Dokument ta' sessjoni

A7-0085/2012

30.3.2012

***I

RAPPORT

dwar il-proposta għal regolament tal-Parlament Ewropew u tal-Kunsill li jħassar ir-Regolament tal-Kunsill (KE) Nru 1342/2007 dwar l-amministrazzjoni ta’ ċerti restrizzjonijiet fuq importazzjonijiet ta’ ċerti prodotti tal-azzar mill-Federazzjoni Russa

( COM(2011)0715 – C7‑0396/2011 – 2011/0315(COD) )

Kumitat għall-Kummerċ Internazzjonali

Rapporteur: Robert Sturdy

PR_COD_1app

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

NOTA SPJEGATTIVA  6

PROĊEDURA  7

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal regolament tal-Parlament Ewropew u tal-Kunsill li jħassar ir-Regolament tal-Kunsill (KE) Nru 1342/2007 dwar l-amministrazzjoni ta’ ċerti restrizzjonijiet fuq importazzjonijiet ta’ ċerti prodotti tal-azzar mill-Federazzjoni Russa

( COM(2011)0715 – C7‑0396/2011 – 2011/0315(COD) )

(Proċedura leġiżlattiva ordinarja: l-ewwel qari)

Il-Parlament Ewropew,

–  wara li kkunsidra l-proposta tal-Kummissjoni lill-Parlament u lill-Kunsill ( COM(2011)0715 ),

–  wara li kkunsidra l-Artikolu 294(2) u l-Artikolu 207 tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C7-0396/2011),

–  wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 55 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Kummerċ Internazzjonali ( A7-0085/2012 ),

1.  Jadotta l-pożizzjoni tiegħu fl-ewwel qari billi jinkorpora l-proposta tal-Kummissjoni;

2.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

3.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

NOTA SPJEGATTIVA

Informazzjoni tal-isfond

Fl-1 ta’ Diċembru 1997, il-Ftehim ta’ Sħubija u Kooperazzjoni li jistabbilixxi sħubija bejn il-Komunitajiet Ewropej u l-Istati Membri tagħhom, min-naħa l-waħda, u l-Federazzjoni Russa,

min-naħa l-oħra, daħal dis-seħħ[1]. Fil-qafas ta’ dan il-ftehim ta' sħubija u kooperazzjoni, il-Komunità Ewropea u l-Gvern tal-Federazzjoni Russa kkonkludew nhar is-26 ta' Ottubru 2007 "Ftehim dwar il-kummerċ f'ċerti prodotti tal-azzar"[2].

Dan il-Ftehim dwar il-kummerċ f’ċerti prodotti tal-azzar (minn hawn ’il quddiem “il-Ftehim") ġie implimentat fl-UE fil-forma tar-Regolament tal-Kunsill (KE) Nru 1342/2007 dwar l-amministrazzjoni ta' ċerti restrizzjonijiet fuq l-importazzjoni ta' ċerti prodotti tal-azzar mill-Federazzjoni Russa[3]. Il-Ftehim stabbilixxa l-kwoti (limiti kwantitattivi) għall-importazzjonijiet fl-UE tal-azzar ġej mill-Federazzjoni Russa. Barra minn hekk, l-Artikolu 10(4) tal-Ftehim ippreskriva li jekk il-Federazzjoni Russa taċċedi għall-Organizzazzjoni Dinjija tal-Kummerċ qabel ma jiskadi l-Ftehim, il-Ftehim ikollu jiġi tterminat u l-kwoti jiġu aboliti.

Skont il-Kummissjoni Ewropea, ir-Russja kienet l-akbar esportatur tal-azzar lejn l-UE fl-2010 b’aktar minn 6.5 miljun tunellata, li jirrappreżentaw 24% tal-importazzjoni totali tal-UE f'dak li għandu x'jaqsam mal-azzar[4].

Raġunijiet għall-Abolizzjoni

Il-proposta tal-Kummissjoni li jkun abolit ir-Regolament tal-Kunsill (KE) Nru 1342/2007 li jimplimenta l-Ftehim fl-UE ġejja mill-Artikolu 10(4) tal-istess, li hu msemmi aktar ’il fuq. Meta wieħed iqis li l-Federazzjoni Russa saret membru tad-WTO fis-16 ta’ Diċembru 2011, l-UE ma għandhiex aktar jedd tapplika l-imsemmija kwoti ta’ importazzjoni tal-azzar u dan b’effett minn dakinhar li r-Russja daħlet fid-WTO. Li r-Regolament (KE) Nru 1342/2007 jibqa’ fid-Dritt tal-UE u b’hekk iżomm il-kwoti fuq l-importazzjonijiet fis-seħħ ikun jikkostitwixxi vjolazzjoni tar-regoli tad-WTO u jesponi lill-UE għal azzjoni legali min-naħa tar-Russja.

Konsegwenzi tal-Adeżjoni tar-Russja mad-WTO fuq ix-Xkiel li Fadal għall-Kummerċ UE-Russja fil-Prodotti tal-Azzar

Bl-adeżjoni tar-Russja mas-sistema tad-WTO ta’ kummerċ multilaterali msejjes fuq ir-regoli, l-UE tista’ tistenna li tibbenefika minn aċċess aktar liberali għas-suq Russu. Il-Kummissjoni Ewropea tistma li l-esportazzjonijiet addizzjonali se jkunu jiswew bejn wieħed u ieħor EUR 107 miljun fis-sena[5] fis-settur tal-ħadid u l-azzar. Tipprevedi wkoll li se tiżdied il-kompetittività tas-settur tal-azzar tal-UE kawża tar-riduzzjoni fl-imposti fuq l-esportazzjoni fuq l-iskrapp tal-ħadid mill-15% tal-lum għal 5% fi żmien 5 snin mid-data tal-adeżjoni u kawża tal-prezzijiet aġġustati tal-gass għall-konsumaturi industrijali fir-Russja.

Dwar ix-xkiel li jifdal għall-kummerċ bilaterali fil-prodotti tal-azzar li jistgħu għadhom japplikaw, dawn għandhom ikunu minimi u applikabbli biss fl-ambiti ċar tar-regoli tad-WTO li jirregolaw aspetti bħalma huma t-tariffi, miżuri applikabbli ta' difiża tal-kummerċ, standards tekniċi, proċeduri speċifiċi ta' dwana/ħruġ mid-dwana, eċċ. In-nuqqas ta' osservanza tar-regoli applikabbli tad-WTO minn wieħed mill-partijiet għandu mnejn ikun hemm ħtieġa li jiġi riżolt bl-użu tal-mekkaniżmu eżistenti ta' riżoluzzjoni tat-tilwim tad-WTO. Ir-Rapporteur jappoġġja s-superviżjoni u t-tneħħija bil-għaqal tax-xkiel għall-kummerċ u l-investiment li għandu mnejn fadal fuq iż-żewġ naħiet, wara l-adeżjoni tar-Russja mad-WTO.

Il-pożizzjoni tar-Rapporteur

Ir-Rapporteur jemmen bil-qawwa li d-WTO tibqa’ l-aqwa garanti ta’ sistemi multilaterali tal-kummerċ imsejsa fuq ir-regoli u jfisser it-tama li l-membru l-ġdid tagħha – ir-Russja – u l-UE jadempjixxu mal-obbligi kollha tagħhom fid-WTO. Ir-Rapporteur jixieq ukoll jara r-relazzjoni ta’ kummerċ bejn l-UE-Russja tiżviluppa f'ottemperanza sħiħa mad-dispożizzjonijiet konġuntament miftehmin tal-ftehimiet bilaterali eżistenti. Għall-mottivi msemmijin aktar ’il fuq, ir-Rapporteur għalhekk jirrakkomanda li l-Parlament Ewropew jagħti l-kunsens tiegħu għall-abolizzjoni proposta tar-Regolament tal-Kunsill (KE) Nru 1342/2007.

PROĊEDURA