Dokument ta' sessjoni

A7-0313/2012

12.10.2012

RAPPORT INTERIM

għall-fini li jinkiseb eżitu pożittiv għall-proċedura ta’ approvazzjoni tal-Qafas Finanzjarju Pluriennali għas-snin 2014-2020

( COM(2011)0398 – COM(2012)0388 – 2011/0177(APP) )

Kumitat għall-Baġits

Korapporteurs: Reimer Böge, Ivailo Kalfin

PR_Consent_InterimMod

WERREJ

Paġna

MOZZJONI GĦAL RIŻOLUZZJONI TAL-PARLAMENT EWROPEW.......................................5

NOTA SPJEGATTIVA..................................................................................................................20

OPINJONI tal-Kumitat għall-Affarijiet Barranin................................................71

OPINJONI tal-Kumitat għall-Iżvilupp.........................................................................75

OPINJONI tal-Kumitat għall-Kummerċ Internazzjonali.................................80

OPINJONI tal-Kumitat għall-Affarijiet Kostituzzjonali.................................83

OPINJONI tal-Kumitat għall-Impjiegi u l-Affarijiet Soċjali............................89

OPINJONI tal-Kumitat għall-Ambjent, is-Saħħa Pubblika u s-Sikurezza tal-Ikel 95

OPINJONI tal-Kumitat għall-Industrija, ir-Riċerka u l-Enerġija...............102

OPINJONI tal-Kumitat għas-Suq Intern u l-Ħarsien tal-Konsumatur....107

OPINJONI tal-Kumitat għat-Trasport u t-Turiżmu.............................................110

OPINJONI tal-Kumitat għall-Iżvilupp Reġjonali.................................................115

OPINJONI tal-Kumitat għall-Agrikoltura u l-Iżvilupp Rurali....................119

OPINJONI tal-Kumitat għas-Sajd.................................................................................125

OPINJONI tal-Kumitat għall-Kultura u l-Edukazzjoni..................................130

OPINJONI tal-Kumitat għall-Affarijiet Legali....................................................139

OPINJONI tal-Kumitat għal-Libertajiet Ċivili, il-Ġustizzja u l-Intern.....142

RIŻULTAT TAL-VOTAZZJONI FINALI FIL-KUMITAT.........................................................145

OPINJONI tal-Kumitat għall-Kontroll tal-Baġit.............................................146

OPINJONI tal-Kumitat għad-Drittijiet tan-Nisa u l-Ugwaljanza bejn is-Sessi       150

RIŻULTAT TAL-VOTAZZJONI FINALI FIL-KUMITAT.........................................................155

MOZZJONI GĦAL RIŻOLUZZJONI TAL-PARLAMENT EWROPEW

għall-fini li jinkiseb eżitu pożittiv għall-proċedura ta’ approvazzjoni tal-Qafas Finanzjarju Pluriennali għas-snin 2014-2020

( COM(2012)0388 – ( COM(2012)0388 – 2011/0177(APP) )

Il-Parlament Ewropew,

–   wara li kkunsidra l-Artikoli 311 u 312 tat-Trattat dwar il-Funzjonament tal-Unjoni Ewropea,

–   wara li kkunsidra l-proposta tal-Kummissjoni tad-29 ta' Ġunju 2011 u l-proposta emendata tal-Kummissjoni tas-6 ta' Lulju 2012 għal Regolament tal-Kunsill li jistabbilixxi l-qafas finanzjarju multiannwali (pluriennali) għas-snin 2014-2020 ( COM(2011)0398 u COM(2012)0388 ),

–   wara li kkunsidra l-proposta tal-Kummissjoni tad-29 ta’ Ġunju 2011 għal Ftehim Interistituzzjonali bejn il-Parlament Ewropew, il-Kunsill u l-Kummissjoni dwar kooperazzjoni f’materji marbuta mal-baġit fir-rigward ta’ ġestjoni finanzjarja soda ( COM(2011)0403 ),

–   wara li kkunsidra l-Komunikazzjoni mill-Kummissjoni tad-29 ta' Ġunju 2011 dwar Baġit għall-Ewropa 2020 ( COM(2011)0500 ),

–   wara li kkunsidra r-rapport tal-Kummissjoni tas-27 ta’ April 2010 lill-Parlament Ewropew u lill-Kunsill dwar il-funzjonament tal-ftehim interistituzzjonali dwar id-dixxiplina baġitarja u t-tmexxija finanzjarja tajba ( COM(2010)0185 ),

–   wara li kkunsidra r-riżoluzzjoni tiegħu tad-29 ta' Marzu 2007 dwar il-futur tar-riżorsi proprji tal-Unjoni Ewropea[1],

–   wara li kkunsidra r-riżoluzzjoni tiegħu tat-8 ta' Ġunju 2011 bit-titolu "Ninvestu fil-ġejjieni: Qafas Finanzjarju Multiannwali (Pluriennali) ġdid għal Ewropa kompetittiva, sostenibbli u inklużiva"[2],

–   wara li kkunsidra r-riżoluzzjoni tiegħu tat-13 ta' Ġunju 2011 dwar perspettivi finanzjarji multiannwali (pluriennali) u riżorsi proprji[3],

–   wara li kkunsidra d-dikjarazzjoni konġunta dwar kwistjonijiet relatati mal-Qafas Finanzjarju Pluriennali annessi mar-regoli finanzjarji riveduti applikabbli għall-baġit ġenerali tal-Unjoni,

–   wara li kkunsidra l-Artikolu 81(3) tar-Regoli ta' Proċedura tiegħu,

–   wara li kkunsidra r-rapport interim tal-Kumitat għall-Baġits u l-opinjonijiet tal-Kumitat għall-Affarijiet Barranin, il-Kumitat għall-Iżvilupp, il-Kumitat għall-Kummerċ Internazzjonali, il-Kumitat għall-Kontroll tal-Baġit, il-Kumitat għall-Impjiegi u l-Affarijiet Soċjali, il-Kumitat għall-Ambjent, is-Saħħa Pubblika u s-Sikurezza tal-Ikel, il-Kumitat għall-Industrija, ir-Riċerka u l-Enerġija, il-Kumitat għas-Suq Intern u l-Ħarsien tal-Konsumatur, il-Kumitat għat-Trasport u t-Turiżmu, il-Kumitat għall-Iżvilupp Reġjonali, il-Kumitat għall-Agrikoltura u l-Iżvilupp Rurali, il-Kumitat għas-Sajd, il-Kumitat għall-Kultura u l-Edukazzjoni, il-Kumitat għall-Affarijiet Legali, il-Kumitat għal-Libertajiet Ċivili, il-Ġustizzja u l-Intern, il-Kumitat għall-Affarijiet Kostituzzjonali u l-Kumitat għad-Drittijiet tan-Nisa u l-Ugwaljanza bejn is-Sessi ( A7-0313/2012 ),

A. billi, skont l-Artikolu 312(2) tat-Trattat dwar il-Funzjonament tal-Unjoni Ewropea (TFUE), il-Kunsill, filwaqt li jaġixxi skont proċedura leġiżlattiva speċjali, għandu jadotta regolament li jistabbilixxi l-Qafas Finanzjarju Pluriennali (QFP), filwaqt li jaġixxi b'mod unanimu, wara li jkun kiseb l-approvazzjoni tal-Parlament; billi, skont l-Artikolu 312(2) tat-TFUE, il-Kunsill Ewropew jista', b'mod unanimu, jadotta deċiżjoni li tawtorizza lill-Kunsill jaġixxi b'maġġoranza kwalifikata meta jadotta r-regolament li jistabbilixxi l-QFP;

B.  billi, skont l-Artikolu 295 tat-TFUE, il-Parlament Ewropew, il-Kunsill u l-Kummissjoni għandhom jikkonsultaw lil xulxin u bi ftehim komuni jagħmlu arranġamenti għall-kooperazzjoni tagħhom, u billi għal dan il-għan, għandu jiġi adottat ftehim interistituzzjonali sabiex jittejjeb il-funzjonament tal-proċedura baġitarja annwali u l-kooperazzjoni bejn l-istituzzjonijiet dwar kwistjonijiet baġitarji;

C. billi l-Artikolu 312(5) tat-TFUE jistieden lill-Parlament Ewropew, lill-Kunsill u lill-Kummissjoni jieħdu kwalunkwe miżura meħtieġa sabiex jiffaċilitaw l-adozzjoni tal-qafas finanzjarju;

D. billi, skont l-Artikolu 311 tat-TFUE, l-Unjoni trid tipprovdi għaliha nnifisha l-mezzi meħtieġa sabiex tikseb l-għanijiet tagħha u twettaq b' suċċess il-politika tagħha, u għandha tkun iffinanzjata kompletament minn riżorsi proprji; billi l-Kunsill mitlub jikkonsulta l-Parlament qabel jadotta deċiżjoni ġdida dwar ir-riforma tar-riżorsi proprji u, barra minn hekk, il-Kunsill irid jikseb l-approvazzjoni tal-Parlament qabel jadotta regolament dwar il-miżuri sabiex jimplimenta s-sistema tar-riżorsi proprji;

E.  billi din se tkun l-ewwel darba li regolament dwar il-QFP jiġi adottat taħt id-dispożizzjonijiet il-ġodda tat-Trattat ta' Lisbona u għaldaqstant jinvolvi arranġamenti ġodda għall-kooperazzjoni bejn l-istituzzjonijiet bil-għan lejn ir-rikonċiljazzjoni ta' proċess effiċjenti għat-teħid ta' deċiżjonijiet mar-rispett għall-prerogattivi tat-Trattat;

F.  billi t-Trattat ta’ Lisbona jikkonferixxi prerogattivi ġodda u sinifikanti lill-Unjoni Ewropea, f'oqsma bħall-azzjoni esterna (l-Artikolu 27(3) tat-TUE), l-isport (l-Artikolu 165 tat-TFUE), l-ispazju (l-Artikolu 189 tat-TFUE), it-tibdil fil-klima (l-Artikolu 191 tat-TFUE), l-enerġija (l-Artikolu 194 tat-TFUE), it-turiżmu (l-Artikolu 195 tat-TFUE) u l-protezzjoni ċivili (l-Artikolu 196 tat-TFUE);

G. billi, fir-riżoluzzjoni tiegħu tat-8 ta' Ġunju 2011, adottata b'maġġoranza kbira, il-Parlament stabbilixxa l-prijoritajiet politiċi ġenerali tiegħu għall-QFP li jmiss, kemm f'termini leġiżlattivi, kif ukoll f'termini baġitarji;

H. billi, fir-riżoluzzjoni tiegħu tat-13 ta' Ġunju 2011, adottata b'maġġoranza kbira, il-Parlament esprima l-prijoritajiet ġenerali tiegħu f'termini baġitarji għall-QFP li jmiss, kemm min-naħa ta' nfiq u kemm min-naħa ta' dħul;

I.   billi l-kumitati parlamentari rilevanti wettqu analiżi sħiħa u fid-dettall tal-ħtiġijiet sabiex jidentifikaw il-prijoritajiet politiċi, kif jixhdu l-opinjonijiet tagħhom mehmużin;

J.   billi l-Presidenza fil-kariga Ċiprijotta bi ħsiebha tippreżenta "kaxxa ta' negozjar", li tinkludi ċifri ta' limitu massimu (imma anke għażliet politiċi li jaqgħu fil-proċedura leġiżlattiva ordinarja), quddiem Kunsill Ewropew Straordinarju f'Novembru 2012;

K. billi jeħtieġ li l-UE jkollha kemm baġit u kemm proċedura baġitarja li jirriflettu kompletament l-essenza trasparenti u demokratika tal-proċess parlamentari għat-teħid ta' deċiżjonijiet u għall-kontroll, abbażi ta' rispett għall-prinċipji ġenerali ta' unità u universalità, li jirrikjedu li d-dħul u l-infiq kollu jiddaħħal sħiħ mingħajr ebda aġġustament fil-konfront ta' xulxin, u li jkun hemm dibattitu u votazzjoni parlamentari kemm dwar id-dħul u kemm dwar l-infiq, skont il-kompetenzi tat-Trattat;

Il-baġit tal-UE bħala għodda kruċjali għal tkabbir intelliġenti, sostenibbli u inklużiv għall-UE kollha

1.    Hu għalkollox konxju li n-negozjati dwar il-QFP għall-2014-2020 qed iseħħu f'kuntest soċjali, ekonomiku u finanzjarju diffiċli ferm, fejn l-Istati Membri qed iwettqu sforzi konsiderevoli biex jagħmlu aġġustamenti fiskali għall-baġits nazzjonali tagħhom, bil-ħsieb sabiex il-finanzi pubbliċi jkunu sostenibbli u s-settur bankarju u l-munita unika jkunu stabbli; jinsisti li l-Unjoni m'għandhiex tidher li qed iżżid piż fiskali żejjed fuq il-kontribwenti; jinsab madankollu konvint li l-baġit tal-UE hu parti mis-soluzzjoni biex l-Ewropa tkun tista' toħroġ mill-kriżi attwali billi jippromwovi investimenti fit-tkabbir u fl-impjiegi u jgħin lill-Istati Membri jaffrontaw, b'mod kollettiv u magħqud u fuq bażi sostenibbli, l-isfidi strutturali tal-lum, b'mod partikolari t-telf tal-kompetittività, kif ukoll il-qgħad u l-faqar li qed jiżdiedu;

2.  Jikkunsidra, madankollu, li riformi strutturali bilanċjati kemm fil-livell nazzjonali, kif ukoll f'dak tal-UE, jirrappreżentaw prekundizzjoni essenzjali għall-implimentazzjoni għaqlija u effiċjenti tal-finanzjament tal-UE, filwaqt li jfakkar fl-importanza ta' finanzi pubbliċi b'saħħithom;

3.    Ifakkar li l-Kunsill Ewropew, f'bosta okkażjonijiet, insista fuq il-ħtieġa ta' governanza ekonomika Ewropea msaħħa u approva l-objettivi stipulati fl-Istrateġija UE 2020 għal tkabbir intelliġenti, sostenibbli u inklużiv, jiġifieri l-promozzjoni tal-impjiegi, it-titjib tal-kundizzjonijiet u tal-infiq pubbliku fl-oqsma tal-innovazzjoni, ir-riċerka u l-iżvilupp, l-ilħuq tal-objettivi tagħna fir-rigward tat-tibdil fil-klima u l-enerġija, it-titjib fil-livelli tal-edukazzjoni u l-promozzjoni tal-inklużjoni soċjali, b'mod partikulari permezz tat-tnaqqis tal-faqar;

4.    Ifakkar li l-Kunsill Ewropew innifsu, f'Ġunju 2012, adotta "Patt għat-Tkabbir u l-Impjiegi", li jirrikonoxxi l-effett ta' ingranaġġ tal-baġit tal-UE fir-rigward tat-tisħiħ tat-tkabbir u tal-impjiegi u jenfasizza ħafna l-kontribut tiegħu biex jgħin lill-Unjoni kollha tegħleb il-kriżi ekonomika u finanzjarja attwali;

5.  Iqis li l-Unjoni kienet partikolarment affettwata mill-kriżijiet finanzjarji suċċessivi tal-aħħar erba' snin, parzjalment minħabba li l-operaturi finanzjarji, is-sħab internazzjonali u l-opinjoni pubblika ddubitaw il-livell ta' solidarjetà fi ħdan l-UE; jemmen li l-baġit tal-UE għandu jkun fil-qalba ta' solidarjetà bħal din; jinsab konvint għalhekk, li d-deċiżjoni dwar il-QFP li jmiss se jkollha jew impatt pożittiv sinifikanti fuq l-isforzi li jsiru mill-gvernijiet nazzjonali sabiex jegħlbu l-kriżi, jew twassal għal riċessjoni akbar fl-UE;

6.    Ifakkar li l-miżuri kollha għall-istabbilizzazzjoni finanzjarja makroekonomika li ttieħdu mill-2008 s'issa għadhom ma ġabux fi tmiem il-kriżi ekonomika u finanzjarja; jemmen, għalhekk, li sabiex nerġgħu lura għat-tkabbir u niġġeneraw l-impjiegi fl-Ewropa, l-Istati Membri għandhom ikomplu bl-isforzi tagħhom sabiex jiżviluppaw il-potenzjal tagħhom għat-tkabbir sostenibbli, filwaqt li jinħtieġ baġit tal-UE mmirat tajjeb, sod u suffiċjenti bħala għajnuna ulterjuri għall-koordinament u t-tisħiħ tal-isforzi nazzjonali;

7.  Jinnota li l-baġit tal-UE jirrappreżenta biss madwar 2 % tal-infiq governattiv totali fl-Unjoni u għaldaqstant hu aktar minn 45 darba iżgħar mit-total tal-infiq governattiv fl-Istati Membri;

8.  Ifakkar li, skont l-Artikolu 310 tat-TFUE, id-dħul u l-infiq li jidhru fil-baġit tal-UE jridu jkunu bilanċjati u li għalhekk, il-baġit ma jistax jiġġenera defiċit u dejn pubbliku;

9.  Jisħaq fuq il-fatt li l-baġit tal-UE primarjament huwa wieħed ta' investiment, u li 94 % tar-redditu totali tiegħu jiġi investit fl-Istati Membri nnifishom jew għall-prijoritajiet esterni tal-Unjoni; jenfasizza li, għar-reġjuni u l-Istati Membri, l-investiment pubbliku jkollu jiġi mminimizzat jew isir impossibbli mingħajr il-kontribut tal-baġit tal-UE; jemmen li kwalunkwe tnaqqis fil-baġit tal-UE inevitabbilment iżid l-iżbilanċ u jxekkel it-tkabbir u s-saħħa kompetittiva tal-ekonomija kollha tal-Unjoni, kif ukoll il-koeżjoni tagħha, u jdgħajjef il-prinċipju tas-solidarjetà bħala valur ewlieni tal-UE;

10. Jenfasizza l-fatt li l-Istrateġija ta' Lisbona naqset milli tikseb il-miri tagħha, fost affarijiet oħra minħabba l-koordinament u l-impenji insuffiċjenti mil-livelli kollha, kemm f'termini baġitarji u kemm dawk leġiżlattivi; jemmen bis-sħiħ li, sabiex tkun effikaċi, jeħtieġ li l-Istrateġija Ewropa 2020 tiġi implimentata issa u mingħajr aktar dewmien;

11. Ifakkar li l-kisba tas-seba' inizjattivi emblematiċi tal-Istrateġija Ewropa 2020 se tirrikjedi ammont sostanzjali ta' investiment orjentat lejn il-ġejjieni, bi stima ta' mhux inqas minn EUR 1 800 biljun sal-2020[4]; jisħaq fuq il-fatt li wieħed mill-objettivi ewlenin tal-Istrateġija Ewropa 2020, jiġifieri l-promozzjoni tax-xogħol u impjiegi ta' kwalità għolja għall-Ewropej kollha, jista' jinkiseb biss jekk l-investiment meħtieġ fl-edukazzjoni, favur soċjetà msejsa fuq l-għarfien, u fir-riċerka u fl-innovazzjoni, fl-SMEs u fit-teknoloġiji ekoloġiċi u ġodda, filwaqt li tkun promossa l-inklużjoni soċjali, isir issa u ma jkomplix jiddewwem; favur li jiġi kkombinat approċċ fuq żewġ binarji ta' miżuri ta' konsolidament fiskali li jiffavorixxu t-tkabbir għat-tnaqqis tad-defiċit u d-dejn pubbliku bil-promozzjoni ta' tali investimenti;

12. Iqis li s-sitwazzjoni allarmanti li qed jaffaċċjaw iż-żgħażagħ madwar l-Ewropa, inklużi rata għolja ta' qgħad mingħajr preċedent, faqar u sfidi edukattivi dejjem jiżdiedu, teħtieġ sforz partikolari, permezz ta' miżuri ta' integrazzjoni, sabiex il-ġenerazzjonijiet il-ġodda jibqgħu marbuta mal-valuri tal-UE tal-paċi, id-demokrazija u d-drittijiet tal-bniedem, il-prosperità ekonomika u l-ġustizzja soċjali, u billi jipprovdu programmi adegwati ta' appoġġ baġitarju;

13. Jenfasizza li bażi industrijali b'saħħitha, diversifikata u kompetittiva hija importanti sabiex tinkiseb ekonomija Ewropea intelliġenti, sostenibbli u inklużiva; jenfasizza l-importanza tas-settur industrijali għall-appoġġ tal-kompetittività u l-ħolqien tax-xogħol fl-UE u l-kontribut kruċjali tiegħu li jirriżulta sabiex tingħeleb il-kriżi ekonomika;

14. Jappoġġa bil-qawwi l-proposta tal-Kummissjoni għall-integrazzjoni ta' miżuri għall-ġlieda kontra t-tibdil fil-klima bil-mira li tal-anqas 20 % tan-nefqa tkun relatata mal-klima; iqis essenzjali li l-baġit tal-UE jkun jista' jimmobilizza investiment favur ekonomija b'livell baxx ta' emissjonijiet ta' karbonju li tkun sostenibbli u prosperuża, jipprovdi appoġġ xieraq biex jinkisbu l-objettivi tal-UE 2020 rigward il-klima, l-enerġija, l-effiċjenza fir-riżorsi u l-bijodiversità, u jkun ta' benefiċċju għaċ-ċittadini tal-UE billi jiżgura ambjent aktar b'saħħtu;

15. Jistieden, għalhekk, lill-Istati Membri jikkunsidraw sinerġiji bejn l-isforz ta' konsolidament nazzjonali u l-valur miżjud ta' baġit tal-UE pprijoritizzat tajjeb, li jkunu jippermettu l-implimentazzjoni tal-impenji politiċi li diġà ttieħdu fl-ogħla livell;

Il-livell tal-infiq

16. Jisħaq fuq il-fatt li, mill-1988, il-baġits nazzjonali, bħala medja, kibru aktar malajr milli kiber il-baġit tal-UE; jinnota li, anke minn mindu bdiet il-kriżi fl-2008, l-infiq governattiv totali fl-Istati Membri kiber b'rata nominali annwali ta' 2 %; jislet il-konklużjoni li l-fatt li l-baġit tal-UE ċkien meta mqabbel mal-baġits nazzjonali jikkontradixxi b'mod flagranti l-estensjoni tal-kompetenzi u l-kompiti konferiti lill-Unjoni mit-Trattat u d-deċiżjonijiet politiċi importanti li ttieħdu mill-Kunsill Ewropew innifsu, partikolarment l-iżvilupp ta' governanza ekonomika Ewropea msaħħa;

17. Jenfasizza li mill-2000, id-distakk bejn il-limitu massimu tar-riżorsi proprji tal-UE (1.29 % tal-ING f'approprjazzjonijiet ta' impenn u 1.23 % f'approprjazzjonijiet ta' pagament) u l-limiti massimi tal-QFP kiber b'mod drammatiku; jinnota, barra minn hekk, li l-QFP jistabbilixxi biss il-livelli massimi tal-infiq, waqt li l-baġit tal-UE dejjem baqa' ferm anqas minn dawk il-livelli;

18. Jikkunsidra li l-proposta tal-Kummissjoni, fejn il-limiti massimi tal-QFP 2014-2020 ġew iffriżati fil-livell tal-limiti massimi tal-2013, mhix se tkun biżżejjed għall-finanzjament tal-prijoritajiet politiċi eżistenti marbutin mal-Istrateġija tal-Ewropa għal tkabbir intelliġenti, sostenibbli u inklużiv, il-kompiti l-ġodda previsti mit-Trattat ta' Lisbona, jew avvenimenti mhux imbassra, biex ma nsemmux l-objettivi u l-impenji politiċi stabbiliti mill-Kunsill Ewropew innifsu;

19. Ifakkar fil-pożizzjoni tiegħu, kif iddikjarata fit-8 ta' Ġunju 2011, li mingħajr żieda adegwata fil-baġit 'il fuq mil-livell tal-limiti massimi tal-2013, bosta mill-prijoritajiet u mill-politiki tal-UE se jkollhom jiġu riveduti 'l isfel jew saħansitra abbandunati;

20. Iwissi lill-Kunsill dwar kwalunkwe tentattiv li jitnaqqas ulterjorment il-livell tan-nefqa tal-UE kif propost mill-Kummissjoni; jopponi strettament, b'mod partikolari, kwalunkwe appell għal tnaqqis lineari u ġenerali li jista' jipperikola l-implimentazzjoni u l-effikaċja tal-politiki kollha tal-UE, irrispettivament mill-valur miżjud Ewropew, il-piż politiku jew il-prestazzjoni tagħhom; minflok jistieden lill-Kunsill, f'każ li dan jipproponi tnaqqis, jidentifika biċ-ċar u pubblikament liema mill-prijoritajiet politiċi jew mill-proġetti tiegħu għandhom jiġu abbandunati kompletament;

21. Jenfasizza r-rwol ewlieni li jrid ikollu l-baġit tal-UE fil-kisba tal-objettivi tal-Istrateġija UE 2020 miftehma b'mod konġunt; jemmen bis-sħiħ li jekk ippjanat sew, il-finanzjament tal-UE jista’ joħloq u jservi ta' katalist għal azzjonijiet b'valur miżjud tal-Unjoni ċar li l-Istati Membri ma jistgħux iwettqu individwalment, kif ukoll joħloq sinerġiji u komplimentaritajiet mal-attivitajiet tal-Istati Membri billi jgħinhom jiffukaw fuq investimenti ewlenin orjentati lejn il-futur;

22. Jafferma mill-ġdid f'dan il-kuntest, il-pożizzjoni tiegħu favur żieda sinifikanti fil-finanzjament disponibbli għall-programmi tal-Unjoni fl-oqsma tal-kompetittività, l-SMEs, l-intraprenditorija u l-infrastrutturi sostenibbli, li huma fil-qalba tal-Istrateġija Ewropa 2020; jemmen bis-sħiħ li tnaqqis ulterjuri fir-rigward tal-proposta tal-Kummissjoni se jipperikola serjament il-kredibilità tal-UE u l-impenn politiku tagħha favur it-tkabbir u l-impjiegi;

23. Jilqa' bi pjaċir il-proposta tal-Kummissjoni dwar il-Faċilità Nikkollegaw l-Ewropa u l-allokazzjoni finanzjarja realistika tagħha għat-titjib tan-netwerks tat-trasport, l-enerġija u dawk diġitali tal-Ewropa; iħeġġeġ f'dan il-kuntest, li l-ammont trasferit mill-Fond ta' Koeżjoni għall-Faċilità Nikkollegaw l-Ewropa għandu jintnefaq – matul l-ewwel snin – f'konformità sħiħa mal-allokazzjonijiet nazzjonali taħt dan il-Fond;

24. Jenfasizza l-importanza tar-riċerka u l-innovazzjoni fl-aċċelerazzjoni tat-tranżizzjoni lejn ekonomija sostenibbli, minn ta’ quddiem fid-dinja u bbażata fuq l-għarfien, li tuża r-riżorsi naturali tagħha b'mod effiċjenti u responsabbli; jistieden lill-istituzzjonijiet tal-UE u lill-Istati Membri jiftiehmu dwar pjan direzzjonali speċifiku sabiex jintlaħaq l-objettiv ta' 3 % tal-PDG ta' investiment fir-riċerka; jindika l-impenn ekonomiku kbir involut b'rabta ma' dan l-objettiv, f'termini ta' nefqa addizzjonali li tammonta għal EUR 130 biljun, kull sena u b'finanzjament mis-sorsi kollha; jenfasizza għalhekk, il-ħtieġa li l-finanzjament tar-riċerka u tal-innovazzjoni fl-Unjoni jissaħħaħ, jiġi stimulat u garantit permezz ta' żieda sinifikanti fin-nefqa, u fil-finanzjament għar-riċerka u l-innovazzjoni tal-UE – partikolarment permezz tal-programm Orizzont 2020;

25. Ifakkar li l-SMEs huma xpruni ewlenin tat-tkabbir ekonomiku, il-kompetittività, l-innovazzjoni u l-impjiegi, u jirrikonoxxi r-rwol importanti tagħhom biex jiġi żgurat l-irkupru u tingħata spinta lil ekonomija tal-UE sostenibbli; jilqa' għalhekk, l-enfasi tal-Istrateġija Ewropa 2020 fuq l-innovazzjoni u l-politika industrijali; jiċħad bil-qawwi kwalunkwe tentattiv sabiex titnaqqas ulterjorment l-allokazzjoni għall-programmi, bħal COSME, li huma fil-qalba tal-kompetittività Ewropea u l-impjiegi;

26. Iqis li l-politika ta' koeżjoni tal-UE (il-fondi strutturali u l-fond ta' koeżjoni) hija strument strateġiku għall-investiment, it-tkabbir sostenibbli u l-kompetittività, u pilastru ewlieni tas-solidarjetà Ewropea, b'valur miżjud tal-UE li ħadd ma jista' jiċħad; jinnota wkoll l-effetti mifruxa sinifikanti tal-finanzjament ta' koeżjoni għall-Istati Membri kollha tal-UE; jinsisti li sabiex l-iżbilanċ makroekonomiku jitnaqqas b'mod effettiv fi ħdan l-UE u jkun hemm kontribut lejn il-koeżjoni ekonomika, soċjali u territorjali, din għandha tkun tista' tiddependi fuq qafas finanzjarju stabbli, solidu u sostenibbli; jafferma mill-ġdid il-pożizzjoni tiegħu li l-finanzjament tal-politika ta' koeżjoni, minħabba l-ħtieġa urġenti li jiġi żgurat investiment pubbliku fit-tkabbir u l-impjiegi, għandu jinżamm tal-anqas fil-livell tal-perjodu 2007-2013 u jkompli jkopri r-reġjuni kollha tal-UE, b'enfasi fuq ir-reġjuni l-anqas żviluppati; japprova l-proposta tal-Kummissjoni li talloka 25 % tal-allokazzjoni totali tal-politika ta' koeżjoni lill-FSE;

27. Ifakkar fil-pożizzjoni tiegħu li fid-dawl tal-firxa wiesgħa ta' kompiti, sfidi u objettivi li l-PAK mitluba tirreaġixxi għalihom, l-ammonti allokati lill-PAK fil-baġit għas-sena 2013 għandhom tal-anqas jinżammu matul il-perjodu ta' programmazzjoni finanzjarja li jmiss; jemmen li l-PAK il-ġdida għandha timmira lejn allokazzjoni aktar effettiva u effiċjenti tal-baġit tagħha, fost l-oħrajn permezz ta' distribuzzjoni ġusta tal-pagamenti diretti u allokazzjonijiet għall-iżvilupp rurali bejn l-Istati Membri, ir-reġjuni u l-bdiewa, sabiex titnaqqas id-differenza eżistenti; jenfasizza f'dan il-kuntest, ir-rwol importanti tat-tieni pilastru tal-PAK, li jikkontribwixxi b'mod sinifikanti għall-investiment u l-ħolqien tax-xogħol f'żoni rurali, isaħħaħ l-effettività u l-kompetittività tal-industrija tal-biedja, partikolarment fid-dawl tal-isfidi ġodda msemmija fl-Istrateġija Ewropa 2020, kif ukoll għall-ġestjoni tal-ambjent u l-preservazzjoni tal-bijodiversità;

28. Jenfasizza li t-tisħiħ tal-programm immirat tajjeb u effettiv tal-Unjoni għall-ambjent u l-klima huwa indispensabbli u li l-infiq integrat fuq il-klima u l-ambjent għandu jiġi appoġġat b'mod attiv fi ħdan fondi rilevanti tal-Unjoni;

29. Jirrikonoxxi l-isfidi serji li qed jaffaċċjaw iż-żgħażagħ fl-UE bil-kriżi ekonomika; iqis li l-parteċipazzjoni, l-impjiegi, l-edukazzjoni, l-edukazzjoni mhux formali, it-taħriġ, il-mobilità u l-inklużjoni soċjali taż-żgħażagħ Ewropej huma kwistjonijiet ta' importanza strateġika għall-iżvilupp tal-UE u tas-soċjetà Ewropea; jinsisti fuq l-integrazzjoni ta' dawn il-kwistjonijiet u li jingħataw prijorità fil-politiki u l-programmi rilevanti kollha ffinanzjati mill-baġit tal-UE, flimkien maż-żieda neċessarja fil-finanzjament tal-istrumenti konkreti speċifiċi għaż-żgħażagħ proposti mill-Kummissjoni, bħall-introduzzjoni ta' skema ta' garanzija għaż-żgħażagħ sabiex ikun żgurat li kull persuna żgħażugħa fl-Ewropa li ma tistax issib impjieg tiġi offruta l-possibilità ta' edukazzjoni u taħriġ ulterjuri;

30. Jenfasizza l-ħtieġa li jitkompla l-programm għall-aktar persuni żvantaġġati; ifakkar lill-Kummissjoni fl-impenn tagħha li tippreżenta, f'ħin utli, proposta leġiżlattiva f'dan ir-rigward sabiex tiġi żgurata l-kontinwità tal-appoġġ għal tali programm wara l-2013 fuq bażi legali ġdida u b'finanzjament indipendenti;

31. Huwa tal-fehma li l-ammont totali ddedikat min-naħa tal-Kummissjoni lill-Ispazju ta' Libertà, Sigurtà u Ġustizzja ma jirriflettix adegwatament it-tisħiħ ta’ dan l-ispazju fil-konfront tat-Trattat ta’ Lisbona u l-kompiti u l-isfidi tiegħu li dejjem qed jiżdiedu; jenfasizza li l-attivitajiet iffinanzjati jrid ikollhom valur miżjud Ewropew u li trid tiġi żgurata parti ġusta, bilanċjata u trasparenti tal-finanzjament bejn l-objettivi varji fil-mira ta' dawn il-programmi;

32. Ifakkar li l-programmi edukattivi, għaż-żgħażagħ, il-midja u dawk kulturali tal-UE huma qrib taċ-ċittadini, għandhom rata ta' implimentazzjoni għolja ħafna, jipproduċu effett ta' ingranaġġ u effetti mifruxa notevoli inklużi riżultati ekonomiċi sinifikanti, u jiġġeneraw valur miżjud Ewropew ċar u tanġibbli permezz ta' ġbir komuni tar-riżorsi, it-tħeġġiġ tal-mobilità u ċ-ċittadinanza attiva, u t-tisħiħ tal-kooperazzjoni fost setturi u partijiet interessati differenti;

33. Itenni mill-ġdid il-pożizzjoni tiegħu li r-resonsabilitajiet il-ġodda konferiti lill-UE mit-Trattati se jeħtiġilhom finanzjament addizzjonali adegwat meta mqabbel mal-QFP 2007-2013, sabiex l-Unjoni tkun tista' taqdi r-rwol tagħha bħala attur globali filwaqt li żżomm l-impenji li diġà kkommettiet ruħha għalihom, partikolarment il-kisba tal-miri dwar l-infiq tal-Istati Membri ta' 0.7 % ING għal Għajnuna Uffiċjali għall-Iżvilupp u l-ilħuq tal-Għanijiet ta' Żvilupp tal-Millennju sal-2015; jenfasizza r-rwol tal-Unjoni fil-promozzjoni tad-demokrazija, il-paċi, is-solidarjetà, l-istabilità u t-tnaqqis fil-faqar fil-pajjiżi ġirien u sħab; jenfasizza l-komplementarjetà tal-assistenza tal-UE għal dik mogħtija mill-Istati Membri u l-effett ta' katalista li għandha fir-rigward tal-intervent f'reġjuni fejn ma tingħatax assistenza bilaterali; jappoġġa b'mod partikolari, il-programmazzjoni konġunta bejn l-azzjonijiet tal-Istati Membri u dawk tal-UE; jenfasizza għalhekk, li l-proposti tal-Kummissjoni għal 'Ewropa Globali' u l-Fond Ewropew għall-Iżvilupp iridu jiġu kkunsidrati l-minimu meħtieġ sabiex tinkiseb l-ambizzjoni tal-Ewropa fid-dinja; jinnota b'mod partikolari, il-ħtieġa li r-responsabilitajiet tas-SEAE jiġu akkumpanjati minn riżorsi baġitarji adegwati;

Proġetti fuq skala kbira

34. Jenfasizza l-importanza strateġika ta' proġetti infrastrutturali fuq skala kbira bħal ITER, Galileo u GMES għall-futur tal-kompetittività tal-UE; jiċħad għalhekk, kwalunkwe tentattiv li l-GMES jiġi trasformat fi programm intergovernattiv;

35. Huwa strettament tal-opinjoni li l-finanzjament ta' dawn il-proġetti fuq skala kbira għandu jiġi garantit fil-baġit tal-UE, iżda fl-istess ħin, protett sabiex ikun żgurat li l-eċċessi possibbli fl-ispejjeż ma jkunux ta' theddida għall-finanzjament u l-implimentazzjoni b'suċċess ta' politiki oħra tal-Unjoni;

36. Jilqa' l-proposta tal-Kummissjoni sabiex tiffissa ammont massimu għal Galileo fir-regolament QFP, b'hekk tipproteġi l-allokazzjoni baġitarja għal dan il-proġett; jemmen barra minn hekk, li l-ammonti massimi għal ITER u GMES ukoll għandhom jiġu ffissati fir-regolament; iqis li l-pakketti finanzjarji għal dawn it-tliet proġetti għandhom jiġu allokati apparti l-limiti massimi tal-QFP, sabiex l-għoti ta' finanzjament addizzjonali mill-Istati Membri ikun aktar faċli, jekk meħtieġ;

Nefqa aħjar

37. Itenni li l-kisba ta' valur miżjud Ewropew u li tkun żgurata ġestjoni finanzjarja tajba - effiċjenza, effikaċja, ekonomija - għandhom ikunu, issa aktar minn qatt qabel, prinċipji gwida tal-baġit tal-UE; jilqa' f'dan ir-rigward, is-sett ta' proposti leġiżlattivi tal-Kummissjoni dwar il-ġenerazzjoni l-ġdida ta' programmi pluriennali li jridu jiġu adottati skont il-proċedura leġiżlattiva ordinarja; jinsisti li jridu jiġu mmassimizzati s-sinerġiji fost il-programmi ta' appoġġ tal-UE u l-investimenti nazzjonali;

38. Jemmen li fil-kuntest preżenti ta' restrizzjonijiet baġitarji pubbliċi, l-effett ta' ingranaġġ ta' sorsi oħra ta' finanzjament huwa assolutament neċessarju sabiex jinkisbu l-investimenti fuq perjodu twil meħtieġa sabiex jintlaħqu l-objettivi tal-Istrateġija UE 2020; jemmen bis-sħiħ li l-valur miżjud tal-Unjoni għandu jinstab partikolarment f'investimenti fuq perjodu twil li mhumiex aċċessibbli għall-Istati Membri fil-livell individwali; jenfasizza f'dan ir-rigward, il-konklużjonijiet u r-rakkomandazzjonijiet tar-riżoluzzjoni tiegħu dwar l-istrumenti finanzjarji innovattivi fil-kuntest tal-Qafas Finanzjarju Pluriennali li jmiss[5];

39. Jenfasizza l-ħtieġa li tkun żgurata l-koerenza bejn ir-regoli speċifiċi għas-settur u l-qafas ġenerali tar-Regolament Finanzjarju u li jinstab bilanċ bejn is-simplifikazzjoni u l-ġestjoni finanzjarja tajba; jieħu nota tat-tabella ta' simplifikazzjoni maħruġa mill-Kummissjoni, u jikkonferma d-determinazzjoni tiegħu li jappoġġa l-aġenda għas-simplifikazzjoni; jinsab konvint li jeħtieġ li jitnaqqsu ulterjorment il-piżijiet amministrattivi minn fuq il-benefiċjarji, u jitlob l-implimentazzjoni ta' 'kontrolli tal-burokrazija' akkurati fuq il-ġenerazzjoni ġdida ta' programmi pluriennali sabiex jiġi evitat kwalunkwe piż amministrattiv kemm fil-livell tal-UE u kemm dak nazzjonali;

40. Jemmen li l-effikaċja tan-nefqa tal-UE tiddependi fuq l-oqfsa regolatorji, istituzzjonali u ta’politika f’saħħithom fil-livelli kollha; jinsisti li skont l-Artikoli 310(5) u 317 TFUE, l-Istati Membri jridu jimplimentaw il-baġit skont il-prinċipju ta’ ġestjoni finanzjarja soda; ifakkar lill-Istati Membri fl-obbligu legali tagħhom li jiżguraw li l-approprjazzjonijiet li jiddaħħlu fil-baġit jintużaw f’konformità ma’ dan il-prinċpju u li hu m’għandhom jassumu l-parti tar-responsabbiltà tagħhom sabiex irendu l-finanzjament tal-UE aktar effikaċi; ifakkar li 90 % tal-iżbalji identifikati mill-Qorti Ewropea tal-Awdituri kienu fl-Istati Membri u li l-maġġorparti ta’ dawn l-iżbalji setgħu ġew evitati; iħeġġeġ lill-Istati Membri kollha jippubblikaw dikjarazzjonijiet ta’ assigurazzjonijiet iffirmati fil-livell politiku adegwat;

41. Jappoġġa l-introduzzjoni ta’ dispożizzjonijiet tal-kundizzjonalità ex ante sabiex ikun żgurat li l-finanzjament tal-UE, partikolarment fir-rigward tal-Fond ta’ Koeżjoni, il-Fondi Strutturali u l-fondi rurali u tas-sajd, ikunu mmirati aħjar lejn l-ilħuq tal-objettivi Ewropa 2020; jemmen li jekk l-implimentazzjoni tagħhom tkun ibbażata, minn naħa, fuq prinċipju ta’ sħubija msaħħaħ permezz tal-involviment aktar b’saħħitu tal-awtoritajiet lokali u reġjonali u, min-naħa l-oħra, fuq kundizzjonijiet li huma rilevanti għall-objettivi tal-fondi differenti, dawn id-dispożizzjonijiet tal-kundizzjonalità jistgħu jtejbu l-leġittimità u l-effikaċja tal-appoġġ tal-UE;

42. Jitlob li l-finanzjament fil-kuntest tal-ftehimiet ta’ sħubija jkun soġġett għal ċerti impenji speċifiċi determinati minn qabel fi djalogu bejn il-Kummissjoni u l-Istati Membri; iqis ġust li tali kundizzjonijiet jinkludu, b’mod partikolari, l-implimentazzjoni sħiħa tal-leġiżlazzjoni tal-UE fis-seħħ (eż. ir-regolamentazzjoni tal-prezzijiet, il-proċeduri ta’ sejħa għal offerti, it-trasport, l-ambjent u s-saħħa eċċ.) sabiex ikunu evitati irregolaritajiet u biex tkun iggarantita l-effikaċja; jiċħad, madankollu, l-impożizzjoni ta’ kundizzjonijiet li jeħtieġu l-Istati Membri jwettqu riforma soċjali u ekonomika fundamentali; il-kundizzjonijiet kollha għandhom b’mod sħiħ jirrispettaw il-prinċipji tas-sussidjarità u tas-sħubija;

43. Jenfasizza madankollu, li ma hemmx relazzjoni diretta bejn il-prestazzjoni tal-politika reġjonali u l-prestazzjoni makroekonomika ta’ Stat Membru, u li r-reġjuni m’għandhomx jiġu kkastigati għan-nuqqas ta’ konformità fil-livell nazzjonali mal-proċeduri relatati mal-governanza ekonomika; jemmen li jekk jiġu imposti sanzjonijiet addizzjonali, il-problemi tal-Istati Membri li diġà qed jaffaċċjaw diffikultajiet makroekonomiċi jistgħu jiggravaw u li għalhekk, dawn il-kundizzjonalitajiet makroekonomiċi mhumiex aċċettabbli;

44. Jenfasizza l-ħidma kruċjali tal-aġenziji deċentralizzati tal-UE fl-appoġġ tal-objettivi tal-Unjoni u l-bżonn li r-responsabbiltajiet tagħhom jiġu riflessi b’riżorsi baġitarji adegwati;

45. Jemmen fl-istess ħin, li l-ħidma tal-aġenziji deċentralizzati tal-UE għandha tirriżulta f’tfaddil sinifikament ogħla fil-livell nazzjonali; iħeġġeġ lill-Istati Membri jevalwaw il-kisbiet fl-effiċjenza ġġenerati minn dawn l-aġenziji fil-livell nazzjonali u jagħmlu użu sħiħ minnhom, biex b’hekk in-nefqa nazzjonali tagħhom tiġi rrazzjonalizzata; jistieden ukoll lill-Istati Membri jidentifikaw l-oqsma possibbli ta’ duplikazzjoni tax-xogħol jew valur miżjud imnaqqas fir-rigward tal-aġenziji, bil-ħsieb li l-funzjonament tagħhom isir aktar effiċjenti;

46. Huwa konvint li l-istabbiliment tas-Servizz Ewropew għall-Azzjoni Esterna (SEAE) għandu jirriżulta f’ekonomiji ta’ skala fil-livell tal-UE u f’tfaddil sinifikanti fil-livell nazzjonali, b’mod partikolari fis-servizzi diplomatiċi nazzjonali fil-pajjiżi terzi;

47. Jissuġġerixxi li għandha titwettaq evalwazzjoni indipendenti fuq l-effikaċja tal-infiq pubbliku fi tliet livelli – nazzjonali, reġjonali u Ewropew – sabiex jiġu eżaminati fid-dettall il-valur miżjud u l-possibbiltajiet ta’ riżorsi komuni u ta’ iffrankar fl-spejjeż f’oqsma bħad-difiża, il-politika għall-iżvilupp, l-aġenziji deċentralizzati, is-Servizz Ewropew għall-Azzjoni Esterna u r-riċerka xjentifika mhux biss permezz tal-inkoraġġiment tal-ekonomiji ta’ skala fil-livell tal-UE, iżda wkoll permezz tar-rispett tal-prinċipju ta’ sussidjarjetà jemmen li din l-evlwazzjoni għandha twassal għal iffrankar fl-ispejjeż; ifakkar li l-evalwazzjoni dwar l-aġenziji deċentralizzati għandha tieħu kont tad-dispożizzjonijiet rilevanti tal-Approċċ Komuni anness mad-Dikjarazzjoni Konġunta tal-Parlament Ewropew, il-Kunsill tal-UE u l-Kummissjoni Ewropea dwar l-aġenziji deċentralizzati, iffirmata fid-10 ta’ Lulju 2012;

48. Jikkondividi l-opinjoni tal-Kummissjoni dwar il-ħtieġa li jiġu rrazzjonalizzati l-ispejjeż amministrattivi; jenfasizza madankollu, l-importanza li jinstab bilanċ bejn iffrankar ulterjuri u l-garanzija li l-istituzzjonijiet jistgħu jwettqu l-kompiti u d-doveri tagħhom f’konformità mal-obbligi u s-setgħat tagħhom skont it-Trattati, filwaqt li jiġu kkunsidrati l-isfidi iebsa li qed tippreżenta l-kriżi ekonomika attwali;

49. Ma jaqbilx assolutament mal-applikazzjoni ta’ tnaqqis lineari tal-persunal għall- istituzzjonijiet, il-korpi u l-aġenziji kollha billi r-rwoli u r-responsabbiltajiet tagħhom skont it-Trattati jvarjaw bil-kbir; jenfasizza li, sabiex l-istituzzjonijiet jiġu trattati b’mod individwali, id-deċiżjoni dwar fejn u liema tnaqqis jista’ jiġi introdott għandha titħalla f’idejhom sabiex ma jkunx ostakolat il-funzjonament tajjeb tagħhom;

50. Jirrimarka li jista’ jsir tfaddil sinifikanti jekk il-Parlament Ewropew ikollu sede unika; iħeġġeġ lill-awtorità baġitarja tqajjem din il-kwistjoni fin-negozjati dwar il-QFP (2014-2020) li jmiss;

Tul ta’ żmien

51. Huwa tal-fehma li għall-QFP li jmiss, perjodu ta’ 7 snin stabbilit sal-2020, għandu jitqies bħala soluzzjoni tranżitorja, fid-dawl tal-fatt li huwa ċarament marbut mal-Istrateġija Ewropa 2020; jemmen madankollu li perjodu ta’ 5- snin jew perjodu ta’ 5+5 snin jallinja aħjar it-tul ta’ żmien tal-QFP ma’ dak tal-mandat tal-istituzzjonijiet, u b’hekk tittejjeb ir-responsabilizzazzjoni u r-responsabilità demokratika; ifakkar li, sabiex il-QFP ikun vjabbli u effikaċi, perjodu ta’ 7 snin jeħtieġ livell massimu ta’ flessibbiltà.

Reviżjoni ta’ nofs it-term

52. Jenfasizza l-bżonn li tiddaħħal reviżjoni ta’ nofs it-term fir-regolament QFP, bi proċedura speċifika li tinkludi kalendarju vinkolanti li jiżgura l-involviment sħiħ tal-Parlament li jmiss; iqis li l-Kummissjoni għandha tressaq proposta leġiżlattiva li tippermetti li l-QFP jiġi adottat qabel il-proċedura baġitarja tal-2018; jenfasizza li r-reviżjoni ta’ nofs it-term m’għandhiex tfixkel l-istabbilità tal-prospetti ta’ investiment u għandha tipproteġi l-benefiċjarji u l-istabbiltà tal-ipprogrammar u l-investimenti fit-tul;

Il-bżonn ta’ QFP iktar flessibbli

53. Jinsab konvint, bħala kwistjoni ta’ prinċipju, li ċ-ċirkostanzi politiċi u ekonomiċi li qed jinbidlu, kif ukoll avvenimenti mhux previsti, se jeħtieġu aġġustamenti fil-QFP tul il-perjodu ta’ 7 snin; jinsisti li l-QFP li jmiss għandu jipprovdi flessibilità baġitarja mtejba kemm fi ħdan l-intestaturi kif ukoll fosthom, u wkoll bejn is-snin finanzjarji fi ħdan il-QFP, sabiex jiġi żgurat li r-riżorsi baġitarji disponibbli jkunu jistgħu jintużaw bis-sħiħ;

54. Jemmen flessibilità ta’ 5% hija indispensabbli fir-rigward tal-limiti massimi għas-(sotto)intestaturi, sabiex ikun jista’ jsir adattament għaċ-ċirkostanzi l-ġodda mingħajr ma jiżdied l-ammont ġenerali u mingħajr ma jkollha ssir reviżjoni tal-QFP;

55. Jilqa’ l-proposta tal-Kummissjoni biex jiżdied il-livell tal-flessibilità leġiżlattiva (possibilità li wieħed imur oltre l-ammont stabbilit għad-dewmien sħiħ tal-programm ikkonċernat) minn 5% għal 10%;

56. Jenfasizza l-bżonn li jsir l-aħjar użu mil-limiti stabbiliti mill-QFP; jipproponi għalhekk li l-marġni li jibqgħu taħt il-limiti tal-approprjazzjonijiet għal impenn fil-baġit ta’ sena partikolari jitressqu ’l quddiem għas-sena ta’ wara u għandhom jitqiesu bħala li jikkostitwixxu maġni globali tal-QFP, li għandu jingħata fis-snin futuri lid-diversi intestaturi bi qbil mal-bżonnijiet stmati tagħhom u mobilizzati fil-qafas tal-proċedura baġitarja annwali;

57. Jenfasizza wkoll il-bżonn li jiġi introdott marġni globali tal-QFP għall-apprprjazzjonijiet ta’ pagament, li jippermetti li l-marġni li jibqgħu taħt il-limitu għall-approprjazzjonijiet ta’ pagament jitressqu ’l quddiem għas-snin ta’ wara u jiġu mobilizzati fil-qafas tal-proċedura baġitarja annwali;

58. Huwa mħassab b’mod partikolari dwar l-impenji pendenti kurrenti (RALs) li dejjem qed jikbru; jitlob strateġija interistituzzjonali konġunta sabiex il-livell tal-RALs jinżamm taħt kontroll fil-QFP 2014-2020 u jitlob li jittieħdu miżuri xierqa għal dan l-għan; jinkoraġġixxi f’dan ir-rigward diskussjoni dwar kif il-livell tal-approprjazzjoni ta’ pagament jista’ ikun distribwit b’mod aktar ugwali matul il-perjodu QFP sabiex jiġi evitat, kemm jista’ jkun, ir-riskju li tiġi ostakolata l-implimentazzjoni tal-programmi tal-UE minħabba nuqqas ta’ approprjazzjonijiet ta’ pagament lejn l-aħħar tal-qafas finanzjarju;

59. Jinnota li kull sena l-baġit tal-UE juri eċċess u li l-kontribuzzjonijiet tal-Istati Membri għall-baġit tal-UE jitnaqqsu b’dan l-ammont; fl-istess hin, jiddeplora t-tnaqqis lineari regolari tal-Kunsill għall-istimi tal-Kummissjoni għall-approprjazzjonijiet ta’ pagament, kif imdaħħla fl-abbozz ta’ baġit, kif ukoll l-oġġezzjoni mtennija ħafna drabi mill-Kunsill, matul is-snin, li jipprovdi l-baġit tal-UE bil-livell ta’ pagamenti addizzjonali meħtieġa mill-Kummissjoni, fl-aħħar tas-sena baġitarja, sabiex l-UE tkun tista’ tissodisfa l-impenji finanzjarji tagħha; huwa tal-opinjoni li approċċ bħal dan mhuwiex ibbaġittjar tajjeb u li, filwaqt li l-eċċess ritornat m’għandu l-ebda impatt fuq il-livell tad-defiċit globali tal-Istati Membri, dan l-ammont jista’ jagħmel differenza ċara għall-baġit annwali tal-UE; ifakkar fl-impenn meħud mill-istituzzjonijiet biex jirrevedu r-Regolament Finanzjarju sabiex jiġi permess ir-riport ta’ approprjazzjonijiet mhux użati u tal-bilanċ baġitarju;

60. Jappoġġa bis-sħiħ il-marġni ta’ kontinġenza, iżda jenfasizza li sabiex tkun effettiva, il-mobilizzazzjoni tiegħu m’għandhiex tinvolvi l-ibbilanċjar obbligatorju ta’ limiti, u għandu jiġi adottat permezz ta’ votazzjoni b’maġġoranza kkwalifikata fil-Kunsill;

61. Jilqa’ l-proposta tal-Kummissjoni biex jiżdied il-pakkett tal-istrument ta’ Flessibilità u l-użu tal-ammonti annwali sa n+3;

62. Jenfasizza l-appoġġ qawwi tiegħu għall-proposta tal-Kummissjoni li r-Riżerva ta’ Għajnuna għall-Emerġenza, il-Fond ta’ Solidarjetà tal-Unjoni Ewropea, il-Fond Ewropew ta’ Aġġustament għall-Globalizzazzjoni u r-riżerva għall-kriżi fis-settur agrikolu, meta titqies in-natura mhux programmabbli tagħhom, għandhom jiddaħħlu fil-baġit b’mod indipendenti mil-limiti għall-intestaturi rilevanti;

63. Jirrikonoxxi l-valur miżjud tal-Fond Ewropew ta’ Aġġustament għall-Globalizzazzjoni (FEG) bħala strument ta’ intervent rapidu ta’ għajnuna għal dawk il-ħaddiema li jkunu tilfu l-impjieg tagħhom biex jerġgħu jidħlu fis-suq tax-xogħol; jenfasizza l-fatt li l-FEG irid jitkompla u jiġi aġġornat wara l-2013 bħala strument disponibbli, bl-istess kundizzjonijiet, għall-kategoriji kollha tal-ħaddiema; jinsisti wkoll fuq il-ħtieġa ta’ proċedura semplifikata u rapida għall-pagament ta’ għotjiet sabiex titjieb l-effikaċja tiegħu;

Unità tal-baġit

64. Ifakkar li l-baġit tal-UE jkopri d-dħul u l-infiq kollu li jirriżulta minn deċiżjonijiet magħmula mill-istituzzjonijiet tal-UE fi ħdan il-qafas tal-kompetenzi tagħhom, u li jqis b’mod separat l-operazzjonijiet finanzjarji tal-Unjoni fil-forma ta’ self u garanziji;

65. Iħeġġeġ lill-Kummissjoni u lill-Kunsill jelenkaw f’anness separat l-impenji u l-garanziji baġitarji jew finanzjarji meħuda mill-Unjoni jew minn xi Stati Membri fil-qafas tal-mekkaniżmi Ewropej ta’ stabbilizzazzjoni (EFSM, EFSF, MES) skont id-dispożizzjonijiet tal-Artikoli 122(2), 136(3) u 143 TFUE, kif ukoll għajnuna finanzjarja bilaterali diretta lil Stati Membri oħra jew proġetti oħra relatati mal-’unjoni bankarja’;

66. Jenfasizza li d-deċiżjonijiet kollha relatati mat-tisħiħ tal-unjoni ekonomika u monitarja għandhom jittieħdu fuq il-bażi tat-Trattati u jinvolvu l-istituzzjonijiet rilevanti; jenfasizza li kull devjazzjoni mill-metodu tal-komunità u użu akbar ta’ ftehimiet intergovernattivi se jaqsmu u jdgħajfu l-Unjoni Ewropea, inkluża ż-żona tal-euro;

67. Jitlob bis-saħħa li l-Istati Membri jieħdu impenn qawwi għall-inkorporazzjoni tal-Fond Ewropew għall-Iżvilupp fil-baġit tal-UE sa mill-2021; jinnota li tali riforma se teħtieġ li l-limiti tal-QFP jiżdiedu kif xieraq;

68. Jikkonferma l-intenzjoni tiegħu li, fil-ġejjieni, jorganizza dibattitu pubbliku speċifiku u jorganizza votazzjoni dwar il-parti tad-dħul tal-baġit, bħala parti mill-eżami tiegħu tal-abbozz annwali tal-baġit; jemmen b’mod qawwi li b’dan il-mod jinżamm dibattitu permanenti fuq is-sistema ta’ finanzjament tal-Unjoni, filwaqt li jirrikonoxxi li l-awtorità baġitarja fil-preżent m’għandha l-ebda kompetenza li tipproponi bidliet f’din il-parti tal-baġit;

Riżorsi Proprji

69. Jemmen li n-negozjati dwar il-QFP li jmiss, li bdew ’l fuq minn sena ilu, juru biċ-ċar is-sitwazzjoni ta’ imblukkar maħluqa min-nuqqas ta’ sistema ġenwina ta’ riżorsi proprji: dawn in-negozjati huma organizzati fil-Kunsill madwar żewġ kampijiet opposti, immexxija mill-pajjiżi kontributuri netti għall-baġit tal-UE, fuq naħa, u l-pajjiżi benefiċjarji netti tal-baġit tal-UE, fuq in-naħa l-oħra, f’sistema li toħloq viżjoni bbażata purament fuq il-kontabilità ta’ ‘ritorn ġust’ li, fl-aħħar mill-aħħar, tagħmel mezz li kwalunkwe ftehim dwar il-QFP isir b’kundizzjoni ta’ ftehim dwar lista twila ta’ aspettattivi u kumpensi, innegozjati b’mod privat u li ma jiftiehemx miċ-ċittadin Ewropew;

70. Jemmen bis-saħħa li l-finanzjament tal-baġit tal-Unjoni għandu jmur lura għal sistema ġenwina ta’ riżorsi proprji, kif previst mit-Trattat ta’ Ruma u mit-trattati suċċessivi kollha tal-UE; jiddispjaċih ħafna dwar il-fatt li s-sistema attwali, fejn il-maġġoranza l-kbira tal-finanzjament ġejja minn kontribuzzjonijiet nazzjonali, mhijiex trasparenti u lanqas mhi ġusta, u mhijiex soġġetta għall-kontroll parlamentari la fil-livell Ewropew u lanqas f’dak nazzjonali; jenfasizza li sistema ta’ dan it-tip tikser essenzjalment l-ittra u l-ispirtu tat-Trattat;

71. Jirrimarka li r-ristrutturar tas-sistema tar-riżorsi proprji ma tikkonċernax id-daqs tal-baġit tal-UE iżda s-sejba ta’ taħlita aktar effikaċi ta’ riżorsi biex jiġu ffinanzjati l-politiki u l-objettivi maqbula tal-UE; jenfasizza li l-introduzzjoni ta’ sistema ġdida ma żżidx il-piż globali tat-taxxa għaċ-ċittadini, iżda minflok se tnaqqas il-piż fuq it-teżori nazzjonali;

72. Itenni l-pożizzjoni bażika tiegħu, kif iddikjarata fir-riżoluzzjoni tiegħu tat-13 ta’ Ġunju 2012, li mhuwiex lest jagħti l-approvazzjoni tiegħu għar-regolamernt tal-QFP li jmiss mingħajr ma jkun hemm ftehim politiku dwar ir-riforma tas-sistema ta’ riżorsi proprji, bi qbil mal-proposti tal-Kummissjoni tad-29 ta’ Ġunju 2011, inklużi l-proposti leġiżlattivi tagħha għal riżorsi proprji ġenwini ġodda; jemmen li riforma bħal din għandu jkollha l-għan li tnaqqas l-ammont ta’ kontribuzzjonijiet tal-Istati Membri bbażati fuq l-ING għall-baġit tal-UE għal massimu ta’ 40% sal-2020, u b’hekk tikkontribwixxi għall-isforzi ta’ konsolidazzjoni tal-Istati Membri;

73. Jemmen bis-saħħa li l-ftehimiet politiċi neċessarji għandhom jinkludu l-elementi li ġejjin:

1)   għandu jkun hemm riforma profonda tal-finanzjament tal-baġit tal-UE, sabiex immorru lura għal sistema ta’ riżorsi proprji ġenwini, ċari, sempliċi u ġusti, li tagħti l-garanziji għat-teħid ta’ deċiżjonijiet u kontroll demokratiku inerenti għall-baġits pubbliċi kollha;

2)   din ir-rifor m’għandha tidħol fis-seħħ matul il-QFP 2014-2020, kif propost mill-Kummissjoni;

3)   dawk l-Istati Membri li jixtiequ jintroduċu taxxa fuq it-tranżazzjonijiet finanzjarji issa għandhom iressqu talba formali lill-Kummissjoni għal proposta dwar kooperazzjoni msaħħa f’dan il-qasam; il-Kummissjoni mbagħad trid tirreaġixxi b’mod immedjat bil-pubblikazzjoni ta’ proposta ta’ dan it-tip, flimkien ma’ sett ta’ proposti riveduti dwar il-pakkett ta’ riżorsi proprji, sabiex jiġi żgurat li d-dħul minn din it-taxxa jiġu allokati b’mod parzjali jew totali lill-Baġit tal-UE bħala riżorsa proprja ġenwina, u b’hekk jitnaqqsu l-kontribuzzjonijiet nazzjonali ta’ dawk l-Istati Membri li jintroduċu din it-taxxa;

4)   ftehim dwar ir-riforma tal-VAT bħala riżorsa proprja, kif ukoll il-modalitajiet implimentattivi tagħha, għandhom jiġu konklużi flimkien ma’ ftehim dwar il-QFP;

5)   is-sistema l-ġdida għandha ttemm l-iskontijiet eżistenti u l-mekkaniżmi korrettivi l-oħra; kull kumpens eventwali jista’ biss jiġi aċċettat abbażi ta’ proposta tal-Kummissjoni, u għandu jkun ta’ natura temporanja u ġustifikat bi kriterji ekonomiċi ċerti u oġġettivi;

6)   fil-każ li l-implimentazzjoni tar-riżorsi l-proprji l-ġodda ma tirriżultax fi tnaqqis sinifikanti fil-kontribuzzjonijiet tal-Istati Membri bbażati fuq l-ING għall-baġit tal-UE, il-Kummissjoni għandha tressaq proposti addizzjonali dwar riżorsi proprji ġodda.

Negozjati interistituzzjonali

74. Jenfasizza li hija meħtieġa l-maġġoranza strinġenti kemm fil-Parlament kif ukoll fil-Kunsill biex jiġi adottat il-QFP, u jirrimarka dwar l-importanza li jiġu sfruttati bis-sħiħ id-dispożizzjonijiet tal-Artikolu 312(5), li jimponi fuq l-istituzzjonijiet id-dmir li jwettqu negozjati sabiex jintlaħaq ftehim fuq test li għalih il-Parlament jista’ jagħti l-approvazzjoni tiegħu;

75. Jenfasizza li din se tkun l-ewwel darba li Regolament dwar il-QFP qed jiġi adottat taħt id-dispożizzjonijiet il-ġodda tat-Trattat ta’ Lisbona, li jinvolvi arranġamenti ġodda għall-kooperazzjoni bejn l-istituzzjonijiet li jgħaqqdu proċess effiċjenti għat-teħid ta’ deċiżjonijiet mar-rispett għall-prerogattivi tat-Trattat; jilqa’ f’dan ir-rigward il-passi meħuda mill-Presidenza Parlamentara Ungeriża, Pollakka, Daniża u Ċiprijotta biex jiġi stabbilit djalogu strutturat u skambju regolari ta’ informazzjoni mal-Parlament;

76. Jesprimi r-rieda tiegħu li jidħol f’diskussjonijiet profondi mal-Kunsill kemm dwar ir-Regolament dwar il-QFP kif ukoll dwar il-FII, u jitlob lill-Kunsill biex jintensifika l-kuntatti tiegħu fil-livelli kollha bħala tħejjija għall-Kunsill Ewropew tat-22 u t-23 ta’ Novembru 2012; jenfasizza l-bżonn li jintlaħaq ftehim finali fuq il-QFP kemm jista’ jkun malajr;

77. Jinnota li kwalunkwe ftehim politiku milħuq fil-livell tal-Kunsill Ewropew jikkostitwixxi biss mandat ta’ negozjati għall-Kunsill; jinsisti li wara li l-Kunsill Ewropew ikun laħaq ftehim politiku, għandu jkun hemm negozjati kompluti bejn il-Parlament u l-Kunsill qabel ma l-Kunsill iressaq formalment il-proposti tiegħu għall-approvazzjoni tal-Parlament, fir-rigward tar-Regolament dwar il-QFP;

78. Itenni li, bi qbil mat-TFUE, il-Parlament u l-Kunsill huma korpi leġiżlattivi u li l-Kunsill Ewropew m’għandux ir-rwol ta’ leġiżlatur; jenfasizza li n-negozjati dwar il-proposti leġiżlattivi b’rabta mal-programmu pluriennali għandhom iseħħu taħt il-proċedura leġiżlattiva ordinarja;

79. Jinsisti dwar approċċ kwalitattiv għar-Regolament dwar il-QFP u n-negozjati dwar programmi pluriennali relatati; jenfasizza li għandhom jitqiesu bħala pakkett, u jtenni l-prinċipju li ‘xejn ma jintlaħaq ftehim dwaru qabel ma jintlaħaq ftehim dwar kollox’;

80. Jenfasizza l-importanza tal-opinjonijiet tal-kumitati tal-PE annessi mar-rapport interim, peress li dawn jikkomplimentaw il-linji gwida tan-negozjar QFP/FII stabbiliti f’din ir-riżoluzzjoni u jipprovdu gwida utli u dettalji ulterjuri dwarhom. jinsisti li r-rakkomandazzjonijiet speċifiċi għal politika li jinstabu f’dawn l-opinjonijiet għandhom jipprovdu bażi għan-negozjati tal-programmi pluriennali rilevanti; itenni, f’dan ir-rigward, il-pożizzjoni stretta tiegħu li l-proċedura leġiżlattiva speċjali tal-QFP m’għandhiex tindirizza kwistjonijiet li huma suġġetti għall-proċedura leġislattiva ordinarja;

81. Jiġbed l-attenzjoni tal-Kunsill għad-Dokument ta’ Ħidma anness li jinnota l-modifiki għall-proposta għal Regolament tal-Kunsill li jistabbilixxi l-QFP għas-snin 2014-2020 u għall-proposta għal Ftehim Interistituzzjonali dwar kooperazzjoni f’kwistjonijiet baġitarji u l-ġestjoni finanzjarja soda; jirrimarka li jistgħu jkunu neċessarji modifiki ulterjuri skont kif jimxu n-negozjati dwar l-QFP; jirrimarka li l-Ftehim Interistituzzjoni jista’ jiġi finalizzat biss wara li titlesta l-proċedura tal-QFP;

82. Jirrimarka fl-aħħarnett li jekk l-ebda QFP ma jkun ġie adottat sal-aħħar tal-2013, il-livelli massimi u dispożizzjonijiet oħra korrispondenti għas-sena 2013 għandhom jiġu estiżi sa dak iż-żmien li fih jiġi adottat QFP ġdid; jindika li, f’dan il-każ, il-Parlament ikun lest li jilħaq ftehim malajr mal-Kunsill u mal-Kummissjoni biex tiġi adattata l-istruttura interna tal-QFP biex tirrifletti l-prijoritajiet politiċi l-ġodda;

83. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill Ewropew, lill-Kunsill, lill-Kummissjoni, lill-Gvernijiet u lill-Parlamenti tal-Istati Membri, u lill-istituzzjonijiet u lill-korpi l-oħra kkonċernati.

NOTA SPJEGATTIVA

WORKING DOCUMENT

21.9.2012

OPINJONI tal-Kumitat għall-Affarijiet Barranin

għall-Kumitat għall-Baġits

dwar ir-rapport interim sabiex jiffaċilita r-riżultat pożittiv tal-proċedura ta' approvazzjoni tal-qafas finanzjarju pluriennali 2014‑2020

( COM(2011)0398 – 2011/0177(APP) )

Rapporteur għal opinjoni: Marietta Giannakou

SUĠĠERIMENTI

1.  Ifakkar li waqt il-qafas finanzjarju pluriennali (QFP) 2007-2013, saru għadd sinifikanti ta' korrezzjonijiet fl-Intestatura 4 tal-baġit tal-Unjoni Ewropea, jew minħabba li l-pakketti baġitarji kienu ristretti żżejjed jew inkella minħabba n-nuqqas ta' flessibilità fl-Intestatura 4 fil-konfront taċ-ċirkostanzi mhux mistennija; itenni l-pożizzjoni tiegħu li r-responsabilitajiet ġodda kkonferiti fuq l-UE permezz tat-Trattat dwar il-Funzjonament tal-Unjoni Ewropea jimplikaw finanzjament supplementari adegwat meta mqabbel mal-QFP 2007‑2013, sabiex jippermetti lill-Unjoni taqdi r-rwol tagħha ta' attur globali waqt li tirrispetta l-impenji li ħadet diġà; jenfasizza n-natura kumplementari tal-assistenza tal-UE ma' dik mogħtija mill-Istati Membri u l-effett ta' katalizzatur tagħha biex tintervjeni fir-reġjuni li fihom l-assistenza bilaterali mhijiex mogħtija; jappoġġa b'mod partikolari l-proċeduri proposti mill-Kummissjoni għat-tisħiħ tal-programmazzjoni konġunta bejn l-azzjonijiet tal-Istati Membri u dawk tal-UE;

2.   Iqis li l-proposta tal-Kummissjoni dwar il-pakkett ta' approprjazzjonijiet għall-Intestatura 4 tirrifletti t-tħassib tal-Parlament Ewropew kif espress fir-riżoluzzjoni tiegħu tat-8 ta' Ġunju 2001[16], u l-ħtiġiet reali għall-azzjoni esterna tal-Unjoni; jilqa' pożittivament is-sinjali li tirrappreżenta din il-proposta għas-sieħba tal-Unjoni kollha, kemm il-pajjiżi li jibbenefikaw mill-għajnuna tagħha, kif ukoll il-pajjiżi donaturi l-oħra; jinnota, madankollu, li l-proposta tal-Kummissjoni hi biss il-minimu meħtieġ għall-ilħuq tal-għanijiet tal-UE appoġġati mill-kapijiet ta' Stat u ta' Gvern kollha u mħaddna fit-Trattat ta' Lisbona; jistenna li l-Kunsill, f'każ li ma jistax jappoġġa għalkollox il-proposti tal-Kummissjoni, jidentifika biċ-ċar liema mill-prijoritajiet jew proġetti għandhom jiġu abbandunati jew ridimensjonati, minkejja l-valur miżjud Ewropew ippruvat tagħhom;

3.  Itenni, madankollu, il-konvinzjoni soda ħafna tiegħu li ż-żieda fil-flessibilità tal-baġit fil-QFP kollu kemm hu, meqjusa neċessarja mill-partijiet kollha, hija partikolarment ta' importanza fundamentali fil-qafas tal-Intestatura 4; jistieden lill-Kummissjoni tipproponi, jekk ikun hemm il-bżonn, regoli speċifiċi għal din l-intestatura baġitarja sabiex tiggarantixxi l-kapaċità ta' reazzjoni għall-kriżijiet u għall-ħtiġijiet imperattivi li għalihom ma jistgħux isiru pjanijiet minn qabel, filwaqt li tirrispetta bis-sħiħ il-prerogattivi tal-awtortià baġitarja; jieħu nota, madankollu, li l-Kummissjoni pproponiet mekkaniżmi mtejba fi ħdan kull programm pluriennali biex jingħata lok li l-UE tadatta l-finanzjament tagħha għall-ħtiġijiet u l-limitazzjonijiet politiċi;

4.   Itenni l-appell tiegħu favur proċedura xierqa għar-riallokazzjoni tal-fondi li ma jintużawx fl-Intestatura 4 fi tmiem is-sena baġitarja; iqis, barra minn hekk, li l-approvazzjoni tal-Parlament għar-Regolament tal-Kunsill għall-qafas finanzjarju pluriennali 2014‑2020 għandu jingħata bil-kundizzjoni, fost oħrajn, tal-qbil tal-Kunsill mal-proposti tal-Kummissjoni għall-użu mill-ġdid ta' dħul u rimborżi ġġenerati mill-istrumenti finanzjarji; jilqa' pożittivament il-proposta tal-Kummissjoni li jsir aktar użu minn strumenti finanzjarji innovattivi fil-qafas tar-relazzjonijiet esterni ma' firxa usa' ta' organizzazzjonijiet u istituzzjonijiet finanzjarji rilevanti;

5.   Itenni s-sostenn tiegħu għall-istrumenti kollha ta' implimentazzjoni tal-azzjoni esterna tal-Unjoni Ewropea proposti għall-perjodu 2014‑2020[17], u b'mod partikolari l-istrument tal-viċinat; jenfasizza li għandha jinżamm bilanċ xieraq bejn l-assistenza għall-ġirien tal-Lvant u dawk tan-Nofsinhar, filwaqt li jitqiesu wkoll ir-riżultati tal-pajjiżi benefiċjarji; jilqa favorevolment l-istrument ta' sħubija l-ġdid li għandu l-għan li jinawgura forma ġdida ta' kooperazzjoni mal-pajjiżi li huma ta' interess strateġiku għall-Unjoni;

6.   Itenni, barra minn hekk, is-sostenn tiegħu lill-Bank Ewropew tal-Investiment u l-Bank Ewropew għar-Rikostruzzjoni u l-Iżvilupp, li jistgħu jibqgħu ċerti li l-UE se tiggarantixxi l-kooperazzjoni finanzjarja tal-pajjiżi ġirien, partikolarment fir-rigward tal-finanzjamenti tal-SMEs u l-mikrokrediti;

7.  Iqis li trid tiġi implimentata adattabilità akbar tal-assistenza finanzjarja lill-pajjiżi kandidati u kandidati potenzjali kif anki lill-pajjiżi benefiċjaji u sħab oħrajn; huwa fil-fatt konvint li l-isforz baġitarju mogħti mill-Unjoni Ewropea għandu jikkorrispondi għar-ritmu u l-progress effettivi, skont il-prinċipju ta' 'iktar għal iktar', waqt li tinżamm f'kunsiderazzjoni l-kapaċità ta' integrazzjoni tal-Unjoni; jenfasizza li l-prinċipju ta' 'iktar għal iktar' ifisser ukoll inqas għall-pajjiżi li ma jonorawx l-impenji tagħhom;

8.  Ifakkar fir-responsabilità tal-UE għall-promozzjoni tas-sigurtà, id-demokrazija, ir-rispett tal-Istat tad-dritt, u l-iżvilupp ekonomiku sostenibbli u inklużiv; jenfasizza bil-qawwa l-valur miżjud tal-programmi pluriennali tal-UE bħall-Istrument għall-Istabbiltà u l-istrument għad-drittijiet tal-bniedem f'dan ir-rigward; jenfasizza wkoll li kull programm ta' azzjoni esterna tal-UE għandu jsir aktar aċċessibbli għas-soċjetà ċivili, għall-imsieħba soċjali u għall-awtoritajiet lokali u reġjonali, bl-għan li jiġi mħeġġeġ l-impenn u l-proprjetà tagħhom;

9.  Jiddefendi bil-qawwi l-ħtieġa li r-Riżerva ta' Għajnuna f'Emerġenza, li wriet li tiffunzjona partikolarment tajjeb fil-forma attwali tagħha, tinżamm bħala riżerva mhux programmata barra l-limiti massimi tal-QFP 2014‑2020 u li din tingħata b'allokazzjoni finanzjarja sinifikanti u realistika, biex b'hekk l-Unjoni tkun tista' tindirizza rapidament kwalunkwe ħtieġa mhux prevista jew krizi mhux mistennija permezz ta' mobilizzazzjoni ad hoc kull meta jkun meħtieġ; jilqa' b'sodisfazzjon il-proposta tal-Kumissjoni li żżid il-finanzjament tagħha għal EUR 350 miljun (prezzijiet tal-2011) u li tippermetti l-użu tagħha sas-sena n+1 bħala pass pożittiv fid-direzzjoni t-tajba; jisħaq li l-integrazzjoni tar-Riżerva ta' Għajnuna f'Emerġenza, kif suġġerit minn xi Stati Membri, fl-Intestatura 4 toħloq ir-riskju li tirriżulta fi tnaqqis tal-finanzjament ġenerali disponibbli għall-azzjoni esterna tal-UE;

10. Iqis li biex il-politika estera tal-UE tkun effikaċi, huwa importanti li s-Servizz Ewropew għall-Azzjoni Esterna jingħata biżżejjed riżorsi biex iwettaq l-għadd ta' kompiti fdati lilu, li kulma jmur qiegħed dejjem jikber; jenfasizza, iżda, f'dan ir-rigward li tali riżorsi għandhom jintużaw fl-aktar mod effiċjenti possibbli, anki permezz ta' struttura tal-persunali aktar ibbilanċjata.

RIŻULTAT TAL-VOTAZZJONI FINALI FIL-KUMITAT

4.9.2012

OPINJONI tal-Kumitat għall-Iżvilupp

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020

( COM (2011)0398 – 2011/0177(APP) )

Rapporteur għal opinjoni: Charles Goerens

SUĠĠERIMENTI

Il-Kumitat għall-Iżvilupp jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

1.  Ifakkar li l-iskadenzi tal-2015 għall-ilħuq tal-Għanijiet ta' Żvilupp tal-Millennju (MDG) u l-mira kollettiva ta' 0.7 % tal-introjtu nazzjonali gross li għandha tiġi pprovduta bħala għajnuna uffiċjali għall-iżvilupp (ODA/GNI), it-tnejn jaqgħu fi ħdan il-perjodu tal-qafas finanzjarju multiannwali 2014-2020; jenfasizza, li wara t-tnaqqis kbir fil-livelli ODA mill-2010 għall-2011 f'14-il Stat Membru tal-UE u tnaqqis fil-livell kollettiv ODA/GNI minn 0.44 % għal 0.42 %, il-qafas finanzjarju multiannwali li jmiss jikkostitwixxi opportunità kritika għad-donaturi tal-UE sabiex jirduppjaw l-isforzi tagħhom biex jerġgħu lura fit-triq it-tajba u jikkonformaw mal-impenji internazzjonali tagħhom; jenfasizza li l-baġit tal-UE għall-iżvilupp jikkomplementa l-isforzi tal-Istati Membri u jgħinhom jilħqu dawn il-miri, b'effett ta' ingranaġġ partikolarment sinifikanti fuq il-baġits għall-għajnuna ta' ċerti Stati Membri, irrispettivament mid-daqs tagħhom;

2.  Huwa partikolarment kburi li l-kwalità tal-għajnuna tal-UE tjiebet b'mod sinifikanti tul l-aħħar deċennju, u dan wassal sabiex illum l-istituzzjonijiet tal-UE huma mexxejja globali fl-effikaċja tal-għajnuna u t-trasparenza[18], b'riżultati li jistgħu jitkejlu u sostanzjali f'termini ta' titjib tanġibbli fil-ħajja ta' miljuni ta' nies f'pajjiżi li qed jiżviluppaw; ifakkar, barra minn hekk, fir-rwol vitali tal-istituzzjonijiet tal-UE fir-rigward tal-koordinazzjoni tal-politiki u tal-għajnuna Ewropea għall-iżvilupp u fil-vantaġġ komparattiv tal-għajnuna tal-UE f'numru ta' oqsma, li jippermetti lill-UE twassal l-għajnuna tagħha bosta drabi b'effiċjenza, effikaċja u prevedibilità ogħla minn dik imwassla minn Stati Membri individwali permezz ta' programmi bilaterali;

3.  Jenfasizza li l-baġit tal-UE għandu rwol ewlieni billi jipprovdi lill-Istati Membri bil-possibilità li jikkooperaw mal-pajjiżi fejn mhumiex preżenti u jkomplu jappoġġaw lill-pajjiżi fejn ikunu waqfu programmi ta' kooperazzjoni, partikolarment fi stati fraġli u f'sitwazzjonijiet ta' wara l-kunflitt; ifakkar li, permezz tal-għajnuna għall-iżvilupp tal-UE, 31 miljun persuna issa għandhom aċċess għal ilma tajjeb għax-xorb u 9 miljun għal faċilitajiet ta' sanità; 5 miljun tifel u tifla tlaqqmu kontra l-ħosba; hemm 9 miljun student ġdid fl-edukazzjoni primarja, 700 000 għalliem kellhom aċċess għat-taħriġ, u aktar minn 80 000 studenta rreġistraw fl-edukazzjoni sekondarja; għalhekk iħeġġeġ lill-Kunsill ikompli l-appoġġ tiegħu b'mezzi suffiċjenti għall-valur miżjud tagħna għall-iżvilupp tal-bniedem u l-qerda tal-faqar;

4.  Jilqa' ż-żieda fil-pakkett finanzjarju tal-intestatura 4 proposta mill-Kummissjoni, b'paragun mal-qafas finanzjarju multiannwali 2007-2013; jenfasizza madankollu, li l-proposta ppreżentata mill-Kummissjoni fl-2004 għall-qafas finanzjarju multiannwali 2007 -2013 kienet ikbar f'termini reali mill-proposta tagħha għall-2014-2020; jenfasizza li l-intestatura 4, li ġiet sottofinanzjata b'mod kroniku fil-qafas finanzjarju multiannwali 2000-2006 u 2007-2013, ma għandhiex tkun il-vittma ta' qtugħ ispirat mill-klima ta' awsterità li hemm f'numru ta' Stati Membri; huwa tal-fehma li livell ambizzjuż ta' finanzjament għall-istrumenti esterni, kif propost mill-Kummissjoni fil-Komunikazzjoni tagħha ''Baġit għall-Ewropa 2020''[19], b'mod partikolari għall-Istrument ta' Finanzjament tal-Kooperazzjoni għall-Iżvilupp (DCI), l-għajnuna umanitarja u l-Fond Ewropew għall-Iżvilupp (FEŻ) li rispettivament jammontaw biss għal 2 %, 0.62 % u 2.96 % tal-baġit totali tal-UE propost, huwa kritiku għall-Unjoni u għall-Istati Membri tagħha għall-ilħuq tal-impenji internazzjonali tagħhom għall-iżvilupp;

5.  Iħeġġeġ bil-qawwi lill-Istati Membri u lill-Istituzzjonijiet Ewropej biex iwaqqfu Taxxa Ewropea fuq it-Transazzjonijiet Finanzjarji (FTT) malajr kemm jista' jkun; jenfasizza li parti sinifikanti tad-dħul ta' kwalunkwe taxxa fuq it-transazzjonijiet implimentata fl-Ewropa għandha tmur għall-finanzjament tal-iżvilupp u l-ġlieda kontra t-tibdil fil-klima; jissottlinja li jekk l-FTT issir waħda mir-riżorsi proprji ġodda tal-UE, din għandha tikkontribwixxi għal żieda sinifikanti tal-intestatura 4;

6.  Jissottolinja li l-koerenza tal-politiki għall-iżvilupp, kif stabbiliti fl-Artikolu 208 tat-TFUE, għandha tfeġġ u tibqa' bħala prinċipju orizzontali ewlieni matul in-negozjati tal-qafas finanzjarju multiannwali;

7.  Jinnota li dan l-aħħar, fost oħrajn fid-dawl tad-diżastri naturali dejjem aktar frekwenti u devastanti, il-fondi disponibbli biex jiġu indirizzati diżastri naturali u umanitarji urġenti sena wara l-oħra wrew li kienu insuffiċjenti; grat lejn iċ-ċittadini tal-UE għall-appoġġ kontinwu u dejjem jikber għall-għajnuna umanitarja tal-UE lil dawk l-aktar fil-bżonn madwar id-dinja[20], anki fid-dawl tal-kriżi finanzjarja u ekonomika li qed taffettwa bosta Stati Membri tal-UE; jenfasizza għalhekk, il-ħtieġa li jiġu żgurati allokazzjonijiet baġitarji xierqa għall-intestaturi tal-baġit dwar l-għajnuna umanitarja u tal-ikel fi ħdan l-intestatura 4, kif ukoll għall-finanzjament realistiku ta' Riżerva ta' Għajnuna f'Emerġenza;

8.  Jiddefendi bil-qawwi l-ħtieġa li r-Riżerva ta' Għajnuna f'Emerġenza, li wriet li tiffunzjona partikolarment tajjeb fil-forma attwali tagħha, tinżamm bħala riżerva mhux programmata barra l-limiti massimi tal-qafas finanzjarju multiannwali 2014-2020 u biex tiġi pprovduta b'allokazzjoni finanzjarja sinifikanti u realistika biex b'hekk l-Unjoni tkun tista' tindirizza malajr kull meta meħtieġ, ħtiġijiet mhux previsti u kriżijiet mhux mistennija permezz ta' mobilizzazzjoni ad-hoc; jenfasizza li l-integrazzjoni tar-Riżerva ta' Għajnuna f'Emerġenza fl-intestatura 4, kif appoġġata minn ċerti Stati Membri, hemm ir-riskju li tirriżulta fi tnaqqis tal-finanzjament ġenerali disponibbli għall-azzjoni esterna tal-UE, b'mod partikolari għall-finanzjament relatat mal-iżvilupp; jilqa' bil-qawwi l-proposta tal-Kummissjoni biex iżżid il-finanzjament tagħha għal EUR 350 miljun (prezzijiet tal-2011) b'paragun mal-qafas finanzjarju multiannwali 2014-2020 u tippermetti l-użu tiegħu sas-sena n+1, bħala pass pożittiv ħafna fid-direzzjoni t-tajba; jenfasizza li r-Riżerva ta' Għajnuna f'Emerġenza għandha tibqa' barra mil-limiti massimi tal-qafas finanzjarju multiannwali sabiex jiġu żgurati l-indipendenza, il-flessibilità u l-ħeffa li huma kruċjali għat-twassil effikaċi tal-għajnuna umanitarja;

9.  Jenfasizza li l-prinċipju tad-divrenzjar għandu jwassal għal konċentrazzjoni tal-fondi għall-iżvilupp fuq numru iżgħar ta' pajjiżi sħab eliġibbli għall-kooperazzjoni bilaterali permezz tal-programmi ġeografiċi, iktar milli għal tnaqqis fil-pakkett finanzjarju ġenerali tal-Istrument ta' Kooperazzjoni għall-Iżvilupp (DCI), filwaqt li jitqies ukoll li l-UE se żżomm il-kooperazzjoni tagħha ma' pajjiżi sħab li jilħqu l-grad neċessarju ('graduating partner countries') permezz tal-programmi reġjonali u tematiċi tal-Istrument ta' Kooperazzjoni għall-Iżvilupp, li wkoll jeħtieġu finanzjament adegwat;

10. Jenfasizza r-responsabbiltà globali tal-UE li tindirizza t-tibdil fil-klima; ifakkar li l-wegħdiet li saru bil-ftehimiet ta’ Kopenħagen u Kankun biex jgħinu lill-pajjiżi li qed jiżviluppaw fil-ġlieda kontra t-tibdil fil-klima għandhom ikunu “ġodda u addizzjonali” għall-għajnuna għall-iżvilupp eżistenti, filwaqt li jinżamm livell adegwat ta’ koerenza bejn iż-żewġ politiki; jitlob għalhekk li l-UE tibqa' ambizzjuża minkejja l-kriżi ekonomika attwali, u li l-finanzjament tal-UE dwar il-klima jkun totalment addizzjonali għall-mira ta' 0.7 % tal-mira tal-ODA u traċċabbli tul il-baġit tal-UE; jistenna impenn politiku qawwi mill-Kummissjoni u l-Kunsill f'dak ir-rigward;

11. Jinnota li l-Kummissjoni, bħala parti mill-Istrument ta' Kooperazzjoni għall-Iżvilupp, ipproponiet il-Programm Pan Afrikan bħala programm kompletament ġdid li għandu jiġi ffinanzjat b'madwar 4.3 % tal-baġit globali tal-Istrument ta' Kooperazzjoni għall-Iżvilupp, b'komplementarjetà mal-programmi ġeografiċi u tematiċi eżistenti oħrajn; jenfasizza li din l-estensjoni tal-ambitu tal-Istrument ta' Kooperazzjoni għall-Iżvilupp għandha tiġi riflessa adegwatament fl-allokazzjoni finanzjarja tal-Istrument;

12. Huwa favur, fil-prinċipju, il-baġitizzazzjoni tal-Fond Ewropew għall-Iżvilupp (FEŻ); jinsisti madankollu, li l-inkorporazzjoni tal-FEŻ fil-baġit tal-UE għandha timplika t-trasferiment tal-finanzjament kollu tal-FEŻ fi ħdan l-intestatura 4 u m'għandha fl-ebda ċirkostanza tintuża bħala pretest għat-tnaqqis fin-nefqa globali għall-azzjoni esterna tal-UE b'mod ġenerali, u l-għajnuna għall-iżvilupp b'mod partikolari, u għandha twassal għal aktar prevedibilità tal-għajnuna; huwa tal-fehma li fid-dawl tal-kriżi baġitarja u ekonomika attwali, ir-riskju li l-baġitizzazzjoni tal-FEŻ twassal għal tnaqqis fil-livell ġenerali ta' finanzjament għall-kooperazzjoni mas-sħab AKP huwa għoli wisq; iħeġġeġ lill-Kummissjoni tirrispetta l-impenji tagħha li tressaq mingħajr dewmien proposti għall-allinjament tal-kontroll tal-Parlament fir-rigward tal-FEŻ mad-drittijiet ta' kontroll li jeżistu skont il-baġit ġenerali tal-UE, speċifikament l-Istrument ta' Kooperazzjoni għall-Iżvilupp, kif ukoll għall-baġitizzazzjoni tal-FEŻ mill-qafas finanzjarju multiannwali ta' wara l-2020;

RIŻULTAT TAL-VOTAZZJONI FINALI FIL-KUMITAT

18.9.2012

OPINJONI tal-Kumitat għall-Kummerċ Internazzjonali

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju pluriennali għas-snin 2014-2020

( COM(2011)0398 – 2011/0177(APP) )

Rapporteur għal opinjoni: Syed Kamall

SUĠĠERIMENTI

Il-Kumitat għall-Kummerċ Internazzjonali jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

Rakkomandazzjonijiet

1.  Jinnota li, minkejja li hemm provvediment għal azzjonijiet imfassla biex isaħħu r-relazzjonijiet kummerċjali u ekonomiċi tal-UE fi strumenti varji, fil-proposta għall-QFP 2014-2020, taħt l-intestatura 4 (Ewropa Globali), għandhom jitqiesu kif xieraq is-sottointestaturi individwali tal-objettivi tal-politika kummerċjali tal-UE għall-kisba tal-promozzjoni tas-swieq miftuħa fi spirtu ta' reċiproċità biex jinħolqu tkabbir ekonomiku u impjiegi u biex jiġi promoss żvilupp sostenibbli;

2.  Jemmen li l-komponenti ekonomiċi u kummerċjali tal-istrumenti ta’ sħubija, filwaqt li jibqgħu fi ħdan il-baġit komplessiv eżistenti, għandhom jirċievu sehem akbar mill-allokazzjoni tiegħu, biex jiġi żgurat li l-kanali ewlenin tal-UE għall-kooperazzjoni ekonomika mas-sħab kummerċjali ewlenin tagħha ma jitħallewx barra fin-negozjati finali tal-QFP;

3.  Jieħu nota tal-proposta tal-Kummissjoni biex jiżdiedu l-impenji taħt l-intestatura 4; jinsisti li ż-żieda proposta fil-baġit għall-Politika tal-Viċinat tan-Nofsinhar u tal-Lvant trid tintuża bħala kontribut sostanzjali għat-twettiq tal-aspirazzjonijiet soċjali kif ukoll ekonomiċi tal-poplazzjonijiet f'dawk ir-reġjuni u li ż-żieda tal-finanzjament se titwettaq bil-kundizzjoni li jkun promoss żvilupp ekonomiku sostenibbli, kooperazzjoni reġjonali aktar fil-fond, tnaqqis fir-rata tal-qgħad u żieda fl-istandards tal-għajxien għall-popolazzjoni kollha;

4.  Iħeġġeġ, fid-dawl tal-ambjent makroekonomiku u l-isfidi li jridu jiġu affaċċati f'dinja li qed tinbidel u biex jiġi żgurat użu aħjar u aktar effiċjenti tal-fondi eżisteni tal-UE, li l-QFP 2014-2020 jingħatalu aktar flessibbiltà biex jindirizza b'mod xieraq iċ-ċirkostanzi u l-prijoritajiet li jinbidlu filwaqt li jiġu rrispettati l-livelli maqbula ta' approprjazzjonijiet ta' pagament;

5.  Jitlob konsistenza fir-rigward tal-istrumenti taħt l-intestatura 4 u l-allokazzjonijiet tal-baġit previsti għal dan tal-aħħar taħt l-intestatura 5; jisħaq li l-implimentazzjoni b'suċċess tal-istrumenti taħt l-intestatura 4 se tiġi żgurata permezz ta' kontrolli proċedurali u fuq livell ta' nfieq li jistgħu jsiru bl-aħjar mod, speċjalment f'pajjiżi terzi, jekk ikun hemm biżżejjed riżorsi disponibbli;

6.  Jitlob konsistenza fir-rigward tal-istrumenti kollha tal-QFP, sabiex tkun permessa l-implimentazzjoni ta' strateġija industrijali komuni msejsa fuq ir-riċerka u l-innovazzjoni, sabiex jiġi żgurat li l-Unjoni Ewropea żżomm il-kapaċitajiet ta' produzzjoni tagħha;

7.  Jinnota l-ambizzjoni tal-UE li talloka tal-anqas 20 % tal-baġit tagħha bl-għan li tikkontribwixxi għal soċjetà b'livell baxx ta' emissjonijiet ta' karbonju u reżiljenti għat-tibdil fil-klima u li tintegra l-azzjoni dwar il-klima u l-bijodiversità fl-istrumenti esterni kollha tagħha; jisħaq fuq l-istatus ta' prijorità ta’ dan l-objettiv u jsostni li l-allokazzjoni ta' 20 % għandha titqies bħala l-minimu indispensabbli; jinsisti li dan l-objettiv irid jiġi tradott fil-politika kummerċjali tal-UE kif riflessa fl-istrumenti esterni;

8.  Iqis li l-Unjoni Ewropea għandha tikkunsidra l-istandards soċjali, tass-saħħa u tal-ambjent, fin-negozjati ta’ ftehimiet kummerċjali minflok toħloq linji baġitarji maħsuba biex jikkumpensaw għad-danni li jistgħu jirriżultaw mid-dħul fis-seħħ ta' dawk il-ftehimiet kummerċjali.

RIŻULTAT TAL-VOTAZZJONI FINALI FIL-KUMITAT

9.10.2012

OPINJONI tal-Kumitat għall-Affarijiet Kostituzzjonali

għall-Kumitat għall-Baġits

dwar ir-rapport interim għall-fini li jintlaħaq eżitu pożittiv tal-proċedura ta’ approvazzjoni tal-Qafas Finanzjarju Multiannwali għas-snin 2014-2020

( COM(2011)0398 – COM(2012)0388 – 2011/0177(APP) )

Rapporteur għal opinjoni: Rafał Trzaskowski

SUĠĠERIMENTI

Il-Kumitat għall-Affarijiet Kostituzzjonali jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

Emenda  1

Abbozz ta' rapport interim

Mozzjoni għal riżoluzzjoni

Premessa D

Emenda  2

Abbozz ta' rapport interim

Mozzjoni għal riżoluzzjoni

Premessa J

Emenda  3

Abbozz ta' rapport interim

Mozzjoni għal riżoluzzjoni

Paragrafu 7

Emenda  4

Abbozz ta' rapport interim

Mozzjoni għal riżoluzzjoni

Paragrafu 8

Emenda  5

Abbozz ta' rapport interim

Mozzjoni għal riżoluzzjoni

Paragrafu 22

Emenda  6

Abbozz ta' rapport interim

Mozzjoni għal riżoluzzjoni

Paragrafu 24

Emenda  7

Abbozz ta' rapport interim

Mozzjoni għal riżoluzzjoni

Paragrafu 26

Emenda  8

Abbozz ta' rapport interim

Mozzjoni għal riżoluzzjoni

Paragrafu 62

RIŻULTAT TAL-VOTAZZJONI FINALI FIL-KUMITAT

24.9.2012

OPINJONI tal-Kumitat għall-Impjiegi u l-Affarijiet Soċjali

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju [pluriennali] għas-snin 2014-2020

( COM(2011)0398 – 2011/0177(APP) )

Rapporteur għal opinjoni: Pervenche Berès

Mod

SUĠĠERIMENTI

Il-Kumitat għall-Impjiegi u l-Affarijiet Soċjali jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

Rakkomandazzjonijiet

1.  Ifakkar li l-politika ta' koeżjoni trid tikkontribwixxi għat-tnaqqis tal-iżbilanċi makroekonomiċi fl-UE u għall-konverġenza ekonomika u soċjali b'konformità mal-objettivi tal-Istrateġija Ewropa 2020 u speċjalment mal-objettivi tagħha għall-edukazzjoni, l-impjiegi u l-faqar;

2.  Iqis li l-bilanċ tal-politika ta' koeżjoni, partikolarment fil-livell soċjali, u l-impatt tal-kriżi jobbligaw li l-programmazzjoni baġitarja jkollha biżżejjed flessibbiltà f'termini ta' riprogrammazzjoni biex tippermetti lill-UE twettaq politika kontroċiklika;

3.  Jinsisti li l-qafas finanzjarju pluriennali l-ġdid jibbenefika minn pakkett finanzjarju kbir biżżejjed biex jippermetti lill-UE żżomm il-kredibilità tagħha fil-konfront taċ-ċittadini tagħha u biex tilħaq l-objettivi ambizzjużi tal-Istrateġija Ewropa 2020;

4.  Jissottolinja l-fatt li fid-dawl tal-kriżi ekonomika u soċjali attwali, il-qafas finanzjarju pluriennali għandu jappoġġa u jħeġġeġ l-investiment li jippromwovi l-irkupru tal-attività ekonomika, iżda fuq kollox għandu juri l-valur miżjud tiegħu fil-ġlieda kontra l-isfidi strutturali, b'mod partikolari l-qgħad u l-faqar li l-Istati Membri jaffaċċjaw;

5.  Jinsisti li l-qafas il-ġdid, u l-istrumenti finanzjarji l-ġodda, jerġgħu jdaħħlu l-fiduċja taċ-ċittadini fil-proġett Ewropew filwaqt li jiġi integrat l-Artikolu 9 tat-Trattat dwar "il-klawżola soċjali orizzonatli" sabiex jiġi ggarantit livell għoli ta' impjieg, protezzjoni soċjali adegwata, tiġi miġġielda l-esklużjoni soċjali kif ukoll biex jitħeġġeġ livell għoli ta' edukazzjoni, ta' taħriġ u ta' protezzjoni tas-saħħa;

6.  Jinsisti li mill-inqas 25% tal-pakkett finanzjarju previst għall-Politika ta' Koeżjoni jiġu allokati għall-Fond Soċjali Ewropew (FSE) sabiex tiġi promossa l-impjegabilità u biex jiġu stimulati l-investimenti soċjali;

7.  Jipproponi li l-impenji mhux użati mill-Istati Membri wara perjodu ta' sentejn jiġu riallokati għal programmi u/jew azzjonijiet oħra tal-Unjoni;

8.  Jissottolinja l-importanza li tissaħħaħ il-kapaċità amministrattiva tal-awtoritajiet responsabbli għall-implimentazzjoni tal-Politika ta' Koeżjoni sabiex tittejjeb il-ġestjoni tal-fondi strutturali u għalhekk, biex tiġi influwenzata l-kapaċità ta' governanza tal-awtoritajiet pubbliċi; jappoġġa l-proposti tal-Kummissjoni stabbiliti f'dan ir-rigward;

9.  Jilqa' l-proposta tal-Kummissjoni u jenfasizza l-bżonn li talloka tal-anqas 20% tal-FSE għall-"promozzjoni tal-inklużjoni soċjali u tal-ġlieda kontra l-faqar";

10. Huwa konvint li s-sanzjonijiet marbuta mal-kundizzjonalità makroekonomika proposti fil-qafas tal-fondi strutturali jmorru kontra l-prinċipju fundamentali ta' solidarjetà tal-UE; jitlob li l-kundizzjonalità makroekonomika titħassar;

11. Huwa konvint li l-Programm Ewropew għall-Bidla Soċjali u l-Innovazzjoni Soċjali għandu rwol essenzjali biex jappoġġa l-iżvilupp u l-koordinazzjoni tal-politiki soċjali fil-livell Ewropew, biex jiffaċilita l-aċċess għall-mikrokreditu u biex jiffavorixxi l-mobbiltà tal-impjegati fil-livell transkonfinali; jinsisti, fir-rigward tal-isfidi tal-ħolqien tal-impjiegi u tal-ġlieda kontra l-qgħad u l-faqar, li l-pakkett finanzjarju tal-programm jiżdied b'5% skont ir-riżoluzzjoni tiegħu tat-8 ta' Ġunju 2011 dwar Ninvestu fil-ġejjieni: Qafas Finanzjarju [Pluriennali (QFP)] ġdid għal Ewropa kompetittiva, sostenibbli u inklużiva;

12. Jitlob li s-sitwazzjoni drammatika taż-żgħażagħ fis-suq tax-xogħol tiġi rikonoxxuta fil-programmazzjoni finanzjarja pluriennali; għalhekk, jipproponi li tinħoloq taqsima "Inizjattiva għaż-Żgħażagħ" fil-Programm Ewropew għall-Bidla Soċjali u l-Innovazzjoni Soċjali bil-pakkett finanzjarju tagħha stess ta' EUR 150 miljun;

13. Ifakkar fir-rwol essenzjali tal-Fond Ewropew ta' Aġġustament għall-Globalizzazzjoni (FEG) fil-ġlieda kontra l-effetti ta' ħsara tal-globalizzazzjoni, tar-ristrutturar industrijali u ta' kriżi mhux mistennija; jirrikonoxxi l-valur miżjud tiegħu bħala strument ta' intervent fi kriżi biex il-ħaddiema li jkunu tilfu xogħolhom jiġu megħjuna jerġgħu jidħlu fis-suq tax-xogħol; jinsisti li l-FEG irid jitkompla u jiġi aġġornat wara l-2014 bħala strument disponibbli, bl-istess kundizzjonijiet, għall-kategoriji kollha tal-ħaddiema; jinsisti fuq il-ħtieġa li l-Istati Membri jiġu mħeġġa jużaw il-FEG biex jilħqu l-miri tal-Istrateġija UE 2020, biex jimmaniġġjaw ir-ristrutturar u biex jippromwovu ħiliet ġodda, anke b'rabta ma' impjiegi ġodda, sostenibbli u ta' kwalità għolja; jinsisti wkoll fuq il-ħtieġa ta' proċedura semplifikata u aċċellerata rigward il-ħlas tal-għotjiet;

14. Jinsisti li programm għall-persuni l-aktar żvantaġġati, inkluża enfasi fuq il-faqar alimentari, għandu jtejjeb is-sitwazzjoni tal-persuni foqra fl-Ewropa; ifakkar lill-Kummissjoni fl-impenn tagħha li tippreżenta, fil-ħin, proposta leġiżlattiva f'dan ir-rigward biex tiggarantixxi l-kontinwità tal-appopġġ għal tali programm wara l-2014 fuq bażi legali ġdida b'pakkett finanzjarju awtonomu (minbarra l-20% tal-FSE previsti għall-promozzjoni tal-inklużjoni soċjali u l-ġlieda kontra l-faqar), b'enfasi fuq l-iffaċilitar tal-organizzazzjonijiet li jappoġġjaw lil dawk l-iktar fil-bżonn u biex tkun indirizzata l-problema strutturali tal-faqar alimentari;

15. Jinsisti fuq l-importanza tal-kuntratti ta' sħubija u fuq il-ħtieġa ta' rappreżentanza u parteċipazzjoni effikaċi tal-Membri tiegħu fil-kumitati ta' monitoraġġ bħala osservaturi;

16. Ifakkar fl-importanza li s-sieħba soċjali jiġu inklużi kemm jista' jkun fl-implimentazzjoni tal-programmi ffinanzjati sabiex ikun żgurat it-twettiq ottimali tal-baġit tal-politika ta' koeżjoni;

17. Ifakkar li d-deċiżjonijiet politiċi jridu jkunu msejsa fuq data u analiżi oġġettivi, approfonditi u sodi; jinsisti fuq il-ħtieġa ta' finanzjament suffiċjenti tal-aġenziji tal-UE sabiex ikunu jistgħu jwettqu l-mandati tagħhom u biex jiġu ssodisfati l-eżiġenzi tal-istituzzjonijiet li jiddependu minnhom.

Modifiki

Modifika  1

Proposta għal Abbozz ta' Ftehim Interistituzzjonali bejn il-Parlament Ewropew, il-Kunsill u l-Kummissjoni dwar il-kooperazzjoni fi kwistjonijiet baġitarji u l-ġestjoni finanzjarja soda

Paragrafu 13 – inċiż 1

Modifika  2

Proposta għal Abbozz ta' Ftehim Interistituzzjonali bejn il-Parlament Ewropew, il-Kunsill u l-Kummissjoni dwar il-kooperazzjoni fi kwistjonijiet baġitarji u l-ġestjoni finanzjarja soda

Paragrafu 13 – inċiż 2

Modifika  3

Proposta għal Abbozz ta' Ftehim Interistituzzjonali bejn il-Parlament Ewropew, il-Kunsill u l-Kummissjoni dwar il-kooperazzjoni fi kwistjonijiet baġitarji u l-ġestjoni finanzjarja soda

Paragrafu 13 – inċiż 3

RIŻULTAT TAL-VOTAZZJONI FINALI FIL-KUMITAT

24.9.2012

OPINJONI tal-Kumitat għall-Ambjent, is-Saħħa Pubblika u s-Sikurezza tal-Ikel

għall-Kumitat għall-Baġits

dwar ir-rapport interim bl-għan li jinkiseb eżitu pożittiv tal-proċedura ta' approvazzjoni tal-Qafas Finanzjarju Multiannwali 2014-2020

( COM(2011)0398 – COM(2012)0388 – 2011/0177(APP) )

Rapporteur għal opinjoni: Marisa Matias

SUĠĠERIMENTI

Il-Kumitat għall-Ambjent, is-Saħħa Pubblika u s-Sikurezza tal-Ikel jistieden lill-Kumitat għall-Baġits, bħala l-Kumitat responsabbli, sabiex jinkorpora s-suġġerimenti li ġejjin fir-rapport tiegħu:

1.  Jinnota l-opinjoni tal-Kumitat għall-Ambjent, is-Saħħa Pubblika u s-Sikurezza tal-Ikel dwar ir-rapport "Ninvestu fil-ġejjieni: Qafas Finanzjarju Multiannwali (QFM) ġdid għal Ewropa kompetittiva, sostenibbli u inklużiva" ( 2010/2211(INI) ) tal-Kumitat Speċjali dwar l-Isfidi tal-Politika u r-Riżorsi Baġitarji għal Unjoni Ewropea sostenibbli wara l-2013;

2.  Jilqa' d-dokument ta' ħidma dwar "LIFE u lil hinn: Sostenibbiltà permezz tal-Qafas Finanzjarju Multiannwali (QFM) li jmiss 2014-2020, ippreżentat fis-16 ta' April 2012 mir-Rapporteur Jutta Haug[21];

3.  Jinnota r-rapport tal-Kumitat għall-Ambjent, is-Saħħa Pubblika u s-Sikurezza tal-Ikel dwar il-proposta għal regolament tal-Parlament Ewropew u tal-Kunsill dwar it-twaqqif ta' Programm Is-Saħħa għat-Tkabbir, it-tielet programm multiannwali ta' azzjoni tal-UE fil-qasam tas-saħħa għall-perjodu 2014-2020 ( COM(2011)0709 – C7-0399/2011 – 2011/0339(COD) );

4.  Jemmen li l-qafas finanzjarju multiannwali (QFM) 2014-2020 għandu jservi biex jintlaħqu l-miri '20-20-20' għall-klima u l-enerġija u biex il-mira għat-tnaqqis tal-emissjonijiet tiżdied għal 30 %;

5.  Jemmen li l-QFM għandu jinkludi l-fondi u l-miżuri kollha, speċjalment dawk relatati mal-ambjent, mal-protezzjoni ċivili, mal-politika dwar il-klima, u mas-sigurtà tal-ikel, billi l-PE huwa favur il-metodu Komunitarju u qed jipprova jiżgura l-valur miżjud massimu mir-riżorsi tal-UE;

6.  Jemmen li l-QFM għandu jippermetti lill-UE tilħaq il-miri globali tagħha tal-bijodiversità u tipprovdi kofinanzjament għall-immaniġġjar tan-netwerk Natura 2000;

7.  Jemmen li l-QFM għandu jkun konformi mal-proposta tal-Kummissjoni għat-trasferiment ta’ finanzjament għas-sigurtà tal-ikel għall-Intestatura 3 tal-baġit;

8.  Jemmen li l-QFM għandu jipprovdi l-mezzi neċessarji għal azzjoni favur l-ambjent u l-klima, jagħmel użu aħjar mill-istrumenti xierqa, isaħħaħ is-sigurtà tal-enerġija, jibni ekonomija effiċjenti fl-użu tar-riżorsi u reżiljenti għat-tibdil fil-klima, u jtejjeb il-kompetittività tal-Unjoni b'aktar impjiegi u impjiegi aktar ekoloġiċi, bit-tisħiħ tas-sigurtà tal-enerġija u b'benefiċċji għas-saħħa permezz ta' arja aktar nadifa;

Programm għall-Ambjent u l-Azzjoni Klimatika (LIFE)

9.  Jitlob bil-qawwa li mill-inqas 0.5 % tal-baġit tal-Unjoni jiġi allokat għall-Programm LIFE, minħabba r-reputazzjoni ferm pożittiva tiegħu bħala strument żgħir iżda mmirat tajjeb u effettiv, il-valur miżjud Ewropew kbir tiegħu u l-fatt li huwa l-uniku strument li jiffoka esklużivament fuq il-klima u l-isfidi ambjentali; jenfasizza li l-infiq integrat għall-klima u l-ambjent permezz tal-Proġetti Integrati LIFE għandu jkunu appoġġat attivament fi ħdan il-fondi rilevanti tal-Unjoni; jitlob li LIFE jiġi allokat sehem suffiċjenti sabiex jikkontribwixxi għal ġestjoni tajba u kostanti tan-netwerk Natura 2000, filwaqt li jitqies il-kontribut garantit ta' fondi oħra tal-Unjoni;

10. Jemmen li l-QFM għandu jkun ibbażat fuq dak li għandu jkun approċċ trasversali, bl-għan tal-koordinazzjoni ta' miżuri għall-ġlieda kontra t-tibdil fil-klima fl-oqsma rilevanti kollha tal-operazzjonijiet, inklużi l-politiki esterni, u għaldaqstant, jassenja 30 % tal-ammont allokat lil kull politika u attività li ser tkun iffinanzjata taħtu għal miżuri biex jintlaħaq l-għan tal-ġlieda kontra t-tibdil fil-klima;

11. Jemmen li l-QFM għandu jiżgura finanzjament adegwat tan-netwerk Natura 2000 billi jiġu allokati mill-inqas EUR 5.8 biljun fis-sena permezz tal-finanzjament mill-UE u l-Istati Membri, li għandhom ikunu disponibbli permezz ta' diversi fondi tal-UE (PAK, Politika ta' Koeżjoni, LIFE, FEMS, Orizzont 2020), flimkien ma' koerenza u sinerġiji aħjar bejn dawn il-fondi permezz ta' Oqfsa ta' Azzjonijiet Ipprijoritizzati fil-livell nazzjonali, b'konformità mal-Qafas Strateġiku Komuni;

12. Jemmen li l-QFM għandu jiżgura li l-fondi għall-Klima Globali u l-Bijodiversità jiġu kkwantifikati;

13. Jemmen li l-QFM għandu jipprovdi appoġġ għall-beni pubbliċi bħall-preservazzjoni tal-bijodiversità, l-istabbiltà tal-klima, il-kwalità tal-arja, il-kwalità tal-ilma u l-kwalità tal-ħamrija, filwaqt li ma jipperikolax l-objettivi tal-politika tal-UE;

14. Jenfasizza li fis-sejħiet għal konċessjoni jew akkwist pubbliku, għandhom jingħataw kundizzjonijiet ċari fir-rigward tal-ħarsien tal-ambjent;

15. Jemmen li l-QFM għandu jinkorpora – u jikkwantifika – il-finanzjament internazzjonali mbassar għall-klima għall-pajjiżi li qed jiżviluppaw, li, kif miftiehem fin-negozjati tal-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC), għandu jammonta għal USD 100 000 miljun fis-sena sal-2020;

16. Ifakkar fit-talba preċedenti tiegħu li għandha tkun integrata fil-politiki kollha ta' nfiq l-ambizzjoni tal-Unjoni li tieħu triq sostenibbli għal żvilupp b'livell baxx ta' karbonju; jenfasizza li f'każ ta' nuqqas li jiġu mmirati fondi, b'mod deċiż, lejn is-sostenibbiltà fi ħdan il-politika ta' koeżjoni, infrastruttura, agrikoltura u riċerka tal-Unjoni, dan iwassal għal żieda fittizja tal-flessibbiltà li ssir b'nuqqas ta' ħsieb fit-tul, filwaqt li tnaqqas bil-qawwi l-flessibbiltà tal-ġenerazzjonijiet futuri; jitlob, għalhekk, għal allokazzjoni intelliġenti fi ħdan il-fondi kollha kif issuġġerit fl-opinjonijiet rispettivi tal-ENVI, li twassal għal tal-inqas 20 % tan-nefqa marbuta mal-klima[22];

17. Jemmen bil-qawwa li l-istrateġija Ewropa 2020, flimkien mal-inizjattivi ewlenin tagħha li għandhom jissarrfu f'azzjonijiet konkreti, impenji u oqfsa leġiżlattivi, għandha tkun ir-referenza politika ewlenija għall-QFM li jmiss; huwa konvint li l-politiki interni kollha għandhom jikkontribwixxu biex jintlaħqu l-miri stabbiliti mill-istrateġija Ewropa 2020; għalhekk, iqis ukoll li l-istruttura tal-QFM għandha tirrifletti dawn il-prijoritajiet strateġiċi: huwa impenjat li jittrasforma l-Unjoni Ewropea b'impenn imsaħħaħ għal aktar sostenibbiltà lejn Ewropa intelliġenti, inklussiva u kompetittiva; huwa konvint li l-investimenti fil-bijodiversità u f’miżuri tal-ekosistema u fl-effiċjenza fl-użu tar-riżorsi kif ukoll azzjonijiet komplementari fil-livell tal-UE fil-qasam tas-saħħa pubblika se jikkontribwixxu għal tkabbir sostenibbli u impjiegi; Jenfasizza l-bżonn li tissaħħaħ l-integrazzjoni tal-leġiżlazzjoni tal-UE dwar l-ambjent, is-saħħa pubblika u l-klima u l-objettivi f’politiki settorjali (bħall-PAK, il-politika ta’ koeżjoni, il-PKS u l-politika tal-iżvilupp);

18. Jenfasizza l-ħtieġa li jiġu stabbiliti salvagwardji solidi biex jiggarantixxu li l-objettivi ta' sostenibbiltà tal-Unjoni ma jkunux imminati billi jkunu ssussidjati jew attivitajiet ta' karbonju intens li huma ta' ħsara għall-ambjent jew infrastruttura fit-tul li tagħlaq is-soċjetajiet tagħna f'mudelli mhux sostenibbli; iqis li huwa indispensabbli, f'dan l-isforz, li strumenti ta' salvagwardja konkreti jiġu applikati orizzontalment għall-infiq tal-Unjoni, bħal kondizzjonalitajiet ex-ante komprensivi, regoli qawwija tal-kundizzjonalità, protezzjoni rigoruża tal-ambjent u l-klima fi programmi u proġetti (SEA, EIA), kif ukoll traċċar ta' impatti pożittivi u negattivi għall-klima u l-bijodiversità; jenfasizza li inkella jista' jkun hemm ir-riskju li investimenti inkoerenti jnaqqsu l-kosteffiċjenza u li l-valur miżjud tal-infiq tal-Unjoni jiġi aċċettat deliberatament;

19. Jemmen bis-sħiħ li l-kriżi tad-dejn attwali m'għandhiex twassal għal investimenti li jqisu biss dak li hu fl-immedjat u li jikkompromettu muhx biss il-kapital finanzjarju tal-Unjoni iżda anke l-kapital naturali tagħha permezz ta' degradazzjoni ulterjuri tal-bijodiversità u s-servizzi ekosistemiċi; jitlob minflok li jiġi stabbilit qafas xieraq biex il-kriżi tingħeleb permezz ta' investimenti li jħarsu 'l quddiem li jindirizzaw sfidi futuri kbar, bħall-effiċjenza fl-użu tar-riżorsi, it-tibdil fil-klima, u l-ħarsien tal-ekosistema, fejn il-benefiċċji potenzjali ekonomiċi u soċjali jkunu sinifikanti;

20. Jitlob li jsiru sforzi biex ikun żgurat li s-sussidji li huma ta' ħsara għall-ambjent jitneħħew gradwalment mill-fondi tal-QFM, partikolarment għal attivitajiet b'użu intensiv tal-karbonju, attivitajiet li jżidu l-intensità tar-riżorsi u l-enerġija, attivitajiet li huma ta' ħsara għall-ekosistemi u l-bijodiversità, u s-sussidji tal-fjuwil;

21. Jenfasizza li parti sinifikanti mill-finanzjament ta' Orizzont 2020 għandha tkun allokata għall-promozzjoni tar-riċerka fl-oqsma prijoritarji tal-UE tal-azzjoni dwar il-klima, l-enerġija rinnovabbli, il-ġestjoni sostenibbli tar-riżorsi naturali u l-bijodiversità, u l-ekoinnovazzjoni; ifakkar li l-objettiv speċifiku tal-ekoinnovazzjoni huwa li titrawwem industrija Ewropea innovattiva u komunità ta' innovazzjoni, li kapaċi toħloq prodotti, proċessi u servizzi ġodda li jwasslu għal tkabbir sostenibbli kif ukoll benefiċċji ambjentali; jenfasizza li l-għan huwa li tiżdied l-effiċjenza fl-użu tar-riżorsi, li jitnaqqsu l-impatti ambjentali, li jkun hemm prevenzjoni ta' tniġġis (tal-ilma) u li jinkiseb użu aktar effiċjenti, effikaċi u responsabbli tar-riżorsi naturali;

22. Jemmen li l-QFM għandu jipprovdi appoġġ għall-agrikoltura sostenibbli, il-bijodiversità u s-servizzi ekosistemiċi fil-Politika Agrikola Komuni (PAK) kollha billi jalloka nofs il-fondi totali tal-PAK għall-iżvilupp rurali, iż-żoni rurali u l-komunitajiet tagħhom, li minnhom aktar minn nofs huma ta' benefiċċju ambjentali, billi jiżguraw il-ħarsien tal-bijodiversità fil-pajsaġġ usa' tal-biedja, itejbu l-konnettività u jimmitigaw u jadattaw għall-effetti tat-tibdil fil-klima, jistimulaw l-innovazzjoni fl-agrikoltura sostenibbli u fl-effiċjenza fl-użu tar-riżorsi; jilqa' l-proposta ta’ riforma tal-PAK tal-Kummissjoni li tipprevedi 'ekoloġizzazzjoni' tal-PAK permezz tal-allokazzjoni ta' 30 % tal-pagamenti tal-Pilastru I għal pakkett ta' prattiki bażiċi sinifikanti tajbin applikati fil-livell tal-biedja, li għandhom jinkludu tinwib u diversifikazzjoni, mergħat permanenti u 'żona b'enfasi ekoloġika' u l-appoġġ għal prattiki agronomiċi tajbin;

23. Jemmen bis-sħiħ li l-Politika Komuni tas-Sajd (PKS) għandha tippromwovi sostenibbiltà ambjentali fit-tul billi din hija prerekwiżit għall-istabbiltà ekonomika u soċjali u billi tikkontribwixxi għad-disponibbiltà tal-provvisti tal-ikel; għalhekk, jitlob li l-QFM jappoġġa tranżizzjoni għal sajd effiċjenti u sostenibbli li jiżgura, pereżempju, li r-rendiment massimu sostenibbli jinkiseb sal-2015 u li r-rimi jiġi eliminat;

24. Jemmen li l-fondi maħsuba għas-sikurezza tal-ikel għandhom jinżammu, filwaqt li titqies il-ħtieġa li tiġi żgurata l-effiċjenza tal-intervent tal-Unjoni f’każ ta’ epidemiji veterinarji jew fitosanitarji; jirrimarka li l-Unjoni taffaċċja regolarment theddid għas-saħħa mhux previst, għalhekk mhuwiex ġustifikat tnaqqis tal-parti finanzjarja maħsuba għal dan il-qasam taħt l-Intestatura 3 tal-baġit tal-Unjoni, kif qed tipproponi l-Kummissjoni.

Politika ta’ Koeżjoni

25. Jemmen li l-QFM għandu jipprovdi appoġġ mill-Fond ta' Koeżjoni għal proġetti fil-qasam tal-ambjent, speċjalment il-bijodiversità, l-effiċjenza tar-riżorsi, l-ambjent urban u t-tniġġis tal-arja;

26. Jemmen li l-QFM għandu jalloka riżorsi tal-Fond Ewropew għall-Iżvilupp Reġjonali għall-effiċjenza enerġetika, l-enerġija rinnovabbli, l-innovazzjoni u l-appoġġ għall-SMEs;

27. Jemmen li l-QFM għandu jalloka riżorsi tal-Fond Ewropew għall-Iżvilupp Reġjonali għall-effiċjenza enerġetika, l-enerġija rinnovabbli, l-ambjent u l-effiċjenza fl-użu tar-riżorsi, l-ekoinnovazzjoni u l-appoġġ għall-SMEs;

28. Jemmen li l-QFM għandu jtejjeb l-evalwazzjonijiet ambjentali tal-infiq tal-Politika ta' Koeżjoni permezz ta' kondizzjonalitajiet ex-ante billi dan jikkontribwixxi għall-prevenzjoni ta' nfiq li huwa ta' ħsara għall-ambjent u għal żieda fil-kwalità tal-programmi operattivi;

Faċilità Nikkollegaw l-Ewropa

29. Jemmen li, fid-dawl tal-ħajja twila ta' proġetti infrastrutturali ewlenin li jkunu appoġġati mill-Faċilità Nikkollegaw l-Ewropa (CEF) u minn strumenti finanzjarji inklużi Bonds tal-Proġetti, huwa prijorità li jiġi żgurat li l-fondi, l-istrumenti u l-proġetti jagħtu kontribut sinifikanti, sal-2050, għall-ilħuq tal-miri tal-Istrateġija Ewropa 2020 u l-miri '20-20-20' tal-enerġija u l-klima, kif ukoll il-pjan direzzjonali għal direzzjoni lejn ekonomija b'livell baxx ta' emissjonijiet ta' karbonju; jemmen li proġetti ta' infrastruttura sostnuti mis-CEF u l-Bonds tal-Proġetti fl-oqsma tal-enerġija, it-trasport u l-komunikazzjonijiet għandhom jipprovdu impatt pożittiv sinifikanti fuq l-ambjent, fuq il-klima u fuq is-sigurtà ta' enerġija b'livell baxx ta' emissjonijiet ta' karbonju; jemmen li l-istima, l-evalwazzjoni u r-rappurtar ta' proġetti għandhom jeħtieġu kontribut dimostrabbli lejn il-miri tal-politika dwar il-klima u l-enerġija tal-UE u r-rispett għall-politiki ambjentali rilevanti kollha (SEA, EIA);

Programm "Saħħa għat-Tkabbir"

30. Jemmen li l-QFM għandu jikkunsidra s-settur tal-kura tas-saħħa (wieħed mill-ikbar setturi tal-impjieg fl-UE, li jirrappreżenta 10 % tal-PDG tal-UE u 10 % tal-impjiegi tal-UE, b'persentaġġ ogħla mill-medja ta' ħaddiema b'livell terzjarju ta' edukazzjoni) bħala wieħed ta' importanza fundamentali f'Ewropa fi kriżi; jenfasizza l-importanza tal-Programm "Saħħa għat-Tkabbir" 2014-2020, u jissottolinja li sal-2020 se jkun hemm nuqqas ta' miljun ħaddiem fil-qasam tas-saħħa fl-UE, filwaqt li jirrimarka li l-programm għandu jgħin biex jipprovdi inċentivi għas-suq tax-xogħol;

31. Jenfasizza l-ħtieġa li jitqiesu l-interessi fit-tul ta' ekonomija stabbli, peress li investimenti għal żmien qasir fil-kura tas-saħħa, u fil-kwalità tas-saħħa għaċ-ċittadin tal-UE li qed jixjieħu, inaqqsu l-ispejjeż tas-saħħa u tal-kura għal perjodu ta' żmien twil;

Mekkaniżmu tal-Unjoni għall-Protezzjoni Ċivili

32. Jemmen li l-QFM għandu jenfasizza l-għadd u l-gravità dejjem jiżdiedu ta' diżastri naturali u kkaġunati mill-bniedem, u l-fatt li t-tibdil fil-klima jista' jwassal għal diżastri aktar estremi; jemmen li l-Mekanniżmu tal-Unjoni għall-Protezzjoni Ċivili għandu jiffoka fuq azzjonijiet fl-Unjoni, u jalloka riżorsi baġitarji xierqa;

33. Jilqa' l-proposta tal-Kummissjoni biex iġġedded l-Istrument Finanzjarju għall-Protezzjoni Ċivili (CPI) biex tipprovdi appoġġ finanzjarju għall-attivitajiet li jindirizzaw l-aspetti differenti taċ-ċiklu ta' ġestjoni tad-diżastri, jiġifieri rispons aktar korenti u integrat aħjar f'każ ta' emerġenzi, tħejjija mtejba biex jiġu trattati diżastri, u azzjonijiet innovattivi għat-tnaqqis tar-riskju ta' diżastru; jirrimarka li s-CPI għandu jintuża wkoll għall-ħolqien tal-Kapaċità Ewropea għal Rispons ta' Emerġenza, bil-parteċipazzjoni tal-assi tal-protezzjoni ċivili tal-Istati Membri kollha, sabiex tiġi ġġenerata kosteffikaċja mtejba permezz tad-disponibbiltà koordinata tal-assi tal-protezzjoni ċivili;

34. Jemmen li l-QFM għandu jappoġġa t-tiġdid tal-CPI sabiex jippermetti li jingħata appoġġ finanzjarju għal attivitajiet li jagħmlu parti minn aspetti differenti taċ-ċiklu ta’ ġestjoni tad-diżastri; jemmen li l-ammont allokat għal dan l-istrument għandu jkun ġestit b’mod flessibbli sabiex ikun hemm skop għal żidiet meta ċ-ċirkostanzi jirrikjedu dan;

35. Iqis li l-ħolqien tal-Kapaċità Ewropea għal Rispons ta' Emerġenza se jibni primarjament fuq il-kapaċitajiet eżistenti tal-Istati Membri, u b'hekk jevita spejjeż addizzjonali; jirrimarka li fil-livell tal-UE, il-ħolqien ta' Ċentru Ewropew għal Rispons ta' Emerġenza, b’funzjonijiet imsaħħa ta’ ppjanar u koordinazzjoni, se jkun ta’ benefiċċju għall-UE kollha billi jiġġenera ffrankar fil-livell tal-Istati Membri li għandu jkun ogħla mill-kostijiet tal-baġit tal-UE, minkejja, naturalment, il-benefiċċji ta’ rispons rapidu u effikaċi għad-diżastri f’termini tal-ħajjiet salvati li ma jistgħux jitkejlu f’termini purament finanzjarji;

36. Ifakkar li l-objettivi ġenerali dwar tal-kooperazzjoni tal-UE fil-qasam tal-protezzjoni ċivili għandhom jiżguraw protezzjoni aħjar għan-nies, l-ambjent, il-proprjetà u l-wirt kulturali f'każ ta' diżastri kbar naturali, teknoloġiċi u kkaġunati mill-bniedem, u li l-kooperazzjoni tal-UE fil-qasam tal-protezzjoni ċivili għandha l-għan li:

     a)  tiffaċilita rispons rapidu u effiċjenti għad-diżastri,

b) tiżgura tħejjija suffiċjenti tal-atturi tal-protezzjoni ċivili għall-emerġenzi, u

c) tiżviluppa miżuri għall-prevenzjoni tad-diżastri;

Implimentazzjoni u monitoraġġ

37. Jinsisti fuq l-importanza tal-provvista ta' limitu massimu suffiċjenti ta' impenji taħt l-Intestatura 5 sabiex jiġi żgurat li l-istituzzjonijiet u l-aġenziji jkunu jistgħu jwettqu dmirijiethom bl-aktar mod effiċjenti; jenfasizza li l-implimentazzjoni b'suċċess u l-monitoraġġ tal-programmi u l-politiki multiannwali, għall-benefiċċju kemm taċ-ċittadini tal-Unjoni kif ukoll tal-Istati Membri, jeħtieġu persunal bi kwalifiki għolja, multilingwi u indipendenti, meħud mill-aktar bażi ġeografika wiesgħa possibbli u li jkun impenjat bis-sħiħ favur il-valuri tal-proġett Ewropew;

38. Jemmen li l-QFM li jmiss għandu jippermetti d-delimitazzjoni ta' proġetti fuq skala kbira bħall-programm għall-Monitoraġġ Globali tal-Ambjent u s-Sigurtà (GMES); iqis li l-baġit tal-UE għandu jagħti kontribut fit-tul għal dan il-programm sabiex jiġu salvagwardjati l-ippjanar, il-kontinwità u l-istabbiltà organizzattiva tiegħu; huwa tal-fehma li jekk ikunu meħtieġa riżorsi finanzjarji addizzjonali għal dan il-programm fuq skala kbira, dan il-finanzjament m'għandux jingħata għad-detriment ta' proġetti iżgħar li rnexxew u li huma ffinanzjati mill-baġit tal-UE;

39. Jieħu nota tal-ammonti indikattivi għal kull aġenzija deċentralizzata fil-kompetenza tal-Kumitat għall-Ambjent, is-Saħħa Pubblika u s-Sikurezza tal-Ikel, kif propost mill-Kummissjoni; mhux konvint li dawn iċ-ċifri jikkorrispondu għall-ħtiġijiet tal-aġenziji biex iwettqu l-kompiti mogħtija lilhom, minħabba li dawn jirrappreżentaw iffriżar tal-baġits tal-aġenziji; jitlob li jiġu żgurati biżżejjed approprjazzjonijiet għall-aġenziji li jaħdmu fil-qasam tal-ambjent, is-saħħa pubblika u s-sikurezza tal-ikel.

RIŻULTAT TAL-VOTAZZJONI FINALI FIL-KUMITAT

25.9.2012

OPINJONI tal-Kumitat għall-Industrija, ir-Riċerka u l-Enerġija

għall-Kumitat għall-Baġits

dwar ir-rapport interim sabiex jiffaċilita r-riżultat pożittiv tal-proċedura ta' approvazzjoni tal-qafas finanzjarju pluriennali 2014-2020

( COM(2012)0388 – 2011/0177(APP) )

Rapporteur għal opinjoni: Edit Herczog

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

1.  Jemmen li biex l-UE toħroġ mill-kriżi ekonomika u soċjali attwali, u sabiex tkun żgurata l-kompetittività ġejjiena tagħha f’dinja globalizzata, huwa essenzjali li jintlaħqu l-objettivi stipulati fl-istrateġija UE 2020 għall-kisba ta’ tkabbir intelliġenti, sostenibbli u inklussiv; jemmen li hu essenzjali li jkun riformat il-baġit tal-Unjoni ħalli jirrifletti aħjar il-ħtiġiet finanzjarji assoċjati mal-indirizzar tal-isfidi tas-seklu 21;

2.  Jilqa' l-proposta tal-Kummissjoni biex tintroduċi sistema tar-riżorsi proprji aktar ġusta, sempliċi u trasparenti li żżid sa b'60% is-sehem tar-riżorsi proprji fil-baġit tal-UE sa mhux aktar tard mill-2018; jappoġġa bis-sħiħ il-proposta tal-Kummissjoni biex tintroduċi taxxa fuq it-tranżazzjonijiet finanzjarji fl-UE kollha bħala riżorsa proprja tal-UE mill-2014 'il quddiem;

3.  Jemmen li l-baġit tal-Unjoni jista' jkun aġent b'saħħtu għar-riforma jekk in-nefqa tal-UE tkun iffukata fuq oqsma li jistimulaw it-tkabbir ekonomiku bħal pereżempju l-innovazzjoni, ir-riċerka u l-iżvilupp;

4.  Jenfasizza li numru ta’ oqsma, bħall-innovazzjoni, ir-riċerka u l-iżvilupp, l-investimenti strateġiċi fin-netwerks infrastrutturali trans-Ewropej u l-politika barranija għandhom jingħataw prijorità akbar fuq oqsma oħra biex jiffaċċjaw l-isfidi politiċi u ekonomiċi attwali u tal-ġejjieni;

5.  Jenfasizza li wieħed mill-għanijiet l-aktar importanti tal-UE huwa li ttejjeb il-kompetittività tagħha u tiffaċilita l-bidla f’ekonomija bbażata fuq l-għarfien fost l-aktar avvanzati fid-dinja; jenfasizza li l-QFM li jmiss għandu jappoġġa dan il-proċess fl-oqsma kollha tal-politika tal-UE;

6.  Jenfasizza r-rwol ewlieni li jrid ikollu l-baġit tal-UE fil-kisba tal-objettivi tal-istrateġija UE 2020 miftehma b'mod komuni; jenfasizza li l-għan għandu jkun baġit intelliġenti u modern li jagħti prijorità lill-għanijiet politiċi ewlenin tal-Unjoni speċjalment l-oqsma li jiġġeneraw tkabbir, aktar milli baġit kbir li jiġbor kollox fih; jemmen li jekk jiġi ppjanat sew, finanzjament tal-UE jista’ jservi ta' katalist għal azzjonijiet b'valur miżjud tal-UE ċar li l-Istati Membri individwali ma jistgħux jiksbu, kif ukoll joħloq sinerġiji u kumplimentarjetajiet mal-attivitajiet tal-Istati Membri billi jgħinhom jiffukaw fuq investimenti ewlenin iffukati fuq il-ġejjieni; jilqa’, għaldaqstant, il-proposta tal-Kummissjoni li jiżdied (meta mqabbel mal-QFM 2007-2013) il-finanzjament disponibbli għal programmi tal-UE fl-oqsma tar-riċerka, l-innovazzjoni, il-kompetittività, l-SMEs u l-infrastruttura; jemmen bis-sħiħ li dawn l-allokazzjonijiet finanzjarji proposti jikkostitwixxu l-minimu, u jwissi bil-qawwa kontra t-tentazzjoni ta’ xi Stati Membri li jnaqqsuhom, għax dan jipperikola l-kredibilità tal-UE u l-impenn politiku favur it-tkabbir u l-impjiegi; jenfasizza, fl-istess waqt, il-ħtieġa li tkun żgurata flessibilità baġitarja suffiċjenti biex il-mezzi baġitarji jkunu jistħu jiġu allinjati b’mod xieraq maċ-ċirkostanzi u l-prijoritajiet li jevolvu;

7.  Jitlob li ssir reviżjoni tal-infiq kollu tal-QFM attwali bil-ħsieb li minn banda jiġi identifikat l-infiq li huwa kruċjali għall-ksib tal-objettivi tal-politika tal-Unjoni filwaqt li mill-banda l-oħra jiġi identifikat ukoll dak l-infiq li huwa anqas rilevanti, bil-mira li jiġu allokati mill-ġdid 30% tal-infiq mill-oqsma li m’għadhomx rilevanti għall-oqsma bi prijorità għolja, biex b’hekk jiġu lliberati r-riżorsi ekonomiċi għal oqsma oħra;

8.  Jenfasizza b’mod partikolari l-ħtieġa li jitjieb, jiġi stimulat u żgurat il-finanzjament tar-riċerka, l-iżvilupp u l-innovazzjoni fl-UE billi jiżdied b’mod sinifikanti l-infiq relevanti fil-QFM 2014-2020 għall-programm Orizzont 2020, u billi jiġu simplifikati b’mod radikali l-proċeduri ta’ finanzjament filwaqt li jinżamm strettament il-prinċipju ta’ ġestjoni finanzjarja soda;

9.  Jinsab konvint li l-fondi tal-Orizzont 2020 għandhom ikunu konformi mal-prijoritajiet tal-UE 2020 u użati bħala katalist għall-attivitajiet ta' valur miżjud tal-UE, is-simplifikazzjoni aħjar tal-fondi pubbliċi tal-UE u l-lieva miżjuda ta' fondi privati; jemmen li minimu ta' 15% tal-baġit tal-Orizzont 2020 għandu jkun iddestinat għal SMEs;

10. Jenfasizza l-valur miżjud mogħti mill-programmi tal-UE favur l-SMEs, għax dawn dehru li kienu siewja ħafna fl-appoġġ tal-isforzi tal-Istati Membri li jiżguraw l-aċċess tal-SMEs għal opportunitajiet ta’ finanzjament u swieq barranin fi żmien ta’ kriżi finanzjarja qawwija; jemmen li l-aċċess imtejjeb, issemplifikat u kkanalat għall-finanzjament għandu jkun magħmul disponibbli fil-futur għall-atturi industrijali kollha fl-UE; jemmen li l-kamp ta’ applikazzjoni tal-istrumenti finanzjarji relevanti għandu jitwessa’ ħalli jkopri l-fażijiet kollha taċ-ċiklu tan-negozju;

11. Jemmen b’saħħa li l-infiq allokat għall-Programm għall-Kompetittività tal-Impriżi u l-SMEs (COSME) għandu jkun irduppjat jew mill-anqas imkabbar b’mod sostanzjali;

12. Hu tal-fehma li l-iżvilupp ta’ ġenerazzjoni ġdida ta’ sistemi ta’ enerġija sostenibbli fl-UE se tirrikjedi sforzi ta’ investiment kbar fir-riċerka u l-iżvilupp fil-qasam tal-enerġija; jenfasizza, għaldaqstant, il-ħtieġa li jiżdied il-finanzjament fir-riċerka u l-iżvilupp teknoloġiċi, u li jinżammu l-proġetti ta’ demostrazzjoni fil-qasam tal-enerġija; jitlob li l-baġit għall-Enerġija Intelliġenti – Programm għall-Ewropa, iġġestjonat mill-Aġenzija Eżekuttiva għall-Kompetittività u l-Innovazzjoni, jinżamm u jiġi ssupplimentat; jitlob li jkun hemm implimentazzjoni sħiħa għall-Pjan SET, li diġà ġie adottat; jitlob lill-Kummissjoni u lill-Kunsill jiċċaraw il-finanzjament tal-pjan fil-qafas tal-QFM 2014-2020; jistieden lill-Kummissjoni u lill-Kunsill jiżguraw finanzjament adegwat għall-iżvilupp tan-netwerks tal-enerġija intelliġenti;

13. Jenfasizza l-importanza li jiġi allokat livell biżżejjed ta' fondi għall-Istati Membri li fil-kuntest tan-negozjati għall-adeżjoni mal-UE, ħadu l-impenn li jagħlqu u sussegwentement jiddekkumissjonaw unitajiet ta' reatturi nukleari, billi rrikonoxxew li dan l-għeluq bikri rrappreżenta piż finanzjarju eċċezzjonali għal dawk l-Istati Membri;

14. Jenfasizza l-importanza strateġika ta’ proġetti infrastrutturali fuq skala kbira (bħal ITER, Galileo u GMES) għall-ġejjieni tal-kompetittività tal-UE u t-tisħiħ tal-industriji tal-UE; jemmen li l-finanzjament tagħhom għandu jkun żgurat fil-baġit tal-UE abbażi ta’ baġit multiannwali awtonomu u komprensiv barra mill-MFF (’il fuq mil-limiti massimi tal-MFF), filwaqt li t-titjib fil-governanza għandu jibqa’ fl-ambitu tar-regoli tat-Trattat UE; jenfasizza li jekk ikun hemm spejjeż żejda waqt l-implimentazzjoni ta’ dawn il-proġetti, dawn għandhom ikunu koperti b’mod li ma jipperikolax il-finanzjament u l-implimentazzjoni b’suċċess ta' proġetti ta' skala kbira jew ta’ politiki oħra tal-Unjoni li jikkontribwixxu għall-kisba tal-għanijiet tal-istrateġija UE 2020;

15. Jemmen li fil-kuntest attwali ta’ limitazzjonijiet fil-baġits pubbliċi, l-effett ta’ lieva ta’ sorsi oħra ta’ finanzjament hu asssolutament meħtieġ biex jitwettqu l-investimenti fit-tul meħtieġa għat-twettiq tal-istrateġija UE 2020; jemmen li l-valur miżjud tal-UE jiżdied b’mod partikolari permezz tal-appoġġ għal programmi b’riskju għoli, b’infiq kbir u fit-tul lil hinn mill-ilħuq tal-Istati Membri individwali; jitlob, għaldaqstant, li jsiru azzjonijiet tal-UE biex inaqqsu r-riskji tal-investiment f’attivitajiet fuq skala kbira u għall-iżvilupp ta’ investiment fl-Ewropa kollha fl-infrastruttura tal-enerġija u tal-ICT, fost proġetti oħrajn; jilqa’, f’dan ir-rigward, it-tnedija tal-fażi pilota 2012-2013 tal-inizjattiva Bonds għall-Proġetti tal-UE, u l-proposta tal-Kummissjoni dwar il-Faċilità Nikkollegaw l-Ewropa, bħala l-ewwel passi f'din id-direzzjoni; jirrakomanda li l-Kummissjoni għandha timmonitorja u terġa' tirrevedi l-impatt kumulattiv ta' leġiżlazzjoni ġdida jew emendata dwar investimenti tas-settur privat fit-tul u tiżgura li l-ostakli għall-investiment jiġu indirizzati b'mod urġenti. jenfasizza l-ħtieġa li jiġi pprovdut finanzjament adegwat għall-Faċilità Nikkollegaw l-Ewropa sabiex tiġi żgurata l-implimentazzjoni tagħha, inter alia, bl-għan li tiġi salvagwardjata l-provvista tal-enerġija tal-Ewropa u jitwettaq is-suq intern tal-UE, bid-diversifikazzjoni ta' diversi sorsi ta' provvista, u l-kontribuzzjoni għall-iżvilupp sostenibbli;

16. Jemmen, madankollu, li tinħtieġ riflessjoni aktar bir-reqqa għat-titjib tal-appoġġ għal investimenti fit-tul fl-UE; jenfasizza l-ħtieġa li jiġu żviluppati u mtejba strumenti finanzjarji għall-kondiviżjoni tar-riskji msejsa fuq il-baġit tal-UE, u permezz tagħhom il-faċilitazzjoni tal-finanzjament tal-investiment f’setturi prijoritarji, li jkun jinkludi firxa ta’ proġetti ikbar u aktar varjata u b’livelli ta’ riskju differenti (approċċ ta’ ‘portafoll ta’ proġetti’); jinsab konvint li għandha ssir ħidma għal sinerġiji u kumplimentarjetajiet bejn skemi tal-UE u dawk nazzjonali biex ikun massimizzat il-potenzjal għal tkabbir ta’ tali strumenti; jenfasizza li dawn l-istrumenti jridu jkunu appoġġjati minn kriterji ċari u trasparenti għall-eleġibilità u l-għażla tal-proġetti;

17. Jenfasizza li r-riinvestiment tad-dħul (reflows) għandu jkun il-prinċipju li jirregola l-istrumenti finanzjarji innovattivi kollha; jenfasizza li dan il-prinċipju “rota” jwassal mhux biss għal tfaddil tal-finanzi pubbliċi iżda anke jsaħħaħ l-effett ta’ lieva u ta’ multiplikatur ta’ dawn l-istrumenti li, fl-aħħar mill-aħħar, jgħinu sabiex ikun żgurat livell ogħla ta’ investimenti fl-ekonomija;

18. Jisħaq li l-interoperabilità u s-sinerġiji bejn il-politika ta' koeżjoni u l-programmi speċifiċi (bħal Orizzont 2020, COSME u CEF) u l-politika ta’ koeżjoni jridu jkunu promossi; jinsab konvint li finanzjament kumulattiv jew imħallat għandu jkun inkoraġġit biex jiġi massimizzat it-teħid tal-fondi disponibbli tal-UE fl-Istati Membri kollha, u b’hekk il-parteċipazzjoni tagħhom fil-programmi speċifiċi kollha, u għall-kisba ta’ żvilupp ekonomiku aktar bilanċjat fit-territorju tal-UE kollu kemm hu;

19. Jenfasizza b'mod partikolari l-ħtieġa għal finanzjament addizzjonali tal-programm ‘Erasmus għal Intraprendituri Żgħażagħ’ skont il-Qafas Finanzjarju Multiannwali 2014-2020. josserva li l-programm adotta bħala l-għanijiet tiegħu l-promozzjoni tal-impriżi Ewropej, l-iskambju tal-għarfien u l-mudelli tal-aħjar prattiki u l-bini ta' netwerks u sħubiji għal dak l-iskop.

20. Jissottolinja li żieda tal-baġit operattiv jeħtieġ li jkun akkumpanjat minn żieda biżżejjed tal-baġit amministrattiv sabiex jiġi żgurat it-twettiq b'suċċess tal-programmi tal-UE.

RIŻULTAT TAL-VOTAZZJONI FINALI FIL-KUMITAT

11.7.2012

OPINJONI tal-Kumitat għas-Suq Intern u l-Ħarsien tal-Konsumatur

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020

( COM(2011)0398 – C7 – 2011/0177(APP) )

Rapporteur għal opinjoni: Cristian Silviu Buşoi

SUĠĠERIMENTI

Il-Kumitat għas-Suq Intern u l-Ħarsien tal-Konsumatur jistieden lill-Kumitat għall-Baġits, bħala l-kumitat responsabbli, sabiex jinkorpora l-emendi li ġejjin fir-rapport tiegħu:

1.  Jilqa' l-Qafas Finanzjarju Multiannwali 2014-2020 (MFF) propost u l-korrelazzjoni mal-objettivi tal-Istrateġija Ewropa 2020; madankollu jenfasizza li għadu ma jissodisfax dak li l-Parlament talab fir-riżoluzzjoni tiegħu tat-8 ta' Ġunju 2011[23]; jirrimarka li anke b'żieda ta' 5 % fil-livell tar-riżorsi għall-MFF li jmiss meta mqabbel mal-livell tal-2013, kontribuzzjoni limitata biss tista' ssir għall-ilħuq tal-objettivi u l-impenji miftiehma tal-Unjoni u għall-prinċipju tas-solidarjetà tal-Unjoni;

2.  Jirrimarka li l-MFF għandu jipprovdi l-mezzi finanzjarji neċessarji għall-implimentazzjoni tal-inizjattivi tal-Att dwar is-Suq Uniku sabiex isir użu aħjar tal-potenzjal tas-suq intern fl-iżgurar tal-kompetittività futura u t-tkabbir ekonomiku inklużiv u sostenibbli tal-UE;

3.  Jenfasizza li l-SMEs huma s-sinsla tal-ekonomija Ewropea u li l-MFF għandu jipprovdi appoġġ qawwi għal politika tal-UE li għandha l-għan li ttejjeb l-aċċess tal-SMEs għall-finanzi, issaħħaħ il-kompetittività tagħhom u tħeġġeġ l-intraprenditorija; jappoġġa bil-qawwa l-Programm propost għall-Kompetittività tal-Impriżi u l-SMEs, iżda jqis li l-pakkett finanzjarju ddedikat għalih għandu jiżdied ulterjorment għal 0.5% tal-MFF;

4.  Jenfasizza l-importanza tal-politika tal-konsumatur għall-iżgurar ta' livell għoli ta' protezzjoni tal-konsumatur fl-UE u għall-għoti tas-setgħa lill-konsumaturi b'mod ġenerali; iqis li l-allokazzjoni proposta għall-Programm tal-Konsumatur 2014-2020 mhijiex biżżejjed għall-ilħuq ta' dawn l-għanijiet u jitlob li jkun hemm żieda ta' 5 % fil-pakkett finanzjarju tiegħu;

5.  Itenni l-ħtieġa li jkunu żgurati fondi adegwati għat-tkomplija tas-suq intern, li jservi madwar 500 miljun ċittadin, filwaqt li jirrappreżenta soluzzjoni kredibbli biex tingħeleb il-kriżi ekonomika u finanzjarja li għaddejja minnha l-UE;

6.  Jilqa' bil-ferħ il-Faċilità Nikkollegaw l-Ewropa proposta għall-finanzjament ta' proġetti maġġuri ta' infrastruttura sabiex tappoġġa l-ħolqien tas-suq uniku tal-enerġija u tas-suq uniku diġitali filwaqt li ssaħħaħ il-moviment ħieles tal-oġġetti, servizzi u persuni u tiżgura protezzjoni akbar għall-konsumaturi, li għalhekk ikunu jistgħu jaċċessaw suq li hu aktar trasparenti u aktar kompetittiv f'termini ta' provvista u prezzijiet; jenfasizza li l-ħtiġijiet finanzjarji f'dan il-qasam huma kbar ħafna u li se jkun impossibbli li jiġu koperti mill-allokazzjoni proposta; għalhekk jargumenta li għandha ssir enfasi akbar fuq mekkaniżmi ta' finanzjament innovattivi bħal pereżempju l-bonds għall-proġetti tal-UE.

7.  Ifakkar li r-riċerka u l-innovazzjoni huma indispensabbli għal suq uniku b'saħħtu u kompetittiv; jistieden lill-Kunsill iqis dan il-qasam ta' politika bħala prijorità fil-qafas finanzjarju multiannwali li jmiss u biex iżid l-allokazzjoni finanzjarja għall-Programm Orizzont 2020 sa 100 biljun euro;

RIŻULTAT TAL-VOTAZZJONI FINALI FIL-KUMITAT

99

20.9.2012

OPINJONI tal-Kumitat għat-Trasport u t-Turiżmu

għall-Kumitat għall-Baġits

dwar ir-rapport interim għall-fini li jintlaħaq eżitu pożittiv tal-proċedura ta' approvazzjoni tal-Qafas Finanzjarju [Pluriennali] għas-snin 2014-2020

( COM(2011)0398 – 2011/0177(APP) )

Rapporteur għal opinjoni: Brian Simpson

SUĠĠERIMENTI

Il-Kumitat għat-Trasport u t-Turiżmu jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

A. billi ntwera li t-8 biljun euro allokati għat-twettiq tan-Netwerk Trans-Ewropew tat-Trasport (TEN-T) għall-perjodu ta' programmazzjoni 2007-2013 huma insuffiċjenti ferm u li jinħtieġu riżorsi addizzjonali biex in-netwerk jitlesta u biex tingħata spinta lit-tkabbir, il-ħolqien tal-impjiegi u l-kompetittività fl-UE;

1.  Jenfasizza r-rwol fundamentali tas-settur tat-trasport tal-UE bħala s-sinsla tas-suq intern u l-bażi għall-moviment ħieles tal-persuni u tal-merkanzija kif ukoll għall-koeżjoni ekonomika, soċjali u territorjali; jirrimarka li s-settur tat-trasport jiġġenera 6.3 % tal-PDG tal-UE u jipprovdi impjieg għal 13-il miljun ruħ;

2.  Ifakkar fl-isfidi finanzjarji u teknoloġiċi enormi li qed jaffaċċja s-settur tal-trasport fir-rigward tat-titjib tal-prestazzjoni ambjentali, tal-kompetittività u tan-netwerks tiegħu;

3.  Jissottolinja l-fatt li jinħtieġu investimenti kbar sabiex tintlaħaq il-mira ewlenija tal-UE ta' tnaqqis ta' 60 % ta' CO2 fis-settur tat-trasport taħt il-livelli tal-1990 sal-2050 u sabiex jiġu appoġġati modi ta' trasport sostenibbli, jitħeġġeġ it-trasport multimodali u tiġi promossa l-mobilità urbana sostenibbli, abbażi tal-prinċipji tas-sigurtà, is-sikurezza u l-aċċessibilità tat-trasport;

4.  Jenfasizza l-inugwaljanzi li jiddistingwu l-iżvilupp tal-infrastruttura tat-trasport fid-diversi Stati Membri, u l-importanza li tiġi żviluppata l-infrastruttura tat-trasport fl-Istati Membri ġodda, u jistieden lill-Kummissjoni u lill-Istati Membri biex jistinkaw sabiex joħolqu żona unika Ewropea tat-trasport li tiġi żviluppata b'mod uniformi;

5.  Jenfasizza li l-pakkett ġenerali disponibbli għall-investimenti fit-trasport fil-Qafas Finanzjarju Pluriennali (QFP) li jmiss se jkun kritiku għall-implimentazzjoni tat-TEN-T, kif ukoll għar-riċerka dwar it-trasport meħtieġa biex l-Unjoni tibqa' l-mexxejja industrijali fit-teknoloġija tat-trasport sostenibbli u innovattiv; għalhekk, jistieden lill-Istati Membri jappoġġaw il-proposta tal-Kummissjoni;

6.  Jenfasizza li t-trasport u l-mobilità huma ta' importanza vitali għas-suq intern Ewropew, u għalhekk jinsisti li l-Unjoni għandha żżid b’mod sinifikanti, u ċertament mhux tnaqqas, l-investimenti mmirati fl-infrastruttura tat-TEN-T u fir-riċerka dwar it-trasport, billi investimenti bħal dawn jistgħu jikkontribwixxu b'mod sinifikanti u dirett biex jingħelbu sitwazzjonijiet ekonomiċi diffiċli billi jagħtu spinta lill-kompetittività, it-tkabbir ekonomiku u l-impjiegi fl-UE;

7.  Jilqa’ l-proposta tal-Kummissjoni dwar il-Faċilità Nikkollegaw l-Ewropa (CEF) u ż-żieda proposta għall-allokazzjonijiet ġestiti ċentralment għat-TEN-T, u jqis li dawn l-ammonti huma ċifri realistiċi u l-minimu assolut; iqis li biex jinħoloq effett ta' lieva mistenni fil-qasam tat-trasport, l-allokazzjonijiet idealment għandhom jirrappreżentaw mill-inqas 10 % tal-ħtiġijiet stmati (EUR 500 biljun għat-TEN-T sal-2020), u li jekk il-Kunsill jaqbel li jnaqqas il-pakkett finanzjarju b'mod sinifikanti, għandu jitwettaq ukoll rieżami sinifikanti tal-lista tal-proġetti tat-trasport identifikati minn qabel imsemmija fl-Anness tas-CEF;

8.  Jinsisti li kwistjonijiet bħad-distribuzzjoni tal-pakkett finanzjarju tas-CEF fost is-setturi varji, il-volum użat għall-istrumenti finanzjarji, jew il-modalitajiet għat-trasferiment mill-Fond ta' Koeżjoni għall-infrastruttura tat-trasport fl-ambitu tas-CEF, mhumiex parti mill-QFP billi jappartjenu għall-proċedura leġiżlattiva ordinarja fir-rigward tas-CEF;

9.  Jinnota l-intenzjoni tal-Kummissjoni li żżid l-użu tal-istrumenti finanzjarji innovattivi, bħall-bonds għall-proġetti, fis-settur tat-trasport; iqis li dawn se jagħtu effett ta' lieva għall-baġit tal-UE, u b'hekk jattiraw investituri oħra għall-proġetti ta' interess komuni li huma kummerċjalment vijabbli imma li mhux jirċievu finanzjament suffiċjenti mis-suq; jissottolinja l-fatt li dan jista' jagħti spinta lill-finanzjament tal-infrastruttura tat-trasport b'valur miżjud Ewropew;

10. Jistieden lill-Kummissjoni tiżgura koordinazzjoni bejn is-CEF u sorsi oħra ta' finanzjament disponibbli għat-TEN-T, u b'mod partikolari l-Fond ta' Koeżjoni u l-programm Orizzont 2020;

11. Jenfasizza li l-10 biljun euro addizzjonali mill-Fond ta' Koeżjoni għandhom jiġu ġestiti b'mod ċentrali fl-ambitu tas-CEF sabiex jagħtu valur miżjud ċar tal-UE għall-proġetti ta' infrastruttura tat-trasport fit-TEN-T b'mod speċjali fil-pajjiżi ta' koeżjoni; jiġbed l-attenzjoni rigward rapport riċenti tal-Qorti Ewropea tal-Awdituri[24], skont liema l-finanzjament mill-Fondi Strutturali u ta' Koeżjoni mhux dejjem użat b'mod ugwalment effikaċi; huwa tal-fehma li attenzjoni speċjali għandha tingħata lid-diffikultajiet li jistgħu jiltaqgħu magħhom xi Stati Membri rigward l-inġinerija tal-proġetti, u lill-bilanċ ġeografiku fid-distribuzzjoni tal-proġetti; jenfasizza li d-deċiżjoni tal-Kummissjoni għandha tkun ibbażata fuq il-prinċipju tal-investiment tal-flus fit-territorju ta' pajjiż benefiċjarju fil-proġett miftiehem tat-TEN-T, kif speċifikat fl-Anness I tas-CEF, u li l-ġestjoni ċentrali tal-10 biljun euro addizzjonali mill-Fond ta' Koeżjoni fl-ebda ċirkostanza m'għandha twaqqaf jew tillimita l-parteċipazzjoni tal-pajjiżi ta' koeżjoni fl-implimentazzjoni u fil-finanzjament tal-proġetti tat-trasport permezz tas-CEF, lil hinn mill-10 biljun euro allokati mill-Fond ta' Koeżjoni;

12. Jinsisti li l-QFP 2014-2020 għandu jipprovdi flessibbiltà baġitarja mtejba kemm fi ħdan kif ukoll bejn l-intestaturi; għalhekk, jenfasizza l-importanza li s-CEF u l-politika tal-koeżjoni jinżammu taħt intestatura konġunta, u jopponi l-kunċett tas-subintestaturi;

13. Jindika l-ħtieġa għal inċentivi għal proġetti aktar effikaċi bħall-prinċipju "tużah jew titilfu", li jiżgura implimentazzjoni aħjar tal-proġetti;

14. Jisħaq li jrid jibqa' jkun hemm rabta realistika bejn l-għadd ta' proġetti identifikati minn qabel fl-anness tar-regolament propost dwar is-CEF u l-ammonti finanzjarji għas-CEF fil-QFP li jmiss;

15. Jisħaq li b'konformità mal-fatt li jridu jintlaħqu l-għanijiet tat-tkabbir sostenibbli tal-UE, għandu jkun garantit finanzjament adegwat għall-prijoritajiet orizzontali fi ħdan is-CEF, partikolarment għas-Sistema Ewropea tal-Ġestjoni tat-Traffiku Ferrovjarju (ERTMS) u għall-proġett ta' Riċerka dwar il-Ġestjoni tat-Traffiku bl-Ajru tal-Ajru Uniku Ewropew (SESAR), li għalihom l-investiment kontinwu huwa kruċjali għall-promozzjoni tal-interoperabilità, b'mod li n-netwerk tat-trasport tal-UE jsir iktar effiċjenti, kompetittiv u sikur;

16. Jenfasizza l-importanza tal-provvista ta' finanzjament għall-programmi kbar ta' żvilupp teknoloġiku – l-inizjattiva tal-Monitoraġġ Globali tal-Ambjent u s-Sigurtà (GMES), is-Sistema Ewropea ta' Navigazzjoni b'Kopertura Ġeostazzjonarja (EGNOS), is-Sistema Globali ta' Navigazzjoni bis-Satellita (GNSS), eċċ. – kollha kemm huma, u jenfasizza l-bżonn li l-inizjattiva GMES tkompli tiġi ffinanzjata mill-QFP, fid-dawl tal-kontribut tagħha għall-iżvilupp sostenibbli u s-sigurtà fis-settur tat-trasport;

17. Ifakkar fl-importanza strateġika ewlenija tal-proġett Galileo għall-UE, li minnu t-teknoloġija tal-GNSS u l-implimentazzjoni prattika tal-applikazzjonijiet tal-ITS huma benefiċjarji ewlenin; jinsisti li l-finanzjament xieraq ta' Galileo għandu jkun assigurat mingħajr ma jkun askapitu tal-baġit tat-TEN-T;

18. Jirrikonoxxi l-fatt li l-Fond ta' Koeżjoni u l-Fond Ewropew għall-Iżvilupp Reġjonali (FEŻR) huma sorsi ewlenin ta' finanzjament tal-UE għat-trasport; jisħaq, f'dan ir-rigward, fuq l-importanza li tiġi żgurata integrazzjoni aħjar tal-miri tal-Istrateġija UE 2020 fil-fondi strutturali tal-UE, sabiex ikunu orjentati lejn il-mobilità intelliġenti u sostenibbli;

19. Jindika s-suċċess tal-programm Marco Polo li, f’konformità mat-tranżizzjoni lejn ekonomija b’livell baxx ta’ emissjonijiet ta’ karbonju, għandu l-għan li jittrasferixxi l-merkanzija minn fuq it-toroq għal modi oħra ta’ trasport, u tal-programm NAIADES, il-Programm ta' Azzjoni Ewropew integrat għat-trasport fl-ilmijiet navigabbli interni, u jemmen li dawn il-proġetti għandu jkollhom finanzjament adegwat disponibbli fil-perjodu finanzjarju li jmiss;

20. Ifakkar li t-turiżmu huwa kompetenza ġdida tal-Unjoni li ġiet stabbilita mit-Trattat ta’ Lisbona, u jirrimarka li għalhekk it-turiżmu għandu jkun rifless ukoll fl-QFP li jmiss; jenfasizza l-kontribut importanti li t-turiżmu jagħti lill-ekonomija tal-Unjoni, u l-fatt li jikkostitwixxi l-attività ekonomika prinċipali f'xi reġjuni, u jemmen li l-istrateġija Ewropea għat-turiżmu għandha tkun appoġġata b'finanzjament adegwat għall-perjodu li jmiss;

21. Jilqa', f'dan ir-rigward, il-proposta tal-Kummissjoni li tistabbilixxi programm għall-Kompetittività tal-Intrapriżi u l-SMEs(COSME) (2014-2020); jenfasizza b'mod partikolari li għandu jingħata appoġġ qawwi għall-allokazzjonijiet speċifiċi ta' EUR 131 miljun għall-kompetittività tal-intrapriżi fis-settur tat-turiżmu;

22. Ifakkar li l-Politika Marittima Integrata għandha titqies fil-QFP li jmiss permezz ta' strument fit-tul u adegwat għall-appoġġ finanzjarju tal-PMI;

23. Jenfasizza kemm il-ħidma kruċjali tal-aġenziji tat-trasport fl-appoġġ għall-għanijiet tas-sikurezza u l-interoperabilità tal-UE kif ukoll il-bżonn li r-responsabbiltajiet tagħhom jiġu riflessi f'rizorsi baġitarji adegwati.

RIŻULTAT TAL-VOTAZZJONI FINALI FIL-KUMITAT

27.9.2012

OPINJONI tal-Kumitat għall-Iżvilupp Reġjonali

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020

( COM(2011)0398 – 2011/0177(APP) )

Rapporteur għal opinjoni: Andrey Kovatchev

SUĠĠERIMENTI

Il-Kumitat għall-Iżvilupp Reġjonali jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

–   wara li kkunsidra l-Artikolu 312(2) tat-Trattat dwar il-Funzjonament tal-Unjoni Ewropea (TFUE), li jistipula li l-Kunsill għandu b’mod unanimu jadotta regolament li jistipula l-Qafas Finanzjarju Pluriennali (QFP) wara li l-Parlament Ewropew ikun ta l-kunsens tiegħu b’maġġoranza assoluta,

–   wara li kkunsidra l-Artikolu 312(2) TFUE, li jiddikjara b’mod ċar li l-QFP għandu jiddetermina l-ammonti tal-limiti massimi għall-approprjazzjonijiet għall-impenji għal kull kategorija tal-infiq u l-limitu massimu annwali għall-approprjazzjonijiet għall-ħlasijiet, li jesiġi li l-Parlament u l-Kunsill iżommu r-rwoli tagħhom imsejsa fuq it-trattat fin-negozjati dwar il-QFP u jħallu li jintlaħaq ftehim dwar it-tfassil tal-Politika ta' Koeżjoni fl-ambitu tal-proċedura leġiżlattiva ordinarja, kif previst fl-Artikolu 177 TFUE,

A. billi fir-riżoluzzjoni tiegħu tat-13 ta’ Ġunju 2012 dwar il-Qafas Finanzjarju Pluriennali u r-riżorsi proprji, il-Parlament saħaq li l-baġit tal-UE, speċifikament fir-rigward tal-infiq tal-Politika ta’ Koeżjoni, jirrappreżenta għodda b'saħħitha biex jiżdied l-investiment strateġiku b’valur miżjud ppruvat u biex ipoġġi l-ekonomija Ewropea lura fit-triq tat-tkabbir u l-kompetittività permezz tal-ħolqien tal-impjiegi u l-ġid għaċ-ċittadini tal-UE, u b'hekk titjieb il-kwalità tal-ħajja tagħhom;

B.  billi l-QFP għall-2014-2020 għandu jitqies bħala l-istrument ewlieni tal-UE biex jitwettqu l-għanijiet tal-istrateġija UE 2020 fit-territorju kollu tal-UE u għall-kisba ta’ koeżjoni ekonomika, soċjali u territorjali; billi għandu jimmira wkoll li l-objettivi tal-UE miftehma bejn il-Kapijiet ta' Stat u ta' Gvern jissarrfu f'azzjonijiet reali u konkreti, u dan joħloq il-ħtieġa li n-negozjati attwali jinsew il-mentalità ffokata fuq il-kriżi u jaħdmu lejn baġit sod u razzjonali li jiggarantixxi t-tkabbir u l-impjiegi, u fl-aħħar mill-aħħar, livell għoljin ta' għajxien u ta’ sigurtà għaċ-ċittadini tal-UE;

C. billi bħala mekkaniżmu li jikkontribwixxi għall-parteċipazzjoni kif jixraq tar-reġjuni kollha tal-UE fi ħdan is-suq uniku, u bħala r-rispons prinċipali tal-UE għall-inugwaljanzi ekonomiċi, soċjali u territorjali persistenti fost ir-reġjuni tagħha, il-Politika ta’ Koeżjoni tal-UE għandha tibqa’ l-pilastru ewlieni tas-solidarjetà Ewropea;

D. billi, madankollu, jeħtieġ issir riforma tal-Politika ta’ Koeżjoni biex din issir aktar orjentata fuq ir-riżultati, iffukata tematikament u taġevola l-benefiċjarji, u għaldaqstant, aktar effiċjenti f'termini tal-investimenti magħmula;

E.  billi l-Politika ta’ Koeżjoni għandha tagħti aċċess ġust għar-riżorsi, u twieġeb għall-ħtiġijiet reali tar-reġjuni kollha tal-UE, li jirrikjedu wkoll flessibilità biex jiġu indirazzati l-ħtiġijiet speċifiċi tar-reġjuni fl-iffissar tal-għanijiet u tal-prijoritajiet tal-investiment, minkejja l-ħtieġa ta’ investiment fir-riċerka, l-iżvilupp u l-innovazzjoni, bħala għodda ewlenin li jikkontribwixxu għall-kisba tal-Istrateġija UE2020, li għandha tkun konnessa, b’mod xieraq, mal-Politika ta’ Koeżjoni permezz ta’ “taraġ lejn l-eċċellenza”;

F.  billi huwa evidenti li l-Politika ta' Koeżjoni ma tistax tkun siewja u effettiva għajr jekk tkun imsejsa fuq qafas finanzjarju stabbli, solidu u sostenibbli; billi f’dan rigward, ir-riżoluzzjoni tiegħu tat-8 ta’ Ġunju 2011 “Ninvestu fil-Ġejjieni: Qafas Finanzjarju Multiannwali (MFF) ġdid għal Ewropa kompetittiva, sostenibbli u inklużiva” ikkonfermat l-impenn tiegħu li jiddefendi Politika ta’ Koeżjoni tal-UE aktar b’saħħitha, filwaqt li nsista li jiġi allokat livell adegwat ta’ riżorsi, ta’ mill-inqas l-istess livell bħal dak miftiehem għall-perjodu ta’ programmazzjoni attwali 2007-2013;

G. billi l-Politika ta’ Koeżjoni tal-UE hi politika għall-iżvilupp u għodda strateġika għall-investiment, it-tkabbir u l-kompetittività, b’valur tal-UE ċert, li tikkontribwixxi għat-tkabbir u l-ħolqien tal-impjiegi fl-Unjoni kollha, u tgħin sabiex tingħeleb il-kriżi ekonomika u finanzjarja attwali billi tikkontribwixxi b’mod deċiżiv għal, fost affarijiet oħra, programm varji ta’ rkupru nazzjonali u billi tfittex li tippromwovi l-innovazzjoni filwaqt li telimina d-disparitajiet bejn ir-reġjuni Ewropej;

H. billi ma teżisti l-ebda relazzjoni diretta bejn il-prestazzjoni tal-politika reġjonali u l-prestazzjoni makroekonomika ta' Stat Membru, u billi r-reġjuni m'għandhomx jiġu kkastigati għal nuqqasijiet fil-livell nazzjonali ta' konformità ma' proċeduri relatati mal-governanza ekonomika; billi l-impożizzjoni ta’ penali addizzjonali tista’ għaldaqstant tkompli tkabbar il-problemi ta’ pajjiżi li diġà qed jiffaċċaw problemi makroekonomiċi, u għaldaqstant, kundizzjonalitajiet makroekonomiċi f’termini tal-finanzjament tal-Politika ta’ Koeżjoni mhumiex aċċettabbli;

I.   billi jiddispjaċih dwar il-proposta tal-Kummissjoni biex l-allokazzjoni addizzjonali speċifika għar-reġjuni ultraperiferiċi u l-anqas popolati titnaqqas b'47%, u jemmen li għandu jiġi allokat l-istess ammont ta' riżorsi finanzjarji li kien ġie allokat għall-perjodu ta' programmazzjoni preċedenti;

J.   billi kemm il-benefiċjarji kif ukoll il-kontributuri netti jibbenefikaw mill-Politika ta’ Koeżjoni tal-UE;

K. billi l-Politika ta’ Koeżjoni tipprovdi appoġġ għal miżuri għall-allinjament ekonomiku u soċjali tar-reġjuni kollha tal-UE, fondi tematiċi ġodda, jekk jiġu stabbiliti, m'għandhomx idgħajfu l-pakketti finanzjarji nazzjonali, għax dawn ikollhom impatt negattiv fuq l-outputs u r-riżultati tal-Politika ta' Koeżjoni fl-Istati Membri individwali;

i.   Jenfasizza li l-pożizzjoni tal-Parlament Ewropew hi li l-finanzjament tal-Politika ta' Koeżjoni għandu tal-anqas jinżamm fl-istess livell bħal dak tal-perjodu 2007-2013, speċifikament EUR 354 815 biljun fi prezzijiet tal-2011 (bl-esklużjoni tal-Faċilità Nikkollegaw l-Ewropa) li hu l-livell minimu assolut ta' finanzjament sod u, għaldaqstant, jikkostitwixxi linja li ma tistax tinqabeż fil-pożizzjoni tan-negozjati ġejjiena tiegħu.

ii.   Ifakkar li kull kwistjoni relatata mat-tfassil tal-Politika ta' Koeżjoni trid tiġi trattata fl-ambitu tal-proċeduri leġiżlattivi ordinarji għaddejjin attwalment fir-rigward tal-pakkett leġiżlattiv għall-2014-2020, u li r-Regolament dwar il-QFP għandu jittratta esklussivament l-ammonti u l-kategoriji ta' nfiq;

iii.  Ifakkar li l-Artikolu 312(5) TFUE jesiġi li l-Parlament, il-Kunsill u l-Kummissjoni jieħdu l-miżuri kollha meħtieġa biex jiffaċilitaw l-adozzjoni tal-qafas finanzjarju tul il-proċedura applikabbli, u li għal dak il-għan il-Kunsill għandu jiżgura li l-Parlament jiġi informat minn qabel dwar l-istrument legali li bi ħsiebu jressaq quddiemu għall-kunsens tiegħu.

RIŻULTAT TAL-VOTAZZJONI FINALI FIL-KUMITAT

18.9.2012

OPINJONI tal-Kumitat għall-Agrikoltura u l-Iżvilupp Rurali

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020

( COM(2011)0398 – 2011/0177(APP) )

Rapporteur għal opinjoni: Paolo De Castro

ĠUSTIFIKAZZJONI QASIRA

Id-diskussjonijiet li għaddejjin dwar il-QFP futur huma ta' importanza kruċjali għall-PAK u għad-deċiżjoni li jridu jittieħdu dwar il-proposti għal riforma leġiżlattiva.

Id-diskussjonijiet fil-Kunsill Ewropew u l-Kunsill għall-Affarijiet Ġenerali dwar 'Il-Pakkett ta' Negozjati' ma jurux f'dan il-punt pożizzjonijiet jew ċifri konkreti għall-QFP futur. Madankollu, il-Kumitat għall-Agrikoltura u l-Iżvilupp Rurali qed juża din l-opinjoni bħala opportunità biex tiġi enfasizzata l-pożizzjoni tiegħu lill-Kumitat għall-Baġits, speċjalment fir-rigward taċ-ċifri attwali għall-QFP futur.

Il-punt tat-tluq għal din l-opinjoni hi l-pożizzjoni espressa mill-Parlament fir-riżoluzzjonijiet tiegħu tat-8 ta' Ġunju 2011 (ir-Rapport SURE) u tat-23 ta' Ġunju 2011 (ir-Rapport Dess). Fiż-żewġ okkażjonijiet, il-Parlament talab b'mod ċar li l-baġit għall-PAK jinżamm għall-inqas fl-istess livell tal-perjodu pluriennali attwali.

L-analiżi tal-proposti tal-Kummissjoni

Meta l-Kummissjoni ppreżentat il-proposti għall-QFP 2014-2020 fid-29 ta' Ġunju 2011, fil-proposta għall-baġit tal-PAK spiss kien hemm referenza għall-iffriżar f'termini reali. Madankollu, hi utli analiżi aktar mill-qrib taċ-ċifri.

Sors: COM(2011)0398

Iċ-ċifri ppreżentati mill-Kummissjoni huma indikati fi prezzijiet kostanti tal-2011. Bl-istess mod, il-QFP attwali 2007-2013, meta kien adottat fl-2006, kien espress fi prezzijiet tal-2004.

Bl-użu ta' deflazzjoni ta' 2 % kull sena, dawn iċ-ċifri jistgħu jiġu mibdula fi 'prezzijiet attwali' (li hu l-mod li bih normalment ikunu ppreżentati; ara http://ec.europa.eu/budget/figures/fin_fwk0713/fwk0713_en.cfm).

Bl-użu tal-istess deflazjoni ta' 2 % kull sena, dawn iċ-ċifri aġġornati tal-QFP 2007-2013 jistgħu wkoll ikunu espressi fi prezzijiet kostanti tal-2011:

Sors: Kompendju ta' dokumenti tekniċi, Dipartment tal-Politika D, DĠ IPOL

Meta tqabbel l-ammont totali tal-Intestatura 2 f'kull tabella tasal għal tnaqqis ġenerali ta':

EUR 420 682 miljun - EUR 382 927 miljun = EUR 37 755 miljun (9 %).

NB: Il-ftehim oriġinali tal-2006 (EUR 371 344 miljun fi prezzijiet tal-2004), mingħajr ma jitqiesu r-reviżjonijiet differenti tiegħu (faċilità għall-ikel, Galileo, ITER, eċċ.) jirrapreżenta ammont ta' EUR 426 558 miljun fi prezzijiet tal-2011 għall-Intestatura 2; jekk din iċ-ċifra titqies bħala bażi, il-proposta tal-Kummissjoni għall-QFP 2014-2020 tikkorrispondi għal tnaqqis fil-baġit ta' madwar 10.3 %.

Konklużjonijiet issuġġeriti mir-rapporteur

Bi qbil mal-pożizzjoni espressa mill-Parlament fir-riżoluzzjonijiet preċedenti tiegħu, il-baġit għall-PAK għandu għall-inqas jinżamm fl-istess livell bħal dak tal-2007-2013. Għalhekk, it-tnaqqis propost mill-Kummissjoni għandu jiġi rifjutat u l-Parlament għandu jsejjaħ għal ammont li jikkorrispondi għal-limitu massimu għall-perjodu ta' pprogrammar attwali.

Fl-isfond tad-diffikultajiet tal-baġit tal-Istati Membri u fir-rigward tal-baġit tal-UE, jeħtieġ li l-Istati Membri jingħataw il-flessibilità biex iċaqilqu fondi bejn iż-żewġ pilastri tal-PAK (ħlasijiet diretti u żvilupp rurali) sabiex l-Istati Membri jkunu jistgħu jindirizzaw l-isfidi li qed jiffaċċaw iż-żoni rurali tagħhom bl-aħjar mod.

SUĠĠERIMENTI

Il-Kumitat għall-Agrikoltura u l-Iżvilupp Rurali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza l-importanza tal-Politika Agrikola Komuni li tiggarantixxi provvista tal-ikel għaċ-ċittadini tagħha bi qbil mat-Trattati; jinnota li d-domanda għall-ikel qed tikber ferm aktar mill-provvista, bl-effetti tat-tibdil fil-klima jinħassu b'mod partikolari b'mod intens fl-agrikoltura; jinsisti li l-Ewropa, bħala l-akbar importatur tal-prodotti agrikoli, jeħtieġ iżżomm u żżid il-potenzjal agrikolu tagħha u l-effiċjenza tas-settur agroalimentari tagħha sabiex tindirizza d-domanda attwali u futura tal-ikel fl-UE;

2.  Hu tal-fehma li għandu jintlaħaq ftehim dwar il-QFP għall-2014-2020 qabel l-aħħar tal-2012, għax inkella l-UE tista' tkun qed tħabbat wiċċha ma' telf ta' kredibilità u stabilità;

3.  Itenni li, skont it-TFUE, il-Parlament u l-Kunsill huma l-entitajiet leġiżlattivi u li m'hemmx lok għall-Kunsill Ewropew li jaġixxi ta' leġiżlatur; jinsisti li l-kontenut tal-politika tal-PAK futura jitfassal permezz tal-proċedura leġiżlattiva ordinarja;

4.  Ifakkar fil-pożizzjoni tiegħu kif imniżżla fir-riżoluzzjonijiet tiegħu tat-8 ta' Ġunju 2011 dwar 'Ninvestu fil-ġejjieni: Qafas Finanzjarju Pluriennali ġdid (QFP) għal Ewropa kompetittiva, sostenibbli u inklużiva[25] u tat-23 ta' Ġunju 2011 dwar 'il-PAK fid-dawl tas-sena 2020: Nindirizzaw l-isfidi tal-futur fl-ambitu tal-ikel, tar-riżorsi naturali u dak territorjali'[26] li l-baġit għall-PAK fil-perjodu tal-QFP li jmiss għandu jinżamm għall-inqas fl-istess livell, f'termini reali, tal-perjodu pluriennali attwali;

5.  Jinnota bi tħassib li l-proposta tal-Kummissjoni għall-QFP futur, li twaqqaf limitu massimu ta' EUR 382 927 miljun[27] għall-Intestatura 2 u sottolimitu massimu ta' EUR 281 825 miljun għal ħlasijiet diretti u infiq relatat mas-suq, jista' jwassal għal tnaqqis ta' EUR 37 755 miljun f'termini reali għal din l-intestatura;

6.  Iqis li dan it-tnaqqis ma jistax jiġi bilanċjat minn infiq previst taħt intestaturi oħra (għajnuna għall-ikel għal persuni l-aktar imċaħħda, ir-riċerka agrikola, riserva għas-sigurtà tal-ikel, eċċ.) jew bi strumenti ta' flessibilità għal infiq mhux previst (riserva għal kriżi agrikola, eċċ.). għaliex dawn huma riservi baġitarji li ma għandhomx approprjazzjonijiet ta' impenn;

7.  Jikkunsidra li l-Fond Ewropew ta' Aġġustament għall-Globalizzazzjoni (FEG) m'għandux ikun meqjus fir-rigward tal-baġit tal-PAK, peress li l-inklużjoni tiegħu fih toħloq konfużjoni: l-ewwel nett mhuwiex ċar jekk u kif il-bdiewa fi Stati Membri differenti se jkunu jistgħu jaċċessaw il-fondi u t-tieni l-inklużjoni tal-FEG tippresupponi li bosta eluf ta' bdiewa se jkomplu jfallu b'riżultat ta' ftehimiet ta' kummerċ internazzjonali; jikkunsidra wkoll li minħabba r-rwol tagħha fis-sigurtà tal-ikel u b'mod partikolari d-dritt tal-bniedem għall-ikel, l-agrikoltura m'għandhiex tintuża bħala pedina fin-negozjati kummerċjali internazzjonali;

8.  Jenfasizza r-rwol importanti li għandu t-tieni pilastru tal-PAK, li jagħti kontribut sinifikanti lill-investiment u l-ħolqien ta' impjiegi f'żoni rurali u li jsaħħaħ l-effikaċja u l-kompetittività tal-industrija agrikola; jemmen li dan ikun konsistenti mal-kisbiet tar-riformi preċedenti tal-PAK għat-tisħiħ tat-tieni pilastru, li jagħmel il-PAK aktar effiċjenti u effikaċi b'mod sinifikanti, partikolarment fid-dawl tal-isfidi l-ġodda msemmija, inter alia, fl-istrateġija Ewropa 2020;

9   Jistieden, għalhekk, lill-Kunsill biex iżid l-Intestatura 2 u s-sottointestatura għal ħlasijiet diretti u l-infiq relatat mas-suq għal EUR 420 682 miljun u EUR 336 685 miljun rispettivament, li jikkorrispondu għal friża f'termini reali, kif mitlub fir-riżoluzzjonijiet preċedenti tiegħu;

10. Jenfasizza li l-politika agrikola hi l-unika politika tal-Unjoni li kienet soġġetta għal tnaqqis sinifikanti bħal dan fil-proposta tal-Kummissjoni għall-QFP futur; jinsisti għalhekk li, jekk ikun previst tnaqqis ġenerali tal-baġit tal-UE, dan taħt l-ebda ċirkostanza m'għandu jwassal għal tnaqqis ulterjuri tal-baġit tal-PAK;

11. Jenfasizza li t-tranżizzjoni għal mudell reġjonali u l-ekoloġizzazzjoni ulterjuri tal-PAK fil-perjodu pluriennali li jmiss se jkollhom impatt qawwi fuq il-bdiewa u tnaqqis ulterjuri fil-baġit ġenerali tal-PAK konsegwentement se jqiegħed saħansitra aktar pressjoni fuq il-pożizzjoni tal-bdiewa individwali;

12. Jenfasizza l-importanza li l-Istati Membri jingħataw ammont ta' flessibilità li jċaqilqu fondi bejn iż-żewġ pilastri tal-PAK (sakemm huma jqisu r-rekwiżiti ta' kofinanzjament eżistenti meta l-fondi jiċċaqilqu mill-ewwel għat-tieni Pilastru), sabiex jindirizzaw l-isfidi taż-żoni rurali b'mod li jkun adatt għaċ-ċirkustanzi speċifiċi tagħhom u l-istrateġiji tagħhom, mingħajr ħsara għall-proċeduri leġiżlattivi li għaddejjin dwar ir-riforma tal-PAK, speċjalment id-dispożizzjonijiet dwar trasferiment bejn il-fondi fir-Regolament futur dwar pagamenti diretti;

13. Jemmen li l-programm ta' assistenza għall-aktar persuni mċaħħda fl-Unjoni għandu jkompli wara l-2013.

RIŻULTAT TAL-VOTAZZJONI FINALI FIL-KUMITAT

20.9.2012

OPINJONI tal-Kumitat għas-Sajd

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020

( COM(2011)0398 – C7-0000/2012 – 2011/0177(APP) )

Rapporteur għal opinjoni: João Ferreira

SUĠĠERIMENTI

Il-Kumitat għas-Sajd jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni tiegħu:

Evalwazzjoni ġenerali

A. Jenfasizza li l-qafas finanzjarji multiannwali (QFM) propost għall-perjodu 2014-2020 huwa żgħir, fil-fatt l-ammont huwa inqas minn dak tal-QFM attwali 2007-2013; jemmen li l-kriżi m’għandhiex isservi ta’ skuża għal tnaqqis fil-baġit tal-Unjoni, anzi, hu saħansitra aktar neċessarju li jkollna għad-dispożizzjoni tagħna baġit solidu u sostanzjalment imsaħħaħ, li jippermetti li jintlaħqu l-objettivi politiċi tal-Unjoni Ewropea, jiġifieri l-appoġġ lit-tkabbir u lill-impjiegi u l-implimentazzjoni tal-prinċipju tal-koeżjoni ekonomika u soċjali fil-qafas tal-istrateġija UE 2020; jitlob, għaldaqstant, li l-Kunsill jimmodifika f’dan is-sens il-proposta tal-QFM 2014-2020 ippreżentat mill-Kummissjoni;

Kwestjonijiet ġenerali marbuta mas-settur tas-sajd

B.  Ifakkar li r-riżorsi tas-sajd huma beni pubbliċi vitali għas-sigurtà tal-ikel fil-livell globali; jindika li s-settur tas-sajd u l-akkwakultura u l-attivitajiet relatati ta’ spiss huma s-sors ewlieni ta’ għajxien u ta’ impjiegi sostenibbli fir-reġjuni kostali, reġjuni gżejjer u reġjuni periferiċi; jenfasizza li l-politika komuni tas-sajd (PKS) riformata għandha ssegwi objettivi soċjali, ekonomiċi u ambjentali, li jgħaddu minn konservazzjoni u ġestjoni xierqa tar-riżorsi tas-sajd kif ukoll mill-ġlieda kontra t-tnaqqis ekonomiku u soċjali li qed jolqot għadd kbir ta' komunitajiet tal-kosta, filwaqt li tistimula l-impjiegi, ittejjeb il-kundizzjonijiet tal-għajxien tal-popolazzjonijiet lokali u tagħti attenzjoni partikolari lis-settur tas-sajd ta' skala żgħira, ħwejjeġ li jesiġu riżorsi finanzjarji suffiċjenti wara l-2013; jirrikonoxxi li hemm bżonn aktar koordinament mal-politika ta’ koeżjoni;

C. Jinnota li l-QFM 2014-2020 propost fil-komunikazzjoni tal-Kummissjoni 'Baġit għall-Ewropa 2020' jipprevedi allokazzjoni indikattiva totali ta’ EUR 6.685 biljun għas-sajd u kwistjonijiet marittimi fi prezzijiet kostanti 2011 (FEMS, miżuri tas-suq inklużi l-FPAs u l-RFMOs), jiġifieri medja annwali ta’ EUR 955. Għall-2013, li hija l-aħħar sena tal-QFM attwali, din l-allokazzjoni hija ta’ EUR 984 miljun: jenfasizza, bi tħassib, li l-ammonti previsti għal kull sena koperta fil-QFM 2014-2020 huma iċken mill-ammont previst għall-2013 fil-QFM attwali; ifakkar li l-Parlament, fir-riżoluzzjoni tiegħu tat-8 ta' Ġunju 2011[28] bit-titolu "Ninvestu fil-ġejjieni: Qafas Finanzjarju Multiannwali Ġdid (QFM) għal Ewropa kompetittiva, sostenibbli u inklużiva", wera x-xewqa li l-livell ta' riżorsi allokati għall-MFF li jmiss jiżdied b’ta' mill-inqas 5 % meta mqabbel mal-livell tal-2013;

D. Jindika li ċerti objettivi proposti mill-Kummissjoni jesiġu riżorsi finanzjarji msaħħa, li mingħajrhom it-twettiq tagħhom jista’ jkun kompromess; ifakkar li l-objettivi tal-Kummissjoni jinkludu partikolarment l-għeluq tad-distakk fl-innovazzjoni bejn is-sajd u setturi oħra tal-ekonomija, il-promozzjoni tat-tranżizzjoni lejn settur tas-sajd b’impatt limitat billi jitwaqqaf ir-rimi fil-baħar u billi jitnaqqas l-impatt fuq l-ekosistemi tal-baħar, l-iżgurar tal-vijabbiltà tal-komunitajiet li jiddependu fuq is-sajd kostali kif ukoll il-promozzjoni tad-diversifikazzjoni;

E.  Jenfasizza l-fatt li, bħal fil-każ tas-settur tal-agrikoltura, is-settur tas-sajd jinvolvi livell ta’ vulnerabilità akbar fil-konfront tal-kriżijiet; jirrakkomanda, għalhekk, bħal fil-każ tas-settur agrikolu, il-ħolqien ta’ mekkaniżmi ta’ appoġġ speċifiċi li jistgħu jintużaw f'każijiet urġenti bħal diżastri naturali, waqfien obbligatorju ta’ ċerti attivitajiet minħabba pjanijiet ta’ rikostituzzjoni tal-istokkijiet jew restrizzjonijiet f’salt fl-aċċess għall-fatturi ta’ produzzjoni essenzjali, fosthom;

F.  Itenni li minħabba l-fatt li s-sajd għandu elementi ta’ irregolarità, minħabba diversi fatturi fosthom limitazzjonijiet naturali inkontestabbli, jeħtieġ jitkompla l-finanzjament pubbliku, nazzjonali u Komunitarju adegwat għal dan is-settur;

Kwistjonijiet relatati mal-Fondi Strutturali, b’mod partikolari l-Fond Ewropew Marittimu u tas-Sajd (FEMS)

G. Jemmen li l-qafas strateġiku komuni li għandu japplika għall-fondi ta' ġestjoni komuni, b'mod partikolari l-FEMS ġejjieni, għandu jqis id-diversità tal-objettivi ta' dawn l-istrumenti ta' finanzjament; ifakkar li l-FEMS huwa fond ta’ appoġġ settorjali li l-attribuzzjoni tiegħu m’għandhiex tiddependi biss mill-istatus ekonomiku taż-żona ġeografika li fiha jkun jopera d-destinatarju tagħha;

H. jirrifjuta l-possibilità li jinħolqu u/jew jissaħħu r-regoli ta’ kundizzjonalità makroekonomika għall-użu tal-fondi Ewropej; jemmen li l-pajjiżi li jiffaċċaw l-akbar problemi finanzjarji u li l-ekonomija tagħhom hi l-aktar fraġli m’għandhomx ikunu penalizzati d-doppju billi jiġi ristrett l-aċċess tagħhom għall-fondi essenzjali biex jirkupraw u jiżviluppaw, għax dan jolqot negattivament il-prinċipju tal-koeżjoni;

I.   Jenfasizza l-importanza tal-FEMS tul il-perjodu 2014-2020, minħabba li dawn il-fondi se jkunu l-istrument ewlieni ta’ finanzjament tal-PKS tal-ġejjieni; jindika li l-objettivi, il-politiki u l-prijoritajiet il-ġodda li se jkollhom impatt fuq l-ambjent marittimu għandhom jingħataw mezzi finanzjarji adegwati; jiċħad l-idea li l-finanzjament tal-objettivi, il-politiki u l-prijoritajiet il-ġodda, bħall-politika marittima integrata, isir għad-detriment tal-finanzjament meħtieġ għall-politika tas-sajd;

J.   Jitlob li jiġi simplikat l-aċċess għall-fondi ta’ ġestjoni maqsuma, b'mod partikolari l-FEMS, biex ikun faċilitat il-kompitu tal-benefiċjarji u l-awtoritajiet nazzjonali kompetenti, u ffavorizzat l-użu integrali tal-fondi disponibbli; hu tal-fehma li jaqbel li jingħataw prijorità l-proġetti li joffru soluzzjonijiet integrati, li jaġevolaw lill-komunitajiet kostali kollha, b’aktar mod wiesa’ possibbli, aktar milli dawk li jaġevolaw biss lil għadd żgħir ta’ operaturi;

K. Jesprimi t-tħassib tiegħu dwar it-tneħħija eventwali ta’ strumenti pubbliċi ta’ regolamentazzjoni fis-suq tas-swieq tal-prodotti tas-sajd u tal-akkwakultura; jitlob li jissaħħaħ il-kontribut tal-organizzazzjoni komuni tas-swieq (OKS) għall-prodotti tas-sajd u tal-akkwakultura biex jiġu żgurati rendiment aħjar fis-settur, l-istabilità tas-swieq, titjib tal-kummerċjalizzazzjoni tal-prodotti tas-sajd u żieda fil-valur miżjud tiegħu, jiġifieri l-OKS se jkollha bżonn tingħata l-mezzi finanzjarji meħtieġa għal dan il-għan;

L.  Jirrakkomanda li jiġu kkoordinati l-istrumenti eżistenti, b'mod partikulari mil-lat finanzjarju, biex joffri risposta għall-problemi speċifiċi ta' dan is-settur u tal-komunitajiet kostali l-aktar dipendenti minnu; Jenfasizza li r-riċerka xjentifika fil-qasam tas-sajd hi għodda essenzjali għall-ġestjoni tajba tas-settur, li hi indispensabbli biex ikunu magħrufa l-fatturi li jikkundizzjonaw l-evoluzzjoni tar-riżorsi tas-sajd, issir evalwazzjoni kwantitattiva tagħhom u jiġu żviluppati mudelli li jagħtu lok li tkun prevista l-evoluzzjoni tagħhom, u biex jitjiebu l-irkaptu u l-bastimenti tas-sajd kif ukoll il-kundizzjonijiet tax-xogħol u s-sigurtà tas-sajjieda; jitlob li jissaħħaħ il-finanzjament tar-riċerka relatata mas-sajd fil-qasam ambjentali, soċjali u ekonomiku;

N. Iqis li hu indispensabbli li jitjiebu l-ġbir, it-trattament u d-disponibilita tad-data bijoloġika b’mod li jkunu garantiti politika u ġestjoni imsejsa verament fuq l-għarfien; jemmen li jeħtieġ li jikber l-intervent tal-Unjoni f’dan il-qasam, billi r-rata ta’ kofinanzjament massimu awtorizzat attwali ta’ 50% tiżdied għal mill-inqas 75%;

O. Iqis li l-waqfiet fl-attivitajiet tas-sajd huma mezz importanti u effikaċi ta’ konservazzjoni tar-riżorsi tas-sajd, u strument essenzjali għal ġestjoni sostenibbli ta’ ċerti żoni tas-sajd; jagħraf li l-perjodi ta’ mistrieħ bijoloġiku, f’ċerti fażijiet kritiċi tal-ħajja tal-ispeċijiet, jagħti lok għal evoluzzjoni tar-riżorsi kompatibbli mat-tkomplija tal-attività tas-sajd barra mill-perjodu ta’ mistrieħ; jitlob, f’dan ir-rigward, li tiġi prevista l-possibilità ta’ kumpens finanzjarju għas-sajjieda waqt il-perjodi ta’ nuqqas ta’attività;

P.  Jenfasizza li l-istat attwali tal-iżvilupp tal-akkwakultura fl-Ewropa jimponi żieda fl-attivitajiet ta’ riċerka u żvilupp f’dan il-qasam, li jippermetti l-isfruttament sħiħ tal-potenzjal tas-settur u, fl-istess ħin, jikkumbatti kontra xi wħud mil-limitazzjonijiet tiegħu, filwaqt li jikkontribwixxi għas-sostenibilità tiegħu;

Reġjuni l-aktar imbiegħda

Q. Jinsisti fuq l-importanza tas-settur tas-sajd għas-sitwazzjoni soċjoekonomika, l-impjiegi u l-promozzjoni tal-koeżjoni ekonomika u soċjali tar-reġjuni l-aktar imbiegħda, ikkaratterizzati minn ekonomija li għandha limitazzjonijiet strutturali permanenti u bi ftit lok għal diversifikazzjoni; jitlob li jitkomplew u jissaħħu l-għajnuniet Komunitarji fis-settur tas-sajd f’dawn ir-reġjuni, b’mod partikolari permezz tal-programm ta’ kumpens għall-ispejjeż żejda kkawżati mill-pożizzjoni mbiegħda tagħhom, għall-kummerċjalizzazzjoni ta’ prodotti speċifiċi tas-sajd ta' wħud mir-reġjuni ultraperiferiċi ("Sajd POSEI"); jemmen li dan il-programm m’għandux ikollu limitazzjonijiet taż-żmien, għax il-pożizzjoni mbiegħda hija fattur permanenti; jiddeplora t-tnaqqis qawwi fil-finanzjament globali previst għal dawn ir-reġjuni fil-proposta tal-QFM 2014-2020, meta fl-istess ħin il-għadd ta’ reġjuni ultraperiferiċi rikonoxxuti mill-Unjoni Ewropea mistenni jikber fis-snin li ġejjin, u jesiġi li dawn il-fondi jiżdiedu;

Abbozz ta’ ftehim interistituzzjonali bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda

R.  Jitlob li l-ftehim interistituzzjonali jkun jipprevedi l-parteċipazzjoni sħiħa tal-PE fiċ-ċiklu tan-negozjati ta' ftehimiet internazzjonali fil-qasam tas-sajd; jitlob li r-rappreżentanti tal-PE jkunu jistgħu jipparteċipaw, bħala osservaturi u fuq livell indaqs mar-rappreżentanti tal-Istati Membri, għall-fażijiet kollha tan-negozjati, filwaqt li jitqiesu l-kompetenzi tal-Parlament fir-rigward tal-ftehimiet tas-sajd;

Kwestjonijiet relatati mad-dimensjoni esterna tal-politika komuni tas-sajd

S.  Jesprimi t-tħassib tiegħu dwar in-nuqqas ta’ effikaċja tal-ftehimiet ta’ sħubija fil-qasam tas-sajd u f'dak li jirrigwarda l-appoġġ settorjali għal pajjiżi terzi; jenfasizza li, skont id-deċiżjonijiet tal-Kummissjoni, il-fondi allokati għall-appoġġ settorjali huma ftit wisq f’valuri assoluti biex jipproduċu riżultati; iqis, għaldaqstant, li hemm lok li jittieħdu miżuri biex tinbidel din is-sitwazzjoni, billi titjieb ukoll l-effikaċja tal-appoġġ settorjali u billi jkun promoss assorbiment aqwa ta’ dawn il-fondi fil-pajjiżi terzi.

RIŻULTAT TAL-VOTAZZJONI FINALI FIL-KUMITAT

24.9.2012

OPINJONI tal-Kumitat għall-Kultura u l-Edukazzjoni

għall-Kumitat għall-Baġits

dwar ir-rapport interim bl-għan li jinkiseb eżitu pożittiv tal-proċedura ta' approvazzjoni tal-Qafas Finanzjarju Multiannwali 2014-2020 ( 2011/0177(APP) )

( COM(2011)0398 – C7 – 2011/0177(APP) )

Rapporteur għal opinjoni: Morten Løkkegaard

SUĠĠERIMENTI

Il-Kumitat għall-Kultura u l-Edukazzjoni jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

–           wara li kkunsidra l-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020 ( COM(2011)0398 ), COM(2012)0388 ),

–           wara li kkunsidra l-proposta għal Ftehim Interistituzzjonali bejn il-Parlament Ewropew, il-Kunsill u l-Kummissjoni dwar kooperazzjoni f'materji marbuta mal-baġit fir-rigward ta' ġestjoni finanzjarja soda ( COM(2011)0403 ),

–           wara li kkunsidra l-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni bit-titolu 'Baġit għall-Ewropa 2020' ( COM(2011)0500 ),

–           wara li kkunsidra r-riżoluzzjoni tiegħu tat-8 ta' Ġunju 2011 bit-titolu 'Ninvestu fil-ġejjieni: Qafas Finanzjarju Mutliannwali (MFF) ġdid għal Ewropa kompetittiva, sostenibbli u inklużiva' ( 2010/2211(INI) )[29],

–           wara li kkunsidra l-proposta għal regolament tal-Parlament Ewropew u tal-Kunsill li jistabbilixxi 'Erasmus Għal Kulħadd' – il-Programm tal-Unjoni għall-Edukazzjoni, it-Taħriġ, iż-Żgħażagħ u l-Isport ( COM(2011)0788 ),

–           wara li kkunsidra l-proposta għal regolament tal-Parlament Ewropew u tal-Kunsill li jistabbilixxi l-Programm Ewropa Kreattiva ( COM(2011)0785 ),

–           wara li kkunsidra l-proposta għal regolament tal-Kunsill li jistabbilixxi l-programm 'L-Ewropa għaċ-Ċittadini' għall-perjodu bejn l-2014 u l-2020 ( COM(2011)0884 ),

–           wara li kkunsidra l-opinjoni tal-Kumitat għall-Affarijiet Legali tat-28 ta' Marzu 2012 dwar il-bażi legali tal-proposta għal regolament tal-Kunsill li jistabbilixxi l-programm 'L-Ewropa għaċ-Ċittadini' għall-perjodu bejn l-2014 u l-2020,

–           wara li kkunsidra d-dikjarazzjoni konġunta tal-Parlament Ewropew, tal-Kunsill u tal-Kummissjoni tat-22 ta' Ottubru 2008 bit-titolu 'Nikkomunikaw l-Ewropa fi Sħubija'[30],

–           wara li kkunsidra d-dokument ta' strateġija bit-titolu 'Nikkomunikaw dwar l-Ewropa, għall-Ewropa u mill-Ewropa'[31],

–           wara li kkunsidra r-riżoluzzjoni tiegħu tal-10 ta' April 2008 dwar aġenda Ewropea tal-kultura fl-era tal-globalizzazzjoni ( 2007/2211(INI) )[32],

A.          billi l-edukazzjoni, it-taħriġ u l-kwistjonijiet li jirrigwardaw iż-żgħażagħ huma komponenti kruċjali tal-istrateġija Ewropa 2020 u tal-għan ewlieni tagħha li l-għadd ta' persuni li jieqfu mill-iskola qabel iż-żmien jitnaqqas għal anqas minn 10 % u li l-għadd ta' żgħażagħ b'lawrja jew b'diploma jiżdied għal tal-anqas 40 %;

B.          billi l-mobilità għat-tagħlim fl-oqsma tal-edukazzjoni, it-taħriġ u ż-żgħażagħ tikkontribwixxi għall-iżvilupp personali u għall-ksib ta' ħiliet li huma meħtieġa fis-suq tax-xogħol tal-UE; billi tikkontribwixxi wkoll għall-ħolqien u s-salvagwardja tal-impjiegi u biex jitnaqqas il-faqar, u għandha impatt dirett f'termini kemm tal-irkupru ekonomiku tal-Ewropa fuq perjodu qasir ta' żmien kif ukoll tat-tkabbir u l-produttività fit-tul tagħha;

C.          billi l-iskambji ffaċilitati bil-mobilità tat-tagħlim fl-oqsma tal-edukazzjoni, it-taħriġ u ż-żgħażagħ jgħinu biex tiġi żviluppata l-parteċipazzjoni attiva taċ-ċittadini fil-koeżjoni u l-integrazzjoni Ewropej;

D.          billi fl-2009 l-Ministri Ewropej responsabbli għall-edukazzjoni għolja stabbilew il-mira li fl-2020 tal-inqas 20 % ta' dawk li jiggradwaw fiż-Żona Ewropea ta' Edukazzjoni Għolja għandhom ikunu għamlu perjodu ta' studju jew taħriġ barra mill-pajjiż;

E.          billi l-industriji kulturali u kreattivi Ewropej jikkontribwixxu ħafna għat-tixrid tad-diversità kulturali u lingwistika, għall-ħolqien u s-salvagwardja tal-impjiegi u, b'mod aktar ġenerali, għall-benessri ekonomiku u soċjali tal-Ewropa, li għalhekk għandhom effett sekondarju pożittiv fuq setturi oħra tal-ekonomija, bħat-turiżmu u t-teknoloġiji diġitali;

F.          billi n-negozji fis-settur kulturali u kreattiv għandhom rwol vitali fl-innovazzjoni fir-rigward tal-iżvilupp xjentifiku, teknoloġiku u territorjali u b'hekk jgħinu lill-Ewropa tilħaq l-objettivi ta' tkabbir tagħha;

G.          billi s-settur awdjoviżiv għandu rwol essenzjali ekonomiku, soċjali u politiku, pereżempju fil-ħolqien ta' impjiegi li jirrikjedu livell għoli ta' ħiliet orjentati lejn il-futur, kif ukoll biex jipproteġi u jkompli jippromwovi l-pluraliżmu u l-libertà tal-midja;

H.          billi skont il-Konvenzjoni tal-UNESCO dwar il-Protezzjoni u l-Promozzjoni tad-Diversità tal-Espressjonijiet Kulturali adottata fl-20 ta' Ottubru 2005, l-attivitajiet, l-oġġetti u s-servizzi kulturali għandhom natura kemm ekonomika kif ukoll kulturali, billi jesprimu identitajiet, valuri u tifsiriet, u għalhekk m'għandhomx jiġu ttrattati bħallikieku għandhom biss valur kummerċjali;

I.           billi l-kultura Ewropea hija ta' diversità u kwalità kbira u għandha tkun integrata aktar fl-isforzi diplomatiċi tal-Ewropa;

J.           billi l-edukazzjoni u l-kultura aċċessibbli u ta' kwalità jirrappreżentaw strument ewlieni biex tissaħħaħ iċ-ċittadinanza Ewropea u jiġi indirizzat l-estremiżmu politiku fl-Ewropa kollha;

K.         billi t-tisħiħ tal-parteċipazzjoni taċ-ċittadini huwa ta' importanza ewlenija għall-Unjoni Ewropea, u għalhekk jeħtieġ li jkollna programm ta' ċittadinanza separat;

L.          billi strateġija ta' komunikazzjoni tal-UE hija essenzjali sabiex jinħolqu rabtiet aħjar bejn l-Unjoni u ċ-ċittadini tagħha; billi l-midja soċjali u l-internet qed jintużaw dejjem iktar miċ-ċittadini Ewropej u jippreżentaw opportunità biex ikun hemm komunikazzjoni interattiva u kollaborattiva mal-politikanti u ma' dawk li jfasslu l-politika;

M.         billi l-isport fil-livell lokali huwa ta' importanza kruċjali fil-promozzjoni tal-attività fiżika tajba għas-saħħa u tal-inklużjoni soċjali;

Rakkomandazzjonijiet

Programmi attwali

(i)          Ifakkar li l-programmi attwali tal-UE dwar l-edukazzjoni, iż-żgħażagħ, il-midja u l-kultura huma viċin iċ-ċittadini, għandhom rati għoljin ta' implimentazzjoni, jipproduċu effetti mifruxa u ta' lieva konsiderevoli, inklużi riżultati ekonomiċi sinifikanti, u jiġġeneraw valur miżjud Ewropew ċar u evidenti billi jinkoraġġixxu l-mobilità, jiġbru r-riżorsi kollha u jsaħħu l-kooperazzjoni fost setturi u partijiet interessati differenti;

(ii)         Jirrimarka li dawn il-programmi għandhom ukoll rwol importanti fit-tmexxija tal-politiki nazzjonali fid-direzzjonijiet miftehma fil-livell Komunitarju u intergovernattiv;

(iii)         Jinnota li l-Programm ta' Tagħlim tul il-Ħajja attwali jikkontribwixxi ferm għall-iżvilupp individwali taċ-ċittadini Ewropej billi jorganizza skemi ta' mobilità fil-livell tal-UE u b'hekk jimmassimizza s-sinerġiji; ifakkar li l-programm għandu wkoll rwol importanti fil-koordinazzjoni u l-modernizzazzjoni tal-politiki nazzjonali ta' edukazzjoni u taħriġ u l-istituzzjonijiet rilevanti fl-Istati Membri;

(iv)        Ifakkar li għadd dejjem jikber ta' inizjattivi ta' suċċess ta' tagħlim mill-bogħod jeżistu fid-dinja kollha; jitlob l-inklużjoni ta' investiment f'inizjattivi onlajn ta' tagħlim mill-bogħod u fl-edukazzjoni tal-ħiliet elettroniċi;

(v)         Jenfasizza li l-programm Żgħażagħ fl-Azzjoni jirrinforza l-Istrateġija mġedda Żgħażagħ tal-UE (2010–2018) u jikkontribwixxi għal żieda fil-parteċipazzjoni taż-żgħażagħ fil-livelli kollha, bil-promozzjoni tal-inklużjoni soċjali permezz tat-tagħlim nonformali u informali u permezz ta' azzjonijiet għas-settur tal-volontarjat, u bis-sostenn tal-iżvilupp ta' politiki taż-żgħażagħ fl-livell nazzjonali u tal-UE;

(vi)        Ifakkar li kemm il-programm MEDIA kif ukoll il-programm MEDIA Mundus jikkontribwixxu għas-sostenn u t-tisħiħ tas-settur Ewropew tal-produzzjoni tal-films u awdjoviżiv u tal-kooperazzjoni f'dak il-qasam bejn l-UE u l-pajjiżi terzi, kif ukoll għat-titjib tal-kompetittività tas-settur awdjoviżiv Ewropew; jenfasizza li dawn il-programmi joħolqu valur miżjud Ewropew sinifikanti billi jappoġġaw id-distribuzzjoni tax-xogħlijiet awdjoviżivi Ewropej u jżidu ċ-ċirkolazzjoni tagħhom u l-għadd ta' nies li jarawhom kemm fl-UE kif ukoll barra l-UE;

(vii)        Jenfasizza li l-għan tal-programm MEDIA huwa li jħares u jsaħħaħ id-diversità kulturali u lingwistika tal-Ewropa u l-wirt ċinematografiku u awdjoviżiv tagħha, billi jiggarantixxi l-aċċessibbiltà tal-pubbliku għal dan tal-aħħar;

(viii)       Ifakkar li l-programm Kultura 2007 għandu effetti mifruxa ekonomiċi sinifikanti u għandu rwol uniku fl-appoġġ tal-kooperazzjoni fl-isfera kulturali u fit-tħeġġiġ tad-diversità kulturali u lingwistika tal-Ewropa;

(ix)         Jenfasizza li l-kooperazzjoni fl-isfera kulturali u edukattiva fi ħdan l-sforzi diplomatiċi tal-UE se jkollha wkoll effetti sinifikanti ekomomiċi u effetti kollaterali pożittivi oħra;

(x)         Ifakkar li l-programm attwali L-Ewropa għaċ-Ċittadini jinvolvi aktar minn miljun ċittadin fis-sena fil-proġetti tiegħu u jikkontribwixxi ferm għall-iżvilupp taċ-ċittadinanza attiva u l-ħidma volontarja, kif ukoll għas-sensibilizzazzjoni dwar il-valuri Ewropej bħas-solidarjetà, in-nondiskriminazzjoni u d-diversità kulturali; jinnota li l-programm il-ġdid propost joħloq valur miżjud billi jġib l-Unjoni aktar fil-qrib taċ-ċittadini tagħha u joħloq dibattitu transkonfinali;

Proposta tal-Kummissjoni dwar 'Erasmus Għal Kulħadd'

(xi)        Jinnota li l-proposta tal-Kummissjoni tgħaqqad l-programmi eżistenti Tagħlim Tul il-Ħajja u Żgħażagħ fl-Azzjoni, u tinkludi wkoll kapitolu separat għall-isport, b'konformità mar-responsabbiltajiet ġodda tal-UE f'dan il-qasam; jikkunsidra l-pakkett finanzjarju propost ta' EUR 17 299 000 000 bħala l-minimu assolut, meta jitqiesu l-ambizzjonijiet u l-ambitu tal-programm il-ġdid; jenfasizza wkoll li l-ammont limitat ħafna previst għas-setturi kollha involuti, b'mod partikolari l-isport, ma jistax jitnaqqas bla ma jipperikola l-effiċjenza tal-politiki;

(xii)        Jinnota li l-proposta tal-Kummissjoni ma tkoprix il-benefiċjarji u l-azzjonijiet fil-mira kollha inklużi fil-programmi attwali: pereżempju, mhux se jibqa' jkun hemm allokazzjoni baġitarja separata għall-mobbiltà tal-adulti; jinnota wkoll, fir-rigward tal-edukazzjoni għolja, li l-pjan tal-Kummissjoni li teskludi studenti dottorali ta' Erasmus Mundus mill-kamp ta' applikazzjoni tal-programm Erasmus Għal Kulħadd u tittrasferixxi l-finanzjament għas-sostenn tal-mobbiltà tagħhom lill-programm Orizzont 2020 jeħtieġ li jkun immonitorjat mill-qrib, peress li dan il-pjan jista' jdgħajjef ir-rabta bejn ir-riċerka u l-edukazzjoni għolja (li l-ħtieġa għaliha hi mtennija kontinwament mill-Proċess ta' Bologna) u jipperikola l-istrateġiji ta' stabbiliment iffaċilitati matul l-aħħar tliet snin permezz tal-programm eżistenti Erasmus Mundus, u jista' jonqos ukoll milli jqis l-aspett edukattiv tad-dottorati ta' Erasmus Mundus, u għalhekk jillimitahom għar-riċerka applikata;

(xiii)       Jirrakkomanda bil-qawwa li l-allokazzjonijiet għal kull settur tal-edukazzjoni, i.e. l-edukazzjoni skolastika, l-edukazzjoni u t-taħriġ vokazzjonali, l-edukazzjoni għolja u t-tagħlim tal-adulti, kif ukoll għaż-żgħażagħ kif deskritt fin-nota spjegattiva tal-proposta, jiġu inkorporati fil-bażi legali, sabiex isiru legalment vinkolanti u soġġetti għad-deċiżjoni tal-awtorità baġitarja; huwa preokkupat dwar il-fatt li l-allokazzjonijiet minimi proposti jammontaw biss għal 56 % tal-baġit totali; jenfasizza l-ħtieġa għal ċifra ogħla sabiex ikun żgurat finanzjament affidabbli għas-setturi differenti; jirrakkomanda wkoll li jiġi previst rieżami ta' nofs it-term tal-allokazzjonijiet mill-Parlament abbażi tar-rapport ta' evalwazzjoni tal-Kummissjoni;

(xiv)       Jiġbed l-attenzjoni dwar il-livell allarmanti attwali ta' qgħad fost iż-żgħażagħ, u jinnota bi preokkupazzjoni li l-politika għaż-żgħażagħ ma tingħatax biżżejjed importanza fil-proposta tal-Kummissjoni; jenfasizza l-ħtieġa li jinħolqu kapitolu separat u linja baġitarja separata għal attivitajiet orjentati lejn iż-żgħażagħ;

(xv)       Jinnota l-inklużjoni fil-proposta għal programm 'Erasmus Għal Kulħadd' biex bih tiġi ffinanzjata l-mobbiltà fil-livell ta' masters; jenfasizza li dan ma għandux jissostitwixxi s-sistemi għall-għotjiet diġà fis-seħħ, u jenfasizza l-importanza li jiġu introdotti limiti minimi ta' introjtu kontinġenti sabiex isir soċjalment sostenibbli, speċjalment fi żminijiet ta' kriżi;

(xvi)       Jenfasizza l-ħtieġa li jiġi inkluż impenn qawwi lejn l-inklużjoni soċjali billi jkun żgurat aċċess ugwali għal mobbiltà tat-tagħlim tul l-edukazzjoni u t-taħriġ u fil-livelli kollha; f'dan ir-rigward, jinnota l-importanza li tiġi żgurata l-parteċipazzjoni fl-opportunitajiet li tkun imfassla għal kull individwu, speċjalment għal studenti b'introjtu baxx;

(xvii)      Jinnota li l-Garanzija Ewropea għaż-Żgħażagħ, bl-appoġġ xieraq, tista' tiġġenera riżultati ekonomiċi relevanti lil hinn mill-perjodu ta' żmien 2014;

(xviii)     Jinnota li l-programm tal-isport tal-UE jista' jibni fuq l-esperjenza tal-azzjonijiet preparatorji biex jiżviluppa dimensjoni tal-UE fl-isport, kif previst fl-Artikolu 165 tat-Trattat ta' Lisbona, b'mod speċifiku fir-rigward tal-inklużjoni soċjali;

Proposta tal-Kummissjoni dwar 'Ewropa Kreattiva'

(xix)       Jinnota l-intenzjoni tal-Kummissjoni li tgħaqqad il-programmi eżistenti MEDIA, MEDIA Mundus u Kultura 2007; jenfasizza, madanakollu, li l-fużjoni ta' dawn il-programmi tista' ddgħajjef is-suċċess li qed jinkiseb bħalissa fl-oqsma kkonċernati; jirrimarka li għal raġunijiet ta' trasparenza u viżibbiltà, huwa kruċjali li jinħolqu allokazzjonijiet baġitarji separati u linji baġitarji separati għal MEDIA, Kultura u l-oqsma transsettorjali;

(xx)       Jinnota li l-Kummissjoni tipprevedi baġit ta' EUR 1 801 000 000; jikkunsidra dan bħala l-minimu assolut biex jiġi żgurat il-funzjonament sħiħ tal-programm multiannwali l-ġdid li ġie propost; jenfasizza li r-riżorsi limitati ħafna previsti għal Kultura u MEDIA ma jistgħux jitnaqqsu aktar mingħajr periklu għall-effikaċja tagħhom;

(xxi)       Jirrimarka li l-allokazzjonijiet indikattivi previsti għal MEDIA, Kultura u l-oqsma transsettorjali mhumiex stabbiliti fil-bażi legali iżda huma stabbiliti biss fin-nota spjegattiva tal-proposta; jenfasizza li distinzjoni ċara bejn l-oqsma trid tiġi inkorporata fil-bażi legali sabiex issir leglament vinkolanti u soġġetta għad-deċiżjoni tal-awtorità baġitarja;

(xxii)      Jenfasizza li minħabba n-nuqqas attwali, jew in-natura marġinali, tal-investiment fis-settur kulturali f'bosta programmi u intestaturi baġitarji tal-UE jeħtieġ li jiġi evitat li jinħela l-potenzjal tas-settur kulturali biex jixpruna l-innovazzjoni u li b'hekk tintilef opportunità għall-promozzjoni ta' tkabbir intelliġenti, sostenibbli u inklussiv;

(xxiii)     Jasserixxi li l-azzjonijiet imnedija mill-programm Ewropa Kreattiva għandhom isegwu objettivi u riżultati li ma jqisux biss fatturi ekonomiċi iżda wkoll kunsiderazzjonijiet soċjali u kulturali, bi qbil man-natura doppja ta' dan is-settur;

(xxiv)     Jilqa' l-idea ta' strument finanzjarju biex jindirizza l-problema tad-diffikultajiet tal-operaturi fis-settur kulturali u kreattiv biex jakkwistaw il-kreditu, u jirrakkomanda li l-garanziji offruti lil intermedjarji finanzjarji permezz ta' dak l-istrument ikunu pprovduti fuq il-bażi ta' portafolli bbilanċjati u rranġati minn qabel u li jiġi żgurat aċċess ugwali għall-Istati Membri kollha u għal kull tip ta' operatur, kemm jekk għall-profitt kif ukoll jekk mhux għall-profitt, kif ukoll ġestjoni trasparenti u sorveljata;

Proposta tal-Kummissjoni dwar 'Ewropa għaċ-Ċittadini'

(xxv)      Jinnota li l-pakkett finanzjarju propost għall-implimentazzjoni ta' dan il-programm jammonta għal EUR 229 000 000, u jirrappreżenta biss żieda limitata ħafna meta mqabbel mal-baġit tal-programm eżistenti; jenfasizza li dan l-ammont huwa minimu assolut jekk irid jiġi żgurat il-funzjonament sħiħ tal-programm propost;

(xxvi)     Jinnota bi preokkupazzjoni li l-allokazzjonijiet indikattivi għal kull qasam mhumiex stabbiliti fil-proposta jew fl-annessi tagħha; jenfasizza li dawn l-allokazzjonijiet iridu jiġu inkorporati fil-bażi legali sabiex ikunu soġġetti għad-deċiżjoni tal-awtorità baġitarja;

(xxvii)    Jenfasizza li l-pakkett finanzjarju għall-programm il-ġdid għandu jkun ugwalment disponibbli għall-gruppi kollha li qegħdin jipparteċipaw;

(xxviii)   Jirrakkomanda bil-qawwa li tingħata prijorità baġitarja lil proġetti żgħar u faċilment aċċessibbli li huma kemm jista' jkun qrib iċ-ċittadini;

(xxix)     Jinsisti bil-qawwa li l-proposta tal-Kummissjoni dwar 'Ewropa għaċ-Ċittadini' għandha tiġi adottata permezz tal-proċedura ta' kodeċiżjoni;

Osservazzjonijiet ġenerali

(xxx)      Jissottolinja l-importanza tal-flessibbiltà fir-rigward tan-nefqa multiannwali, u jinnota li l-eżistenza ta' intestaturi żgħar bħall-Intestatura 3b attwali tostakola r-riallokazzjoni tal-fondi bejn il-programmi; iħeġġeġ li l-intestaturi u s-subintestaturi ż-żgħar jiġu evitati fil-QFM li jmiss;

(xxxi)     Ifakkar li l-investiment mill-Fond Soċjali Ewropew u mill-Fond Ewropew għall-Iżvilupp Reġjonali għandu jirrappreżenta aktar minn EUR 72 biljun għall-edukazzjoni u t-taħriġ u EUR 60 biljun għar-riċerka u l-innovazzjoni fil-perjodu 2007-2013; iqis li jeżistu opportunitajiet biex miżuri kulturali jiġu ffinanzjati skont għadd ta' programmi tal-Unjoni, bħall-Fondi Strutturali jew strumenti ta' azzjoni esterna; għalhekk, jenfasizza l-importanza li jiġu mmassimizzati s-sinerġiji u l-effetti multiplikaturi bejn partijiet differenti tal-baġit, partikolarment bejn il-politiki strutturali, minn naħa waħda, u l-politiki dwar l-edukazzjoni, iż-żgħażagħ u l-kultura, min-naħa l-oħra;

(xxxii)    Jitlob attenzjoni partikolari biex jiġi żgurat li l-mobbiltà tat-tagħlim għall-adulti (inklużi ħaddiema u studenti adulti) tkun eliġibbli għal finanzjament skont il-Fondi Strutturali, u li l-aċċess għal tali finanzjament isir aktar faċli;

(xxxiii)   Jirrakkomanda titjib fl-aċċessibbiltà taċ-ċittadini u l-partijiet interessati għall-opportunitajiet fil-proposta tal-QFM li jmiss; f'dan ir-rigward, iqis li huwa importanti li l-piżijiet amministrattivi u finanzjarji marbuta mal-programmi tal-UE jiġu ssimplifikati;

(xxxiv)   Iqis li l-NGOs huma atturi importanti għall-ilħuq tal-għanijiet stabbiliti fil-QFM li jmiss, u jirrakkomanda bil-qawwa li r-rwol tagħhom bħala atturi ewlenin fid-djalogu ċivili Ewropew, għandu jiġi rikonoxxut u li għandhom jingħataw sostenn amministrattiv u finanzjarju adegwat, speċjalment fi żminijiet ta' kriżi;

(xxxv)    Jenfasizza l-importanza tal-Istrument Ewropew ta' Viċinat fil-promozzjoni tal-mobbiltà u s-sostenn tas-soċjetà ċivili fil-pajjiżi tal-PEV; ifakkar, f'dan il-kuntest, fil-bżonn li jinżamm bilanċ fit-tqassim tal-fondi bejn id-dimensjoni tan-nofsinhar tal-PEV u d-dimensjoni tal-Lvant tagħha;

(xxxvi)   Ifakkar li l-midja soċjali u l-internet qegħdin jintużaw dejjem aktar miċ-ċittadini Ewropej bħala sors ta' aħbarijiet u kontenut kulturali, kif ukoll bħala opportunità biex ikun hemm komunikazzjoni interattiva u kollaborattiva mal-politikanti u ma' dawk li jfasslu l-politika; jistieden lill-istituzzjonijiet tal-UE jużaw il-midja soċjali u strumenti onlajn oħra u jkollhom interazzjoni aktar attiva maċ-ċittadini, pereżempju permezz ta' programmi bħal Nikkondividu l-Ewropa; jistieden lill-istituzzjonijiet tal-UE jagħmlu aktar informazzjoni tas-settur pubbliku disponibbli għall-użu mill-ġdid;

(xxxvii)  Jirrakkomanda bil-qawwa li l-komunikazzjoni tingħata l-bażi legali tagħha, kif ukoll li jiżdiedu l-impenji u l-pagamenti għall-azzjonijiet ta' politika tal-komunikazzjoni, sabiex ikun hemm djalogu aħjar maċ-ċittadini.

RIŻULTAT TAL-VOTAZZJONI FINALI FIL-KUMITAT

18.9.2012

OPINJONI tal-Kumitat għall-Affarijiet Legali

għall-Kumitat għall-Baġits

dwar il-proposta għal regolament tal-Kunsill li jistabbilixxi l-qafas finanzjarju multiannwali għas-snin 2014-2020

( COM(2011)0398 – 2011/0177(APP))

Rapporteur għal opinjoni: Dagmar Roth-Behrendt

SUĠĠERIMENTI

Il-Kumitat għall-Affarijiet Legali jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

Ġustizzja

1.  Iqis li huwa ta' prijorità assoluta li titfassal leġiżlazzjoni sempliċi, ċara u li tinftiehem b'ħeffa, biex ikun żgurat livell għoli ta' trasparenza fil-leġiżlazzjoni Ewropea u tkun iggarantita applikazzjoni effikaċi; josserva, f’dan ir-rigward, li l-ħtieġa ta’ żvilupp ulterjuri ta’ spazju Ewropew ta’ ġustizzja jeħtieġ li jkun sostnut permezz ta' riżorsi finanzjarji adegwati, bil-għan li ċ-ċittadini jingħataw l-istess standards madwar l-Ewropa kollha, livell bażiku ta' ġustizzja, trattament mhux diskriminatorju u l-opportunità sħiħa li jeżerċitaw drittijiethom fi kwalunkwe post fl-Ewropa;

2.  Iqis li huwa essenzjali li l-UE tiffinanzja, b' allokazzjonijiet finanzjarji sinifikanti, sensiela ta' programmi finanzjarji ddedikati bl-għan li jappoġġjaw il-leġiżlazzjoni u l-politiki tagħha fil-qasam tal-ġustizzja u li jiffukaw fuq kwistjonijiet transkonfinali li jistgħu jiġu indirizzati b'mod adegwat biss permezz ta' azzjoni kkoordinata fil-livell tal-UE;

3.  Jenfasizza li aċċess imtejjeb u aktar sħiħ għall-ġustizzja, taħriġ ġudizzjarju eżawrjenti u kooperazzjoni ġudizzjarja effikaċi fi kwistjonijiet ċivili u kriminali jistgħu jiġu żgurati aktar billi l-allokazzjoni proposta għall-Programm tal-Ġustizzja 2014-2020 tiżdied u jitlob żieda ta' 5 % fil-pakkett finanzjarju tiegħu;

Amministrazzjoni

4.  Jikkondividi l-bżonn espress mill-Kummissjoni li jiġi rrazzjonalizzat l-infiq amministrattiv; jenfasizza, madankollu, li huwa vitali li jinstab bilanċ bejn iffrankar ulterjuri u l-ħtieġa li jiġi żgurat li l-istituzzjonijiet ikunu fil-qagħda li jwettqu l-ħidmiet u d-doveri tagħhom bi qbil mal-obbligi u s-setgħat tagħhom skont it-Trattati, b’qies tal-isfidi diffiċli mqajmin mill-kriżi ekonomika kurrenti;

5.  Jinnota, f'dan ir-rigward, li 80 % tal-iffrankar previst mill-Kummissjoni ġej minn tnaqqis propost ta' 5 % fil-persunal; ma jaqbilx assolutament mal-applikazzjoni ta' tnaqqis lineari tal-persunal għall-istituzzjonijiet, korpi u aġenziji kollha għaliex ir-rwoli u r-responsabbiltajiet tagħhom skont it-Trattati jvarjaw bil-kbir; jenfasizza li d-deċiżjoni għandha titħalla f'idejn kull waħda biex jiddeċiedu fejn jista’ jsir tnaqqis u x’għandu jitnaqqas, sabiex il-funzjonament tajjeb tagħhom ma jiġix imfixkel;

6.  Ifakkar li fl-2004, iċ-ċivil tal-Unjoni Ewropea għadda minn riforma profonda li diġà iġġenerat iffrankar ta' € 3 biljun, u li ser tkompli tiġġenera tfaddil għall-baġit tal-UE ta' madwar €5 biljun oħrajn sal-2020; jinnota li l-infiq amministrattiv tal-UE jirrapreżentaw biss 5.8 % tal-qafas finanzjarju pluriennali (QFP) 2007-2013, li fih innifsu jirrappreżenta madwar 1 % tad-DNG tal-UE;

7. Jirrikonoxxi l-fatt li l-kuntest ekonomiku u soċjali, li se jinbidel matul il-perjodu tal-QFP li jmiss, jeħtieġ li jeħtieġ jitqies mill-Awtoritajiet Baġitarji, iżda jenfasizza li, illum aktar minn qatt qabel, l-UE teħtieġ servizz ċivili effiċjenti b' persunal ferm kwalifikat u multilingwi, li jintgħażel minn fost iċ-ċittadini tal-Istati Membri fuq l-aktar bażi ġeografika wiesgħa possibbli u b' kunsiderazzjoni xierqa għall-bilanċ tal-ġeneru; jirrimarka li l-persunal jeħtieġlu jkun indipendenti, iżomm mal-ogħla standards professjonali u jkun lest li jitlaq mill-pajjiż tal-oriġini tiegħu; barra minn hekk, jinnota li l-persunal jeħtieġ li jiġi pprovdut bil-mezzi meħtieġa biex iwettaq dmirijietu b'mod kemm jista' jkun effiċjenti u leali;

8. Sejjer jopponi bil-qawwa kwalunkwe miżura li tikser il-pożizzjoni legali tal-uffiċjali fir-rigward tad-drittijiet fundamentali, il-prinċipji ġenerali tal-liġi tal-Unjoni u l-prinċipju tal-ġustizzja soċjali u li tipperikola l-funzjonament tajjeb tal-amministrazzjoni tal-UE fit-twettiq tal-missjoni tagħha biex taqdi liċ-ċittadini u l-Unjoni.

RIŻULTAT TAL-VOTAZZJONI FINALI FIL-KUMITAT

20.9.2012

OPINJONI tal-Kumitat għal-Libertajiet Ċivili, il-Ġustizzja u l-Intern

għall-Kumitat għall-Baġits

dwar ir-rapport interim għall-fini li jintlaħaq eżitu pożittiv tal-proċedura ta’ approvazzjoni tal-Qafas Finanzjarju Multiannwali għas-snin 2014-2020

( COM(2011)0398 – 2011/0177(APP) )

Rapporteur għal opinjoni: Monika Hohlmeier

SUĠĠERIMENTI

Il-Kumitat għal-Libertajiet Ċivili, il-Ġustizzja u l-Intern jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

1.  Jinnota l-istruttura l-ġdida tal-Intestatura 3 dwar is-Sigurtà u ċ-Ċittadinanza; iqis li l-inklużjoni tas-Sikurezza tal-Ikel, l-Aġenzija Ewropea għas-Sikurezza tal-Ikel, l-Uffiċċju Komunitarju tal-Varjetajiet tal-Pjanti u l-Aġenzija Ewropea għall-Mediċini fl-Intestatura 3 l-ġdida hija dibattibbli u ma tirreflettix l-objettiv ġenerali tas-Sigurtà u ċ-Ċittadinanza; jissuġġerixxi li t-titolu jinbidel f’konformità mar-Riżoluzzjoni tal-Parlament tat-8 ta’ Ġunju 2011: Ninvestu fil-ġejjieni: Qafas Finanzjarju Multiannwali (MFF) ġdid għal Ewropa kompetittiva, sostenibbli u inklużiva[33] għal: “Ċittadinanza, libertà, sigurtà u ġustizzja”;

2.  Huwa tal-fehma li l-ammont totali dedikat lill-Ispazju ta’ Libertà, Sigurtà u Ġustizzja ma jirreflettix adegwatament it-tisħiħ ta’ dan il-qasam fil-konfront tat-Trattat ta’ Lisbona u l-kompiti u l-isfidi tiegħu li dejjem qed jiżdiedu;

3.  Jenfasizza l-ħtieġa li jiġu żgurati l-użu effiċjenti u l-ġestjoni tajba tal-fondi, sabiex jiġi evitat li l-Istati Membri jħarsu l-interessi nazzjonali tagħhom stess;

4.  Jenfasizza li s-simplifikazzjoni tal-istrutturi tal-iffinanzjar, filwaqt li tipprovdi flessibilità, għandha żżomm il-prevedibilità u l-kredibilità, u li għandu jkun żgurat sehem adegwat għal kull objettiv tal-fondi speċifiċi;

5.  Jenfasizza l-ħtieġa ta’ attivitajiet iffinanzjati biex jiġi pprovdut valur miżjud Ewropew, u biex ikun hemm bilanċ adegwat bejn l-objettivi tal-politika fil-fondi u l-programmi kollha;

6.  Jilqa’ s-simplifikazzjoni ta’ strutturi ta’ ffinanzjar li rriżultat bl-istabbiliment tal-Fond għall-Migrazzjoni u l-Ażil u l-Fond għas-Sigurtà Interna, kif ukoll ir-regoli applikabbli b’mod ġenerali dwar l-ipprogrammar, il-ġestjoni, il-kontroll u r-rappurtar, sakemm jinżamm bilanċ bejn il-prijoritajiet differenti fi ħdan il-fondi; jirrimarka li s-simplifikazzjoni tal-istrumenti tal-Affarijiet Interni se tnaqqas in-numru tal-bażijiet legali u r-regoli ta' implimentazzjoni tagħhom u tippermetti fehim aħjar tar-regoli mill-partijiet interessati kollha;

7.  Iqis li sehem ġust tar-riżorsi finanzjarji għandu jiġi allokat taħt il-Fond għall-Migrazzjoni u l-Ażil b'mod partikolari biex jingħata appoġġ lill-objettivi tal-Fond tar-Refuġjati attwali u l-Fond tal-Integrazzjoni; jinnota l-enfasi partikolari fuq il-miżuri tar-risistemazzjoni u tar-rilokazzjoni; jenfasizza l-ħtieġa ta’ attivitajiet iffinanzjati biex jiġi pprovdut valur miżjud Ewropew, u biex ikun hemm bilanċ adegwat bejn l-objettivi tal-politika;

8.  Itenni li l-elementi l-ġodda bħas-sistema tal-PNR tal-UE jew il-“Pakkett tal-Fruntieri Intelliġenti” diġà huma ppjanati; huwa tal-fehma li l-Fond għas-Sigurtà Interna għandu jkollu riżorsi finanzjarji adegwati biex ikun jista' jissodisfa l-objettivi tiegħu, filwaqt li jenfasizza li l-azzjonijiet kollha tiegħu għandhom jikkonformaw għalkollox mal-Karta tad-Drittijiet Fundamentali; jitlob iffinanzjar għall-iżvilupp ta' kontrolli fil-fruntieri li jkunu sensittivi għall-protezzjoni u li jirrispettaw kompletament id-drittijiet fundamentali tal-migranti;

9.  Jenfasizza l-bżonn li jintefaq il-Fond għas-Sigurtà Interna bil-għan li jissaħħaħ l-Ispazju ta' Libertà, Sigurtà u Ġustizzja u tiġi assigurata koordinazzjoni bejn l-Istati Membri fir-rigward tal-iżvilupp ta' sistema ta’ kontrolli ta' kwalità tajba u uniformi fil-fruntieri esterni; jemmen, barra minn hekk, li l-investiment fl-infrastruttura, it-tagħmir, il-mezzi tat-trasport u s-sistemi tal-IT għandu jagħti kontribut biex jiġu sodisfatti l-istandards komuni tas-sigurtà u biex tiżdied l-effiċjenza tal-operazzjonijiet konġunti koordinati mill-Aġenzija FRONTEX;

10. Jenfasizza li l-Programm tal-Ġustizzja jirċievi ffinanzjar adegwat; jenfasizza l-bżonn ta’ bilanċ adegwat bejn il-fondi attribwiti għall-objettivi differenti;

11. Huwa tal-opinjoni li d-drittijiet tat-tfal u l-isforzi għall-protezzjoni tat-tfal għandhom isiru viżibbli f'linji speċifiċi tal-iffinanzjar sabiex l-allokazzjonijiet ikunu jistgħu jiġu traċċati u immonitorjati u l-effettività tagħhom ivvalutata;

12. Jilqa’ l-proposta għal Programm dwar id-Drittijiet u ċ-Ċittadinanza; jenfasizza li s-simplifikazzjoni tal-istrutturi tal-iffinanzjar m'għandhomx jirriżultaw fi tnaqqis fil-livell tar-riżorsi finanzjarji kkomparati mal-livell disponibbli fil-programmi attwali tal-2007-2013, u għalhekk jiddeplora l-proposta tal-Kummissjoni li tnaqqas l-iffinanzjar; jitlob żieda fil-baġit biex jiġu promossi u protetti d-drittijiet fundamentali u biex jiġu miġġielda r-razziżmu, il-ksenofobija u forom oħra ta' diskriminazzjoni, speċjalment fil-kuntest tal-intolleranza li qed tikber u t-taqlib soċjali esperjenzat fl-Ewropa bħala konsegwenza tal-kriżi finanzjarja attwali;

13. Jiddeplora l-approċċ statiku tal-iffinanzjar tal-aġenziji fl-Ispazju ta’ Libertà, Sigurtà u Ġustizzja, li ma jirrefletti ebda żieda jew waqfien fil-kompiti;

14. Iqis li, b’mod partikolari, il-baġit ta’ FRONTEX, l-Uffiċċju Ewropew ta' Appoġġ fil-Qasam tal-Ażil (EASO) u l-Uffiċċju Ewropew tal-Pulizija (Europol), mhumiex ibbilanċjati mal-kompiti tagħhom li żdiedu b’mod sostanzjali; jinnota, f’din il-konnessjoni, il-mandat ta’ FRONTEX, li ġie emendat reċentement, it-tnedija tal-attivitajiet previsti tal-EASO, u l-ħolqien taċ-Ċentru Ewropew taċ-Ċiberkriminalità fi ħdan il-Europol.

15. Jenfasizza l-bżonn ta' evalwazzjoni xierqa tal-miżuri eżistenti, u jenfasizza li valutazzjonijiet xierqa tal-impatt għandhom ikunu obbligatorji qabel ma jsiru proposti leġiżlattivi ġodda.

RIŻULTAT TAL-VOTAZZJONI FINALI FIL-KUMITAT

8.10.2012

OPINJONI tal-Kumitat għall-Kontroll tal-Baġit

għall-Kumitat għall-Baġits

Rapport interim għall-fini li jintlaħaq eżitu pożittiv tal-proċedura ta’ approvazzjoni tal-Qafas Finanzjarju Pluriennali għas-snin 2014-2020

( COM(2011)0398 – COM(2012)0388 – 2011/0177(APP) )

Rapporteur għal opinjoni: Jan Mulder

SUĠĠERIMENTI

Il-Kumitat għall-Kontroll tal-Baġit jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

Rakkomandazzjonijiet

Kwistjonijiet orizzontali

1.  Jikkunsidra l-bidliet importanti u li għadhom qed isiru fl-ekonomija reali tal-Istati Membri minħabba l-kriżi; jinsisti, għalhekk, li l-azzjonijiet previsti fil-Qafas Finanzjarju Pluriennali (QFP) għall-2014-2020 ikunu bbażati fuq is-sitwazzjoni ekonomika u soċjali kurrenti tal-Istati Membri u, fejn dan ikun f’loku, jiġu riaġġustati skont l-objettivi komprensivi deskritti mill-Kunsill Ewropew fil-konklużjonijiet tiegħu tat-28 u d-29 ta’ Ġunju 2012 taħt l-intestatura “Il-kontribut tal-politiki Ewropej għat-tkabbir u l-impjiegi";

2.  Jappoġġja l-pakkett finanzjarju globali għall-perjodu finanzjarju multiannwali futur kif deskritt fil-proposta tal-Kummissjoni għal regolament tal-Kunsill li jistabbilixxi l-qafas finanzjarju pluriennali għas-snin 2014-2020; huwa tal-fehma, madankollu, li l-kamp ta’ applikazzjoni tar-regolament għandu jkun limitat għall-prinċipji ta’ ġestjoni finanzjarja soda, minħabba li ċ-ċirkostanzi politiċi u ekonomiċi li dejjem jinbidlu u avvenimenti mhux previsti jistgħu jirrikjedu aġġustamenti fuq perjodu ta’ seba’ snin; jemmen li dispożizzjonijiet aktar dettaljati għandhom għalhekk jiġu inkorporati fil-Ftehim Interistituzzjonali (FII);

3.   Juri dispjaċir li, fit-tħejjija għall-qafas finanzjarju pluriennali (QFP) 2014-2020, il-Qorti Ewropea tal-Awdituri (QEA) ma ġietx mitluba tħejji abbozz ta’ “rapport tal-pajsaġġ” li jiddeskrivi l-punti qawwija u d-dgħufijiet tal-QFP preċedenti; jitlob lill-QEA, għalhekk, biex tħejji tali rapport minn issa sal-QFP ta’ wara l-2020;

4.   Jibqa’ konvint li amministrazzjoni baġitarja soda għandha tibni fuq l-esperjenza ta’eżekuzzjoni baġitarja miksuba fis-snin preċedenti; iqis, f’dan ir-rigward, li l-isforzi tal-Kumitat għall-Kontroll tal-Baġit, bħala kumitat b’kompetenzi orizzontali, huma ta’ importanza partikolari;

5.   Jikkundanna l-fatt li l-abbozz il-ġdid tal-Ftehim Interistituzzjonali ma fih – fir-rigward tal-implimentazzjoni tal-baġit – l-ebda dispożizzjoni dwar ekonomija, effikaċja u effiċjenza u ġestjoni finanzjarja soda mill-perspettiva tal-kontroll tal-baġit;

6.   Jitlob li jiżdiedu mal-FII l-ġdid dispożizzjonijiet biex il-kontabbiltà, it-trasparenza u l-ġestjoni finanzjarja soda, sakemm dawn ma jkunux koperti mir-Regolament Finanzjarju (RF) rivedut fil-futur;

7.   Jinsisti li l-Istati Membri għandhom jerfgħu r-responsabilità tagħhom skont l-Artikolu 317 tat-Trattat dwar il-Funzjonament tal-Unjoni Ewropea; ifakkar li 90 % tal-iżbalji misjuba mill-QEA seħħew fl-Istati Membri, u li l-maġġoranza ta’ dawn l-iżbalji setgħu ġew evitati;

8.   Jistieden lill-Istati Membri kollha joħorġu dikjarazzjonijiet ta’ ġestjoni nazzjonali ffirmati fil-livell politiku xieraq; huwa tal-fehma li, meta Stat Membru jippreżenta dikjarazzjoni ta’ ġestjoni nazzjonali fir-rigward tal-infiq taħt is-sistema tal-ġestjoni kondiviża, il-korrezzjonijiet finanzjarji għandhom jitnaqqsu bi 15 % għal kull fond;

9.   Jistieden lill-Kummissjoni sabiex tistabbilixxi, b’kooperazzjoni mal-Istati Membri, mudell għad-dikjarazzjonijiet ta’ ġestjoni nazzjonali li jagħmilhom sinifikanti u komparabbli; huwa tal-fehma li dikjarazzjonijiet bħal dawn għandhom, fost l-oħrajn, jiċċertifikaw kriterji (bħal kontijiet veri u ġusti, l-effikaċja tas-sistemi ta’ ġestjoni u kontroll u l-legalità u r-regolarità tat-tranżazzjonijiet sottostanti), jispeċifikaw il-kopertura tal-assigurazzjoni u l-bażi sottostanti għall-assigurazzjoni, ikunu akkumpanjati minn opinjoni ta’ awditu u jinkludu riservi u dikjarazzjonijiet ta’ ċaħda[34]; huwa tal-fehma li l-Qorti u l-Kummissjoni għandhom ikunu kapaċi jinkorporaw il-kontenut tad-dikjarazzjonijiet ta’ ġestjoni nazzjonali fil-ħidma ta’ awditu tagħhom;

10. Jistieden lill-Istati Membri kollha biex jipproduċu u jippubblikaw sommarji annwali sinifikanti;

11. Jikkundanna l-fatt li l-Mekkaniżmu Ewropew ta’ Stabbiltà (MES) inħoloq fuq bażi intergovernattiva, barra milll-istrutturi istituzzjonali tal-Unjoni Ewropea, anke jekk l-euro huwa wieħed mill-prerogattivi tal-Unjoni; jinnota li dan inaqqas it-trasparenza fit-teħid tad-deċiżjonijiet skont it-Trattat dwar il-MES, li joħloq dubji fir-rigward tal-kontabbiltà u l-iskrutinju demokratiku;

Kwistjonijiet speċifiċi

12. Jitlob li d-dħul u l-infiq li jirriżultaw mill-implimentazzjoni tal-Fond għall-Iżvilupp Ewropew rispettiv jiġu inklużi fil-baġit ġenerali tal-Unjoni sabiex jiġi żgurat skrutinju demokratiku adegwat; jinnota li l-fondi disponibbli taħt l-Intestatura 4 għandhom jiżdiedu skont dan;

13. Jitlob, bil-ħsieb li jitjiebu l-isforzi għall-ġlieda kontra l-kuntrabandu u l-kontrafazzjoni tas-sigaretti, li l-multi ġġenerati minn sanzjonijiet għat-traffiku illegali tal-prodotti tat-tabakk jiġu kkunsidrati bħala dħul assenjat estern;

14. Jitlob li multi imposti fil-qasam tal-kompetizzjoni, multi u ammonti riċevibbli oħra bħala riżultat ta’ soluzzjonijiet li jsiru barra mill-qorti, qbil jew kwalunkwe ftehim ieħor simili ma’ partijiet terzi mhux statali jikkostitwixxu d-dħul tal-baġit tal-UE, kemm jekk ikun dħul assenjat jew forom oħra ta' dħul;

15. Jinnota li l-approprjazzjonijiet mhux differenzjati li jikkorrispondu mal-obbligi kkuntrattati kif xieraq f’għeluq is-sena finanzjarja għandhom jiġġeddu awtomatikament għas-sena finanzjarja ta’ wara biss, u li l-istess regola għandha tapplika għall-approprjazzjonijiet diżimpenjati u mhux użati (impenji u pagamenti) mhux koperti mill-Artikolu 9, paragrafi 2 u 3, tal-abozz tar-RF il-ġdid, u għal marġini disponibbli u mhux minfuqa taħt il-limitu massimu ġenerali tal-QFP għal kull intestatura, li għandhom jikkostitwixxu ‘marġni globali tal-QFP’ u jiġu allokati lill-intestaturi differenti fis-sena finanzjarja ta’ wara skont il-ħtiġijiet tagħhom;

16. Jitlob għall-possibbiltà li jiġġeddu l-approprjazzjonijiet diżimpenjati u mhux użati (impenji u pagamenti) mis-sena N għall-baġit N +1, jew wieħed mill-baġits futuri, skont il-proċedura baġitarja annwali b’deċiżjoni tal-awtorità baġitarja; jitlob li l-approprjazzjonijiet diżimpenjati u mhux użati jiġu allokati għal programm speċifiku jew imdaħħla f’kapitolu proviżorju; jinnota li, f’każijiet bħal dawn, ir-riżorsi mill-Istati Membri għandhom ikunu mitluba biss wara li l-awtorità baġitarja tiddeċiedi dwar id-destinazzjoni speċifika;

17. Jitlob għall-possibbiltà li jiġġeddu l-marġini mhux użati taħt kull limitu tal-MFF fi kwalunkwe limitu ta’ snin sussegwenti tal-QFP, mingħajr ma jitbiddel l-ammont totali tal-QFP;

18. Jitlob għall-impenji żejda u mhux minfuqa minn snin baġitarji preċedenti tal-QFP attwali, flimkien ma’ approprjazzjonijiet diżimpenjati biex jiddaħħlu fir-riżerva għall-pagamenti u l-impenji;

19. Jitlob li t-taxxi tal-valur miżjud (VAT) jiġu kkunsidrati bħala spejjeż eliġibbli tal-proġett;

20. Jitlob li t-tipi differenti ta’ appoġġ baġitarju jiġu identifikati b’mod ċar; jinnota li l-obbligi tal-benefiċjarju u l-kundizzjonijiet li taħthom tingħata l-għajnuna baġitarja għandhom ukoll jiġu identifikati b’mod ċar.

RIŻULTAT TAL-VOTAZZJONI FINALI FIL-KUMITAT

20.9.2012

OPINJONI tal-Kumitat għad-Drittijiet tan-Nisa u l-Ugwaljanza bejn is-Sessi

għall-Kumitat għall-Baġits

dwar ir-rapport interim għall-fini li jintlaħaq eżitu pożittiv tal-proċedura ta’ approvazzjoni tal-Qafas Finanzjarju Multiannwali għas-snin 2014-2020 ( 2011/0177(APP) )

( COM(2011)0398 – 2011/0177(APP) )

Rapporteur għal opinjoni: Inês Cristina Zuber

Mod

SUĠĠERIMENTI

Il-Kumitat għad-Drittijiet tan-Nisa u l-Ugwaljanza bejn is-Sessi jistieden lill-Kumitat għall-Baġits, bħala l-kumitat responsabbli, sabiex jinkorpora s-suġġerimenti li ġejjin fir-rapport tiegħu:

Ċitazzjonijiet u/jew premessi

–   wara li kkunsidra l-Artikolu 2 u l-Artikolu 3(3), it-tieni subparagrafu, tat-Trattat dwar l-Unjoni Ewropea (TUE) u l-Artikolu 8 tat-Trattat dwar il-Funzjonament tal-Unjoni Ewropea (TFUE),

–   wara li kkunsidra l-Artikolu 23 tal-Karta tad-Drittijiet Fundamentali tal-Unjoni Ewropea,

A. billi l-approċċ tal-Kummissjoni fir-rigward tal-aspetti tal-ugwaljanza bejn is-sessi tal-QFP li jmiss jimmira għal aktar flessibbiltà fl-indirizzar tal-isfidi tal-futur qrib li n-nisa qed isibu ma’ wiċċhom, iżda l-fatt li ma ġewx assenjati fondi konkreti jista' jirriżulta fl-allokazzjoni ta' anqas fondi meta mqabbla mal-QFP attwali;

B.   billi l-istrateġija għall-ugwajanza bejn l-irġiel u n-nisa 2010-2015 issostni li l-Qafas Finanzjarju Pluriennali li jmiss se jipprovdi appoġġ għall-implimentazzjoni tal-azzjonijiet ikkuntemplati fl-istrateġija;

C. billi l-proposta attwali għall-QFP 2014-2020 ma tirriflettix l-importanza li jiżdied l-investiment fl-ugwaljanza bejn is-sessi u fid-drittijiet tan-nisa, inter alia bħala rispons neċessarju għall-kriżi ekonomika u finanzjarja attwali;

Rakkomandazzjonijiet

(i)  Jenfasizza li l-integrazzjoni tal-prinċipju tal-ugwaljanza bejn is-sessi u l-allokazzjoni speċifika ta' riżorsi għandhom imorru id f'id, u li, għalhekk, l-allokazzjoni speċifika tar-riżorsi ma tistax tiġi sostitwita b'objettivi orizzontali; jitlob li jkun hemm approċċ doppju li jkun jiżgura l-effiċjenza u l-prevedibilità u li jkun ir-regola fl-istrumenti ta’ finanzjament ewlenin kollha; jenfasizza l-ħtieġa li matul il-perjodu ta' programmazzjoni li jmiss ikun hemm integrazzjoni aktar b'saħħitha u aktar effiċjenti tal-politiki tal-ugwaljanza bejn is-sessi u tal-għodod tal-integrazzjoni tal-kwestjonijiet tal-ugwaljanza bejn is-sessi;

(ii) Jistieden lill-Kummissjoni u lill-Kunsill japplikaw proċessi ta' bbaġittjar li joffru rispons għall-kwestjoni tal-ugwaljanza bejn is-sessi fil-QFP 2014-2020; jenfasizza li r-Regolament tal-QFP għandu jinkludi struzzjonijiet lill-Kummissjoni biex tapplika l-ibbaġittjar skont il-prinċipju tal-ugwaljanza bejn is-sessi fil-proċess baġitarju tal-UE u fl-użu tal-istrumenti ta’ finanzjament differenti.

(iii)Jirrimarka li l-QFP għandu jipprovdi analiżi tal-prijoritajiet tal-baġit tiegħu mil-lat tal-kwestjoni tal-ugwaljanza bejn is-sessi, kif ukoll analiżi dettaljata ta’ kwalunkwe dispożizzjoni baġitarja għall-politiki u l-programmi li jittrattaw b’mod speċifiku l-ugwaljanza bejn is-sessi;

(iv) Jenfasizza li tinħtieġ żieda fil-finanzjament għal azzjonijiet li jirrigwardaw l-ugwaljanza bejn is-sessi, f'dawk li huma impjiegi u tkabbir bil-għan li jiġu indirizzati b’mod organizzat u determinat is-segregazzjoni orizzontali u vertikali tas-sessi u biex jiġu miġġielda d-disparità bejn il-pagi tal-irġiel u tan-nisa u d-disparità bejn il-pensjonijiet tal-iriġiel u tan-nisa u r-rata tal-faqar fost in-nisa li kulma jmur qed tiżdied, kif ukoll f’dawk li huma drittijiet u d-demokrazija; jistieden lill-Kummissjoni u lill-Kunsill jistabilixxu l-ugwaljanza bejn is-sessi bħala objettiv speċifiku fil-programm Drittijiet u Ċittadinanza, kif ukoll isalvagwardjaw il-programm Daphne bħala sottointestatura indipendenti f'dan l-istess programm;

(v) Jistieden lill-Kummissjoni u lill-Kunsill jinkludu objettivi għall-ugwaljanza bejn is-sessi fi ħdan ir-regolamenti li jirregolaw il-Fondi Strutturali, kif ukoll fi ħdan il-programmi ewlenin ta' ffinanzjar tal-UE (is-saħħa u l-ambjent, l-edukazzjoni, iż-żgħażagħ, l-ekonomija, eċċ), u jiżguraw li huma akkumpanjati minn finanzjament assenjat; jinkoraġġixxi applikazzjoni aktar strateġika tal-FSE għall-promozzjoni tal-ugwaljanza bejn in-nisa u l-irġiel, tal-aċċess għas-suq tax-xogħol u l-integrazzjoni fih mill-ġdid, u għall-ġlieda kontra l-qgħad, il-faqar, l-esklużjoni soċjali u s-suriet kollha ta’ diskriminazzjoni; jistieden lill-Kummissjoni toħroġ b'miżuri proattivi permezz tal-Fond Agrikolu Ewropew għall-Iżvilupp Rurali, bil-għan li jiġi appoġġjat l-impjieg tan-nisa fiż-żoni rurali;

(vi) Jistieden lill-Kummissjoni u lill-Kunsill jiżguraw il-kontinwità ta' finanzjament assenjat għall-Istitut Ewropew għall-Ugwaljanza bejn is-Sessi, mingħajr ebda tnaqqis, bil-għan li l-Istitut ikun jista’ jsir operazzjonali għalkollox u jipprovdi statistika u riċerka dwar il-politika tal-ugwaljanza bejn is-sessi fl-UE lill-Istati Membri u lill-Presidenzi rotatorji tal-Kunsill tal-Unjoni Ewropea;

(vii)

     Jenfasizza li l-istrateġija tal-Kummissjoni għall-ugwaljanza bejn in-nisa u l-irġiel 2010-2015 u l-istrateġija għall-ħames snin ta’ wara l-2015, kif ukoll ir-rapporti annwali dwar l-ugwaljanza bejn is-sessi, għandhom iservu ta' indikazzjoni fundamentali fir-rigward ta’ f’liema oqsma u kif għandu jiġi mmirat l-infiq, filwaqt li jitqies b’mod partikolari r-riskju qawwi ta’ faqar u esklużjoni soċjali li għandhom il-kategoriji l-aktar vulnerabbli, bħalma huma n-nisa xjuħ u l-ommijiet waħedhom;

(viii)Jinnota li l-ħolqien ta' programmi ta' finanzjament fuq skala kbira se jżomm lill-NGOs iżgħar, inklużi organizzazzjonijiet tan-nisa, milli jibbenefikaw mill-finanzjament li tagħti l-UE għall-proġetti u b’hekk se jxekkel il-kontribut uniku tagħhom għat-titjib tal-kwalità tal-politika u tal-leġiżlazzjoni fil-qasam tal-ugwaljanza bejn is-sessi; jitlob li jibqgħu jingħataw l-għotjiet żgħar flimkien ma' dawk akbar, sabiex jiġi żgurat li fil-ġejjieni l-NGOs iżgħar se jibqa' jkollhom aċċess għall-finanjzament tal-UE;

(ix) Jistieden lill-Kummissjoni u lill-Kunsill jiżguraw li l-allokazzjonijiet baġitarji kollha taħt il-QFP 2014-2020 se jirrispettaw il-prinċipju tal-ugwaljanza bejn is-sessi u li se jippromwovu l-integrazzjoni tal-kwestjonijiet tal-ugwaljanza bejn l-irġiel u n-nisa fil-politiki kollha tal-Unjoni;

(x) Jirrimarka li l-ugwaljanza bejn is-sessi teħtieġ li tiġi ddikjarata b’mod ferm aktar ċar bħala objettiv u li tiġi akkumpanjata minn finanzjament assenjat fl-azzjonijiet esterni u l-programmi kollha tal-UE;

(xi) Jenfasizza kemm l-ibbaġittjar li jqis l-ugwaljanza bejn is-sessi huwa importanti bħala għodda tajba ta’ governanza biex jittejbu l-effiċjenza u l-ekwità, il-monitoraġġ xieraq ta' kif l-allokazzjonijiet baġitarji jaffettwaw l-opportunitajiet ekonomiċi u soċjali tan-nisa u l-irġiel, u l-flessibilità fir-rigward tar-ristrutturar ta’ dawk li jaffettwaw b'mod negattiv l-ilħiq tal-ugwaljanza bejn is-sessi; jemmen li analiżi sostanzjali tal- kwestjonijiet li jirrigwardaw l-ugwaljanza bejn is-sessi fil-proċess tal-ippjanar tal-baġit tal-UE se ttejjeb l-identifikar tar-riżorsi b’tali mod li l-ugwaljanza u l-koeżjoni soċjali jisseddqu;

Modifiki

Modifika 1

Proposta emendata għal regolament tal-Kunsill li jistabbilixxi l-qafas finanzjarju pluriennali għas-snin 2014-2020

Premessa 14a (ġdida)

Modifika  2

Proposta emendata għal regolament tal-Kunsill li jistabbilixxi l-qafas finanzjarju pluriennali għas-snin 2014-2020

Artikolu 12 – paragrafu 1

RIŻULTAT TAL-VOTAZZJONI FINALI FIL-KUMITAT

RIŻULTAT TAL-VOTAZZJONI FINALI FIL-KUMITAT