Dokument ta' sessjoni

A8-0342/2016

17.11.2016

*

RAPPORT

dwar l-abbozz ta' deċiżjoni ta' Implimentazzjoni tal-Kunsill li tapprova l-konklużjoni mill-Uffiċċju Ewropew tal-Pulizija (Europol) tal-Ftehim dwar Kooperazzjoni Operattiva u Strateġika bejn l-Ukrajna u l-Europol

(10345/2016 – C8-0267/2016 – 2016/0811(CNS) )

Kumitat għal-Libertajiet Ċivili, il-Ġustizzja u l-Intern

Rapporteur: Mariya Gabriel

PR_CNS_LegAct_app

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

NOTA SPJEGATTIVA  7

PROĊEDURA TAL-KUMITAT RESPONSABBLI  9

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI  10

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar l-abbozz ta' deċiżjoni ta' Implimentazzjoni tal-Kunsill li tapprova l-konklużjoni mill-Uffiċċju Ewropew tal-Pulizija (Europol) tal-Ftehim dwar Kooperazzjoni Operattiva u Strateġika bejn l-Ukrajna u l-Europol

(10345/2016 – C8-0267/2016 – 2016/0811(CNS) )

(Proċedura leġiżlattiva speċjali – konsultazzjoni)

Il-Parlament Ewropew,

–  wara li kkunsidra l-abbozz tal-Kunsill (10345/2016),

–  wara li kkunsidra l-Artikolu 39(1) tat-Trattat dwar l-Unjoni Ewropea, kif emendat bit-Trattat ta' Amsterdam, u l-Artikolu 9 tal-Protokoll Nru 36 dwar id-dispożizzjonijiet tranżitorji, skont liema artikoli ġie kkonsultat mill-Kunsill (C8-0267/2016),

–  wara li kkunsidra d-Deċiżjoni tal-Kunsill 2009/371/ĠAI tas-6 ta' April 2009 li tistabbilixxi l-Uffiċċju Ewropew tal-Pulizija (Europol)[1], b'mod partikolari l-Artikolu 23(2) tagħha,

–  wara li kkunsidra d-Deċiżjoni tal-Kunsill 2009/934/ĠAI tat-30 ta' Novembru 2009 li tadotta r-regoli implimentattivi li jirregolaw ir-relazzjonijiet tal-Europol mal-imsieħba, inkluż l-iskambju ta' data personali u informazzjoni klassifikata[2], b'mod partikolari l-Artikoli 5 u 6 tagħha,

–  wara li kkunsidra d-Deċiżjoni tal-Kunsill 2009/935/ĠAI tat-30 ta' Novembru 2009 li tiddetermina l-lista ta' Stati terzi u organizzazzjonijiet li magħhom l-Europol għandu jikkonkludi ftehimiet[3],

–  wara li kkunsidra l-Artikoli 59 tar-Regoli ta' Proċedura tiegħu,

–  wara li kkunsidra r-rapport tal-Kumitat għal-Libertajiet Ċivili, il-Ġustizzja u l-Intern ( A8-0342/2016 ),

1.  Japprova l-abbozz tal-Kunsill;

2.  Jistieden lill-Kunsill biex jinfurmah jekk ikollu l-ħsieb li jitbiegħed mit-test approvat mill-Parlament;

3.  Jitlob lill-Kunsill biex jerġa' jikkonsultah jekk ikollu l-ħsieb li jemenda t-test approvat mill-Parlament b'mod sustanzjali;

4.  Jitlob lill-Kummissjoni tivvaluta, wara d-data ta' applikazzjoni tar-Regolament il-ġdid dwar l-Europol[4], id-dispożizzjonijiet tal-ftehim ta' kooperazzjoni, u jitlobha wkoll tinforma lill-Parlament u lill-Kunsill dwar l-eżitu ta' din il-valutazzjoni u, jekk ikun xieraq, tressaq rakkomandazzjoni għal awtorizzazzjoni li jinfetaħ rinegozjar internazzjonali tal-ftehim;

5.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

NOTA SPJEGATTIVA

Il-proposta

Skont l-Artikolu 23(2) tad-Deċiżjoni tal-Kunsill dwar l-Europol attwali (id-Deċiżjoni 2009/371/ĠAI), huwa kompitu tal-Kunsill li japprova l-konklużjoni ta' ftehimiet ta' kooperazzjoni internazzjonali ma' stati terzi jew organizzazzjonijiet internazzjonali, wara li jkun ikkonsulta lill-Parlament Ewropew. Tali ftehimiet jistgħu jirrigwardaw l-iskambju ta' informazzjoni operattiva, strateġika, teknika jew klassifikata. Il-ftehim ta' kooperazzjoni operattiva jinkludi wkoll l-iskambju ta' data personali.

Din il-proposta tikkonċerna l-approvazzjoni proposta ta' ftehim strateġiku u operattiv bejn l-Europol u l-Ukrajna, li jipprevedi l-iskambju ta' informazzjoni, inkluża d-data personali. Tali informazzjoni tista' tkun fil-qasam ta' għarfien speċjalizzat, rapporti dwar is-sitwazzjoni ġenerali, riżultati ta' analiżi strateġika, tagħrif dwar proċeduri ta' investigazzjoni kriminali, tagħrif dwar metodi ta' prevenzjoni tal-kriminalità, il-parteċipazzjoni fl-attivitajiet ta' taħriġ, u l-appoġġ f'investigazzjonijiet kriminali individwali.

Il-proċedura

Kif spjegat hawn fuq, il-konklużjoni ta' dan il-ftehim internazzjonali l-ġdid hija proposta fuq il-bażi tad-Deċiżjoni tal-Kunsill li tistabbilixxi l-Europol (Deċiżjoni 2009/371/ĠAI).

Fil-11 ta' Mejju 2016 daħal fis-seħħ Regolament Ewropew ġdid (Regolament (UE) 2016/794), li fih ġew modifikati b'mod sinifikanti l-proċedura għall-konklużjoni tal-ftehimiet internazzjonali u d-dispożizzjonijiet u s-salvagwardji rilevanti għall-protezzjoni tad-data personali taċ-ċittadini Ewropej, wara d-dħul fis-seħħ tat-Trattat ta' Lisbona. Madankollu, id-data ta' applikazzjoni ta' dan ir-Regolament il-ġdid dwar l-Europol hija l-1 ta' Mejju 2017 u sa dik id-data se jibqgħu japplikaw id-dispożizzjonijiet eżistenti fid-Deċiżjoni tal-Kunisll dwar l-Europol.

Għaldaqstant, ir-rapporteur tixtieq tiġbed l-attenzjoni għall-fatt li fl-Artikolu 25(4) tar-Regolament dwar l-Europol hemm stabbilit li l-Kummissjoni għandha tivvaluta d-dispożizzjonijiet, b'mod partikolari dawk li jikkonċernaw il-protezzjoni tad-data, li jinsabu fil-ftehimiet ta' kooperazzjoni operattiva kollha li ġew konklużi qabel l-1 ta' Mejju 2017, u li l-Kummissjoni għandha tinforma lill-Parlament dwar l-eżitu ta' dik il-valutazzjoni, u tista', jekk ikun adatt, tibda proċedura għan-negozjar mill-ġdid ta' dawn il-ftehimiet. Ir-rapporteur tinsisti fuq l-obbligu tal-Kummissjoni li tinforma fi żmien xieraq lill-Parlament Ewropew f'dan ir-rigward. Barra minn hekk, ir-rapporteur tixtieq tisħaq ukoll fuq il-fatt li l-Awtorità ta' Kontroll Komuni tal-Europol, li tikkonsisti mill-awtoritajiet nazzjonali tal-protezzjoni tad-data speċjalizzati fl-infurzar tal-liġi, tat opinjoni pożittiva għall-konklużjonijiet ta' dan il-ftehim ta' kooperazzjoni, filwaqt li qieset il-livell ta' protezzjoni tad-data fl-Ukrajna.

Il-kontenut

Jeżistu ħtiġijiet operattivi ċari li l-Europol għandu jintensifika l-kooperazzjoni operattiva tiegħu mal-Ukrajna. L-Ukrajna hija sieħeb ewlieni tal-Unjoni Ewropea fil-qafas tas-Sħubija tal-Lvant, u s-sigurtà u l-ġlieda kontra l-kriminalità jikkostitwixxu n-neċessitajiet bażiċi sabiex jintlaħqu bis-sħiħ l-għanijiet ta' din is-sħubija.

Skont l-Europol, l-Ukrajna qed issir dejjem aktar importanti fil-ġlieda kontra l-kriminalità organizzata, b'mod aktar speċifiku kontra reati relatati mad-drogi u reati ta' natura ekonomika, it-traffikar tal-bnedmin u l-kuntrabandu, kif ukoll il-gruppi tal-kriminalità organizzata mobbli (ambulanti). L-iskambju ta' informazzjoni jippermetti lill-UE, lill-Istati Membri u lill-Ukrajna jipprevjenu u jiġġieldu kontra l-kriminalità organizzata, it-terroriżmu u forom oħra ta' kriminalità internazzjonali b'mod aktar effikaċi. Apparti l-iskambju ta' informazzjoni, il-ftehim jiftaħ ukoll opportunitajiet bħalma huma l-attivitajiet ta' taħriġ u prevenzjoni tal-kriminalità. Il-konklużjoni ta' dan il-ftehim ta' kooperazzjoni huwa pass konkret u importanti ħafna biex l-Ukrajna issir sieħeb ewlieni fil-ġlieda kontra l-kriminalità organizzata. Ir-rapporteur tenfasizza wkoll li l-iffirmar ta' dan il-ftehim ta' kooperazzjoni strateġika u operattiva għandu jħeġġeġ koordinament ulterjuri bejn l-istrateġiji u l-pjanijiet ta' azzjoni f'oqsma differenti ta' kriminalità tal-UE u l-Istati Membri tagħha minn naħa waħda, u l-Ukrajna min-naħa l-oħra. Barra minn hekk, il-kooperazzjoni msaħħa fil-qasam tas-sigurtà bejn l-UE, l-Istati Membri tagħha u l-Ukrajna hija konsistenti u komplementari mar-rikonċiljazzjoni li għaddejja f'oqsma oħra bħalma hija l-mobbiltà taċ-ċittadini Ewropej u Ukrajni.

Għaldaqstant, ir-rapporteur tappoġġa l-konklużjoni ta' dan il-ftehim ta' kooperazzjoni strateġika u operattiva mal-Ukrajna, peress li dan jgħin u jsaħħaħ il-ġlieda kontra l-kriminalità organizzata, li minnha nnifisha hija internazzjonali, u jikkontribwixxi għat-tisħiħ tal-kooperazzjoni internazzjonali fil-qasam tat-traffikar tal-bnedmin u kwistjonijiet kriminali rilevanti oħra.

PROĊEDURA TAL-KUMITAT RESPONSABBLI

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI

It-tifsira tas-simboli użati:

+  :  favur

-  :  kontra

0  :  astensjoni