Dokument ta' sessjoni

 

A7-0227/2012

12.7.2012

*

RAPPORT

dwar il-proposta għal direttiva tal-Kunsill dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti (riformulazzjoni)

( COM(2011)0714 – C7‑0516/2011 – 2011/0314(CNS) )

Kumitat għall-Affarijiet Ekonomiċi u Monetarji

Rapporteur: Ildikó Gáll-Pelcz

(Riformulazzjoni – Artikolu 87 tar-Regoli ta' Proċedura)

PR_CNS_Recastingam

 

 

Tifsira tas-simboli użati

       *     Proċedura ta’ konsultazzjoni

   ***     Proċedura ta’ approvazzjoni

  ***I     Proċedura leġiżlattiva ordinarja (l-ewwel qari)

 ***II     Proċedura leġiżlattiva ordinarja (it-tieni qari)

  ***III     Proċedura leġiżlattiva ordinarja (it-tielet qari)

 

(It-tip ta’ proċedura jiddependi mill-bażi legali proposta mill-abbozz ta’ att.)

 

 

 

 

 

Emendi għal abbozz ta’ att

Fl-emendi li jsiru mill-Parlament, it-test emendat huwa indikat b’tipa grassa u korsiva. Test korsiv normali huwa indikazzjoni għas-servizzi tekniċi li turi partijiet tal-abbozz ta’ att li għalihom qed tkun proposta korrezzjoni bl-iskop li tgħin fil-preparazzjoni tat-test finali (pereżempju, żbalji ovvji jew nuqqasijiet f’verżjoni lingwistika partikolari). Il-korrezzjonijiet proposti huma soġġetti għall-qbil tas-servizzi tekniċi involuti.

 

L-intestatura ta’ kwalunkwe emenda għal att eżistenti, li l-abbozz ta’ att ikollu l-ħsieb li jemenda, ikun fiha t-tielet u r-raba’ linji li jidentifikaw rispettivament l-att eżistenti u d-dispożizzjoni kkonċernata f’dak l-att. Il-partijiet li jittieħdu kif inhuma minn dispożizzjoni eżistenti li l-Parlament jixtieq jemenda, imma li l-abbozz ta’ att ma jkunx emenda, huma indikati b’tipa grassa. It-tħassir eventwali li jikkonċerna dawn il-partijiet jiġi indikat kif ġej: [...].

 

 

 

 

 

 

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW................5

NOTA SPJEGATTIVA.............................................................................................................13

ANNESS: ITTRA LILL-KUMITAT GĦALL-AFFARIJIET LEGALI.......................................14

ANNESS: OPINJONI TAL-GRUPP TA' ĦIDMA KONSULTATTIV TAS-SERVIZZI LEGALI TAL-PARLAMENT EWROPEW, TAL-KUNSILL U TAL-KUMMISSJONI  16

PROĊEDURA...........................................................................................................................17

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal direttiva tal-Kunsill dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti (riformulazzjoni)

( COM(2011)0714 – C7‑0516/2011 – 2011/0314(CNS) )

(Proċedura leġiżlattiva speċjali – konsultazzjoni – riformulazzjoni)

Il-Parlament Ewropew,

–   wara li kkunsidra l-proposta tal-Kummissjoni lill-Kunsill ( COM(2011)0714 ),

–   wara li kkunsidra l-Artikolu 115 tat-Trattat dwar il-Funzjonament tal-Unjoni Ewropea, skont liema artikolu ġie kkonsultat mill-Kunsill (C7‑0516/2011),

–   wara li kkunsidra l-Ftehima Interistituzzjonali tat-28 ta' Novembru 2001 fuq l-użu aktar strutturat tat-teknika ta' kitba mill-ġdid tal-atti legali[1],

–   wara li kkunsidra l-ittra tas-6 ta' Marzu 2012 tal-Kumitat għall-Affarijiet Legali indirizzata lill-Kumitat għall-Affarijiet Ekonomiċi u Monetarji b'konformità mal-Artikolu 87(3) tar-Regoli ta' Proċedura tiegħu,

–   wara li kkunsidra l-Artikoli 87 u 55 tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Affarijiet Ekonomiċi u Monetarji ( A7-0227/2012 ),

A. billi, fl-opinjoni tal-Grupp ta’ Ħidma Konsultattiv tas-Servizzi Legali tal-Parlament Ewropew, tal-Kunsill u tal-Kummissjoni, il-proposta kkonċernata ma tinkludi ebda tibdil sustanzjali ħlief dak identifikat bħala tali fil-proposta u billi, f’dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil, il-proposta tillimita ruħha għal kodifikazzjoni pura u sempliċi ta’ l-atti eżistenti mingħajr tibdil sustanzjali;

1.  Japprova l-proposta tal-Kummissjoni kif adattata għar-rakkomandazzjonijiet tal-Grupp ta' Ħidma Konsultattiv tas-Servizzi Legali tal-Parlament Ewropew, tal-Kunsill u tal-Kummissjoni u kif emendata hawn taħt;

2.  Jistieden lill-Kummissjoni biex timmodifika l-proposta tagħha konsegwentement, skont l-Artikolu 293(2) tat-Trattat dwar il-Funzjonament tal-Unjoni Ewropea;

3.  Jistieden lill-Kunsill biex jinfurmah jekk ikollu l-ħsieb li jitbiegħed mit-test approvat mill-Parlament;

4.  Jitlob lill-Kunsill biex jerġa' jikkonsultah jekk ikollu l-ħsieb li jemenda t-test approvat mill-Parlament b'mod sustanzjali;

5.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali;

Emenda  1

Proposta għal direttiva

Premessa 1

 

Test propost mill-Kummissjoni

Emenda

(1) Id-Direttiva tal-Kunsill 2003/49/KE tat-3 ta' Ġunju 2003 dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti kienet emendata bosta drabi. Peress li għandhom isiru iktar emendi, din għandha tiġi rriformulata fl-interessi taċ-ċarezza.

(1) Id-Direttiva tal-Kunsill 2003/49/KE tat-3 ta' Ġunju 2003 dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti kienet emendata bosta drabi. Peress li għandhom isiru iktar emendi, din għandha tiġi rriformulata fl-interessi taċ-ċarezza. Fid-19 ta' April 2012, il-Parlament Ewropew talab li jkun hemm mezzi konkreti biex jingħelbu l-frodi fiskali u l-evażjoni fiskali, filwaqt li ġibed l-attenzjoni għall-evażjoni fiskali permezz ta' strumenti finanzjarji ibridi, u talab lill-Istati Membri jiżguraw kooperazzjoni u koordinazzjoni mingħajr problemi bejn is-sistemi fiskali tagħhom sabiex jiġu evitati non-tassazzjoni u evażjoni fiskali mhux mixtieqa.

 

Emenda  2

Proposta għal direttiva

Premessa 1a (ġdida)

 

Test propost mill-Kummissjoni

Emenda

 

(1a) Defiċits pubbliċi persistenti u konsiderevoli huma marbuta mill-qrib mal-kriżi soċjali, ekonomika u finanzjarja attwali. Fl-istess ħin, il-kompetizzjoni fiskali fost l-Istati Membri hija fattur importanti li jimpedixxi l-konsolidazzjoni sostenibbli tal-baġits nazzjonali. Għalhekk, il-Kummissjoni għandha tressaq l-introduzzjoni f’waqtha ta’ rata minima ta' taxxi korporattivi. Tali rata minima tnaqqas il-kompetizzjoni fiskali u għalhekk issaħħaħ il-libertà tal-Istati Membri biex jintaxxaw il-kumpaniji. Għaldaqstant, il-prinċipju ta’ sussidjarjetà ma jiġix effettwat b’mod negattiv.

 

Emenda  3

Proposta għal direttiva

Premessa 4

 

Test propost mill-Kummissjoni

Emenda

(4) It-tneħħija ta' tassazzjoni fuq il-pagamenti ta' imgħax u ta' royalties fl-Istat Membru fejn iqumu, sew jekk miġburin permezz ta' tnaqqis minn ras il-għajn sew jekk permezz ta' stima, hija l-mezz l-aktar approprjat sabiex ikunu eliminati l-formalitajiet u l-problemi imsemmija qabel u sabiex ikun assigurat it-trattament tat-taxxa ndaqs bejn operazzjonijiet nazzjonali u dawk bejn il-fruntieri; huwa meħtieġ partikolarment li jitneħħew dawn it-taxxi fuq dawn il-pagamenti li jsiru bejn kumpaniji assoċjati fi Stati Membri differenti kif ukoll bejn stabbilimenti permanenti ta' dawn il-kumpaniji.

(4) It-tneħħija ta' tassazzjoni fuq il-pagamenti ta' imgħax u ta' royalties fl-Istat Membru fejn iqumu, sew jekk miġburin permezz ta' tnaqqis minn ras il-għajn sew jekk permezz ta' stima, hija l-mezz l-aktar approprjat sabiex ikunu eliminati l-formalitajiet u l-problemi imsemmija qabel u sabiex ikun assigurat it-trattament tat-taxxa ndaqs bejn operazzjonijiet nazzjonali u dawk bejn il-fruntieri; huwa meħtieġ partikolarment li jitneħħew dawn it-taxxi fuq dawn il-pagamenti li jsiru bejn kumpaniji assoċjati fi Stati Membri differenti kif ukoll bejn stabbilimenti permanenti ta' dawn il-kumpaniji sabiex tiġi żgurata sistema semplifikata u iktar trasparenti ta' tassazzjoni.

 

Emenda  4

Proposta għal direttiva

Premessa 5

 

Test propost mill-Kummissjoni

Emenda

(5) Jeħtieġ li jkun assigurat li l-pagamenti ta' imgħax u royalties ikunu soġġetti għat-taxxa darba fi Stat Membru u li l-benefiċċji tad-Direttiva għandhom ikunu applikabbli biss meta l-introjtu li ġej mill-ħlas huwa effettivament soġġett għat-taxxa fl-Istat Membru tal-Kumpanija riċeventi jew fl-Istat Membru fejn jinsab l-istabbiliment permanenti tar-riċevitur.

(5) Jeħtieġ li jkun assigurat li l-pagamenti ta' imgħax u royalties ikunu soġġetti għat-taxxa darba fi Stat Membru u li l-benefiċċji tad-Direttiva għandhom ikunu applikabbli biss meta l-introjtu li ġej mill-ħlas huwa effettivament soġġett għat-taxxa fl-Istat Membru tal-Kumpanija riċeventi jew fl-Istat Membru fejn jinsab l-istabbiliment permanenti tar-riċevitur, mingħajr ma jkun hemm il-possibilità ta' eżenzjoni jew ta' sostituzzjoni permezz tal-ħlas ta' taxxa oħra.

 

 

Emenda  5

Proposta għal direttiva

Premessa 12

 

Test propost mill-Kummissjoni

Emenda

(12) Barra minn dan, huwa meħtieġ li l-Istati Membri ma jinżammewx milli jieħdu miżuri xierqa biex jiġġieldu l-frodi jew l-abbuż.

(12) Barra minn dan, huwa meħtieġ li jittieħdu l-miżuri xierqa biex l-Istati Membri ma jinżammewx milli jiġġieldu l-frodi fiskali, l-evażjoni fiskali u l-abbuż.

 

Emenda          6

Proposta għal direttiva

Premessa 20a (ġdida)

 

Test propost mill-Kummissjoni

Emenda

 

(20a) Sabiex tiġi żgurata implementazzjoni bla xkiel u kosteffiċjenti tad-dispożizzjonijiet ta’ din id-Direttiva, il-kumpaniji għandhom iħejju l-kontijiet annwali tagħhom flimkien mad-data fiskali relevanti kollha f’Extensible Business Reporting Language (XBRL).

 

Emenda  7

Proposta għal direttiva

Artikolu 1 – paragrafu 1

 

Test propost mill-Kummissjoni

Emenda

1. Pagamenti ta' imgħax u royalties li jqumu fi Stat Membru għandhom ikunu eżenti minn kull taxxa imposta fuq dawk il-pagamenti f'dak l-Istat Membru , sew jekk permezz ta' tnaqqis minn ras il-għajn sew jekk permezz ta' stima, iżda s-sid benefiċjarju tal-imgħax jew royalties irid ikun kumpanija ta' Stat Membru ieħor jew stabbiliment permanenti fi Stat Membru ieħor ta' kumpanija ta' Stat Membru u huwa effettivament soġġett għat-taxxa fuq dak l-introjtu li ġej minn dawk il-pagamenti f’dak l-Istat Membru l-ieħor.

1. Pagamenti ta' imgħax u royalties li jqumu fi Stat Membru għandhom ikunu eżenti minn kull taxxa imposta fuq dawk il-pagamenti f'dak l-Istat Membru , sew jekk permezz ta' tnaqqis minn ras il-għajn sew jekk permezz ta' stima, iżda s-sid benefiċjarju tal-imgħax jew royalties irid ikun kumpanija ta' Stat Membru ieħor jew stabbiliment permanenti fi Stat Membru ieħor ta' kumpanija ta' Stat Membru u huwa effettivament soġġett għat-taxxa fuq dak l-introjtu li ġej minn dawk il-pagamenti f’dak l-Istat Membru l-ieħor, mingħajr ma jkun hemm il-possibilità ta' eżenzjoni jew ta' sostituzzjoni permezz tal-ħlas ta' taxxa oħra b’rata ta’ mhux inqas minn 70% tar-rata fiskali korporattiva statutorja medja applikabbli fl-Istati Membri, mingħajr ma jkun hemm il-possibilità ta' eżenzjoni jew ta' sostituzzjoni b'pagament ta' taxxa oħra. Il-ħlas ta' imgħax u royalties m’għandux ikun eżentat fl-Istati Membri fejn jirriżulta jekk il-pagament ma jkunx taxxabbli skont il-liġi fiskali nazzjonali li għaliha jkun suġġett is-sid benefiċjarju minħabba kwalifikazzjoni differenti tal-pagament (strumenti ibridi) jew kwalifikazzjoni differenti ta' min jagħmel u min jirċievi l-ħlas (entitajiet ibridi).

 

Emenda  8

Proposta għal direttiva

Artikolu 1 – paragrafu 3

 

Test propost mill-Kummissjoni

Emenda

3. Stabbiliment permanenti għandu jkun trattat bħala dak li jħallas l-imgħax u r-royalties biss sakemm dawk il-pagamenti jirrappreżentaw spiża l mġarrba  għal l-għanijiet tal-attivitajiet  tal-istabbiliment permanenti.

3. Stabbiliment permanenti għandu jkun trattat bħala dak li jħallas l-imgħax u r-royalties biss sakemm dawk il-pagamenti jirrappreżentaw spiża l mġarrba  għal l-għanijiet tal-attivitajiet  tal-istabbiliment permanenti. Huwa biss stabbiliment permanenti li ħallas it-taxxi kollha dovuti li jiġi trattat bħala benefiċjarju ta' eżenzjoni jew benefiċċju fiskali.

 

Emenda          9

Proposta għal direttiva

Artikolu 2 – paragrafu 1 – punt d – punt i

 

Test propost mill-Kummissjoni

Emenda

(i) l-ewwel kumpanija għandha holding minimu ta' 10  % fil-kapital tat-tieni kumpanija, jew

(i) l-ewwel kumpanija għandha holding minimu ta' 25  % fil-kapital tat-tieni kumpanija, jew

 

Emenda          10

Proposta għal direttiva

Artikolu 2 – paragrafu 1 – punt d – punt ii

 

Test propost mill-Kummissjoni

Emenda

(ii) it-tieni kumpanija għandha holding minimu ta' 10  % fil-kapital tal-ewwel kumpanija, jew

(ii) it-tieni kumpanija għandha holding minimu ta' 25  % fil-kapital tal-ewwel kumpanija, jew

 

Emenda          11

Proposta għal direttiva

Artikolu 2 – paragrafu 1 – punt d – punt iii

 

Test propost mill-Kummissjoni

Emenda

(iii) kumpanija terza għandha holding minimu ta' 10  % kemm fil-kapital tal-ewwel kumpanija kif ukoll fil-kapital tat-tieni kumpanija.

(iii) kumpanija terza għandha holding minimu ta' 25  % kemm fil-kapital tal-ewwel kumpanija kif ukoll fil-kapital tat-tieni kumpanija.

 

Emenda          12

Proposta għal direttiva

Artikolu 4 – titolu

 

Test propost mill-Kummissjoni

Emenda

Frodi u abbuż

Frodi fiskali, evażjoni fiskali u abbuż

 

Emenda          13

Proposta għal direttiva

Artikolu 4 – paragrafu 2

 

Test propost mill-Kummissjoni

Emenda

2. L-Istati Membri jistgħu, fil-każ ta' operazzjonijiet li l-għan prinċipali jew wieħed mill-għanijiet prinċipali tagħhom huwa l-evażjoni tat-taxxa, l-għan li tiġi evitata t-taxxa jew l-abbuż, jirtiraw il-benefiċċji ta' din id-Direttiva jew jiċħdu l-applikazzjoni ta' din id-Direttiva.

2. L-Istati Membri jistgħu, fil-każ ta' operazzjonijiet li l-għan prinċipali jew wieħed mill-għanijiet prinċipali tagħhom huwa l-frodi tat-taxxa, l-evażjoni fiskali, l-abbuż fiskali jew l-għan li tiġi evitata t-taxxa, jirtiraw il-benefiċċji ta' din id-Direttiva jew jiċħdu l-applikazzjoni ta' din id-Direttiva.

 

Emenda          14

Proposta għal direttiva

Artikolu 6 – paragrafu 1 – subparagrafu 1

 

Test propost mill-Kummissjoni

Emenda

L-Istati Membri għandhom iġibu fis-seħħ il-liġijiet, regolamenti u dispożizzjonijiet amministrattivi meħtieġa sabiex iħarsu l-Artikolu 1(1) u (3), l-Artikolu 2(c) u (d) u l-Anness I, Parti A  sa mhux aktar tard mill-1 ta' Jannar  2012 . Huma għandhom mill-ewwel jikkomunikaw  lill-Kummissjoni t-test ta' dawk id-dispożizzjonijiet u tabella ta' korrelazzjoni bejn dawk id-dispożizzjonijiet u din id-Direttiva  .

L-Istati Membri għandhom iġibu fis-seħħ il-liġijiet, regolamenti u dispożizzjonijiet amministrattivi meħtieġa sabiex iħarsu l-Artikolu 1(1) u (3), l-Artikolu 2(c) u (d) u l-Anness I, Parti A  sa mhux aktar tard mill-31 ta' Diċembru 2013. Huma għandhom mill-ewwel jikkomunikaw  lill-Kummissjoni t-test ta' dawk id-dispożizzjonijiet u tabella ta' korrelazzjoni bejn dawk id-dispożizzjonijiet u din id-Direttiva  .

 

Emenda  15

Proposta għal direttiva

Artikolu 6 – paragrafu 2a (ġdid)

 

Test propost mill-Kummissjoni

Emenda

 

2a. Il-kumpaniji għandhom iħejju l-kontijiet annwali tagħhom flimkien mad-data fiskali relevanti kollha f’Extensible Business Reporting Language (XBRL).

 

Emenda  16

Proposta għal direttiva

Artikolu 7 – paragrafu 1

 

Test propost mill-Kummissjoni

Emenda

Sal-31 ta' Diċembru , 31 ta' Diċembru 2016  , il-Kummissjoni għandha tirrapporta lill-Kunsill dwar l- impatt ekonomiku  ta' din id-Direttiva.

Sal-31 ta' Diċembru 2015, il-Kummissjoni għandha tirrapporta lill-Parlament Ewropew u lill-Kunsill dwar l-impatt ekonomiku  ta' din id-Direttiva.

 

Emenda  17

Proposta għal direttiva

Artikolu 8 – paragrafu 1

 

Test propost mill-Kummissjoni

Emenda

Din id-Direttiva m'għandhiex tolqot l-applikazzjoni ta' dispożizzjonijiet domestiċi jew ibbażati fuq ftehim li jmorru lil hinn mid-dispożizzjonijiet ta' din id-Direttiva u li għandhom l-għan li jeliminaw jew inaqqsu t-tassazzjoni doppja ta' imgħax u ta' royalties.

Din id-Direttiva m'għandhiex tolqot l-applikazzjoni ta' dispożizzjonijiet domestiċi jew ibbażati fuq ftehim li jmorru lil hinn mid-dispożizzjonijiet ta' din id-Direttiva u li għandhom l-għan li jeliminaw jew inaqqsu t-tassazzjoni doppja u n-non-tassazzjoni doppja ta' imgħax u ta' royalties.

 

 

 

NOTA SPJEGATTIVA

Erba' snin wara li faqqgħet il-kriżi finanzjarja, ekonomika u soċjali, huwa ta' importanza estrema li wieħed jara b'mod ċar lejn fejn sejrin l-Istati Membri, billi jitqiesu s-soluzzjonijiet kollha possibbli biex l-Ewropa terġa' tinġieb fi triq tat-tkabbir u tal-iżvilupp.

Minn banda, huwa essenzjali li jinħolqu u jiġu implimentati politiki ġodda komuni, li permezz tagħhom se nkunu magħquda u b'saħħitna biżżejjed biex nevitaw kriżi fil-futur, iżda mill-banda l-oħra, fi żminijiet diffiċli bħal dawk li għaddejjin minnhom, għandna wkoll nerġgħu nikkunsidraw il-politiki u l-impenji eżistenti tagħna u nittestjawhom biex naraw jekk għadhomx aġġornati u adegwati biżżejjed biex jiffaċċjaw l-isfidi li għandna quddiemna.

Id-Direttiva tal-Kunsill dwar sistema komuni ta' tassazzjoni applikabbli għall-pagament ta' imgħax u royalties magħmula bejn kumpaniji assoċjati tad-diversi Stati Membri ġiet emendata bosta drabi tul dawn l-aħħar snin, iżda għad hemm xi titjibiet tekniċi li għandhom isiru, li huma żgħar u, kif tgħid ukoll il-Kummissjoni fid-dikjarazzjoni tagħha, għandhom isiru f'ġieħ iċ-ċarezza u r-responsabilità.

Meta jitqies il-fatt li l-verżjoni riformulata tad-Direttiva dwar il-Kumpaniji Prinċipali u dawk Sussidjarji ġiet adottata f'Settembru 2011 u li r-Rapport dwar Bażi Fiskali Komuni u Konsolidata għall-Kumpaniji ġie adottat din is-sena mill-Kumitat ECON; u wara li jitqies il-fatt li hemm stimi reċenti li juru l-evażjoni u l-evitar fiskali, li jiswew lill-gvernijiet tal-Unjoni Ewropea ammont sinifikanti ta' dħul mitluf; billi t-telf tad-dħul iżid il-livelli ta' defiċit u ta' dejn tad-diversi Stati Membri; billi l-kooperazzjoni bejn is-sistemi fiskali tad-diversi Stati Membri hija dejjem iktar mixtieqa, u huwa għalhekk meħtieġ li tiġi emendata d-Direttiva sabiex titnaqqas ulterjorment il-possibilità ta' frodi b'rabta ma' non-tassazzjoni, tassazzjoni doppja u evitar fiskali mhux intenzjonali fost l-Istati Membri, li joħolqu saħansitra iktar danni għat-tħaddim xieraq tas-suq intern, kif iddikjarat fil-mozzjoni għal riżoluzzjoni adottata reċentement dwar 'kulħadd favur mezzi konkreti biex tingħeleb il-frodi fiskali u l-evażjoni fiskali'.

Fost l-emendi tar-rapporteur, id-dispożizzjonijiet dwar 'soġġett għat-taxxi' u 'stabbilimenti permanenti' għandhom l-għan li jeskludu kwalunkwe possibilità ta' evażjoni fiskali, sostituzzjoni ta' taxxi jew kwalunkwe eżenzjoni fiskali illeġittima.

Il-kwistjoni dwar ir-rekwiżiti ta' parteċipazzjoni (10%) u dik dwar il-perjodi tranżitorji mhumiex modifikati bl-abbozz ta' rapport tar-rapporteur, madankollu huwa essenzjali li jiġi enfasizzat ir-rwol tal-Parlament Ewropew meta tkun qed tiġi valutata l-evalwazzjoni dwar l-impatt tad-Direttiva riformulata mill-Kummissjoni.

 

ANNESS: ITTRA LILL-KUMITAT GĦALL-AFFARIJIET LEGALI

 

Ref.: D(2012)12434

 

 

 

Is-Sa Sharon Bowles

President tal-Kumitat għall-Affarijiet Ekonomiċi u Monetarji

ASP 10G201

Brussell

 

 

 

Suġġett:      Proposta għal direttiva tal-Kunsill dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti (tfassil mill-ġdid)

                  ( COM(2011)0714 – C7 0516/2011 – 2011/0314(CNS) )

 

 

 

Għażiż President,

 

Il-Kumitat għall-Affarijiet Legali, li għandi l-unur nippresjedi, eżamina l-proposta msemmija hawn fuq, skont it-termini tal-Artikolu 87 dwar it-Tfassil mill-Ġdid, kif iddaħħal fir-Regoli ta’ Proċedura tal-Parlament.

Il-Paragrafu 3 ta’ dak l-Artikolu jgħid hekk:

 

"Jekk il-kumitat responsabbli għall-affarijiet legali jikkonkludi li l-proposta ma tinkludi l-ebda bidla sostantiv għal-leġiżlazzjoni minbarra dawk identifikati bħala tali, għandu jinforma lill-kumitat responsabbli dwar dan.

 

F'każ ta' dan it-tip, minbarra l-kundizzjonijiet stabbiliti fl-Artikoli 156 u 157, l-emendi għandhom ikunu ammissibbli mill-kumitat responsabbli biss jekk jikkonċernaw dawk il-partijiet tal-proposta li jinkludu bidliet.

Madankollu, jekk, f’konformità mal-punt 8 tal-Ftehim Interistituzzjonali, il-kumitat responsabbli jkollu l-ħsieb ukoll li jressaq emendi għall-partijiet ikkodifikati tal-proposta, għandu jinnotifika minnufih l-intenzjoni tiegħu lill-Kunsill u lill-Kummissjoni, u din tal-aħħar għandha tinforma lill-kumitat, qabel il-votazzjoni skont l-Artikolu 54, dwar il-pożizzjoni tagħha fir-rigward tal-emendi kif ukoll dwar jekk għandhiex il-ħsieb li tirtira l-proposta ta' riformulazzjoni.”

B'segwitu għall-opinjoni tas-Servizz Legali, li r-rappreżentanti tiegħu pparteċipaw fil-laqgħat tal-Grupp ta' Ħidma Konsultattiv li eżamina l-proposta għal riformulazzjoni, u b'konformità mar-rakkomandazzjonijiet tar-rapporteur għal opinjoni, il-Kumitat għall-Affarijiet Legali jikkunsidra li l-proposta msemmija ma tinkludi l-ebda tibdil sostantiv ħlief dak identifikat bħala tali fil-proposta u billi, f’dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil, il-proposta tillimita ruħha għal kodifikazzjoni pura u sempliċi tal-atti eżistenti mingħajr tibdil fis-sostanza tagħhom.

 

Biex nikkonkludu, wara li ddiskutiha fil-laqgħa tiegħu tal-1 ta' Marzu 2012, il-Kumitat għall-Affarijiet Legali, b'22 vot favur u ebda astensjoni[2], jirrakkomanda li l-Kumitat tiegħek, bħala l-kumitat responsabbli, jipproċedi biex jeżamina l-proposta msemmija hawn fuq f'konformità mal-Artikolu 87.

 

Dejjem tiegħek,

 

 

 

 

 

 

 

 

 

 

 

Klaus-Heiner LEHNE

 

 

 

 

 

 

 

Mehmuż: L-Opinjoni tal-Grupp ta’ Ħidma Konsultattiv.

ANNESS: OPINJONI TAL-GRUPP TA' ĦIDMA KONSULTATTIV TAS-SERVIZZI LEGALI TAL-PARLAMENT EWROPEW, TAL-KUNSILL U TAL-KUMMISSJONI

 

 

 

GRUPP TA' ĦIDMA KONSULTATTIV

TAS-SERVIZZI LEGALI

Brussell, 16 ta' Jannar 2012

OPINJONI

                     GĦALL-ATTENZJONI TAL-PARLAMENT EWROPEW

                                                              TAL-KUNSILL

                                                              TAL-KUMMISSJONI

Proposta għal direttiva tal-Kunsill dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti (tfassil mill-ġdid)

COM(2011)0714 tal- 11.11.2011 – 2011/0314(CNS)

Wara li kkunsidra l-Ftehim Interistituzzjonali tat-28 ta’ Novembru 2001 dwar użu iktar strutturat tat-teknika tat-tfassil mill-ġdid ta’ atti legali, u partikolarment il-punt 9 ta' din il-Ftehima, il-Grupp ta’ Ħidma Konsultattiv, li hu magħmul mis-servizzi legali tal-Parlament Ewropew, il-Kunsill u l-Kummissjoni rispettivament, iltaqa’ fis-28 ta’ Novembru 2011 biex jeżaminaw, fost oħrajn, il-proposta msemmija hawn fuq ippreżentata mill-Kummissjoni.

 

F'din il-laqgħa[3], l-evalwazzjoni tal-proposta għal direttiva tal-Kunsill li tfassal mill-ġdid id-Direttiva tal-Kunsill 2003/49/KE tat-3 ta' Ġunju 1990 dwar sistema komuni ta' tassazzjoni applikabbli għall-pagamenti ta' imgħax u ta' royalties bejn kumpaniji assoċjati ta' Stati Membri differenti wasslet biex il-Grupp ta' Ħidma Konsultattiv jikkonkludi, mingħajr dissens, li l-proposta ma fiha l-ebda emenda sostantiva, għajr il-bidliet li ġew identifikati bħala tali. Il-Grupp ta' Ħidma innota wkoll, f’dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma’ dan it-tibdil, il-proposta tillimita ruħha għal kodifikazzjoni pura u sempliċi tal-atti eżistenti, mingħajr tibdil sustanzjali.

 

 

C. PENNERA                       H. LEGAL                            L. ROMERO REQUENA

Ġurikonsult                            Ġurikonsult                            Direttur Ġenerali

 

PROĊEDURA

Titolu

Sistema komuni ta’ tassazzjoni applikabbli għall-pagamenti ta’ imgħax u ta’ royalties bejn kumpaniji assoċjati ta’ Stati Membri differenti (riformulazzjoni)

Referenzi

COM(2011)0714 – C7-0516/2011 – 2011/0314(CNS)

Data meta ġie kkonsultat il-PE

20.12.2011

 

 

 

Kumitat responsabbli

       Data tat-tħabbir fis-seduta plenarja

ECON

17.1.2012

 

 

 

Kumitat(i) mitlub(a) jagħti/u opinjoni

       Data tat-tħabbir fis-seduta plenarja

JURI

17.1.2012

 

 

 

Rapporteur(s)

       Data tal-ħatra

Ildikó Gáll-Pelcz

29.11.2011

 

 

 

Eżami fil-kumitat

31.5.2012

25.6.2012

 

 

Data tal-adozzjoni

10.7.2012

 

 

 

Riżultat tal-votazzjoni finali

+:

–:

0:

32

3

3

Membri preżenti għall-votazzjoni finali

Jean-Paul Besset, Sharon Bowles, Udo Bullmann, Nikolaos Chountis, George Sabin Cutaş, Rachida Dati, Leonardo Domenici, Diogo Feio, Markus Ferber, Elisa Ferreira, Ildikó Gáll-Pelcz, Jean-Paul Gauzès, Sven Giegold, Gunnar Hökmark, Wolf Klinz, Jürgen Klute, Rodi Kratsa-Tsagaropoulou, Philippe Lamberts, Werner Langen, Ivari Padar, Alfredo Pallone, Anni Podimata, Antolín Sánchez Presedo, Olle Schmidt, Edward Scicluna, Peter Simon, Theodor Dumitru Stolojan, Kay Swinburne, Sampo Terho, Marianne Thyssen, Ramon Tremosa i Balcells, Corien Wortmann-Kool, Pablo Zalba Bidegain

Sostitut(i) preżenti għall-votazzjoni finali

Thijs Berman, Danuta Maria Hübner, Olle Ludvigsson, Gay Mitchell, Theodoros Skylakakis

Data tat-tressiq

12.7.2012

 

 

[1] ĠU C 77, 28.3.2002, p. 1.
[2] Dawn li ġejjin kienu preżenti għall-votazzjoni finali: Klaus-Heiner Lehne (Chair), Evelyn Regner (Vice-Chair), Raffaele Baldassarre (Vice-Chair), Françoise Castex (Vice-Chair), Sebastian Valentin Bodu (Vice-Chair), Luigi Berlinguer, Piotr Borys, Cristian Silviu Buşoi, Christian Engström, Marielle Gallo, Giuseppe Gargani, Lidia Joanna Geringer de Oedenberg, Sajjad Karim, Kurt Lechner, Eva Lichtenberger, Antonio Masip Hidalgo, Jiří Maštálka, Alajos Mészáros, Angelika Niebler, Bernhard Rapkay, Dagmar Roth-Behrendt, Alexandra Thein, Rainer Wieland, Cecilia Wikström, Jacek Włosowicz, Tadeusz Zwiefka. 
[3] Il-Grupp ta’ Ħidma Konsultattiv kellu għad-dispożizzjoni tiegħu l-verżjonijiet tal-proposta bl-Ingliż, bil-Franċiż u bil-Ġermaniż u ħadem bil-verżjoni Ingliża, peress li din kienet il-verżjoni oriġinali tat-test diskuss.