċi ta’ Kondotta tal-Qorti tal-Awdituri, il-membri tal-Qorti tal-Awdituri għandhom jittrasmettu dikjarazzjoni tal-interessi finanzjarji tagħhom lill-President tal-Qorti tal-Awdituri, li jżommhom taħt kunfidenzjalità, u jiżgura li dawn id-dikjarazzjonijiet ma jkunux ippubblikati; itenni l-pożizzjoni tiegħu li, fl-interess tat-trasparenza, id-dikjarazzjonijiet tal-interessi finanzjarji tal-membri tal-istituzzjonijiet kollha tal-Unjoni għandhom ikunu aċċessibbli fuq l-Internet permezz ta' reġistru pubbliku, u jistieden lill-Qorti tal-Awdituri biex tieħu l-miżuri meħtieġa f'dan ir-rigward u tadatta u tibbaża r-regoli tagħha dwar l-'interessi finanzjarji' fuq l-abbozz il-ġdid tal-Kodiċi ta' Kondotta għall-Kummissarji, meta jkun il-każ;

16. Ifakkar li l-indipendenza, l-integrità, l-imparzjalità, l-eċċellenza u l-professjonaliżmu huma l-valuri ċentrali tal-Qorti tal-Awdituri u jqis li l-aħbarijiet li dehru fuq il-midja jirrikjedu riflessjoni, ifakkar ukoll li matul il-preżentazzjoni tar-rapport ta’ rieżami bejn il-pari, il-President tal-Qorti tal-Awdituri ħabbar li se ssir reviżjoni ta' segwitu bejn il-pari wara tliet snin; jistieden lill-Qorti tal-Awdituri tippreżenta r-riżultati ta' dan ir-rieżami bejn il-pari lill-kumitat kompetenti tal-Parlament sabiex jiġu stabbiliti, għal darb’oħra, dawk il-valuri, b’mod partikolari l-objettività, l-imparzjalità u l-professjonaliżmu tal-Qorti tal-Awdituri;

17. Ifaħħar lill-Qorti tal-Awdituri għall-kwalità tar-Rapport tal-Attività Annwali tagħha;

18. Jinnota li, kontra dak li ġara fis-snin ta’ qabel, il-missjonijiet lejn pajjiżi mhux Stati Membri ma ġewx irrapportati skont il-pajjiż fl-2009.

RIŻULTAT TAL-VOTAZZJONI FINALI FIL-KUMITAT

Data tal-adozzjoni

22.3.2011

 

 

 

Riżultat tal-votazzjoni finali

+:

–:

0:

24

1

0

Membri preżenti għall-votazzjoni finali

Marta Andreasen, Jean-Pierre Audy, Inés Ayala Sender, Zigmantas Balčytis, Andrea Češková, Andrea Cozzolino, Luigi de Magistris, Tamás Deutsch, Martin Ehrenhauser, Jens Geier, Gerben-Jan Gerbrandy, Ingeborg Gräßle, Ville Itälä, Iliana Ivanova, Bogusław Liberadzki, Monica Luisa Macovei, Jan Olbrycht, Aldo Patriciello, Crescenzio Rivellini, Christel Schaldemose, Bart Staes, Georgios Stavrakakis, Søren Bo Søndergaard

Sostitut(i) preżenti għall-votazzjoni finali

Chris Davies, Derk Jan Eppink, Christofer Fjellner, Véronique Mathieu

 

 

[1] ĠU L 69, 13.3.2009.
[2] ĠU C 308, 12.11.2010, p. 1.
[3] ĠU C 303, 9.11.2010, p. 1.
[4] ĠU C 308, 12.11.2010, p.129.
[5] ĠU L 248, 16.9.2002, p. 1.
[6] ĠU L 69, 13.3.2009.
[7] ĠU C 308, 12.11.2010, p. 1.
[8] ĠU C 303, 9.11.2010, p. 1.
[9] ĠU C 308, 12.11.2010, p.129.
[10] ĠU L 248, 16.9.2002, p. 1.