Dokument ta' sessjoni

A8-0164/2017

19.4.2017

*

RAPPORT

dwar l-abbozz ta' deċiżjoni ta' implimentazzjoni tal-Kunsill li tapprova l-konklużjoni mill-Uffiċċju Ewropew tal-Pulizija (Europol) tal-Ftehim dwar Kooperazzjoni Operattiva u Strateġika bejn ir-Renju tad-Danimarka u l-Europol

(07281/2017 – C8-0120/2017 – 2017/0803(CNS) )

Kumitat għal-Libertajiet Ċivili, il-Ġustizzja u l-Intern

Rapporteur: Agustín Díaz de Mera García Consuegra

PR_CNS_LegAct_app

WERREJ

Paġna

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW  5

NOTA SPJEGATTIVA  7

PROĊEDURA TAL-KUMITAT RESPONSABBLI  9

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI  10

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar l-abbozz ta' deċiżjoni ta' implimentazzjoni tal-Kunsill li tapprova l-konklużjoni mill-Uffiċċju Ewropew tal-Pulizija (Europol) tal-Ftehim dwar Kooperazzjoni Operattiva u Strateġika bejn ir-Renju tad-Danimarka u l-Europol

(07281/2017 – C8-0120/2017 – 2017/0803(CNS) )

(Konsultazzjoni)

Il-Parlament Ewropew,

––  wara li kkunsidra l-abbozz tal-Kunsill (07281/2017),

–  wara li kkunsidra l-Artikolu 39(1) tat-Trattat dwar l-Unjoni Ewropea, kif emendat mit-Trattat ta' Amsterdam, u l-Artikolu 9 tal-Protokoll Nru 36 dwar id-Dispożizzjonijiet Transitorji, skont liema artikoli l-Parlament ġie kkonsultat mill-Kunsill (C8-0120/2017),

–  wara li kkunsidra d-Deċiżjoni tal-Kunsill 2009/371/ĠAI tas-6 ta' April 2009 li tistabbilixxi l-Uffiċċju Ewropew tal-Pulizija (Europol)[1], u b'mod partikolari l-Artikolu 23(2) tagħha,

–  wara li kkunsidra d-Deċiżjoni tal-Kunsill 2009/935/ĠAI tat-30 ta' Novembru 2009 li tiddetermina l-lista ta' Stati terzi u organizzazzjonijiet li magħhom l-Europol għandu jikkonkludi ftehimiet[2], kif emendata bid-Deċiżjoni ta' Implimentazzjoni tal-Kunsill (UE) 2017/290[3],

–  wara li kkunsidra d-Deċiżjoni tal-Kunsill 2009/934/ĠAI tat-30 ta' Novembru 2009 li tadotta r-regoli implimentattivi li jirregolaw ir-relazzjonijiet tal-Europol mal-imsieħba, inkluż l-iskambju ta' data personali u informazzjoni kklassifikata[4], u b'mod partikolari l-Artikoli 5 u 6 tagħha,

–  wara li kkunsidra d-Dikjarazzjoni mill-President tal-Kunsill Ewropew, mill-President tal-Kummissjoni u mill-Prim Ministru tad-Danimarka tal-15 ta' Diċembru 2016, li enfasizzat il-ħtiġijiet operattivi, iżda wkoll in-natura eċċezzjonali u transitorja, tal-arranġament previst bejn l-Europol u d-Danimarka,

–  wara li kkunsidra d-Dikjarazzjoni msemmija hawn fuq, li enfasizzat li l-arranġament previst huwa kundizzjonali fuq is-sħubija kontinwa tad-Danimarka fl-Unjoni u fiż-żona ta' Schengen, fuq l-obbligu tad-Danimarka li sal-1 ta' Mejju 2017 timplimenta b'mod sħiħ fid-dritt Daniż id-Direttiva (UE) 2016/680/UE[5] dwar il-protezzjoni tad-data fi kwistjonijiet marbuta mal-pulizija, u fuq il-qbil tad-Danimarka dwar l-applikazzjoni tal-ġurisdizzjoni tal-Qorti tal-Ġustizzja tal-Unjoni Ewropea u tal-kompetenza tal-Kontrollur Ewropew għall-Protezzjoni tad-Data,

–  wara li kkunsidra l-Protokoll Nru 22 tat-Trattat dwar il-Funzjonament tal-Unjoni Ewropea,

–  wara li kkunsidra l-eżitu tar-referendum Daniż tat-3 ta' Diċembru 2015 b'rabta mal-Protokoll Nru 22 tat-Trattat dwar il-Funzjonament tal-Unjoni Ewropea,

–  wara li kkunsidra r-riżoluzzjoni leġiżlattiva tiegħu tal-14 ta' Frar 2017 dwar l-abbozz ta' deċiżjoni ta' implimentazzjoni tal-Kunsill li temenda d-Deċiżjoni 2009/935/ĠAI fir-rigward tal-lista ta' Stati terzi u organizzazzjonijiet li magħhom l-Europol għandu jikkonkludi ftehimiet[6] u speċifikament it-talba fil-paragrafu 4 tagħha li l-arranġament futur bejn l-Europol u r-Renju tad-Danimarka jkollu data ta’ skadenza ta’ ħames snin wara d-data tad-dħul fis-seħħ, sabiex tiġi żgurata n-natura transitorja tiegħu bil-ħsieb li jsir arranġament aktar permanenti,

–  wara li kkunsidra l-Artikolu 78(c) tar-Regoli ta' Proċedura tiegħu,

–  wara li kkunsidra r-rapport tal-Kumitat għal-Libertajiet Ċivili, il-Ġustizzja u l-Intern ( A8-0164/2017 ),

1.  Japprova l-abbozz tal-Kunsill;

2.  Jistieden lill-Kunsill biex jinfurmah jekk ikollu l-ħsieb li jitbiegħed mit-test approvat mill-Parlament;

3.  Jitlob lill-Kunsill jerġa' jikkonsultah jekk ikollu l-ħsieb li jemenda t-test approvat mill-Parlament b'mod sostanzjali;

4.  Jistieden lill-Kunsill u lill-Kummissjoni biex jiżguraw li, bħala parti mill-valutazzjoni li għandha ssir skont l-Artikolu 25 tal-Ftehim dwar Kooperazzjoni Operattiva u Strateġika bejn ir-Renju tad-Danimarka u l-Europol, il-Parlament Ewropew jiġi informat u kkonsultat regolarment, b'mod partikolari permezz tal-Grupp ta' Skrutinju Parlamentari Konġunt għall-Europol li għandu jiġi stabbilit skont l-Artikolu 51(1) tar-Regolament (UE) 2016/794[7];

5.  Jistieden lill-partijiet kollha involuti biex jeżawrixxu l-possibilitajiet kollha fid-dritt primarju u sekondarju ħalli mill-ġdid joffru lid-Danimarka sħubija sħiħa fl-Europol;

6.  Jagħti istruzzjonijiet lill-President tiegħu biex jgħaddi l-pożizzjoni tal-Parlament lill-Kunsill, lill-Kummissjoni u lill-Europol.

NOTA SPJEGATTIVA

Fil-preżent id-Danimarka tipparteċipa b'mod sħiħ fl-Europol, li jopera taħt id-Deċiżjoni eżistenti tal-Kunsill (2009/371/ĠAI). Skont it-termini tal-Protokoll Nru 22 għat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea, id-Danimarka ma setgħetx tieħu sehem fl-adozzjoni ta' dan ir-Regolament il-ġdid tal-Europol u mhijiex soġġetta għall-applikazzjoni tiegħu. Ir-Regolament il-ġdid tal-Europol se jibda japplika mill-1 ta' Mejju 2017, meta d-Deċiżjoni eżistenti tal-Kunsill dwar l-Europol se tiġi rrevokata awtomatikament. Dan ifisser li, mill-1 ta' Mejju 2017, id-Danimarka mhux se tibqa' tkun parti mill-Europol u mhux se tkun tista' tipparteċipa fl-attivitajiet tiegħu, tikkonsulta d-databażijiet tiegħu jew ikollha skambji ta' data miegħu.

Fit-3 ta' Diċembru 2015, id-Danimarka organizzat referendum fuq il-konverżjoni tan-nonparteċipazzjoni inflessibbli tagħha tal-lum fi kwistjonijiet relatati mal-Ġustizzja u l-Affarijiet Interni fil-Protokoll Nru 22 f'parteċipazzjoni selettiva aktar flessibbli, ta' parteċipazzjoni, simili għal dik li għandhom bħalissa l-Irlanda u r-Renju Unit. Madankollu, l-eżitu tar-referendum kien negattiv (53,1 % vvotaw "Le", kontra 46,9 % "Iva").

Wara l-eżitu negattiv ta' dan ir-referendum, saru diskussjonijiet informali bejn l-awtoritajiet Daniżi u l-Istituzzjonijiet Ewropej biex ifittxu modi li bihom id-Danimarka tkun assoċjata kemm jista' jkun mill-qrib mal-Europol.

Dawn id-diskussjonijiet informali wasslu għal dikjarazzjoni konġunta fil-15 ta' Diċembru 2016 mill-President tal-Kunsill Ewropew, il-President tal-Kummissjoni Ewropea u l-Prim Ministru tad-Danimarka. F'din id-dikjarazzjoni konġunta huwa propost li d-Danimarka, sabiex timinimizza l-effetti negattivi tat-tluq tagħha mill-Europol, tkun assoċjata miegħu fil-forma ta' ftehim ta' kooperazzjoni operattiva. Bil-għan li jiġi evitat kwalunkwe nuqqas operattiv, dan il-ftehim ta' kooperazzjoni jkun irid jiġi konkluż bejn l-Europol u d-Danimarka qabel l-1 ta' Mejju 2017.

Ir-rotta legali għal dan tkun tinvolvi żewġ proċeduri leġiżlattivi konsekuttivi, fejn l-ewwel nett id-Danimarka se titqiegħed fil-lista ta' pajjiżi terzi li magħhom l-Europol għandu jikkonkludi ftehimiet ta' kooperazzjoni internazzjonali, u mbagħad jiġi konkluż il-ftehim ta' kooperazzjoni operattiva bejn l-Europol u d-Danimarka. Il-Parlament Ewropew għandu jiġi kkonsultat dwar iż-żewġ proposti.

Fl-14 ta' Frar 2017, il-Parlament Ewropew adotta b'maġġoranza ferm kbira r-rakkomandazzjoni biex tiġi emendata d-Deċiżjoni 2009/935/ĠAI sabiex id-Danimarka titqiegħed fuq il-lista ta' Stati terzi u organizzazzjonijiet li magħhom l-Europol għandu jikkonkludi ftehimiet ta' kooperazzjoni internazzjonali.

Dan ir-rapport jikkonċerna l-konsultazzjoni tal-Parlament dwar l-abbozz ta' ftehim ta' kooperazzjoni operattiva bejn l-Europol u d-Danimarka,

Ir-rapporteur jirrakkomanda l-approvazzjoni tal-ftehim propost. Il-ġlieda kontra l-kriminalità transfruntiera serja u organizzata u t-terroriżmu internazzjonali fl-Unjoni tirrikjedi kooperazzjoni mill-qrib u skambju ta' data bejn l-Istati Membri tagħha. Tluq f'daqqa tad-Danimarka mill-Europol, mingħajr reġim transitorju li jwassal bla intoppi f'xi forma ta' assoċjazzjoni bejn id-Danimarka u l-Europol, jista' jwassal għal lakuni operattivi u jnaqqas tal-kapaċità tal-UE li tiġġieled b'mod effikaċi kontra l-kriminalità organizzata u t-terroriżmu. Għaldaqstant huwa importanti li jiġi żgurat livell suffiċjenti ta' kooperazzjoni operattiva bejn id-Danimarka u l-Europol, inkluż l-iskambju ta' data personali rilevanti, u ta' informazzjoni klassifikata, soġġetti għal salvagwardji xierqa u għall-protezzjoni tad-data.

Fl-istess ħin, għandu jkun ċar li tali ftehim ta' kooperazzjoni mad-Danimarka għandu jkun ta' natura eċċezzjonali u ma jista' bl-ebda mod ikun ekwivalenti għal sħubija sħiħa fl-Europol. Dan issemma b'mod ċar ukoll fil-pożizzjoni tal-Parlament Ewropew, adottata fl-14 ta' Frar 2017.

Ir-rapporteur jinnota b'sodisfazzjon li dak li ntqal hawn fuq ġie rifless debitament fl-abbozz ta' ftehim ta' kooperazzjoni, kif ukoll il-kundizzjonijiet stabbiliti fid-dikjarazzjoni konġunta tal-15 ta' Diċembru 2016, b'mod partikolari li l-arranġament propost ikun jiddependi mill-isuktar tas-sħubija tad-Danimarka fiż-żona Schengen, l-obbligu tad-Danimarka li sal-1 ta' Mejju 2017 tkun implimentat id-Direttiva dwar il-Protezzjoni tad-Data (Direttiva (UE) 2016/680) b'mod sħiħ fid-dritt Daniż, u l-qbil tad-Danimarka dwar l-applikazzjoni tal-ġurisdizzjoni tal-Qorti Ewropea tal-Ġustizzja u l-kompetenza tal-Kontrollur Ewropew għall-Protezzjoni tad-Data. Barra minn hekk, huwa jilqa' l-fatt li d-Danimarka se tkompli tikkontribwixxi b'mod xieraq fil-baġit tal-Europol.

PROĊEDURA TAL-KUMITAT RESPONSABBLI

VOTAZZJONI FINALI B'SEJĦA TAL-ISMIJIET

FIL-KUMITAT RESPONSABBLI

Tifsira tas-simboli użati:

+  :  favur

-  :  kontra

0  :  astensjoni