Dokument ta' sessjoni

A7-0231/2012

12.7.2012

***I

RAPPORT

dwar il-proposta għal regolament tal-Parlament Ewropew u tal-Kunsill li jemenda r-Regolament (KE) Nru 428/2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta’ oġġetti b’użu doppju

( COM(2011)0704 – C7‑0395/2011 – 2011/0310(COD) )

Kumitat għall-Kummerċ Internazzjonali

Rapporteur: Christofer Fjellner

PR_COD_1amCom

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

NOTA SPJEGATTIVA  8

PROĊEDURA  11

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal regolament tal-Parlament Ewropew u tal-Kunsill li jemenda r-Regolament (KE) Nru 428/2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta’ oġġetti b’użu doppju

( COM(2011)0704 – C7‑0395/2011 – 2011/0310(COD) )

(Proċedura leġiżlattiva ordinarja: l-ewwel qari)

Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill ( COM(2011)0704 ),

–  wara li kkunsidra l-Artikolu 294(2) u l-Artikolu 207(2) tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C7‑0395/2011),

–  wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 55 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Kummerċ Internazzjonali ( A7-0231/2012 ),

1.  Jadotta l-pożizzjoni fl-ewwel qari li tidher hawn taħt;

2.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

3.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

Emenda    1

Proposta għal regolament

Premessa 9

Emenda  2

Proposta għal regolament

Artikolu 1 – punt 2

Regolament (KE) Nru 428/2009

Artikolu 15 – paragrafu 3

Emenda    3

Proposta għal regolament

Artikolu 1 – punt 3

Regolament (KE) Nru 428/2009

Atikolu 23a – paragrafu 2

NOTA SPJEGATTIVA

L-UE tikkontrolla l-esportazzjoni ta’ oġġetti li huma ta’ natura ċivili, imma li jistgħu jintużaw għal finijiet militari, skont ir-Regolament (KE) Nru 428/2009[1]. L-Anness I tiegħu fih lista tal-UE ta’ oġġetti kkontrollati, li tirrifletti deċiżjonijiet meħuda bi qbil komuni fir-reġimi internazzjonali tal-kontroll tal-esportazzjoni[2]. L-oġġetti kkontrollati ma jistgħux joħorġu mit-territorju doganali tal-UE mingħajr awtorizzazzjoni tal-esportazzjoni[3]. L-Awtorizzazzjonijiet Ġenerali tal-UE għall-Esportazzjoni elenkati fl-Anness II ikopru l-esportazzjoni ta’ ċerti oġġetti b'riskju aktar baxx lejn ċerti destinazzjonijiet.

Il-qafas tal-kontroll tal-esportazzjoni tal-oġġetti u t-teknoloġiji b’użu doppju jaqdi żewġ finijiet: li jillimita r-riskju tal-proliferazzjoni u tal-użu militari, bla ma jfixkel il-kummerċ leġittimu. Għaldaqstant, huwa essenzjali li jintlaħaq bilanċ ġust bejn dawn il-finijiet.

Aġġornamenti tar-Regolament (KE) Nru 428/2009 li jiggverna s-sistema Ewropea ta’ kontroll tal-esportazzjoni ta’ oġġeti b’użu doppju, kif ukoll aġġornamenti tal-Annessi tiegħu li fihom listi ta’ oġġetti kkontrollati u destinazzjonijiet, isiru permezz tal-proċedura leġiżlattiva ordinarja. Din il-proposta għandha l-għan li tissimplifika l-proċeduri fir-reġim tal-UE għall-kontroll tal-esportazzjonijiet billi tintroduċi atti delegati għall-aġġornamenti regolari tal-Anness I u għal modifiki tal-Anness II.

Is-simplifikazzjoni tal-aġġornamenti tal-Anness I

Il-progress teknoloġiku rapidu jwassal għal rieżami kostanti tal-listi internazzjonali ta’ kontroll tal-oġġetti b’użu doppju. Minkejja li d-deċiżjonijiet tas-sistemi internazzjonali ta’ kontroll tal-esportazzjoni mhumiex vinkolanti, l-impenji internazzjonali meħuda mill-Istati Membri jfissru li jkun jeħtieġ li jsiru aġġornamenti frekwenti tal-lista ta’ kontroll tal-UE tal-esportazzjoni ta’ oġġetti b’użu doppju.

Is-simplifikazzjoni u l-aċċelerazzjoni tal-proċeduri eżistenti huma meħtieġa għal żewġ raġunijiet ewlenin. Jistgħu jinqalgħu kwistjonijiet ta’ sigurtà minħabba dewmien fl-implimentazzjoni ta’ deċiżjonijiet għal kontrolli aktar stretti. F’każijiet ta’ dekontroll internazzjonali, implimentazzjoni tard tagħmel ħsara lill-esportaturi Ewropej, meta pajjiżi terzi jneħħu l-kontrolli tal-esportazzjoni b’aktar ħeffa mill-UE[4].

Aġġornamenti tal-Anness I isiru għal raġunijiet ta’ konformità mal-impenji internazzjonali, ħaġa li twassal biex il-kontrolli tal-oġġetti b’użu doppju maqbula fil-livell internazzjonali jiġi trasposti, kważi awtomatikament, fil-liġi tal-UE. Bir-regoli eżistenti, kwalunkwe aġġornament tar-Regolament (KE) Nru 428/2009 jsir bil-proċedura leġiżlattiva ordinarja.

Irriżulta li dan huwa proċess ta’ ċertu piż u li jieħu żmien twil, mentri l-ħtieġa hija għal aġġornamenti regolari u f’waqthom. Ir-reviżjoni kurrenti tal-Anness I, li tinkludi tibdiliet maqbula għal-2009 u l-2010, il-Parlament ivvota dwarha f’Marzu 2012. Barra minn hekk, fi proċedura leġiżlattiva tqila u kumplessa u ta’ natura teknika, fil-parti l-kbira tagħha, il-Parlament m’għandu l-ebda possibbiltà reali li jaġixxi bħala istituzzjoni emendatorja.

Ladarba l-proċedura leġiżlattiva ordinarja f’dan il-qasam ma rriżultax li hija l-aktar mezz effiċjenti għall-ilħiq tal-fini, ir-rapporteur jaqbel li s-setgħa li taġġorna l-Anness I għandha tiġi kkonferita lill-Kummissjoni. Dan jippermetti li l-lista ta’ oġġetti kkontrollati tiġi riveduta bl-anqas dewmien possibbli, jekk ikun hemm bżonn darbtejn jew aktar fis-sena.

Modifikazzjonijiet aktar rapidi tal-Anness II

Sitt tipi eżistenti tal-l-Awtorizzazzjonijiet Ġenerali tal-UE għall-Esportazzjoni[5] (GEAs elenkati fl-Anness II) ikopru esportazzjonijiet “mhux sensittivi” ta’ anqas riskju ta’ oġġetti definiti bi preċiżjoni lejn destinazzjonijiet speċifiċi, b’kundizzjonjiet ta’ użu konkreti. Din is-sistema tippermetti l-esportazzjoni ta’ oġġetti kkontrollati b’anqas dewmien, bla ma jkun hemm bżonn li jinkisbu liċenzji globali jew individwali.

L-UE għandha tkun tista’ tirreaġixxi bil-ħeffa għal ċirkustanzi internazzjonali li jkunu qed jinbidlu malajr billi tneħħi ċerti pajjiżi mill-ambitu tal-GEAs eżistenti. F’każijiet ta’ dan it-tip, huwa essenzjali li jkun hemm il-kapaċità li l-Anness II isirulu modifiki f’waqthom, b’tali mod li jkun żgurat li jsiru biss tranżazzjonijiet ta’ riskju baxx. L-esportazzjonijiet faċilitati għandhom jitwaqqfu b’urġenza meta s-sitwazzjoni tmur għall-agħar.

Konklużjonijiet

L-objettiv tas-sistema ta’ kontroll tal-UE huwa li tiżgura n-nonproliferazzjoni bla ma tirrestrinġi l-kompetizzjoni u l-kompetittività. Il-proposta tal-Kummissjoni hija fi qbil mal-mira li niżguraw li l-listi ta’ kontoll tal-UE jiġu aġġornati bl-anqas dewmien possibbli, biex b’hekk intejbu l-ħeffa u l-flessibbiltà. Dan jippermetti adattament rapidu għal tibdiliet fiċ-ċirkostanzi esterni, b’tali mod li jintlaqa’ għal thediddiet emerġenti ta’ proliferazzjoni filwaqt li jkun żgurat li l-industrija Ewropea ma titħalliex fi żvantaġġ kompetittiv.

Il-proposta hija pass imprtanti lejn it-titjib tal-effikaċja, it-trasparenza u l-proporzjonalità li għandu jġib miegħu r-rieżami futur tas-sistema tal-kontroll tal-oġġetti b’użu doppju, bla ma tiddgħajjef l-effikaċja tal-kontrolli. Ir-rapporteur iħeġġeġ lill-Kummissjoni biex tintensifika l-isforzi tagħha ħalli tiżviluppa Sistema Elettronika u programm ta’ taħriġ rigward il-kontroll tal-esportazzjonijiet, biex b’hekk tiżgura li l-SMEs jibqgħu kompetittivi sew ġewwa kif ukoll barra s-suq uniku, Dan għandu jwassal għall-objettiv globali li nissimplifikaw is-sistema u nħaffu l-proċessi ħalli nnaqqsu l-piżijiet fuq l-esportaturi u l-awtoritajiet, intejbu s-sigurtà u nqawwu l-kompetittività. Fid-dawl tal-importanza tal-industrija tal-oġġetti b’użu doppju, huwa tassew essenzjali li niżguraw trattament ugwali tal-esportaturi.

Ir-rapporteur itenni l-appell tiegħu għal aktar konsistenza tal-politika tal-UE fi ħdan ir-reġimi internazzjonali ta’ kontroll tal-esportazzjonijiet ta’ natura intergovernattiva. Biex tinforza r-rwol tagħha ta’ koordinazzjoni u rappreżentanza u ttejjeb it-trapsarenza, il-Kummissjoni għandha tikkunsidra li tissieħeb, jew tal-anqas tikseb status ta’ osservatur, f’reġimi ta' kontroll li fihom għadha mhijiex membru[6].

Ir-rappoteur jissottolinja li r-rwol tal-Parlament huwa li jwettaq is-superviżjoni ġenerali tal-politika tal-UE dwar il-kontoll tal-esportazzjoni, u mhux il-ġestjoni tagħha fif-dettall. Is-suċċess tas-sistema Ewropea kurrenti tal-kontroll tal-esportazzjoni jiddependi primarjament fuq l-isforzi tal-Istati Membri, li għandhom jiżguraw l-infurzar tajjeb tal-leġiżlazzjoni komuni u jibblukkaw l-esportazzjoni u t-tranżitu ta' oġġetti sensittivi. Ir-riskju ta’ esportazzjonijiet mhux awtorizzati mit-territorju tal-UE jista’ jitrażżan permezz tal-intensifikazzjoni tal-koordinament, sew fil-livell statali kif ukoll bejn l-aġenziji (kontrolli doganali mtejba, kooperazzjoni tas-servizzi tal-pulizija, l-intelliġenza u l-prosekuzzjoni) kif ukoll sanzjonijiet effikaċi għal vjolazzjonijiet tal-kontroll tal-esportazzjoni tal-oġġetti b’użu doppju.

Biex niżguraw approċċ orizzontali għar-reġim ta' atti delegati stipulat fl-Artikolu 290 tat-Trattat ta' Lisbona, ir-rapporteur jissuġġerixxi emendi tat-test, b’tali mod li jinġieb fi qbil ma’ elementi sostanzjali tal-pożizzjoni tal-Parlament fl-hekk imsejħa "trade omnibuses".

PROĊEDURA