Dokument ta’ sessjoni

A7-0201/2011

30.5.2011

***I

RAPPORT

dwar il-proposta għal regolament tal-Parlament Ewropew u tal-Kunsill li jemenda r-Regolament (KE) Nru 2006/2004 dwar il-kooperazzjoni bejn l-awtoritajiet nazzjonali responsabbli għall-infurzar tal-liġijiet tal-protezzjoni tal-konsumaturi

( COM(2010)0791 – C7‑0012/2011 – 2011/0001(COD) )

Kumitat għas-Suq Intern u l-Ħarsien tal-Konsumatur

Rapporteur: Mitro Repo

PR_COD_1amCom

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

PROĊEDURA  13

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal regolament tal-Parlament Ewropew u tal-Kunsill li jemenda r-Regolament (KE) Nru 2006/2004 dwar il-kooperazzjoni bejn l-awtoritajiet nazzjonali responsabbli għall-infurzar tal-liġijiet tal-protezzjoni tal-konsumaturi

( COM(2010)0791 – C7‑0012/2011 – 2011/0001(COD) )

(Proċedura leġiżlattiva ordinarja: l-ewwel qari)

Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill ( COM(2010)0791 ),

–  wara li kkunsidra l-Artikolu 294(2) u l-Artikolu 114 tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C7–0012/2011),

–  wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

–  wara li kkunsidra l-opinjoni tal-Kumitat Ekonomiku u Soċjali tal-5 ta' Mejju 2011[1],

–  wara li kkunsidra l-Artikolu 55 tar-Regoli ta' Proċedura tiegħu,

–  wara li kkunsidra r-rapport tal-Kumitat għas-Suq Intern u l-Ħarsien tal-Konsumatur ( A7-0201/2011 ),

1.  Jadotta l-pożizzjoni tiegħu fl-ewwel qari kif tinstab hawnhekk;

2.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

3.  Jagħti istruzzjonijiet lill-President tiegħu biex jgħaddi l-pożizzjoni tal-Parlament lill-Kunsill, lill-Kummissjoni u lill-parlamenti nazzjonali.

Emenda    1

Proposta għal regolament – att li jemenda

Premessa 10 a (ġdida)

Emenda    2

Proposta għal regolament – att li jemenda

Artikolu 1 – parti introduttorja u punt 1 (ġdid)

Regolament (KE) Nru 2006/2004

Artikolu 21 a (ġdid)

NOTA SPJEGATTIVA

I.  Regolament (KE) Nru 2006/2004 dwar il-kooperazzjoni bejn l-awtoritajiet nazzjonali responsabbli għall-infurzar tal-liġijiet ta' protezzjoni tal-konsumaturi

Ir-Regolament 2006/2004 (ir-Regolament dwar kooperazzjoni fil-protezzjoni tal-konsumaturi, CPC) ġie adottat mill-Parlament Ewropew u l-Kunsill fis-27 ta' Ottubru 2004 u daħal fis-seħħ fid-29 ta' Diċembru 2006.

Ir-Regolament jimmira lejn abolizzjoni tal-ostakoli għall-kooperazzjoni transkonfinali bejn l-awtoritajiet pubbliċi tal-infurzar biex jidentifikaw, jinvestigaw u jwaqqfu jew jipprojbixxu l-infrazzjonijiet interni fl-UE tal-liġijiet li jipproteġu l-interessi tal-konsumaturi. Ir-Regolament huwa maħsub biex jiġu indirizzati b'mod effiċjenti u effikaċi n-negozjanti transkonfinali li jużaw prassi irregolari li jfixklu l-funzjonament mexxej tas-suq intern, u biex għalhekk iżid il-fiduċja tal-konsumaturi biex jidħlu għal offerti transkonfinali, u jipprevjeni li l-bejjiegħa u l-fornituri jevadu l-infurzar għad-detriment kompetittiv ta' bejjiegħa u fornituri li jsegwu l-liġi.

Ir-Regolament jilħaq dawn l-objettivi bit-twaqqif ta' netwerk madwar l-UE ta' awtoritajiet pubbliċi responsabbli mill-infurzar tal-liġijiet tal-konsumatur fl-Istati Membri (in-'Netwerk CPC'), li beda jaħdem f'Diċembru 2006. Ir-Regolament CPC jarmonizza parzjalment il-poteri investigattivi u dawk tal-infurzar tal-awtoritajiet u jistabbilixxi l-mekkaniżmi biex isir skambju ta' informazzjoni relevanti u/jew jittieħdu passi ta' infurzar biex jitwaqqfu l-infrazzjonijiet f'sitwazzjonijiet transkonfinali.

II.  Raġunijiet u objettivi tal-proposta attwali

In-netwerk stabbilit bir-Regolament jagħmel monitoraġġ tal-leġiżlazzjoni li tipproteġi l-interessi tal-konsumatur u jinfurzaha. Il-leġiżlazzjoni li tinsab fi ħdan l-ambitu tan-netwerk CPC qiegħda fil-lista fl-Anness tar-Regolament. L-objettiv tar-regolament li jemenda propost huwa li jaġġorna l-kontenuti tal-Anness biex jirriflettu l-iżviluppi leġiżlattivi reċenti fil-qasam tal-protezzjoni tal-konsumatur.

L-aġġornament tal-Anness se jkun jikkonsisti fit-tneħħija mill-Anness ta' leġiżlazzjoni li mhix relevanti għall-kooperazzjoni fil-protezzjoni tal-konsumatur bejn l-awtoritajiet nazzjonali tal-infurzar u fl-aġġornar ta' referenzi għal-leġiżlazzjoni l-qadima li ma għadhiex fis-seħħ b'referenzi għal-leġiżlazzjoni l-ġdida fil-qasam tal-protezzjoni tal-konsumatur.

Aktar importanti, l-aġġornar tal-Anness huwa meħtieġ minħabba li d-Direttiva 87/102/KEE ġiet revokata bid-dħul tad-Direttiva 2008/48/KE dwar ftehim ta' kreditu għall-konsumatur, mingħajr ma tiddikjara espliċitament li referenzi għad-Direttiva revokata għandhom jinftiehmu bħala referenzi għad-Direttiva l-ġdida. Għall-finijiet ta' ċertezza legali, dan ir-Regolament għalhekk għandu jidħol fis-seħħ bħala kwistjoni urġenti.

III.  Il-kummenti ġenerali tar-Rapporteur dwar il-funzjonament tar-Regolament CPC

Ir-Rapporteur jilqa' l-proposta tal-Kummissjoni minħabba li hija meħtieġa biex tiżgura li l-Anness għar-Regolament jirrifletti l-iżviluppi tal-ġabra tal-leġiżlazzjoni tal-UE dwar il-protezzjoni tal-konsumatur.

Filwaqt li jqis l-objettivi limitati ta' din il-proposta, ir-Rapporteur jikkunsidra, madankollu, li l-kwistjoni politika ewlenija li għandha tkun eżaminata hija dwar jekk ir-Regolament attwali jipprovdix qafas adegwat għall-infurzar transkonfinali tal-acquis tal-konsumatur.

L-aħħar rapport mill-Kummissjoni dwar l-applikazzjoni tar-Regolament CPC ippubblikat fit-2 ta' Lulju 2009[2] u l-Laqgħa ta' Livell Għoli "Lejn ir-Rispett tad-Drittijiet Ekonomiċi tal-Konsumatur fis-Suq Intern" (Brussell, 22 ta' Settembru 2010) joħroġ fil-beraħ it-tħassib dwar il-kisbiet fl-infurzar transkonfinali tal-acquis tal-konsumatur.

Numru sinifikanti ta' awtoritajiet innotifikati jew mhumiex ikkonnettjati, jew ma jużawx is-sistema attivament, għalkemm din hija prekondizzjoni għall-funzjonament effikaċi tan-Netwerk CPC. It-talbiet qed jieħdu aktar u aktar fit-tul biex jingħalqu, billi l-awtoritajiet qed jużaw l-għodda tal-IT b'modi tant differenti li dan jista' jkun qed iħalli impatt negattiv fuq l-isforzi li qegħdin jagħmlu biex jikkooperaw.

Xi kwistjonijiet oħrajn huma ta' natura aktar orizzontali, bħalma hi l-kwistjoni tad-diverġenza tal-liġijiet nazzjonali tal-konsumatur, il-kwistjoni tal-ġurisdizzjoni u l-liġi applikabbli u sa fejn japplika r-Regolament CPC għal dak li għandu x'jaqsam mal-introduzzjoni tal-obbligu tal-kooperazzjoni. Mhuwiex dejjem possibbli li jkun hemm konformità ma' talba għal assistenza reċiproka f'sitwazzjoni fejn azzjoni tista' tkun ipprojbita fl-Istat Membru tal-konsumatur imma mhux fl-Istat Membru tal-fornitur.

Problema oħra tikkonċerna l-ordni ta' preċedenza. Bħalissa m'hemm l-ebda ġabra komuni ta' prijoritajiet bejn l-awtoritajiet tal-infurzar. Huwa kruċjali u normali li l-awtoritajiet pubbliċi nazzjonali jkollhom is-sistema tagħhom ta' ordni ta' preċedenza minħabba li r-riżorsi huma limitati. Imma jekk kull talba għal assistenza reċiproka hija suġġetta għall-ordni ta' preċedenza nazzjonali, u m'hemmx qbil ta' kif jiġi stabbilit x'għandu jingħata preċedenza, is-sistema ma tistax taħdem b'mod effiċjenti. Għalhekk għandu jkun previst rwol tal-Kummissjoni fil-formazzjoni ta' metodu komuni fl-issettjar tal-prijoritajiet u tal-ippjanar multiannwali.

Hemm ukoll il-ħtieġa biex ikun żviluppat fehim kondiviż ta' fatti relevanti u interpretazzjoni komuni tar-regoli tal-UE dwar il-protezzjoni tal-konsumatur, ngħidu aħna, id-definizzjoni dwar "l-interessi kollettivi tal-konsumatur". Ħarġu wkoll fehmiet differenti ta' kif l-acquis tal-konsumatur jinteraġixxi ma' partijiet oħra tal-leġiżlazzjoni relevanti tal-UE.

Barra minn hekk, ir-regoli ta' proċedura għall-infurzar jibqgħu frammentati. Sistemi legali u sistemi ta' infurzar nazzjonali differenti jagħmluha diffiċli biex jkunu indirizzati l-infrazzjonijiet interni tal-UE b'mod effiċjenti. Xi awtoritajiet pubbliċi għandhom mezzi b'effetti aktar wiesa' biex iwaqqfu l-infrazzjonijiet filwaqt li oħrajn ikollhom jitilgħu l-qorti u jaffaċjaw proċeduri pjuttost twal.

L-ispejjeż tal-qorti jistgħu joħolqu problemi wkoll. Kif previst fl-Artikolu 15 tar-Regolament, l-awtorità li qed tapplika għandha tibqa' responsabbli għall-ispejjeż kollha u għat-telf kollu li jsiru minħabba miżuri li jinstab li ma jkunux fondati. F'xi pajjiżi, bħall-Finlandja, l-awtorità li qed tapplika m'għandhiex għalfejn tħallas minħabba li tapplika r-regola ta' servizz bla ħlas, għalkemm f'ħafna pajjiżi dan mhuwiex il-każ. Dan jista' jirriduċi n-numru ta' proċeduri ta' infrazzjonijiet li jistgħu jiġu indirizzati, jekk l-awtorità li qed tapplika ma tkunx tista' tlaħħaq mal-ispejjeż possibbli tal-proċeduri tal-qorti.

Fl-aħħar nett, il-fatt li t-talbiet qed jieħdu aktar u aktar fit-tul biex jingħalqu (medja ta' 81 ġurnata sa Ġunju 2008, b'din il-figura titla' għal 148 ġurnata sal-aħħar tal-2008) jista' jkun spjegat parzjalment minħabba li l-każijiet transkonfinali huma aktar kumplessi, imma huwa ġeneralment indikatur ta' nonkonformità mal-iskadenzi stabbiliti jew ma' rekwiżiti operattivi oħrajn.

Dan min-naħa tiegħu għandu effett fuq in-numru ta' talbiet li jidher li staġnaw jew saħansitra tnaqqsu fl-2010. Din mhijiex tendenza mixtieqa u għandha tinqaleb malajr kemm jista' jkun sabiex jintlaħaq l-objettiv finali tar-Regolament CPC. Hija l-konvinzjoni soda tar-Rapporteur li t-tnaqqis fin-numru ta' talbiet ma jirriflettix tnaqqis fin-numru ta' infrazzjonijiet interni tal-UE imma pjuttost jirrifletti n-nuqqasijiet tas-sistema.

Rigward il-kwistjoni ta' koordinament, il-metodu attwali fuq bażi settorjali għal inizjattivi tal-politika tal-konsumatur ma jiffaċilitax l-infurzar koerenti. Ikun meħtieġ rwol ikbar għall-Kummissjoni fil-koordinament tal-infurzar ta' attivitajiet pan-Ewropej minħabba li attwalment din il-problema mhix indirizzata biżżejjed.

Ir-Rapporteur huwa tal-fehma wkoll li, sabiex jintlaħqu l-objettivi għal trawwim aħjar tal-protezzjoni tal-konsumatur fl-Ewropa, l-ambitu tar-Regolament CPC għandu jitwessa' sabiex ikun jirrifletti l-ġabra tal-leġiżlazzjoni tal-UE dwar il-protezzjoni tal-konsumatur b'mod aktar olistiku u orizzontali. Sa ċertu punt l-ambitu tar-Regolament CPC diġà twessa', imma għandha ssir valutazzjoni aktar ġeneral tal-ambitu li tkun tinkludi l-leġiżlazzjoni ġestita minn dipartimenti differenti tal-Kummissjoni (ngħidu aħna, is-servizzi finanzjarji, il-leġiżlazzjoni dwar id-drittijiet tal-passiġġieri).

IV.  Il-pożizzjoni ġenerali tar-Rapporteur

Filwaqt li jqis li r-riżultati attwali tal-kooperazzjoni tal-infurzar transkonfinali mhumiex sodisfaċenti u li għandhom jittieħdu miżuri, ir-Rapporteur identifika tliet tipi ta' azzjonijiet alternattivi li jistgħu jittieħdu rigward din il-proposta:

(a) ikunu proposti emendi sostantivi mmirati biex jindirizzaw il-problemi li ġew identifikati sa issa fl-applikazzjoni tar-Regolament, (b) tkun aċċettata l-proposta teknika tal-Kummissjoni mingħajr ma jkunu proposti modifiki oħra, (c) ikunu proposti numru limitat ta' emendi, i.e. 'klawsola ta' rieżami', fejn il-Kummissjoni tintalab tieħu r-responsabbiltà ta' valutazzjoni tal-effikaċità u tal-mekkaniżmi operattivi tar-Regolament, u toħroġ, fi żmien stipulat u tajjeb, bi proposta leġiżlattiva mmirata lejn reviżjoni aktar sostanzjali tar-Regolament attwali, inkluż it-twessigħ tal-ambitu tiegħu.

Filwaqt li jirrikonoxxi l-ħtieġa għal aġġornament u konsolidazzjoni malajr tal-Anness tar-Regolament , sabiex tkun żgurata ċ-ċertezza legali għan-negozju, il-konsumaturi u l-awtoritajiet tal-infurzar,

ir-Rapporteur jqis it-tielet alternattiva bħala l-aktar waħda xierqa f'dan l-istadju.

Madankollu r-Rapporteur jixtieq jenfasizza li din il-proposta hija l-okkażjoni ġusta biex tkun ikkonfermata l-ħtieġa għal rieżami aktar sostanzjali tar-Regolament. Fil-fehma tar-Rapporteur, hemm ħtieġa reali li jiġu indirizzati n-nuqqasijiet u l-problemi fl-infurzar transkonfinali tal-acquis tal-konsumatur u biex jitjieb il-funzjonament ġenerali tan-Netwerk CPC.

Ir-Rapporteur huwa konxju li għalissa m'hemmx biżżejjed informazzjoni fuq l-operat tar-Regolament u informazzjoni simili għandha tinkiseb minn analiżi dettaljata. Bħalissa, il-Kummissjoni qed tħejji t-tieni rapport dwar l-applikazzjoni tar-Regolament CPC li għandu jiġi ppubblikat aktar tard dis-sena. Il-Kummissjoni pprevediet ukoll li twettaq evalwazzjoni esterna segwita minn konsultazzjoni pubblika fost il-partijiet interessati. Għalhekk, jidher li huwa raġonevoli li wieħed jistenna r-riżultati ta' dan il-proċess qabel ma jkunu proposti xi modifiki iktar wiesa' tar-Regolament CPC.

Bl-inklużjoni tal-'klawsola tar-rieżami' fir-Regolament, ir-Rapporteur irid jenfasizza l-ħtieġa li l-Kummissjoni timpenja ruħha għall-proċess tar-rieżami u tħaffu filwaqt li toħroġ bi proposta leġiżlattiva ġdida sal-aħħar tal-2014.

Ir-Rapporteur jenfassizza wkoll li għandu jsir stħarriġ bir-reqqa li jippreżenta stampa ċara tal-liġi tal-UE dwar il-konsumatur meta tkun qed issir il-valutazzjoni tal-ambitu tar-Regolament CPC. L-ambitu tar-Regolament għandu jitqies b'mod aktar olistiku, u finalment għandu jkopri l-leġiżlazzjoni kollha tal-UE li tolqot l-interessi kollettivi tal-konsumaturi.

Bħala konklużjoni, ir-Rapporteur jaħseb li l-infurzar transkonfinali tal-interessi tal-konsumaturi għandu jitqiegħed fuq quddiem tal-aġenda politika. Titjib fil-kooperazzjoni bejn l-awtoritajiet nazzjonali tal-infurzar għandu jiżviluppa f'rimedju aktar effiċjenti f'idejn il-konsumaturi Ewropej u jżid il-fiduċja tagħhom fis-suq intern.

PROĊEDURA