Dokument ta' sessjoni

A8-0010/2016

28.1.2016

***I

RAPPORT

dwar il-proposta għal regolament tal-Parlament Ewropew u tal-Kunsill li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati AKP previsti fi ftehimiet li jistabbilixxu, jew li jwasslu biex jiġu stabbiliti, Ftehimiet ta' Sħubija Ekonomika (riformulazzjoni)

( COM(2015)0282 – C8-0154/2015 – 2015/0128(COD) )

Kumitat għall-Kummerċ Internazzjonali

Rapporteur: Jarosław Wałęsa

(Riformulazzjoni – Artikolu 104 tar-Regoli ta' Proċedura)

PR_COD_1recastingapp

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

NOTA SPJEGATTIVA  7

ANNESS: ITTRA TAL-KUMITAT GĦALL-AFFARIJIET LEGALI  8

ANNESS: OPINJONI TAL-GRUPP TA' ĦIDMA KONSULTATTIV TAS-SERVIZZI LEGALI TAL-PARLAMENT EWROPEW, TAL-KUNSILL U TAL-KUMMISSJONI  10

PROĊEDURA TAL-KUMITAT RESPONSABBLI  12

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal regolament tal-Parlament Ewropew u tal-Kunsill li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati AKP previsti fi ftehimiet li jistabbilixxu, jew li jwasslu biex jiġu stabbiliti, Ftehimiet ta' Sħubija Ekonomika (riformulazzjoni)

( COM(2015)0282 – C8-0154/2015 – 2015/0128(COD) )

(Proċedura leġiżlattiva ordinarja – riformulazzjoni)

Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill ( COM(2015)0282 ),

–  wara li kkunsidra l-Artikolu 294(2) u l-Artikolu 207(2) tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C8-0154/2015),

–  wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

–  wara li kkunsidra l-Ftehim Interistituzzjonali tat-28 ta' Novembru 2001 dwar użu aktar strutturat tat-teknika ta' ristrutturazzjoni tal-atti legali[1],

–  wara li kkunsidra l-ittra tas-16 ta' Settembru 2015 tal-Kumitat għall-Affarijiet Legali indirizzata lill-Kumitat għall-Kummerċ Internazzjonali f'konformità mal-Artikolu 104(3) tar-Regoli ta' Proċedura tiegħu,

–  wara li kkunsidra l-Artikoli 104 u 59 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Kummerċ Internazzjonali ( A8-0010/2016 ),

A.  billi, fl-opinjoni tal-Grupp ta’ Ħidma Konsultattiv tas-Servizzi Legali tal-Parlament Ewropew, tal-Kunsill u tal-Kummissjoni, il-proposta tal-Kummissjoni ma tinkludi ebda tibdil sustanzjali ħlief dak identifikat bħala tali fil-proposta u billi, f’dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil, il-proposta tillimita ruħha għal kodifikazzjoni pura u sempliċi tal-atti eżistenti mingħajr tibdil sustanzjali;

1.  Jadotta l-pożizzjoni tiegħu fl-ewwel qari billi jinkorpora l-proposta tal-Kummissjoni, filwaqt li jikkunsidra r-rakkomandazzjonijiet tal-Grupp ta' Ħidma Konsultattiv tas-Servizzi Legali tal-Parlament Ewropew, tal-Kunsill u tal-Kummissjoni;

2.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda din il-proposta b'mod sustanzjali jew li tibdilha b'test ġdid;

3.  Jagħti istruzzjonijiet lill-President tiegħu biex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

NOTA SPJEGATTIVA

Il-proposta tal-Kummissjoni tikkonċerna kodifikazzjoni u riformulazzjoni tar- Regolament tal-Kunsill (KE) Nru 1528/2007, l-hekk imsejjaħ "Regolament dwar l-Aċċess għas-Suq" (MAR), li jirregola l-importazzjonijiet ta' prodotti li joriġinaw f'ċerti pajjiżi AKP. Dan l-istrument temporanju jipprovdi aċċess bla dazju u bla kwoti għas-suq tal-UE għal prodotti li joriġinaw minn pajjiżi AKP li mhumiex PAŻ qabel il-konklużjoni u l-applikazzjoni ta' Ftehimiet ta' Sħubija Ekonomika kompatibbli mad-WTO rispettivi (EPAs) qabel l-1 ta' Ottubru 2016. L-Anness I tal-MAR bħalissa jinkludi 27 pajjiż.

L-għan tal-eżerċizzju ta' kodifikazzjoni huwa li tiġi żgurata t-trasparenza, iċ-ċarezza u s-simplifikazzjoni tal-leġiżlazzjoni tal-UE wara li l-istrument legali oriġinali ġie emendat diversi drabi. Mill-adozzjoni tiegħu fl-2007, ir-Regolament dwar l-Aċċess għas-Suq diġà ġie emendat disa' darbiet, inkluż l-eżerċizzju ta' allinjament ta' wara Lisbona fil-qafas tat-"Trade Omnibus II" u regolamenti sussegwenti delegati mill-Kummissjoni (ara l-Annex III tal-proposta tal-Kummissjoni). Għalhekk, il-kodifikazzjoni hija essenzjali sabiex jiġu żgurati ċ-ċarezza u l-leġibilità tar-regolament.

Il-metodu ta' riformulazzjoni jintuża minħabba l-ħtieġa ta' ċertu tibdil sostantiv limitat fl-Artikolu 3(4) u l-Artikolu 22 eżistenti.

L-emenda proposta tal- Artikolu 3(4) tagħti lill-Kummissjoni s-setgħa li tadotta atti ddelegati sabiex tistabbilixxi r-reġim applikabbli għal prodotti li joriġinaw fl-Afrika t'Isfel ġaladarba d-dispożizzjonijiet rilevanti tal-Ftehim dwar il-Kummerċ, l-Iżvilupp u l-Kooperazzjoni (TDCA) bejn l-UE u l-Afrika t'Isfel ġew superati mid-dispożizzjonijiet rilevanti tal-EPA bejn l-UE u l-Komunità għall-Iżvilupp tan-Nofsinhar tal-Afrika (SADC), konkluż fil-15 ta' Lulju 2014.

Fl-Artikolu 22, referenza superfluwa għall- Artikolu 134 tat-Trattat li jistabbilixxi l-Komunità Ewropea għandha titħassar, peress li dan l-Artikolu ġie abrogat mit-Trattat ta' Lisbona.

Wara l-kunsiderazzjonijiet imsemmija hawn fuq u fid-dawl tal-opinjoni favorevoli tal-Kumitat għall-Affarijiet Legali, li tikkonferma li l-proposta hija sempliċi kodifikazzjoni u tillimita ruħha għall-emendi sostantivi identifikati, ir-Rapporteur jirrakkomanda l-adozzjoni tal-proposta tal-Kummissjoni mingħajr emendi.

ANNESS: ITTRA TAL-KUMITAT GĦALL-AFFARIJIET LEGALI

Ref. D(2015)40901

Bernd Lange

President, Kumitat għall-Kummerċ Internazzjonali

ASP 12G205

Brussell

Suġġett: Proposta għal regolament tal-Parlament Ewropew u tal-Kunsill li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati AKP previsti fi ftehimiet li jistabbilixxu, jew li jwasslu biex jiġu stabbiliti, Ftehimiet ta' Sħubija Ekonomika (riformulazzjoni)

COM(2015)0282 – C8-0154/2015 – 2015/0128(COD) )

Sur President,

Il-Kumitat għall-Affarijiet Legali eżamina l-proposta msemmija hawn fuq, skont l-Artikolu 104 dwar ir-Tfassil mill-Ġdid (riformulazzjoni), kif introdott fir-Regoli ta' Proċedura tal-Parlament.

Il-paragrafu 3 ta' dak l-Artikolu jgħid hekk:

"Jekk il-kumitat responsabbli għall-affarijiet legali jqis li l-proposta ma tinkludi l-ebda bidla sostanzjali ħlief għal dawk il-bidliet identifikati bħala tali fil-proposta, huwa għandu jgħarraf lill-kumitat responsabbli b'dan.

F'dan il-każ, minbarra l-kundizzjonijiet stabbiliti fl-Artikoli 169 u 170, l-emendi għandhom ikunu ammissibbli mill-kumitat responsabbli mis-suġġett jekk jikkonċernaw dawk il-partijiet tal-proposta li jinkludu tibdiliet sostanzjali.

Madankollu, jekk f'konformità mal-punt 8 tal-Ftehim Interistituzzjonali l-kumitat responsabbli jkollu l-ħsieb ukoll li jippreżenta emendi għall-partijiet kodifikati tal-proposta, huwa għandu jinnotifika minnufih il-ħsieb tiegħu lill-Kunsill u lill-Kummissjoni, u din tal-aħħar għandha tgħarraf lill-kumitat, qabel il-vot skont l-Artikolu 58, bil-pożizzjoni tagħha fir-rigward tal-emendi kif ukoll dwar jekk għandhiex il-ħsieb li tirtira l-proposta ta' tfassil mill-ġdid."

B'segwitu għall-opinjoni tas-Servizz Legali, li r-rappreżentanti tiegħu pparteċipaw fil-laqgħat tal-Grupp ta' Ħidma Konsultattiv li eżamina l-proposta għal riformulazzjoni, u f'konformità mar-rakkomandazzjonijiet tar-rapporteur għal opinjoni, il-Kumitat għall-Affarijiet Legali jqis li l-proposta inkwistjoni ma tinkludi l-ebda tibdil sostantiv ħlief dak identifikat bħala tali fil-proposta u li, f'dak li jikkonċerna l-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil, il-proposta tillimita ruħha għal kodifikazzjoni pura u sempliċi tat-testi eżistenti, mingħajr tibdil fis-sustanza tagħhom.

Bħala konklużjoni, wara l-laqgħa tiegħu tal-15 ta' Settembru 2015, il-Kumitat għall-Affarijiet Legali ddeċieda unanimament, bi 22 vot favur[2], li jirrakkomanda li l-Kumitat għall-Kummerċ Internazzjonali, bħala l-kumitat responsabbli, jipproċedi bl-eżami tal-proposta msemmija hawn fuq f'konformità mal-Artikolu 104.

Dejjem tiegħek,

Pavel Svoboda

Mehmuża: Opinjoni tal-Grupp ta' Ħidma Konsultattiv

ANNESS: OPINJONI TAL-GRUPP TA' ĦIDMA KONSULTATTIV TAS-SERVIZZI LEGALI TAL-PARLAMENT EWROPEW, TAL-KUNSILL U TAL-KUMMISSJONI

Brussell, 10 ta' Awissu 2015

OPINJONI

  GĦALL-ATTENZJONI  TAL-PARLAMENT EWROPEW

    TAL-KUNSILL

    TAL-KUMMISSJONI

Proposta għal regolament tal-Parlament Ewropew u tal-Kunsill li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati AKP previsti fi ftehimiet li jistabbilixxu, jew li jwasslu biex jiġu stabbiliti, Ftehimiet ta' Sħubija Ekonomika (riformulazzjoni)

COM(2015)0282 tal-10.6.2015 – 2015/0128(COD)

Wara li kkunsidra l-Ftehim Interistituzzjonali tat-28 ta' Novembru 2001 dwar użu aktar strutturat tat-teknika ta' riformulazzjoni għal atti legali, u b'mod partikolari għall-punt 9 tiegħu, il-Grupp ta' Ħidma Konsultattiv magħmul mis-servizzi legali rispettivi tal-Parlament Ewropew, tal-Kunsill u tal-Kummissjoni ltaqa' fil-25 ta' Ġunju 2015 biex jeżamina, fost affarijiet oħra, il-proposta msemmija aktar 'il quddiem, imressqa mill-Kummissjoni.

F'dik il-laqgħa[3], eżami tal-proposta għal Regolament tal-Parlament Ewropew u tal-Kunsill li jfassal mill-ġdid ir-Regolament tal-Kunsill(KE) Nru 1528/2007 tal-20 ta' Diċembru 2007 li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati AKP previsti fi ftehimiet li jistabbilixxu, jew li jwasslu biex jiġu stabbiliti, Ftehimiet ta' Sħubija Ekonomika wasslet biex il-Grupp ta' Ħidma Konsultattiv stabbilixxa, bi qbil komuni, dan li ġej:

1. Fl-Artikolu 5, il-kelma "eżami" u n-numru tal-Artikolu "21(5)", li t-tnejn ġew immarkati bi vleġeġ ta' adattament, kellhom jiġu mmarkati permezz ta' tipa ta' kulur griż li ġeneralment tintuża sabiex jiġu identifikati bidliet sostantivi fi proposti riformulati.

2. Fit-titolu tal-Artikolu 7, il-kelmiet "kwoti u tneħħija eventwali ta' dazji" għandha titneħħa.

3. Fit-titolu tal-Artikolu 8, il-kelma "kwoti" għandha titneħħa.

4. Fl-Artikolu 21(1) ir-referenza magħmula għall-"Artikolu 4(1) tar-Regolament tal-Kunsill (KE) Nru 260/2009" għandha tiġi adattata biex tinqara bħala referenza għall-"Artikolu 3(1) tar-Regolament (UE) 2015/478 tal-Parlament Ewropew u tal-Kunsill".

Konsegwentement, l-eżami tal-proposta ppermetta lill-Grupp ta' Ħidma Konsultattiv jikkonkludi, mingħajr nuqqas ta' qbil, li l-proposta ma tinkludi l-ebda tibdil sostantiv ħlief dak identifikat bħala tali. Il-Grupp ta' Ħidma kkonkluda wkoll, fir-rigward tal-kodifikazzjoni tad-dispożizzjonijiet mhux mibdula tal-atti preċedenti flimkien ma' dan it-tibdil sostantiv, li l-proposta tillimita ruħha għal kodifikazzjoni pura u sempliċi tal-atti legali eżistenti, mingħajr ebda tibdil sostanzjali.

F. DREXLER      H. LEGAL      L. ROMERO REQUENA

Ġurikonsult      Ġurikonsult      Direttur Ġenerali

PROĊEDURA TAL-KUMITAT RESPONSABBLI