Dokument ta' sessjoni

 

A7-0034/2012

7.2.2012

***I

RAPPORT

dwar il-proposta għal regolament tal-Parlament Ewropew u tal-Kunsill dwar id-dħul gradwali aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed (tfassil mill-ġdid)

( COM(2011)0566 – C7‑0269/2011 – 2011/0243(COD) )

Kumitat għat-Trasport u t-Turiżmu

Rapporteur: Dominique Riquet

(Tfassil mill-ġdid – Artikolu 87 tar-Regoli ta’ Proċedura)

PR_COD_1recastingam

 

 

Tifsira tas-simboli użati

  *  Proċedura ta’ konsultazzjoni

  ***  Proċedura ta’ approvazzjoni

  ***I  Proċedura leġiżlattiva ordinarja (l-ewwel qari)

  ***II  Proċedura leġiżlattiva ordinarja (it-tieni qari)

  ***III  Proċedura leġiżlattiva ordinarja (it-tielet qari)

 

(It-tip ta’ proċedura jiddependi mill-bażi legali proposta mill-abbozz ta’ att.)

 

 

 

 

 

Emendi għal abbozz ta’ att

Fl-emendi li jsiru mill-Parlament, it-test emendat huwa indikat b’tipa grassa u korsiva. Test korsiv normali huwa indikazzjoni għas-servizzi tekniċi li turi partijiet tal-abbozz ta’ att li għalihom qed tkun proposta korrezzjoni bl-iskop li tgħin fil-preparazzjoni tat-test finali (pereżempju, żbalji ovvji jew nuqqasijiet f’verżjoni lingwistika partikolari). Il-korrezzjonijiet proposti huma soġġetti għall-qbil tas-servizzi tekniċi involuti.

 

L-intestatura ta’ kwalunkwe emenda għal att eżistenti, li l-abbozz ta’ att ikollu l-ħsieb li jemenda, ikun fiha t-tielet u r-raba’ linji li jidentifikaw rispettivament l-att eżistenti u d-dispożizzjoni kkonċernata f’dak l-att. Il-partijiet li jittieħdu kif inhuma minn dispożizzjoni eżistenti li l-Parlament jixtieq jemenda, imma li l-abbozz ta’ att ma jkunx emenda, huma indikati b’tipa grassa. It-tħassir eventwali li jikkonċerna dawn il-partijiet jiġi indikat kif ġej: [...].

 

 

 

 

 

 

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

NOTA SPJEGATTIVA  11

ANNESS 1: ITTRA LILL-KUMITAT GĦALL-AFFARIJIET LEGALI  13

ANNESS 2: OPINJONI TAL-GRUPP TA’ ĦIDMA KONSULTATTIV TAS-SERVIZZI LEGALI TAL-PARLAMENT EWROPEW, TAL-KUNSILL U TAL-KUMMISSJONI  15

PROĊEDURA  16

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal regolament tal-Parlament Ewropew u tal-Kunsill dwar id-dħul gradwali aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed (tfassil mill-ġdid)

( COM(2011)0566 – C7‑0269/2011 – 2011/0243(COD) )

(Proċedura leġiżlattiva ordinarja – tfassil mill-ġdid)

Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill ( COM(2011)0566 ),

–  wara li kkunsidra l-Artikolu 294(2), u l-Artikolu 100(2) tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C7-0269/2011),

–  wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

–  wara li kkunsidra l-opinjoni tal-Kumitat Ekonomiku u Soċjali Ewropew tal-7 ta' Diċembru 2011[1],

–  wara li kkonsulta mal-Kumitat tar-Reġjuni,

–  wara li kkunsidra l-Ftehim Interistituzzjonali tat-28 ta’ Novembru 2001 fuq l-użu aktar strutturat tat-teknika ta' kitba mill-ġdid tal-atti legali[2],

–  wara li kkunsidra l-ittra tal-25 ta’ Novembru tal-Kumitat għall-Affarijiet Legali indirizzata lill-Kumitat għat-trasport u t-Turiżmu skont l-Artikolu 87(3) tar-Regoli ta' Proċedura tiegħu,

–  wara li kkunsidra l-Artikoli 87 u 55 tar-Regoli ta' Proċedura tiegħu,

–  wara li kkunsidra r-rapport tal-Kumitat għat-Trasport u t-Turiżmu ( A7-0034/2012 ),

A.  billi, fl-opinjoni tal-Grupp ta’ Ħidma Konsultattiv tas-Servizzi Legali tal-Parlament Ewropew, tal-Kunsill u tal-Kummissjoni, il-proposta kkonċernata ma tinkludi ebda tibdil sostantiv ħlief dak identifikat bħala tali fil-proposta, u billi, f’dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil, il-proposta tinkludi kodifikazzjoni sempliċi tat-testi eżistenti mingħajr tibdil fis-sostanza tagħhom,

1.  Jadotta l-pożizzjoni fl-ewwel qari li tidher hawn taħt, filwaqt li jikkunsidra r-rakkomandazzjonijiet tal-Grupp ta’ Ħidma Konsultattiv tas-Servizzi Legali tal-Parlament Ewropew, tal-Kunsill u tal-Kummissjoni;

2.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

3.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

Emenda    1

Proposta għal regolament

Premessa 21

 

Test propost mill-Kummissjoni

Emenda

(21) Il-Kummissjoni għandu jkollha s-setgħa li tadotta atti delegati skont l-Artikolu 290 tat-Trattat bl-iskop li temenda ċerti referenzi għar-Regolamenti rilevanti f’MARPOL 73/78 u għar-Riżoluzzjonijiet MEPC 111(50) u 94(46), sabiex ir-referenzi jiġu allinjati mal-emendi għal dawk ir-Regolamenti u r-Riżoluzzjonijiet adottati mill-IMO, sa fejn tali emendi ma jwessgħux il-kamp ta’ applikazzjoni ta’ dan ir-Regolament.

(21) Huwa xieraq li l-Kummissjoni tiġi delegata bis-setgħa li tadotta atti delegati skont l-Artikolu 290 tat-Trattat dwar il-Funzjonament tal-Unjoni Ewropea għal dak li għandu x’jaqsam ma’ ċerti referenzi għar-Regolamenti rilevanti f’MARPOL 73/78 u għar-Ri¿oluzzjonijiet MEPC 111(50) u 94(46), sabiex ir-referenzi jiġu allinjati mal-emendi għal dawk ir-Regolamenti u r-Ri¿oluzzjonijiet adottati mill-IMO, sa fejn tali emendi ma jwessgħux il-kamp ta’ applikazzjoni ta’ dan ir-Regolament. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, anke fil-livell ta’ esperti. Il-Kummissjoni, meta tħejji u tfassal atti delegati, għandha tiżgura t-trażmissjoni simultanja, f’waqtha u xierqa ta’ dokumenti rilevanti lill-Parlament Ewropew u lill-Kunsill.

Ġustifikazzjoni

Il-Kummissjoni għandha twettaq konsultazzjonijiet xierqa qabel ma tadotta att delegat. Barra minn hekk, jekk il-Parlament jiddelega setgħat lill-Kummissjoni, huwa daqstant importanti li jinżamm infurmat b’mod xieraq u li d-dokumenti relevanti jiġu pprovduti. Din l-emenda tikkunsidra l-formulazzjoni standard ġdida rigward l-atti delegati.

 

 

Emenda    2

Proposta għal regolament

Artikolu 11

 

Test propost mill-Kummissjoni

Emenda

 

- 1. Is-setgħa ta’ adozzjoni tal-atti delegati mogħtija lill-Kummissjoni għandha tkun suġġetta għall-kundizzjonijiet stabbiliti f’dan l-Artikolu.

1. Is-setgħa ta’ adozzjoni tal-atti delegati msemmija fl-ewwel subparagrafu tal-Artikolu 10 għandha tingħata lill-Kummissjoni għal tul indeterminat.

1. Is-setgħa ta’ adozzjoni tal-atti delegati msemmija fl-ewwel subparagrafu tal-Artikolu 10 għandha tingħata lill-Kummissjoni għal perjodu ta’ ħames snin li jibda minn [data tad-dħul fis-seħħ]. Il-Kummissjoni għandha tfassal rapport fir-rigward tad-delega ta’ setgħa mhux iktar tard minn disa’ xhur qabel it-tmiem tal-perjodu ta’ ħames snin. Id-delega ta’ setgħa għandha tiġi estiża awtomatikament għal perjodi ta’ żmien identiċi, ħlief jekk il-Parlament Ewropew jew il-Kunsill jopponu tali estensjoni mhux iktar tard minn tliet xhur qabel it-tmiem ta’ kull perjodu.

 

2. Id-delega ta’ setgħa msemmija fl-ewwel subparagrafu tal-Artikolu 10 tista' tiġi revokata mill-Parlament Ewropew jew mill-Kunsill fi kwalunkwe ħin. Deċiżjoni ta’ revoka għandha ttemm id-delega ta’ setgħa speċifikata f'dik id-deċiżjoni. Ir-revoka għandha ssir effettiva fil-jum wara l-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandhiex taffettwa l-validità ta’ ebda att delegat li jkun diġà fis-seħħ.

 

3. Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

 

4. Att delegat adottat skont l-Artikolu 10(1) għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien perjodu ta’ xahrejn min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex sejrin joġġezzjonaw. Dak il-perjodu għandu jiġi estiż b’xahrejn fuq inizjattiva tal-Parlament Ewropew jew tal-Kunsill.

Ġustifikazzjoni

Id-delega tas-setgħa lill-Kummissjoni għandha tkun limitata fit-tul ta’ żmien għal perjodu ta’ ħames snin, li jista’ jiġġedded sakemm jiġu sodisfatti ċerti kundizzjonijiet, bħat-tfassil tar-rapport, u sakemm il-Parlament u l-Kunsill ma jkollhom ebda oġġezzjoni. Għandu jkun possibbli li l-perjodu għat-tressiq ta’ oġġezzjonijiet għal att delegat ikun ta’ erba’ xhur b’kollox. Dan huwa perjodu aktar realistiku biex jippermetti lill-Parlament u l-Kunsill iż-żmien li jsegwu l-proċedura neċessarja sabiex jippreżentaw oġġezzjoni. Din l-emenda tikkunsidra l-formulazzjoni standard ġdida rigward l-atti delegati.

 

 

Emenda    3

Proposta għal regolament

Artikoli 12 u 13

 

Test propost mill-Kummissjoni

Emenda

Artikolu 12

imħassar

Revoka ta’ delega

 

1. Id-delega ta’ setgħa msemmija fl-ewwel subparagrafu tal-Artikolu 10 tista' tiġi revokata mill-Parlament Ewropew jew mill-Kunsill fi kwalunkwe ħin.

 

2. L-istituzzjoni li tibda proċedura interna sabiex jiġi deċiż jekk tiġix revokata d-delega ta’ setgħa għandha tinforma lill-istituzzjoni l-oħra u lill-Kummissjoni, f’perijodu ta’ żmien raġonevoli qabel ma tittieħed id-deċiżjoni finali, billi tindika s-setgħat delegati li jistgħu jkunu s-suġġett ta’ revoka kif ukoll ir-raġunijiet possibbli għal revoka.

 

3. Id-deċiżjoni ta’ revoka ttemm id-delega tas-setgħat speċifikati f'dik id-deċiżjoni. Din għandha tidħol fis-seħħ immedjatament jew f’data ulterjuri stipulata minnha. Ma għandhiex taffettwa l-validità ta’ kwalunkwe att delegat li jkun diġà fis-seħħ. Din għandha tiġi ppubblikata fil-Ġurnal Uffiċjali tal-Unjoni Ewropea.

 

Artikolu 13

 

Oġġezzjonijiet għall-atti delegati

 

1. Il-Parlament Ewropew u l-Kunsill jistgħu joġġezzjonaw għall-att delegat fi żmien xahrejn mid-data tan-notifika.

 

Fuq inizjattiva tal-Parlament Ewropew jew tal-Kunsill, dan il-perijodu ta’ żmien għandu jiġi estiż b’xahar.

 

2. Jekk, meta jiskadi dak il-perijodu, la l-Parlement Ewropew u lanqas il-Kunsill ma jkunu oġġezzjonaw għall-att delegat, dan għandu jiġi ppubblikat fil-Ġurnal Uffiċjali tal-Unjoni Ewropea u għandu jidħol fis-seħħ fid-data stabbilita fih.

 

L-att delegat jista’ jiġi ppubblikat fil-Ġurnal Uffiċjali tal-Unjoni Ewropea u jidħol fis-seħħ qabel l-iskadenza ta’ dak il-perijodu jekk il-Parlament Ewropew u l-Kunsill jkunu t-tnejn li huma infurmaw lill-Kummissjoni bl-intenzjoni tagħhom li ma joġġezzjonawx.

 

3. Jekk il-Parlament Ewropew jew il-Kunsill joġġezzjonaw għal att delegat, dan m’għandux jidħol fis-seħħ. L-istituzzjoni li tesprimi oġġezzjonijiet għall-att delegat għandha tispjega r-raġunijiet għall-oġġezzjonijiet.

 

Ġustifikazzjoni

Dan it-tħassir għandu l-għan li jallinja t-test dwar il-formulazzjoni standard ġdida relattiva għall-atti delegati.

 

 

 

 

 

NOTA SPJEGATTIVA

 

 

Introduzzjoni

 

L-introduzzjoni aċċellerata ta' rekwiżiti ta' buq doppju jew ta' disinn ekwivalenti għal tankers taż-żejt b'buq wieħed hija suġġett importanti ħafna. L-irqajja ta’ żejt ikkawżati minn tankers li jegħrqu, partikolarment bħal Erika fl-1999 u Le Prestige fl-2002, huma katastrofi ekoloġiċi kbar u huma traġedji għall-fawna u l-flora tal-baħar.

 

Għal raġunijiet ta’ ħarsien ambjentali u biex nitgħallmu mill-passat, l-oġġettiv tar-regolament preżenti huwa li jonqsu r-riskji ta’ tniġġis aċċidentali miż-żjut fl-ilmijiet Ewropej grazzi għall-introduzzjoni aċċellerata ta’ buq doppju. Fil-bastimenti b’buq wieħed, iż-żejt fit-tankijiet tal-merkanzija huwa separtat mill-ilma tal-baħar permezz ta' pjanċa rqiqa tal-metall fil-qiegħ u mal-ġnub biss. Fil-każ li din il-pjanċa tiġġarraf minħabba ħbit jew inkaljar, il-kontenut tat-tankijiet tal-merkanzija jkun fil-periklu li jinfirex fil-baħar u li jikkawża tniġġis fuq skala kbira. Mod effikaċi kif dan jista’ jiġi evitat huwa li t-tankijiet tal-merkanzija jiġu miksija mad-dawra kollha bi pjanċa oħra interna tal-metall, b’distanza suffiċjenti mill-pjanċa esterna. Dan il-kunċett ta’ “buq doppju” jipproteġi t-tankijiet tal-merkanzija kontra d-diżastri u jnaqqas ir-riskju ta’ tniġġis.

 

Proposta tal-Kummissjoni

 

Il-proposta tal-Kummissjoni hija tfassil mill-ġdid tar-regolament dwar id-dħul gradwali aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed.

 

Għall-bidu, il-Kummissjoni kienet se tipproponi l-proċedura ta’ kodifikazzjoni biex sempliċement tiġbor flimkien id-diversi atti f’reġolament ġdid mingħajr ma tibdel is-sustanza u mingħajr ma ddaħħal emendi oħra barra dawk rikjesti formalment.

 

Sussegwentement daħal fis-seħħ it-Trattat ta’ Lisbona, u l-Artikolu 290 tat-Trattat dwar il-Funzjonament tal-Unjoni Ewropea issa jippermetti lil-leġiżlatur jiddelega lill-Kummissjoni s-setgħa li tadotta atti mhux leġiżlattivi ta’ applikazzjoni ġenerali sabiex jissumplimentaw jew jemendaw ċerti elementi mhux essenzjali tal-att leġiżlattiv.

 

Għalhekk, imbagħad il-Kummissjoni pproponiet it-tfassil mill-ġdid pjuttost mill-kodifikazzjoni biex tkun tista’ tintroduċi emendi meħtieġa ta’ ċerti dispożizzjonijiet li fir-rigward tagħhom tali delega tas-setgħat tkun xierqa.

 

Il-proposta ma għandhiex implikazzjonijiet għall-baġit tal-Unjoni.

 

Opinjoni tar-rapporteur

 

Wieħed jista’ jargumenta li l-ambitu tad-delega tas-setgħat lill-Kummissjoni huwa wiesa’ wisq fit-tfassil ġdid propost. Fl-Abbozz ta’ Rapport, ir-rapporteur irid jillimita t-tul ta’ żmien għall-adozzjoni tal-atti delegati tal-Kummissjoni kif ukoll jistabbilixxi kundizzjonijiet għall-estensjoni ta’ dawn is-setgħat. Ir-rekwiżit ta’ tfassil ta’ rapport jippermetti lill-Parlament u l-Kunsill ikollhom bażi regolari li fuqha jkunu jistgħu jiġu vvalutati proposti futuri.

 

Barra minn hekk, fir-rigward tal-atti delegati, ir-rapporteur irid iżid għal xahrejn l-estensjoni tal-perjodu għall-Parlament Ewropew u l-Kunsill. Dan b’kollox jagħti erba’ xhur biex tiġi indirizzata l-proċedura neċessarja, perjodu li huwa iktar realistiku biex tiġi ppreżentata oġġezzjoni.

 

L-emendi kollha tar-rapporteur f’dan l-Abbozz ta’ Rapport jikkunsidraw il-formulazzjoni standard ġdida tal-Parlament Ewropew rigward l-atti delegati.

 

 

 

ANNESS 1: ITTRA LILL-KUMITAT GĦALL-AFFARIJIET LEGALI

 

Ref.: D(2011)58410

 

 

 

Is-Sur Brian SIMPSON

President tal-Kumitat għat-Trasport u t-Turiżmu

ASP 12G205

Brussels

 

 

 

Subject:  Proposta għal Regolament tal-Parlament Ewropew u tal-Kunsill dwar id-dħul gradwali aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed (tfassil mill-ġdid)

  ( COM(2011)0566 – C7‑0269/2011 – 2011/0243(COD) )

 

 

 

Għażiż President,

 

Il-Kumitat għall-Affarijiet Legali, li għandi l-unur nippresjedi, eżamina l-proposta msemmija hawn fuq, skont it-termini tal-Artikolu 87 dwar it-Tfassil mill-Ġdid, kif iddaħħal fir-Regoli ta’ Proċedura tal-Parlament.

Il-Paragrafu 3 ta’ dak l-Artikolu jgħid hekk:

 

"Jekk il-kumitat responsabbli għall-affarijiet legali jikkonkludi li l-proposta ma tinkludi l-ebda bidla sostantiv għal-leġiżlazzjoni minbarra dawk identifikati bħala tali, għandu jinforma lill-kumitat responsabbli dwar dan.

 

F'każ ta' dan it-tip, minbarra l-kundizzjonijiet stabbiliti fl-Artikoli 156 u 157, l-emendi għandhom ikunu ammissibbli mill-kumitat responsabbli biss jekk jikkonċernaw dawk il-partijiet tal-proposta li jinkludu bidliet.

Madankollu, jekk, f’konformità mal-punt 8 tal-Ftehim Interistituzzjonali, il-kumitat responsabbli jkollu l-ħsieb ukoll li jressaq emendi għall-partijiet ikkodifikati tal-proposta, għandu jinnotifika minnufih l-intenzjoni tiegħu lill-Kunsill u lill-Kummissjoni, u din tal-aħħar għandha tinforma lill-kumitat, qabel il-votazzjoni skont l-Artikolu 54, dwar il-pożizzjoni tagħha fir-rigward tal-emendi kif ukoll dwar jekk għandhiex il-ħsieb li tirtira l-proposta ta' riformulazzjoni.

 

 

B'segwitu għall-opinjoni tas-Servizz Legali, li r-rappreżentanti tiegħu pparteċipaw fil-laqgħat tal-Grupp ta' Ħidma Konsultattiv li eżamina l-proposta għal riformulazzjoni, u b'konformità mar-rakkomandazzjonijiet tar-rapporteur għal opinjoni, il-Kumitat għall-Affarijiet Legali jikkunsidra li l-proposta msemmija ma tinkludi l-ebda tibdil sostantiv ħlief dak identifikat bħala tali fil-proposta u billi, f’dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil, il-proposta tillimita ruħha għal kodifikazzjoni pura u sempliċi tal-atti eżistenti mingħajr tibdil fis-sostanza tagħhom.

 

Biex nikkonkludu, wara li ddiskutiha fil-laqgħa tiegħu tal-22 ta' Novembru 2011, il-Kumitat għall-Affarijiet Legali, b'19 vot favur u ebda astensjoni[3], jirrakkomanda li l-Kumitat tiegħek, bħala l-kumitat responsabbli, jipproċedi biex jeżamina l-proposta msemmija hawn fuq f'konformità mal-Artikolu 87.

 

Dejjem tiegħek,

 

 

 

 

 

 

 

 

 

 

 

Klaus-Heiner LEHNE

 

 

 

 

 

 

 

Mehmuż: L-Opinjoni tal-Grupp ta’ Ħidma Konsultattiv.

 

 

ANNESS 2: OPINJONI TAL-GRUPP TA’ ĦIDMA KONSULTATTIV TAS-SERVIZZI LEGALI TAL-PARLAMENT EWROPEW, TAL-KUNSILL U TAL-KUMMISSJONI

 

 

 

GRUPP TA’ ĦIDMA KONSULTATTIV

TAS-SERVIZZI LEGALI

Brussell, 14 ta’ Ottubru 2011

OPINJONI

  GĦALL-ATTENZJONI  TAL-PARLAMENT EWROPEW

    TAL-KUNSILL

    TAL-KUMMISSJONI

Proposta għal Regolament tal-Parlament Ewropew u tal-Kunsill dwar id-dħul gradwali aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed (tfassil mill-ġdid)

COM(2011)0566 tat-23.09.2011 – 2011/0243(COD)

Wara li kkunsidra l-Ftehima Interistituzzjonali tat-28 ta’ Novembru 2001 dwar l-użu aktar strutturat dwar it-teknika ta’ riformulazzjoni għal atti ġuridiċi, u partikolarment għall-punt 9 tagħha, il-Grupp ta’ Ħidma Konsultattiv, li hu magħmul mis-servizzi legali rispettivi tal-Parlament Ewropew, tal-Kunsill u tal-Kummissjoni, iltaqa’ fid-29 ta’ Settembru 2011 sabiex jeżamina l-proposta msemmija li tressqet mill-Kummissjoni.

 

Waqt din il-laqgħa[4], l-evalwazzjoni tal-proposta għal regolament tal-Parlament Ewropew u tal-Kunsill u li tfassal mill-ġdid ir-Regolament (KE) Nru 417/2002 tal-Parlament Ewropew u tal-Kunsill tat-18 ta’ Frar 2002 dwar id-dħul gradwali aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed u li jħassar ir-Regolament tal-Kunsill wasslet biex il-Grupp ta’ Ħidma Konsultattiv stabbilixxa, bi ftehim reċiproku, dan li ġej.

1) Fir-rigward tal-memorandum spjegattiv, sabiex ikun hemm abbozz li jkun kompletament konformi mar-rekwiżiti relevanti stabbiliti mill-Ftehim Interistituzzjonali, dan id-dokument kellu jispeċifika liema dispożizzjonijiet tal-att preċedenti ma jkunux inbidlu fil-proposta, kif previst fil-punt 6(a)(iii) ta’ dak il-ftehim.

2) Fir-rigward tal-emenda sostantiva proposta b’din ir-riformulazzjoni, li tikkonsisti fl-għoti ta’ setgħa lill-Kummissjoni biex tadotta atti delegati f’konformità mal-Artikolu 290 TFUE, il-kliem li jidher fil-premessa 21, fl-ewwel paragrafu tal-Artikolu 10 u fl-Artikoli 11, 12 u 13 jeħtieġu li din tiġi allinjata ma’ dawk tal-klawsoli standard mehmuża mal-Fehim Komuni bejn il-Parlament Ewropew, il-Kunsill u l-Kummissjoni.

3) Fl-ewwel paragrafu tal-Artikolu 10, il-kelma “temenda”, li tinsab fil-verżjoni attwalment applikabbli tal-ewwel paragrafu tal-Artikolu 11 tar-Regolament (KE) Nru 417/2002, kellha tidher wara l-kliem tal-bidu “Il-Kummissjoni tista’”. Il-kelma kellha tkun identifikata bl-użu tas-sinjal użat ġeneralment biex jiġi mmarkat “tħassir sostantiv”, jiġifieri “ingassar doppju” flimkien mat-tipa ġriża .

 

B’konsegwenza ta’ dan, l-eżami tal-proposta ppermetta lill-Grupp ta’ Ħidma Konsultattiv jikkonkludi, mingħajr dissens, li l-proposta ma fiha l-ebda emenda sostantiva, għajr il-bidliet li ġew identifikati bħala tali fiha stess jew fl-opinjoni preżenti. Il-Grupp ta’ Ħidma kkonkluda wkoll, fir-rigward tal-kodifikazzjoni tad-dispożizzjonijiet mhux mibdula tal-att iżjed bikri b’dawk l-emendi sostantivi, li l-proposta fiha kodifikazzjoni ċara tat-test eżistenti, mingħajr ebda tibdil fis-sustanza tiegħu.

 

 

 

 

 

 

C. PENNERA        H. LEGAL      L. ROMERO REQUENA

Ġurikonsult        Ġurikonsult      Direttur Ġenerali

 

PROĊEDURA

Titolu

Id-dħul aċċellerat ta’ rekwiżiti ta’ buq doppju jew ta’ disinn ekwivalenti għal tankers taż-żejt b’buq wieħed (Riformulazzjoni)

Referenzi

COM(2011)0566 – C7-0269/2011 – 2011/0243(COD)

Data meta ġiet ippreżentata lill-PE

23.9.2011

 

 

 

Kumitat responsabbli

       Data tat-tħabbir fis-seduta plenarja

TRAN

29.9.2011

 

 

 

Kumitat(i) mitlub(a) jagħti/u opinjoni

       Data tat-tħabbir fis-seduta plenarja

JURI

29.9.2011

 

 

 

Eżami fil-kumitat

20.12.2011

 

 

 

Data tal-adozzjoni

6.2.2012

 

 

 

Riżultat tal-votazzjoni finali

+:

–:

0:

30

1

0

Membri preżenti għall-votazzjoni finali

Inés Ayala Sender, Georges Bach, Philip Bradbourn, Antonio Cancian, Michael Cramer, Christine De Veyrac, Saïd El Khadraoui, Ismail Ertug, Knut Fleckenstein, Jacqueline Foster, Mathieu Grosch, Jim Higgins, Dieter-Lebrecht Koch, Georgios Koumoutsakos, Eva Lichtenberger, Marian-Jean Marinescu, Gesine Meissner, Olga Sehnalová, Brian Simpson, Laurence J.A.J. Stassen, Keith Taylor, Silvia-Adriana Ţicău, Giommaria Uggias, Artur Zasada, Roberts Zīle

Sostitut(i) preżenti għall-votazzjoni finali

Burkhard Balz, Spyros Danellis, Michel Dantin, Dominique Riquet, Anna Rosbach

Sostitut(i) (skont l-Artikolu 187(2)) preżenti għall-votazzjoni finali

Ioan Enciu

Data tat-tressiq

8.2.2012

 

 

[1] ĠU C ... /Għadha mhux ippubblikata f'Il-Ġurnal Uffiċjali.
[2] ĠU C 77, 28.3.2002, p. 1
[3] Dawn li ġejjin kienu preżenti għall-votazzjoni finali: Klaus-Heiner Lehne (President), Luigi Berlinguer (Viċi President), Raffaele Baldassarre (Viċi President), Evelyn Regner (Viċi President), Sebastian Valentin Bodu (Viċi President), Philippe Boulland, Christian Engström, Marielle Gallo, Lidia Joanna Geringer de Oedenberg, Kurt Lechner, Toine Manders, Antonio Masip Hidalgo, Jiří Maštálka, Gabriel Mato Adrover, Alajos Mészáros, Bernhard Rapkay, Alexandra Thein, Diana Wallis, Rainer Wieland.     
[4] Il-Grupp ta’ Ħidma Konsultattiv kellu għad-dispożizzjoni tiegħu l-verżjonijiet tal-proposta bl-Ingliż, bil-Franċiż u bil-Ġermaniż u ħadem bil-verżjoni bl-Ingliż, peress li din kienet il-verżjoni oriġinali tat-test fid-diskussjoni.